يامل قلب تقل في داخله حره

[عبدالله السويلم]

يامل قلب(ن) تقل في داخله حـــرّه= بسبابِ دنياً على ربي مشاكيها
لامن صفت مرة(ن) شانت لها مره= تقبل وتقفي ولادري وش تواليها
مدري على ويشِ بعض الناس مغتره= ماهوبِ من زودِ مار ابليس مغويها
ليته مثل ماكفا خيره كفا شره = يشيلها كلّهـا والا يخـليهـا
في الدار ماشفت له بصمه ولاجره=لكنِ في غيرها رجليه محفيها
قلته وانا ولد حر(ن) من بطن حره=مانيب لاخايف(ن) منها والا ارجيها
الله هو اللي يسر العبد ويضره= ماغيره النفس يحييها ويفنيها
والرزق ماهوب عند الناس تضطره=امدبر الرزق يمنعها ويعطيها