منتديات الفطاحله - منيع والطائر اليوم1442/6/17

منيع
لاتفوت الفرصة ترى الوقت غدار=كم حاجة ضاعت على قول بعدين
حقق مطاليبك وخل عنك الاعذار=من عاش باالا وهام مايوفي الدين

الطائر المهاجر
واترك طموحٍ زايد دون مقدار=واقنع برزقك لاتفكر بملايين

منيع
المال زينة قالها رب الابرار=وان كان عندك مال غيرك مساكين

الطائر المهاجر
كم من غنيٍ يشتكي مر الامرار= وده بصحه لو دفع ملكه الزين

منيع
حول رصيدك لاتوسوس وتحتار=وزهدبدنيا مابها لك موالين

الطائر المهاجر
اسبق على التحويل لو نصف مليار=وانفع اخيّك طير ببلا جناحين

الطائر المهاجر
طير فقير ما ملك نصف دينار=مديون ما يلقى مساعد ولا معين

منيع
اشكر ربك لاتولول ياطرار=والله يزيدك خيرمن غير تخمين

الطائر المهاجر
مانيب مثلك بالملايين محتار=ازين تصدق للفقير المسيكين

الطائر المهاجر
واعرف ترى الثروه تقصر للاعمار=كم من غني بالمرض عدة سنين

منيع
لاتجحد النعمه ولاتكون عيار=عارفك ملياردير وطبعكم شين

الطائر المهاجر
لابد تتصدّق قيل يوم الاعصار=لاجاك عزرائيل شالك بالاذنين

منيع
لاجيب طاري المال صابك ابوصفار=بلاش منها حكمتك يابوجهين

الطائر المهاجر
لالا تهرب او تدور للاعذار=عارفك ثري متزوج فوق ثنتين

الطائر المهاجر
تعبر الى البحرين مخفي للاسرار=مستغفلٍ حرمتك ماتعرف الشين

منيع
حلله ربي وانت ماعندك اخبار=والجسر ماجيته من قبل ولاالحين

منيع
راضي بوحده ولادوجت بسفار=وراك تتقلب علينا بلونين

الطائر المهاجر
عندي خبرك وعارفٍ كل ما صار=وسرك ببير ما يطوله حقودين

منيع
مسيلمة خابرك لاتبدي اشوار= خبز يدي ماحنا بناس غشيمين