ابدى بذكر اللي عزيـز الجلالـي = الواحد القهار ما غيـره ارجيـه
راضي بما قـدّر عليـه اتكالـي = اللي عليمٍ بي وما كنـت ناويـه
مشيت في دربٍ احسبـه عدالـي = واثره طويل المن تساهل مماشيه
حتى لقيت اني بصحـرا لحالـي = بين المجنن صاحي مادري فيـه
وشلون ابذكر يالملا ماجرى لـي = وشلون ابنسى جرح فالقلب يكويه
من وين اببدا بقصـةٍ كالخيالـي = والموت حولي واضحاتٍ خطاويه
قصـة عـذابٍ طاولتنـي ليالـي = والخاتمه حي اندفن محد يرثيـه
ضيّعت انا حب القلوب المثالي = واهديتها للي تعالت مساويه
من عقب مابعته زمان ٍ مضا لي = بين السراير مقعدي واهني فيه
قصة عذاب ٍ بالغثا قد صفا لي = والخاتمه سوء ٍ ونا احصد مجانيه
حبيت لي ريم ٍ غزتني غزالي = بين القوافي اشتري ما يهنّــيه
واهديتها عذب الحروف الغوالي = وارخصت نفسي للشعر علّ اداويه
كنت اكتب الجمله ونا انطر بدالي = من طيّب الجمله يسامر مخاويه
حتى تعلق ضامري بالجمالي = واصبحت اسيره والرسن في اياديه
ابي اقاوم غير واعزتا لي = مقدر يفارقني ولاقدر تخطيه
قلت اطلبه من والده بالحلالي = وجاني الجواب الرفض ماهوب لبيه
فقير معدم والشهاده قبالي= ما تسقي العطشان جرعة امانيه
تخصصي في الشعر ماله مجالي= إلا ببيعه للذي يهتوي فيه
البيت بريالين لا صار غالي = والاّ بنص ريال لا قل شاريه
وبعت القوافي لجل اتم المنالي = واحضا بها يومي احقق امانيه
لين ارتمى هاك العدد بالهمالي = ثمّ ارتفع سوقي وسالت مجاريه
وجاد الصبر في خافقي واعتلالي= وشافت عيوني يوم الامس اياديه
وفاق الأمل ماكنت احسبه محالي = خمسة ألوف ٍ وافق ٍ في مراجيه
وكنت احسب اني لا حضيت المطالي = بأسعد بدنيا مابها منهو بهجيه