يا قيس : طش الشداد ونوخ الضمر..

[خلف الغريب]

أسهرت عين القلم حتى غفا الدفتر=وخيل القوافي تعب خيالها الماهر

السرج خالي ومات حصاني الأشقر=وغابت عن أسماع قلبي دقّة الحافر

السيف طايح عسى ماشر يا عنتر=ماهي عوايدك تغمد سيفك الباتر

من بعد ماكان سيفك باللقا مشهر=خاض المعارك وعوّد بعدها خاسر

سمعي قصر عن عتابك كيف ما يقصر ؟=والعين دونك يعوّد طرفها الساهر

لو حاول يعاتب الأحباب ! ما يقدر=إثر الغلا .. يترك القادر مهو قادر

اشوف مغربك مشـرق . وايمنـك ايسـر=واشـوف آخـرك أول . واولـك آخــر

صارت عيوبك مزايـا , والبـلا الأكبـر:=انـي اشـوف المزايـا عيـوب بالآخـر

قلـب منحـك الغـلا والحـب مـا قصـر=ضمد جروحه وغنى ( لا متـى صابـر )

اغمـدت خنجـرك فـي شريانـه الابهـر=ونزعتها وانت فـي ليـل الجفـا سامـر

ما اطيعهم لو حكوا عـن غـدرة الخنجـر=الغـادر اللـي طعـن بالخنجـر الـغـادر

ملّتك الاسفار مـن مهجـر إلـى مهجـر=متى تبطل عـن الأسفـار يـا مسافـر ؟؟

يا قيس طش الشداد و نوّخ الضمـر=ليلاك خانت , وراحت مع بني عامر