الشاعر مشعل بن محماس الحارثي ،،

[داعي الشوق]

الحزن كتفني وعذبني الهم=والحلم من دوني تقطع سرابه

ماذقت من كف الزمن غير علقم=لو ذاقه الرجال شقق ثيابه

احيان اجامل من نشد واتكلم= واحيان لاوالله ولا ربع جابه

واليوم مزي ٍ من عناي اتنسم=كني صويبٍ معطبته الاصابه

ماكني الا فرخ حرٍ معلم=هدوه للصيده يبون العشا به

ويوم انتعض شلعبها لين غيم=يبغى يعلقها بصدر السحابه

وحول بعد ماخرمص الليل واظلم=ثم هب عاصوف الشمال وسرابه

ومن قو ما يكفخ جناحه تحطم=ومن ردي حظه طاح في وسط غابه

عجزت عن رحلة شقاي اتيمم=ياويل من هذي بداية شبابه

بالله انا بنشدك يا وارد الجم=وشلون تفلت من يدين العصابه

اللي على خطلان الايدي تحكم =ناسٍ مراجلها الحسد والنهابه

عن قربهم تمنعني طبوع وشيم =أموت مادورت منهم حبابه

ادور اللي لانخيته تحيزم =وله مع اهل الطيب قدر ومهابه

البارحه وهجوس فكري ترازم =مثل الضوامي فوق جال اللهابه

اليا قلط هجسٍ علي هجس سلم =لين امتلا صدري وضاقت رحابه

مثايل ٍ من دونها غبة اليم =منوة خلاوي ٍ يجر الربابه

ياكيف ببديها ويا كيف بختم =واخاف علم ٍ ماحسبنا حسابه

ومن كثر ما قامت علي تزاحم =الصدر فجت من عراويه بابه

ارخت رسنها كنها تقولي قم =السيف مايطعن وهو في جرابه

انص الذي للطيب دوم يتغانم =ماللحراب الا رجال الحرابه

وسميت بالمعبود رب الملا ثم =دكيت للطرس القلم وا عذابه

المن ابشكي حالتي واتقدم =وانا عزيزٍ كسر الوقت نابه

ثم قمت اجمع واطرح الزود واقسم =واوقف التاريخ واقرا كتابه

وافل شرطاني على البال والم =اسما رجالٍ ذكرهم ينبدابه

قارنتهم بالحال واخترت منهم =صميدعٍ كلن عرفه وحكابه

وان قيل لي وشلون تفتي و تحكم=برد من بين العيون الاجابه

من هو الغلام اللي طوا البيد من هم=ماله خوي الا الخلا والذيابه

من ديرته حزم زهابه وعّزم=يسوق رجله والمراجل زهابه

من هو الذي كان بدوي بس يحلم=واصبح حقيقه حلمه الي هقابه

من هو الذي قدم المليك المعظم =هز المنابر بالشعر والخطابه

من هو الذي بالنصر راهن وصمم=يوم العراقي جاك يشعب ركابه

شاعر وطن شاعر وغى فذ ملهم=ماله شبيه ولا له احدٍ يجابه

ماضنتي ينسى خلف كل مسلم =وانا اشهد ان ذكره يشيد ترابه

من شان ذي جنبت كل البشر يم = بيتك يابن هذال وازبن جنابه

ولاجيتك بوجهي فقط لجل تعلم،،،انا دخلت البيت بوجيه لابه

عنهم نصيتك ياخلف واتقدم =ربعي وانا مرسولهم بالنيابه

خلف خلف جيتك من البعد وازهم =داخل عليك بوجيه ربعك عتابه

خلف خلف لا ياخلف من توسم =فيه الزمان وغربله وانتحابه

افزع لمنهو من عنا الوقت منسم =رده حياه وراح عمره هبابه

في ديرةٍ ماهي بتاوي وترحم =ماشاف فيها الا الشقا والكآبه

عندك وعندك ياخلف ينثر الدم =انت الذي تقدر تفك النشابه

والله ماجيتك وانا بتندم = زبنت انا ما عاد فيها طلابه


( الشاعر مشعل بن محماس الحارثي )