في رد له على صديقه عبدالله محمد السياري
ذعذع وأنا بالجزاير من هبوب الوجد نسناس=وسما بي الشعر وأطلق همته عقب احتباسي
ما بين هاك السهول الطيبة وجبال الاوراس=قريت خط الرفيق اللي تزايد به حماسي
من شاعر له بقلبي منزل سوس على ساس=يا ما شكالي هموم يطردن عنه النعاسي
وإلى بغى يدمج الدعوى ويبعد عنه الأرماس=سوى قضية يبي جوي يجي فيه التماسي
حاشاك منتب يبو خالد على الغرات بلاس=انت الصفي الوفي ولا تجي درب التباسي
لاشك من سمع هرجك لبس درع والطاس=وفصل ثياب من البهتان لو ما هي مقاسي
ما ثور الحرب بين كليب و المقرود جساس=إلا كلام بسيط وصار له راس وساسي
لا تنصح الناس درب العشق ما به غير الإفلاس=من جنبه صار سالم والمولع به يداسي
رست سفينة غرامك في مكان ما به او ناس=وإلا الحميدي مسافر ما بعد دور مراسي
وانا تخيرت عن باب الطمع باب من الياس=ومشيت في الدرب الابلج ما تعرضت الهراسي
من عاش ما حط بالدنيا دليل وحط نبراس=ما ادرك مرامه وشرب من النكد عشرين كاسي