عليا وابو زيد

[ناصر عبيد الهواوي]

البارح انقٌص بالاشوار وأزيد=اريا لها ترحيب واريا طريدة
واذكٌر الماضي على القلب واعيد=مرة يعاندني ومرات افيده
واستعرض احداث السنين المساريد=طول الزمن والوقت كلش تبيده
وتعرض على قلبي صور سيد الغيد=واقرٌب المشهد واكرر واعيده
ولو إنها جت لي على كيف ماريد=وجت له بعد مثلي على مايريده
وعنا اندحر كيد الخباث المقاريد=وهبت وغابت كل نفسٍ قريدة
صرنا حكاية مثل عليا وابو زيد=وراع الذلول اللي عمل له مكيدة
يومه لحق عليا بصحصح من البيد=وقصٌت يدين الحر من حد قيده
لكنها حِفت بشر وتناكيد=ساعة تجي سلوى وساعة نكيدة
واحلام بددها طغى الوقت تبديد=وحنا بعد كلٍ ذلف مع بديدة
عليه ياكثر المنى والتواجيد=واثر المنى والوجد ماهي مفيدة
طول الجوى جا ساعرٍ بالحشا قيد=واشعل بقلبي والمشاعر وقيدة
وجد الفطيم اللي يبكي على الديد=ماعاضته كثر القراقع بديده
او وجد من جاه الخبر ثاني العيد=علمٍ لفاه إعصير ينعى وحيده
من الكبر غادن بوجهه تجاعيد=حتى الصلاة امع الجماعة تكيده
ومع البكى جاله شهيق وتناهيد=فقد الظنى خلا حياته زهيدة
لالم بي طيفه رفعت الزغاريد=واعدها مكسب وفرصة سعيدة
واقوم اهلي به مثل تهلية زيد=لاوالله اكثر بالتراحيب ازيده
ياعاذلي وش جاك يابن الأجاويد=اروي قديم اخبار ماهي جديدة
ياشين لو بي فاد شجبٍ وتنديد=كان العراق وقدسنا نستعيده
تكتب لي الوصفة من سنين وتعيد=تعبت نفسك والسعادة بعيدة
هواجسي تاتي لفكري مواريد=وفورت دمي لين حنٌب وريده