رحلة كوماند للهند
 

صراحة بطني ماهوب جراب لأحد ، وانطلاقا من سياسة ازالة الحواجز بين الأعضاء قررت إني اعرف بعضهم على بعض ، لأن الكثيرين ودهم إذا شافوا مشاركة او رد لواحد يعرفون اشياء عنه ، فدعونا نبدأ بكوماند ورحلته الشهيرة للهند التي يحاول التكتم عليها
كوماند : هذا رجال مستاذية منه الأرض ، حتى في حارتهم ، مالهم كلام إلا عنه ، لقشارته ورجته ،
وصراحه غاث أهله ، من كثر شكاوى الجيران .. وعليه طلعات غريبة جداً ، أحيانا يظنونه أهله مسكون ،
وسبحان الله من يوم لحظة ولادته وهو واضح إنه اقشر ، تصدقون إن سنونه طالعه وهو في بطن امه ، والرجال
عيا يطلع ، ويوم فحصت الدكتوره الوضع لقت الأخ عاض امه من الداخل بسنونه ، ومتعلق كنه شبث .
وما امداه يجي أبو 4 شهور إلا ويلقون رايح يمشي في الشارع ، ومن مر من الناس ، رجمه بالحصاء ،
ويوم وصل سن المدرسة ، من أول يوم دخلها ، وهو لازخ بواب المدرسة بهكالحصاة والاه فاقش راسه
والاها بجية المدير ، وشافه ، وخذ هالعرق واهجم عليه يبي يدبغه ، وبحركة اسرع من البرق ، إلا وكماند
يلقط العرق من المدير ، ويطالع فيه ، بنظرات يخرج منها الشرر ، قال له : هيا انقلع ، والله لولا إني عمي حالف
علي ما اطق المدير إني لوريك شغلك ، وحط المدير وراه وادخل المدرسة ، وعلى طول فصل سادس ، واجلس
مع العيال الكبار ، وهو نتفة ما يويد عن 90سم ، واحد من العيال الكبار جاه يستهبل ، قال له : انت يالاخو ..
ترى فصل أول تحت عند دورات المياه ، وما امداه يكمل حكيه ، إلا يوم صمخه بهكالطراق ، اللي لف وجهه ،
وشله فوق وامسط به ، ومن ذكاءه ، صار تحته ومسكه من جيبه وغدا يصيح فكوني منه ، والاها مع دخلت
المراقب وبالفعل شاف الولد الكبير فوق وكوماند يستنجد ، وتنطلي الحيلة على المراقب ويمسك الولد ويجلده ،
جو بهض البزران يبون يعلمون المراقب من المخطي ومن المتضرر ، ما استمع لهم ، وشال كوماند وعطاه حلاوه
ونزله تحت للفصل الأول واستانس كوماند مع الحلاو ، والمراقب عرف إن الحلاو هو الوحيد اللي يقدر يهجد كوماند
فتقاطوا في المدرسة وشروا خيشة حلاو من نوع حلاو الحلقوم ، لأن الوحدة كبيرة وتسد حنجرة كوماند ويغص بها
وينشغل عما سواها ، وصاروا كلما شافوا عيونه متغيرة دروا أن الشياطين ركبته ، دعسوا في اثمه حلاوة ..
وبعد ما خلص الإبتدائي بعد كل كلفة ، وجدوا أنه استهلك مالا يقل عن 100 الف خيشة حلاو حلقوم .. الملاحظ إنه كان شاطر في جميع الدروس ويجيب الدرجات كاملة إلا في القرآن ، رغم أنه ما يبذل أية جهد فقط يكفيه الحضور
حتى وهو نايم اثناء الحصة ، مخه يسجل كل شرح المدرس ، مما بهر المدرسين والمدرسة كاملة واصبحت تتحدث عنه هالفلته الأقشر ..
المشكلة إن عمه بلش به ، المدرسة عيت تعطيه شهادة حسن سيرة وسلوك ولازم يدخله في المتوسط ، وجت هكالفكرة ، ليش ما نجيب له شهادة من امام المسجد والمطوع ، اللي متأذين منه ، وهذي له سالفة طويله بس اختصارا ، كان يدخل وهم يصلون ، ويروح يمصع اسلاك الميكرفون ، وإلا تلقاه رابط عقرب عند مكان سجود الإمام ، وإلا تلقاه راقي في أعلا المنارة وجالس يدربل على بيوت الناس ، واذا نشده احد ماتستحي ، قال
ادور قطوتي انحاشت ولاادري وين راحت لأي بيت .. اخيرا وتقبله مدرسة الجاليات الهندية بعد كل كلفة وبعد ما ثبت
عمه لهم إن اصولهم من الهند ، والمدرسة مختلطة ، الولد فل الحجاج ، ولقى بنيات يسولف معهن ولو في البداية ما يدري وش يقولون ، وكان ينبسط على رقصهم وتلقاه دايم معسكر عند صنم حاطينه في المدرسة ويحطون جنبه شموع وحلاو فكان مالقى من حلاو يلهمه ، وهم يعتقدون إن صنمهم هو اللي ياكله ، فيقولون فيه العافية ،
طبعا الصنم على هيئة رجال قاعد من النحاس ، وتجيه هالكالفكرة ذاك اليوم ، وادخل في وسطه واسبط
ومن جاء يدعو الصنم إنه يحقق له أي شئ ، يرد عليه بكلمة هندية بما يعني : تم .. تم .. وصار كلما جاء للمدرسة
ومن دون ما احد يدري يتسلل ويدخل في وسطه ..والهنود شاعت شائعة بينهم في كل انحاء الرياض إن الصنم
اصبح يتكلم ويلبي طلبات اللي يجون له ، الا والله يوم المدرسة ماعادهيب مدرسة صارت مزار للهنود من جميع انحاء المملكة والدول المجاورة.. وبناء عليه ارسلت الهند فريق من رجال الدين بقيادة الكاهن حقهم درمنداش
وكان رجلا ذكياً ، فبعد حضوره ، وسماعه للصنم وهو يتكلم خر له ساجدا ، فقال له لابد من اخذك للهند وبناء
مزار لك يأتيك الناس من كل مكان ، فاسقط في يد كوماندو ، فالناس جادين ويبون ياخذونه ، فكانت الفكرة
إنه يهرب بعد ما يروحون ، ولم يخطر بباله أن الكاهن درمنداش ، قد وضع حراسا اشداء كل واحد شنبه ياصل
اذانه ، وما امداه يطل براسه بعد ما تأكد إنهم راحوا إلا ويشوف الحراس ، هالحين وشلون يتصرف !!
طبعا كوماندو من حسن حظه معه جواله ، فدق على البيت وكان عندهم خدامه هندية ، وقال لأهله خذوا الهندية ومعكم ضب كبير في مخرف ومغطى بورود ، وإذا وصلت باب المدرسة قولوا لها تودي الزبيل الين الصنم
وبالفعل ما امداها تاصل الصنم وتجي تزل الورود من المخرف ، إلا والضب يطلع منه ، هي شافته إلا وحطت رجلها تصرخ بصوت عالي ، وجوا الحراس ومن يوم شافوا الضب تطامروا منحاشين ، وتركوا المكان كله ، وبالفعل
طلع كوماند من داخل الصنم وحط رجله ، لكن ما درى إن الحراس ملبدين له برا الغرفة ، ومن يوم ما طلع إلا
وهم متعاونين عليه وتاغصينه ، لإعتقادهم إنه الضب تحول إلى إنسان ، حاول يقنعهم ولكن مافيه فايدة قاضبينه قضبت الأعمى شاته ، وارسلوا يطلبون الكاهن يعطيهم الأمر ، وما هي إلا دقائق قليلة إلا والكاهن يأتي على عجل
ومن يوم ما شافه إلا وهو ماخذه بالحضن ويبكي بقوة والدموع تنهمر من مقلتيه ، طبعا كوماند والباقين ما يعرفون وش القصة ، فقال لهم الكاهن خلاص أنتم روحوا خلوني أنا وياه ، وبالفعل راحوا ورجع مرة ثانية
وخمه ذيك الخمة اللي بغت تطلع معها روحه ، ثم قال له : هو صدق إني شفت وليدي بعد كل هالسنين
عقب ما سرقوه مني في بومبي ، ياوليدي الله اللي ردك لي مثلما رد يوسف ليعقوب ، كوماند وقف ذاهلا
وش يقول ذا لهندي ، وش الكلام اللي تقوله انا مافيه هندي كلام ، قال ياوليدي هالكالسنة وانا وامك رايحين نتمشى في بومبي جايين من مدراس إلا ويطبون علينا ذيك العصابه ويلقطونك انت وهي وانت بين يدياتها الله العالم انك ابو 3- 4 اشهر ولا عاد عنكم الطير خبر ، ولأنك من قشرك قبلها بشهرين تلعب طاش ماطاش انكسرت القاروره وجرحتك في خدك ، وهذا جرحك لاتزال آثاره واضحة .. كوماند بالطبع كان يقول في نفسه اكيد ذالهندي خرف لأن امه تحكي عربي ، لكن كلما نشدها عن ابوه تقول مسافر ، يرجع إن شاء الله . رجع كوماند وسأل المفتي وانت اكيد هالحين ابوي ، قال نعم ، انا ونا ابوك عرفت بعدها إن خالك هو اللي مدبر المقلب ،
وقلت في نفسي وشوله ارجع وادخل في مشاكل مع نسيبي ، وولدي إن شاء الله ما عليه خوف بين امه واخواله
وسأله طيب وش قصة اتك صرت كاهن : قال ضحكت على ذالهنود ، تراهم ماعندك احد ، كلشي يمشيهم مثل المصاريه الين وصلت لرتبة الكاهن الأعظم لهم ، رد عليه كوماند وشلون تركت الإسلام وصرت هندوسي / قال له لا ونا ابوك
كل هاللي تشوفه مظاهر ، وإلا أنا ولله الحمد ما خليت الدين .. كوماند المسكين بدأ يبكي ويبكي ويبكي
وشلون الله يهديك مخليني طول هالسنين ولا سألت عني . رد عليه ، لا ونا ابوك انا قبل على اتصال بعمك
وقايل له لاتخلي ولدي يحتاج لاحد ، أجل ما شرى لك سيارة يوم خذت الإبتدائي ، رد عليه بلا ، قال عساك محافظ
عليها ، قال لا .. صناعتها نخره ، فحطت بها مرتين او ثلاث وعقبها للتشليح ..
لم يكن يخطر ببال كوماند أن من امامه ماهو إلا شخص مخادع ، انتحل شخصية والده وادعى ما ادعى به ،
فقط ليأخذه معه إلى الهند ، فهو بالنسبة له تجارة رابحه ... ولكن كيف عرف درمنداش ان كوماند هو من كان بداخل الصنم ؟ .. منذ اوهلة الأولى التي سمع فيها الصوت يأتي من داخل الصنم أدرك أن بداخله شخص ما ، فهو يعلم أن الصنم لا يتكلم ، ولكنه مثل غيره من الدجالين يسره أن الناس تجهل بعض الأمور وهو من يفتي لها،وعندما استدعاه الحراس وشرحوا له قصة الحيوان المخيف : الضب ، وأن من احضره امرأة هندية
اسرع الخطى ، إلى المدرسة وعلى الفور قابل المرأة الهندية وعرف منها أنها خادمة لدى عائلة سعودية طلبوا منها أن توصل المخرف للمدرسة وتضعه عند الصنم وانها لم تكن تعرف أن داخل المخرف ضب مغطى بالورود ،
إذا هذا الغلام هو ابن العائلة ، فأخذ منها بعض المعلومات عن العائلة ، وهذا ما ادى بكوماند إلى تصديقه في بعض ما رواه من اساطير .. المهم اقنع كوماند بالذهاب معه إلى الهند ، ولكن اشترط عليه أن يدخل في الصنم مرة اخرى ، وسوف يأتي إليه في اوقات مختلفة ويخرجه للراحة والإستجمام ، اثناء ساعات معينة في النهار أما في الليل فمن بعد العاشرة سيكون في فراشه نائما . كانت شروط كوماند أن يوفر له لاب توب ، ومعه سماعات
وكمية كبيرة من الفصفص والحلوى .. وواعده الكاهن بأن يوفر له كل مايريد ويسكنه في قصر كبير بدل خرابتهم في شارع الريس .... وهكذا ابتدت رحلة كوماند إلى الهند


يتبع....

ههههههههههههههههههههههههه


ههههههههههههههههههههههههههههههه


<==== منسدح ضحك

ههههههههههههههههههههههههههههههههههه

عاد تصدق يا الطائر المهاجر ما أحس إني أقشر إلا إذا قرعت ( يعني حلقت راسي بالموس )

قسم بالله يا فيه فلقات مدري وشلون جت

حتى الحلاق يقول لي وش قصتك ورى راسك كذا ؟؟

أقول له حتى أنا مستغرب

أما على طاري الجيران فـ صدقني عادي ولا هموني وأبشرك البيت إلي بجنبنا نقلوا من كثر ما أطب عليهم أخر الليل وأروعهم ( أزاعق وأركض وراهم )

لين ما مسكني أبوي وقال عسى ماشر وش فيك طاب عليهم ؟؟

قلت له : عادي جيرانا وطبيت عليهم أمزح وياهم ما فيها شيء

هههههههههههههههههههه

--------------

بس ولو يا الطائر المهاجر

يبغالك موضوع نقلع فيه سوى وإلا ؟؟


ههههههههههههههههههههههههه


تحياتي لك وإحترامي

أخوك كماند

لا تستعجل على فضحك جاي لك في الطريق .... الين استلمتك في المستشفى وإلا نسيت !!

خخخخخخخخخخخخخخ الحمدلله
ووين فضيحتك للاعضاء الثانين ترى انبسط على الفشايل خخخخخخخخ

وانتي اصبري .. جاي الدور عليك ...

آها عهود

خلك ساكته ياخوفى ان الدور عليك

انا ابتفرج وانا ساكت

وعساى اسلم

شفتى شلون

سبقنى المشرف فى الجواب

خخخخ انا اقول اسكت احسن لي خخخخخخخ
ترى خلاص ماعاد ابي اقرا ولا تكتب فضايح الاعضاء يكفي كماند خلك عليه
وحول بعد للقعقاع وبعد للخواطر مهنتي بس انا من بعيد بتفرج خخخ
وغيرهم لاتكتب عنهم شيء

مافيه استثناء حتى الخواطر مهنته
لكن انتبهوا تراي رايح اضيف على الموضوع باستمرار ، ليكون الكلام متواصل ..

مشرفنا , انا من خريجين الكتاب الاولين اللى يقولون لهم الابوان اللحم لك والعظم لنا

ارحب بتعلقات ولاكون الضحيه التاليه

بس عشان ترتاح عهود وبعدها دورى فى الضحك

واللى يضحك اخير يضحك كثير

يسلموا مشرفنا

ههههههههههههههههههههههه


يؤ أنت ألحين فضحت نفسك وطلعت أبوي

وإلا وش مخليك تستلمني ؟؟؟

أعترف

هههههههههههههههههههههه

<==== وهق المشرف

( قسم بالله ألحين صدق بديت أحس إني أقشر )

ههههههههههههههه

[quote]ولا تكتب فضايح الاعضاء يكفي كماند خلك عليه
وحول بعد للقعقاع وبعد للخواطر مهنتي بس انا من بعيد بتفرج خخخ
وغيرهم لاتكتب عنهم شيء[/quote]

عهود

خير إن شاء الله ؟؟؟

تبين فضايحنا وإلا تبين أحد يجيب طاريك ؟؟

أيه هين تراني مرتز أول واحد وحاس إن ذا الموضوع كله لعيوني ( يعني بتطول فضايحي )

ولاهيب خالصة

إلا إذا تكرم المشرف العام ( صديقي ) وحول على أحد ثاني

[quote=الخواطر مهنتى]مشرفنا , انا من خريجين الكتاب الاولين اللى يقولون لهم الابوان اللحم لك والعظم لنا

ارحب بتعلقات ولاكون الضحيه التاليه

بس عشان ترتاح عهود وبعدها دورى فى الضحك

واللى يضحك اخير يضحك كثير

يسلموا مشرفنا[/quote]

والله مدري عنك لاتكون زميلي عند المطوع الاقشر اللي انت خابر في حلة القصمان

مشرفنا وش فيك؟

الا عطنا سالفة المطوع وحكابات ايام زمانك

مشرفنا بيفضح نفسه

يالله يابو عبدالله كلنا آذان صاغيه.........

اول شئ اعترف هو أنت وإلا لا .. ترى حاسني قلبي

الصدق منجى واما مانى بكذوب

ماقد عرفتك قبل الفطاحيل

بعلم النفس ياكثر الدروب

علوم تحركش بقلوب الرجاجيل

+++++++++++++++++++++
ابو عبدالله شرف لى التعارف والتواصل معك

"انا من خريجين الكتاب الاولين اللى يقولون لهم الابوان اللحم لك والعظم لنا"
هالعبارة منتهية من زمان يمكن جيلنا كان آخر من لحق عليها ..
"بعلم النفس ياكثر الدروب علوم تحركش بقلوب الرجاجيل"
ومتخصص علم نفس ... يعني سجل واحد شايب متقاعد من قسم علم النفس

حرام عليك يابو عبدالله

تونى على التقاعد الله يهديك

بس لاتتهرب من سوالف المطوع

هذي تلقاها في قسم كشكول حيث غرفتي الخاصة وفي سوالف الطائر المهاجر في قسم السوالف
هذا واحد شرس يحط الطفل مع قطو في خيشه ويدربيه مع الدرجة ، قصته طويلة ولكن دار الزمن وجابه الله لي على رجليه..

وما امداه يجي أبو 4 شهور إلا ويلقون رايح يمشي في الشارع ، ومن مر من الناس ، رجمه بالحصاء


ههههههههههههه بسم الله والله يروع هذا وش هالنزعه العدوانيه.......

ويوم وصل سن المدرسة ، من أول يوم دخلها ، وهو لازخ بواب المدرسة بهكالحصاة والاه فاقش راسه

ههههههههههه وش قصته مع الحصاء والله اقشر من نعومه اظافره P:

الله يستر من باقي الفضايح ;)


تحيااااااااتي للجمـــــــيع

ساكت يخاف يجي دوره >> يقول الستيره زينه ومن ستر مسلما ستره الله يوم القيامه

والله يانا ناويك انت ومقالبك وحركاتك من الجفارة الين ....!!

انتبهوا تراي اضيف على الموضوع باستمرار ، ليكون الكلام متواصل

[quote]انتبهوا تراي اضيف على الموضوع باستمرار ، ليكون الكلام متواصل
[/quote]
منتبهين وانا بالذات
بس انا فضيحتي خلها بعدين مابي احد الحين يضحك علي
يمه الله يستر منك يالمشرف وش وراك من ذولي الفضايح اعرف ماتحط موضوع عبث

نحن على وشك بدء رحلة كوماند للهند

[quote]نحن على وشك بدء رحلة كوماند للهند[/quote]


على وزن تمسكوو ؟؟؟

ههههههههههههههههههههههههه

اطالب بانزال الجديد من القصه لانها مثيره خخخخخخخ

وبالفعل ذهب كوماند للهند مع الكاهن .... وجيت وخليته هناك!!

وانا
اقول كماند وشلون يعرف يتكلم هندي خخخخخخ

ولكن كانت عين الخيرة .... فكماند اصبح ذو شأن عظيم في الهند ..
استطاع أن يكون ثروة كبيرة ، وخلال عدة سنوات ، وبعد ان دارت السنين
وانا اطالع احد القنوات الهندية ، حيث استمتع بالرقص الهندي واصوات المغنين
الهنود ، فإذا بي اطالع مهرجان تكريم كبار الفنانين ، واذا برجل تقدم لاستلام
اكبر الجوائز ، تأملت فيه ، كأني اعرفه ، وإذا بالمذيع يردد اسمه : اميتاب كماند
نعم إنه هو بشحمه ولحمه ، كان مبتسماً كالعادة ، ولكنها ابتسامة مكر ، فقد
استطاع ان يضحك على الهنود ، بداية حينما كان يكلمهم من داخل الصنم ،
وحاليا كأعظم فنان انجبته الهند وهم لا يعلمون أن من انجبه هو شارع عسير في الرياض.

للحديث بقية

خخخخخخخخخخخخخ

مشرفي وربي نكته يالله بإنتظار الباقي