صوت وصدى

[منيع]

هذه الابيات كتبتها بمناسبة سفر اخي مع ابن عمي الى مصر من اجل علاج اخي وذالك في سنة 1404 وبما ان اخي شاعر متمكن لم اسلمها اليه الا بعد مرور خمس سنوات لترددي في ذالك وخجلي من ان تكون ابياتي ليس في المستوى المطلوب ------------------------




في مرقب تذري عليـه الهبايـب=والحر الاشقر فوق عاليه قد حـام
تذكرت من تفـداه كـل الحبايـب=عني بعيد وكن فرقـاه لـي عـام
من راح والدمعات منـي سكايـب=والبال خجـه هـم الالام بسهـام
ياعبيد من رحتو وموري صعايب=لابالنهاراسلـى ولاالليـل بـنـام
متفكربـك يازبـون الصـلايـب=وداعي لـك الله بالشفاسروعـلام
ياعبيد ليت اللي تبـلاك صايـب=الصايع اللي عايش بوهم الاحـلام
ليته مرضبـه وبتلتـه النوايـب=مير البلى دايم يعانيـه ضرغـام
ودنيـاك دار للعنـا والمصايـب=ولاابتلى فيها سـوى كـل همـام
امامحـب ضـاق حـر اللهايـبب=بفراق من وده على غيـر مـارام
ولاعشيـق مغـرم غيـر ثايـب=تاه بوداد معزل الوسـط بحـزام
وياكم بالدنيـا نشـوف العجايـب=افراح وحـزان وزغاريـد والام
وياما بعد فيهـا سمعنـا غرايـب=يحكي بها التاريخ ثم روس الاقلام
تحكي مأسي من جميـع السبايـب=وياكم مخلوق من افراحهـا صـام
وياعبيد شيبنـي ولانـي بشايـب=جور الزمان اللي يحطـم تحطـام
وجسمي غدى منهوك والفكر غايب=ياخوك لي حسرات والام الايتـام
ومعلوم كل حي تصيبه النشايـب=وحتى بعد ذاك الذي وسط الارحام
والصبرهو راس الرجا والكسايب=من به تمسك ياعضيـدي فلاهـام
قلته وبي علام مجري السحايـب=اني لكم مخلص على مر الاعـوام
وبلـغ تحياتـي لعـز القـرايـب=اعني ابن عمي ذرى كل منضـام
ابومشاري سعد من كـان هايـب=وبلسم على كل البلاوي والاسقـام
وسائل من المولى كريم الوهايـب=يردكـم بالخيـر ياذخـر الايـام



-----------------------------------------------
جواب اخي بهذه الابيات




اخوك ياابراهيـم شـاف العجايـب=واهوال بقعا في بحـر غيهـا هـام
في غير يمـه شاحتـه للمصايـب=قامت اتوميبه مـن عمـان للشـام
شيطانهـا يمـه يسـوق الركايـب=حثيث عجل بـدل المشـي درهـام
ضاقت علي افجوجهـا والرحايـب=وصارالفضا عندي كبر فتحة السام
سلمى وانامنها جروحـي عطايـب=غاراتها يمـي عديـدات واجسـام
لوشفت وش سوى عقيـد الطبايـب=في ساعة فيها الحكي صـار تمتـام
شرحت تشريحة خروف الزرايـب=وخمسة عشر ليله وانابلفـة الخـام
ملفوف معقـود الربـاط بكلايـب=والربع مـن حولـي جثـي وقيـام
معهم هديب الشام سبـع الحرايـب=اللي تكفل بـي مـن الالـف لـلام
جـزاه بالحسنـى ولاهـو بخايـب=والراية البيضا على روس الاعـلام
بقت على قبـري تـرز النصايـب=لولا الرجا بمنـزل ايـات الانعـام
ايضـا ودعواكـم علينـا سبايـب=فيها تجلت وانجلـت كـل الاوهـام
لاشك مايكتب على العبـد صايـب=والاقدار ماعنهـا مطـار ومهـزام
وانا ومن يرجع لـه العبـد تايـب=سلواي ذكـرام بطيفـي والاحـلام
تشكي على الحـال منحـول ذايـب=ابشر بسعدك كان هبـت بـالاولام
لجيك فوق اللـي تبـوج السحايـب=تمشي بنا وان غطلـس الجوسخـام
شكواك سوت في ضميري ثلايـب=كني عضيض الغلث من ارقط الهام
بالمال والنفـس العزيـزه ذهايـب=ولاجلك لخلي كايد الصعب مريـام
تحـرم علـى معطـرات الذوايـب=ولاطاب عيشي وانت ياخوك منضام
هـذا وردي يمكـم غيـر ثـايـب=مادام مكتوبـك خذاخمسـة اعـوام
وماطاح من دهم السحايب شخايـب=على النبي صليت ماهبـت انسـام