غثــــّـــــــــــــــــه

[فارس القوافي]

عليها ذكر الله من حكـيٍ يقولونـه = ومن عيون الحسد ان كان شافتهـا
قالوا غثيثه تغثّـك حيـل ملسونـه = قالوا وقالـوا ولا هـزّوا مكانتهـا
ما نسمع الهرج والعـذّال يروونـه = ما نقّصوا بسّ !! زادوني بمحبتهـا
لو هم يشوفون بعيوني مدى كونـه = كان اصبح الكون كلّه تحت رايتهـا
هذي العسل والشهْد والماي في لونه = شفّافـة القلـب تعجبنـي برائتهـا
لا من حكت يسكت العالم وما دونه = كـلّ ٍ يفكّـر ويتمـنـى ثقافتـهـا
فيها ابتسامه تداوي القلب وطعونـه = خفيفـة الـدمّ ياموتـي بضحكتهـا
الطيب فيها وفيهـا الثقـل وفنونـه = عريبة الجـد تسحرنـي رزانتهـا
يكفي عيوني تناظر فيهـا مجنونـه = والقلب يكفيه كلمـه مـن سعادتهـا
قلبـي هواهـا ولا بيّـح بمكنونـه = حفظت سـرّي وتاركهـا براحتهـا
ان كان هذا غثاهـا الّـي يقولونـه = فـيالله تبلانـي وتكرمنـي بغثّتهـا