[الطائر المهاجر]

إن ضاق صدري أسلي النفس واشغلها = بابيات شعر اسطرها على بالي
يا ما قصيدة أحاولها واحايلهــــا = لعل تعكس بعض همي وغربالـي
مع كل هم قصيدة لو أطولهــــا = تقضى القصايد وهمي واقف قبالي
يالله دخيلك همومي كيف ابدلهـــا = والوقت صعب يعاند كل رجالــي
دنيا بها الحر ما يقوى تحملهــــا = مما يشوفه ولا يدري وش التالـي
دنيا بها ابليس أبرق في مخايلهـــا= وامطر سراب يهدد كل الاجيالــي
والناس تركض وتزرع في مجاهلهـا = وكل مع الخيل يا شقرا بالاعجالي
لا فكر ، لا حس ، لا دين يعقلهـــا = ولا خوف من ربها او نار واهــوالي
مكر وخداع ونفاق في تعاملهـــا = والدين اصبح تجارة بعض الانذالي
والواسطة علة والوقت سهلهــــا = ومن دونها ضايع حقك بالاهمالـي
ولوك تمهلت ما تبغي تشغلهــــا = تلقى حصاني تعقد كل حلالـــي
باسم القوانين كل صار يفتلهــــا = واذا اشتهى عطل القانون بالحـالي
وكل يبي فوق لو نفسه يرذلهــــا = حتى ولو ضامره باعه ولايبالي
وقت الحصاني تبختر في تدللهـــا = والذيب جايع وتايه في الخلا الخالي
والبوم غرد يغني في خمايلهــــا = والحر يصلى من همومه بلا صالـي
هذي هي الحال عل الله يعدلهــــا = وتصحى الضماير بعد نوم ولو طالي
شيطان هالوقت نفسي ما تحملهــا = ما دام ترفض تسير بدرب الاوحالي
نفسي عزيزة ولا يقدر يذللهــــا = لو عشت باق العمر في أضيق الحالي
النفس لا برمجت صعب تعدلهـــا = ونفسي على الحق منهاج ومنوالـي
مانيب من يشري الدنيا يفضلــهـا= دنيا بلا دين سجن كله اغلالــــي
احمل جروحي على كفي واحولهـــا = قوات ردع على شيطان عذالــــي
ثابت على مبدئي ربي يكملهــــا= حياة حر رفيع الراس بالعالـــــي