ثوب زفافي مالبسته.
 

[b]كانت كقريناتها من الفتيات تحلم بالفارس الذي ينتشلها من واقعها ينتشلها من الطفش والملل الذي تعيشه في بيتها لعالم رسمته في مخيلتها

خلود كأي فتاة تحلم بارتداء الثوب الأبيض وزفة للشاعر فلان يتحكى المدعوون فترة عنها ولا ينسونها..
كانت احلاما وردية
كبرت وكبر حلمها

في الجامعة وكعادتها مع افراد شلتها حصة وعبير وشوق وهلا يتحدثن عن مواصفات فارس احلامهن الذي وعلى قولتهن سعيد الحظ..
هلا : انا ابيه دكتور ابيهم يقولون هلا مرت الدكتور فلان وأبيه يشبه جواد العلي
حصةك وع مالقيتي إلا جواد مالت عليس
شوق: استغفر الله بس
عبير:أنا أبيه ولد عز...أبي جيبه مليان..أبي اعيش مثل الناس و العالم..أبي أسافر برى أبي أروح جنيف وأسبانيا والمكسيك..أبي لما اروح السوق اشتري اللي ابي مب امي غالي غالي بعدين يسوون تخفيض

أما شوق التي لازمت الصمت
لا لاشيء
ولكن لأن القدر حكم عليها ان تكون من نصيب عمر ولد عمها فهذه تقاليد العائلة.

هلا: هاه حصة وخلود وانتم وغلا تبون تعنسون؟
حصة: انا اللي يجي من الله حياه الله.
خلود:أبيه بكل شيء يشبه أبوي..ومايهمني جيبه..أهم شيء الخلاق.

مرت شهور والبنات على هالحالة
جامعة ودراسة وش طريقة الحلى الفلاني وش آخرصرعات الموضة والأزياء وهالخرابيط.
خلود: يمه ماأبي أروح مالي خلقسوير معها صديقاتها(سوير :سارة اخت خلود)وانا اقعد لحالي مثل المجنونة.
أقول بتروحين غصب ام عامر تقول جيبي كل البنات

ماشاء الله ماشاء الله وش هالقمر ياام بندر
هاذي بنتي خلود
أم تركي: الله يحرسها



خلود:هلا جيبي لي كت كات وشيبس
عبير: هاه خلود وش اخبار عزومتكم الخميس؟
خلود: اف ...استغفر الله ...عادي بس ام عامر تكن مافيه ولد تخرج من الحربية غير ولدها.
شوق:حرام عليك..ولدها تبي تفرح فيه...بكره تشوفين غلاة الولد على قولة امي.
خلود: ايه..(تصرف)



رن رن
ساره:آلوو
المتصل:السلام عليكم
ساره: وعليكم السلام
المتصل:كيف الحال يابنتي؟؟
ساره: الحمد لله مين معي ؟
المتصل: ام تركي
ساره: هلا والله حياك
أم تركي :وين أمك؟
ساره: يمه يمه التليفون
ام بندر: آلوووو








ام بندر: انا أبكلم أبوها وأرد لك عن شاء الله خير.


أم بندر: أبو بندر ترى ام تركي اللي تقرب لمرت ولد عمي دقت اليوم.
أبو بندر :وش تبي؟؟
أم بندر: تبي خلود لولدها تركي.
تقول إسألوا عنه وردوا لنا الولد مستعجل يبي الزواج بالعطله الصيفية.


ومرت الأيام

أبو بندر: والله سألت عنه بمكان شغله ومدحوه لي .. قالوا ماشاء الله رجال ..وسالت الجيران والامام اللي بمسجدهم قال غنه يشوفه كل يوم يصلي غلا الظهر بحكم دوامه..
الولد باين عليه ماشي سيدا لا يمين ولا يسار .
ام بندر بعد العشاء دخلت على خلود بغرفتها وسكرت الباب شوي غلا تدخل ساره:وش عندكم؟؟
ام بندر: افول اطلعي ذاكري جيبي نسبة لا تفشلينا.
خلود:خليك مثلي.
أقول يمه صدق عمي أبو صالح بيروحون الامارات؟؟
ام بندر:يقول أبوك يمكن..
ساره:وحنا بعدنبي نروح
خلود:ايه يمه تكفون...لو اسبوع مانطول
أم بندر:لا تزوجتوا كل وحدة تروح للي تبي
ساره: استغفرالله بس كلش كذا يمه ماطلبنا كثيييييييييير
أم بندر: أقول اقضبي الباب
ساره: أقول وش عندكم؟؟

عصبوا عليها وطلعت.
خلود:يمه وش ذا!!!
من صدقك انتي وابوي تبون تزوجوني..توني صغيرة ..وبعدين باكمل دراستي..
أم بندر:وجع واحد قالك لا تكملين...كملي معه..بعدين الولد ماشاء الله عليه مايعيبه شيء أبوك سأل عنه..و
خلود: ياحلاوة..طابخين الطبخة وخلاص يعني..
ام بندرك يابنتي نبي مصلحتك
خلود: ومنهو ذا من يكون؟؟
ام بندر:تركي ولد ام تركي..
خلود:استغفر الله عسى ذاك اللي اخته امل ..استغفر الله شايفه نفسها على ايش ماأدري..
ام بندر:اللحين مين بتتزوجين امل وإلا اخوها؟؟
المهم ترى بيجون الثلاثاء الجاي يتقهوون عندنا..
جهزي نفسك..
وطلعت من الغرفة..
وبعدها عجزت خلود اللي كان عندها كوز انجليزي تستوعب شيء..


خلود:سوير قطعي الحلى اللي بالثلاجة بروح البس..
ساره: من قدك حركات .. والله وكبرتي ياخلود..
خلود: تبينه
ساره:لا والله
خلود:والله عادي اقولهم سوير مستعجله
ساره: أصلا انا طموحي فوق كذا
خلودك يعني وشو.. من زينك..زين بكرة تلقين مثل تركي يضفك.
ساره: وانا على رأسك..انا ببيت ابوي الله يخليه لي.
أم بندر:خلود صبي القهوة زين امسكي الفنجال باليمين مب مثل دايم باليسار
وتبسمي مب تكشرين
ساره: ايه عشان يقولون سنعه خخخخخخخخخخ

وبالمجلس ام تركي وبناتها امل ونوف
ماشاء الله هاذي عروسة ولدي ياحبي لهاز
سارة: ذوقوا الحلى ترى العروسة مسويته وتضحك بخبث.



المهم مرت الأيام وتركي طلي يشوف خلود.
يمه وش ذا عطوه صورتي عجبته كان بها ماعجبته وش اسوي له
ام بندر: المهم ترى أبوك يقول البنت تلبس ساتر ولا تحط مكياج.

أبو بندر: حيا الله من جانا

أبو بندر: هاه أم بندر البنت جهزت؟
ام بندرك ايه اللحين
وساره متقعده لأختها تعليقات
خلود: يمه تكفين
أم بندر: وحطبه .. امسكي الصينية زين.

دخلت المجلس
وبصوت واطي: السلام عليكم
وعليكم السلام والرحمه
بنتي خلود تعالي يوبه اجلسي جنبي
المهم طول الوقت والبنت عيونها على السجادة مارفعتهم ولا شافته
ثواني وطلعت..
تركي:أبو بندر بنتك انا شاريها..


يوم الملكة بالبيت اهلها وصديقاتها واهل تركي مجتمعين
نوف:خلود ترى تركي يقول انه قايل لأبوك لما يطلعون الرجاجيلهو يستناك بالمجلس..
خلود:حصة شفتي وش يبي ذا؟

خلود وافقت على مضض بشرط ان اخواته يدخلون معها.
تركي:ياارض احفظي ماعليك
نوف وامل مبرررررررروك تركي شوي واطلعوا من المجلس.
تركي: وش اخبارك؟
خلود: تمام
تركي:قولي الحمدلله
خلود بينها وبين نفسها (هاذي اولها)
تركي:وش اخبار الدراسه؟
خلود: ماشي
تركي وهو يضحك: وانتي ماتردين علي الا بكلمة.
ابتسمت خلود.
تركي: ياويلك تقصين شعرك والا تصبغينه خليه كذا طويل احلى
ابتسمت خلود
اسمعي خلود انا اعرف ان كل بنت ودها يكون لها بيت مستقل بس انتي تعرفين انا وحيد امي واخواتي بعد موتة ابوي مالهم الا انا
خلود: الله يرحمه
فيعني ماودي تتضايقين حنا بيكون لنا جناح كامل.
خلود:عادي
تركي:والله....
خلود تهز براسه يعني ايه.
تركي: طيب وبعد ترى اول مانتزوج بنروح مكة نأخذ عمرة ابي نبدأحياتنا بطاعة الله بعدين جدة خلاص
وأنا أوعدك بس تتحسن حالتي بأوديك وين ماتبين......هاه
خلود: طيب






ومرت الأيام والبنت محتاسة بدراستها وتجهيزات الزواج.


يمه يالله لا نتاخر على الخياطة قالت الساعة ست يعني ست

ساره: الله روعة الفستان خلود بس لو اطول شوي كان احلى
أم بندر: لا كذا زين
خلود دخلت الفستان في دولابها وكل يوم تفتحه وتشوفه وتقعد قدام المرايه كانت تحس بسعادة لاتوصف


أبو بندر وهو معتفس: خلود خلود
ام بندر: البنت نايمه توها راجعه من الجامعه
ابو بندر: صحيها ابيها
ابو بندر: خلود البسي عبايتك وامشي معي
خلود: يبه وين؟
ابو بندر: تركي صار له حادث ودق علي خاله يقول انه بالمستشفى

ساره توقعت ان اللي صاير له كسر رجل...... يد أي شي بس ماتوقعت اللي شافته

دخلوا المستشفى وسألوا الاستقبال
راحوا الدور الثالث وسمعوا ضجة وصياح
خلود طاح قلبها
وصلت خلود متاخر كثــــــــــــــير
لقت امه تبكي ولدها ...تبكي وحيدها
وامل ونوف بحالة يرثى لها
خلود وهي تصارخ تركي وينه تركي
ودخلت الغرفة
وليتها مادخلت
لقت جسم ممدد على السريرمغطى بكامله بشرشف.....سحبته
تركي وهي تهزه من كتوفه تركي
تركي رد علي تركي


وسقطت مغشيا عليها
صحت وامها واختها بقربها
قامت يمه تركي .......تركي يمه وتصيح
عطوها إبرة مهدئه ورجعت نامت


طوال ايام العزاء وهي بغرفتها

كان منظرها يهز الواحد من الداخل.
وشهور وهي على هالحالة بغرفتها ماتقعد مع احد ولا تبي احد

ساره حطت الصينية في حضن خلود :يالله هاذي المرتديلا اللي تحبينها..
خلود وهي تناظر ساره:ساره قالي تركي شعرك حلو
وقال انه بياخذني مكه
بس راح ياساره
راح وخلاني
ليته خذاني معه

ساره لم تحتمل طلعت دفنت نفسها بسريرها وهي تصيح:خلود ماتستاهل اللي صار لها
ياربي ليتك اخذت روحي بداله


لم تنفع محاولات اهلها وصديقاتها من انتشالها من الحزن اللي فيه
ليه اللي صار لها قليل؟؟؟؟؟؟؟؟

وفي فجر ذاك اليوم حينما خرج ابو بندر للصلاة وعاد للبيت أخذ يوقظ اهله
دخل على ساره ثم خلود
لقد أبكاه مارأى
ذلك الرجل الذي ملأ الشيب رأسه والتجاعيد سلكت مسلكها في وجهه .....بكى

لقد رأى خلود نائمة وهي تحتضن ثوبها الأبيض..


كانت ساره دائما تتقرب من خلود لتواسيها فأمها لا تستطيع ان تمسك نفسها امام ابنتها


خلود: ساره فيه بنت تترمل قبل ماتتزوج!!!!!
قبل ماتلبس ثوبها الأبيض؟؟؟؟
قبل ماتكمل 22سنه؟
ساره انتي بس جاوبيني ابي ارتاح...[/b]





ياحليكم اكيد صدقتوا
هاذي من تأليفي
وتراها اول محاوله قصصيه لي
يعني اعذروني
يمكن الاحداث مو مره متسلسله
يمكن فيه شوية مبالغات
ونصها عامي ونصها فصحى
بس مثل ماقلت لكم هاذي اول محاوله


عاد اللي يدخل ويقراها لا يبخل علي ابي نقد ماابي مجاملات

الأخت نجود

قصه جميله
وأنا تراي ماني ناقد ولكن أتوقع لو ماجبتي أسماء حقيقيه فيها كان أحسن مثل جواد العلي لو استبدلتيه باسم وهمي أحسن

عموما يعطيك العافيه وبانتظار النقاد الحقيقيين من الزملاء الأعضاء

تحياتي

والله مانك بهينه يانجودماشاء الله>>>>>>>>>>>>>>وصدق مو بمجامله
أنا من يوم قريت خاطرتك اللي أنتي عارفتها قلت البنت وراها شيء مو هين

توقعتك ماتخلصين كتابتها بالسرعه ذي ماشاء الله

على العموم قصه حلوه وعشت أحداثها كلها وتسلم أفكارك الحلوه وأناملك بعد

عزيزتي نجود

قصه جميله ومعبره

يعطيك العافيه :)

تحياتي لك

غاليتي نجود بدايه موفقه

قصتك واقعيه ومؤثره

تسلم أناملك

تحياتي ياحياتي

للجميع أسعدني مروركم
وكله من ذوقكم
أخوي سناعيس كل مافي الأمر إني بغيتها تكون أقرب للواقع

نجود والله بكيتيني ...........


بس القصه رووووووووووووووووووووووووعه.

ماشالله عليك مبدددددددددددددعه هذا وانت تقولين ماعرف اكتب ماشالله عليك
وبالفعل بداية رائعة ومبدعة

سلمت لي

ياربي..... ليييييييييييييييييه حرام عليك كذا ...بس فعلا دخلتيني جو ........بداية حلوة
وقصة رائعة بروعتك ......... يعطيك العافية ياقلبي....

وربي اني ابكي الحين

ماشاء الله عليك

قصتك بالمرة روعة

تسلم يدينك يا قلبي