ياطير

[ناصر عبيد الهواوي]

ياطيرمع هالبرود وتكثر الطلعات والحوم=رايق مزاجك وظني ماا ثرت فيك المآسي
خذ لي معك هالكتاب اللي بدهن العود مرشوم=وده محمد عريب الجد من ربع ٍ رواسي
قل مرحبا بالعتاب الحلو لو ماهوب مفهوم=في لين منطق وحسن اخلاق واسلوب ٍ سياسي
انا تعلمت وسط السوق كيف ابيع واسوم=ماشي عدال بطريقي منتبه مانيب أساسي
وأدخل معارض تغص بكل زين بشوت وهدوم=واطلع وانا ماشريت البشت مااحصل مقاسي
من ماركات ٍ شهيرة مثبتة باوراق وختوم=واهل المعارض لهم قدر ٍعلى عيني وراسي
وبديت من شهر تسعة في مشاريعي الى اليوم=وانجزت منها مية مشروع في وقت ٍقياسي
ومخي قليل ذكاء يدرك علوم ويجهل علوم=لكن ما اخالفه من غير حذف ولا اقتباسي
وكل ٍ يعرف العرب باقي لهم عادات واسلوم=لو كان يجري على اكثرها تغير واندراسي
لو كل ممدوح ابا امدح له ومن ينلام ابا الوم=لتشوف طلاب فصلي يحذفوني بالكراسي