[سهيل الشمري]

ألِدّ لليمْنى واشُوف البلاوِي = وارْجعْ على اليسرى واذُوق الخسايِرْ
والعُود مِنْ غِرّات الايّام ذاوِي =والحظّ مِنْ شِين التّوافِيق بايِرْ
والعظْم ماعاده للاحْمال قاوِي = والكسْر مافادتْه كِثْر الجِبايِرْ
بارتْ بنا والحرّ لجّمْه شاوِي =والذيب من غبْنه يِهِلّ العبايرْ
واللي من اوّلْ ماقِصرْ بالخطاوِي = اليوم مشْيهْ دُونه 2000 عايِر
والبهْرجهْ رزّتْ قِرِيب الهقاوِي =والخنْبقهْ شاختْ وبنّتْ عمايِرْ
والطّهْبلهْ شِيّخْ بها 1000 جاوِي = والعنْترهْ حاشهْ رِدِيّ الخبايِرْ
يالوضْع قلْ لِي قبْل كِثْر الحكاوي=ومنْ قبْل مالثّايرْ يجاوِبْه ثايِرْ
ريّحْ قهرْ مِنْ زلْزلهْ غبْن ضاوِي =وروَضْ شِواربْها وهدّ الحرايرْ
خلّ اسْحم ٍ مِنْ ضِيم الايام عاوِي=يرْجِي شِببْ مايلْعنِنّهْ دِوايِرْ
وِمْعزّز ٍ ماهُو لِزِيّ وجلاوِي =بذّال حالِفْ مايِصِرّ الصّرايِرْ
إنْ قال فِعْله قُرْب ماهُو نحاوِي = وانْ عايِبتْ يلْعنْ ثِوى كِلّ جايِرْ
يالوضْع قبلْ المُوت ياخِذْ شِقاوِي =ومِنْ قبْل يحْيا جرْح بالعُود غايِرْ
علّمْ لعُود ٍ مادهتْه البلاوِي = يِرْحمْ عِياله من غُبُون الخسايِرْ