الجديد المتواضع لاحبائي,,,

[حرف وشعر]

ياوردة (ن) فى الغابة الممطوره=شفاف خدك كنه البلوره
وصفك تعذر عن مديح المادح= لو يجتمع شعارها المعموره
سبحان هو من بالحلا سواكي=وابدع جمالك بالحسن والصوره
عطرك تناثر فى الفلا والوادي= وغطي على نبت الفلا وزهوره
والبلبل الشادي شدى وترنم= لاجلك وشل الصوت من حنجوره
وتغنجت من شذوك المياده=وتراقصت بغصانك العصفوره
احمر على اصفر من روائع لونك=وتمازجت الوانك المغموره
غنت لك الشعار يافتانه=بحروف شعر (ن) فى الادب مسطوره
شفتك وذكرني جمال اخدودك=بخدود نجلاء فاتنه غندوره
يجري هواها فى نياط اعروقي=بالدم يجري دورها من دوره
بنت البدو تلبس لباس العفه=حشمة عرب تزهو بها المستوره
اللول يكسو ضحكة المزيونه=وحب الكرز بالشفتين احضوره
وسحر العيون الناعسه ياواصف=ماتنوصف لا بالشعر وشعوره
لو خيروني فى بنات العالم=قالوا تفظل شوف لك سنيوره
قلت اعذروني صد قلبي عنهن= واللوز ماينوكل بقشوره
بنت البلد طعم العسل لمصفى=تشفا بها علاتنا المخطوره
بنت البلد طير(ن) ربي بديارك=والجاهل اللي مايحشم اطيوره
بنت البلد نبت الخزاما طيبه=والنبت يثمر لا حسنت ابذوره
بكتب انا اسم الغلا بفوادي= ماريد من لوح(ن) ولا طبشوره
والود ياخلي مشاعر قلب (ن)= ماينقرا من لوحة السبوره
وهذى تراجم قصتي مع ورده= وهذى تراجم قصتي مع نوره
وهذى قوافي بالحدا ياحادي=طرق الحدا من طرقنا المشهوره