من فوق ضلع طويق والشمس غايبه

[عبدالمحسن الرحمه]

‏‏‏‏من فوق ضلع طويق والشمس غايبه/
هليت دمع العين والنفس طايبه/
طابت من اللي خان ذكراي وابتعد/
حسيبه الله يوم قفت ركايبه/
أجر صوتي كلها أسباب صدته/
لوا عذاب القلب زود لهايبه /
يمر بي وقتي وأنا الفكر معتجب/
على سواته يوم زلت سحايبه/
‏ليا هبوب النود هبي بريحها/
ينعش لقلبي كان هبت هبايبه!
ياوجد حالي وجد غايب عن البلد/
زود ن على الغربه كثيرة مصايبه/
ياقوّ قلبه يا هلي كيف ما رحم/
كل الرجاوي في لقا الخل خايبه/
ياعاذلين القلب ياحر فقدها /
كبدي بعد فرقا أريش العين ذايبه/
لو وصلها ممكن وحيد ن وصلتها/
والله لا أصلها لو الرجل عايبه/
العيش ماله طعم ياناس دونها/
من زود همي شوفوا العين شايبه/
ماتنفع الخفرات لو يجمعونها/
عنها بليا شك ماهيب نايبه/
خيالها ماتفارق العين طلته/
لو إنها ياناس ماهيب ثايبه/
عشت بسعاده ياعرب في وجودها/
عن شي يسعدني فلاهيب هايبه/
لاهمت في حب الحبيبه وضرني/
لاتعذلون القلب وأرياي صايبه/
على وفاق سنين عده قضيتها/
ماأدري لنا الأقدار هي ويش جايبه/
لو الوصل يآتي بقوه وصلتها/
لو الدمي في شذرة السيف رايبه/
عزيت نفسي بالصبر وانتهى الصبر/
ياكثر ماأنصحها ولاهيب تايبه/