انا شايمٍ من كلمة مالها لزوم
لفظها غثيثٍ مايحاتي توابعها
ومن المجلس اللي يدهله هابيٍ ورخوم
علوم الردى معهم وراثه ومنبعها
واحب الغَني اللي يقلّط على المقسوم
مكانه مقر للفقارى وشابعها
واحب الحليم اللي لربعه غدا زيزوم
حكيم ورزينٍ ماتهزه زوابعها
واحب السنافي دائماً وامدحه واشوم
من لسّابة المقفي والنمّه وتابعها
واحب الكِرام اللي تفرج على المهموم
تهون الكبار الا احضرو مع توابعها
ولو باتمنى منوِتي لمّها ياقوم
مزاياً حميده وحض من فيه طابعها
٢٠٢١/١/١٥م