اصعب مهمه تكسب لكل الاحباب

[الطائر المهاجر]

اصعب مهمه تكسب لكل الاحباب = وترضي الجميع ولا تفرط بمخلوق
في منتدى يجمع شبابٍ وشيّاب= وجسر التواصل حرف ماهوب موثوق
احدٍ تشوفه مفتهم كل الاسباب = يمشي على القانون بالطيب والذوق
يدري بأن المنتدى جمعة اصحاب= ومن دون تعليمات يخرج عن الطوق
ويدري بمن يالاه من عمد واطناب= خيرة رجالٍ فالمكارم لهم سوق
علم وخبره والثقافه لهم باب = وتواضعٍ واخلاق في لين ورفوق
حتى ارتفع صرح الفطاحل فالارتاب = ومن النقاء في النت ماهوب مسبوق
واحدٍ تشوفه لو فهم درس الاعراب= ما يعجبه هالوضع في كل منطوق
يبغاه سايب بين عبله وزرياب = مفتوح دون حدود كالثوب مشقوق
واحدٍ يبي يأمر وينهى بلا عتاب= ولو فرق العربان ما يلحقه عوق
تلقى لسانه حلو يقطر بالاعجاب= ينفخ خفيف العقل من كل مدروق
يبغى يكوّن شلة له كالاحزاب = يجرهم لا من بغى كنهم نوق
ومن لا يطيعه بالكذب دوم يغتاب= ويضرب عتيقٍ مع سعيدٍ ومعتوق
واحدٍ حمق فالنفس كبريت شبّاب= يبغى تطيعه لا ومر جاي من فوق
وإلا بعد خوّتك تلقاه قلاب= ومن كان ضده يتبعه كنّه الشوق
واحدٍ تعرفه طيب القلب حبّاب= يضحك عليه اللي لقى ليّن عروق
تشره عليه وتنصحه يترك الداب= ويلقفه ثعلب من سواياك محروق
لانّك كشفته مصدر لْكل الاتعاب = ولا عاد به فالأمر والنهي ماثوق
ياحيسفا يارجال عكفين الاشناب= ياحيسفا فالفخ طحتوا بلا سوق
لاتحسبون القصر من بعدكم عاب= عالي ويعلى ماتأثر من عقوق
لكن اخوّتنا تحتم بالايجاب= ندمح خطا الأصحاب لو جاوز الطوق