[محمد عبدالعزيز الغنام]

أسعد الله أوقاتكم بكل خير،
في برنامج شاعر المليون 4 وفي جولته الأولى التي أقيمت في عاصمة الثقافة والتراث "أبو ظبي"
تواجدت وشاركت بنص عاطفي أجازتني اللجنة عليه بالإجماع،
هنا اطرح النص بين أيديكم لنقده وأتمنى أن يحوز على رضاكم.


------------

.،:* العالم=السحري *:،.
بداني ما بدا لي يوم غرد بالفضاء عصفور=وجمّع وحدتي ويا المفارق واشتكى صبري
هبوب الغرب غلابة تفتت قلبي المكسور=تعبت أقلّط الفرقا وأعشيّها على صدري
تعبت أجامل العالم قوي البأس فعل وشور=وأنا تملاني الآهات من ضفري إلى ضفري
ألا يالله يا شافي مريضك والسبب دكتور=تخلي سبّتي شوفة فقيدة قلبي وفكري
فتون" كل ما آخذ دقيقة من وراء السور=أسج الفكر وأتذكّر جلالة وجهها البدري
وأعيد بداخلي ذكرى حكايا ليلنا الممطور=يهل الدمع من غيمة ويسقي حبنا العذري
جمعنا وابتدت قصة كتبها حظنا المغمور=وعنون قصتي معها (جنون العالم السحري)
بداية انتهت فيها مبادي شخصي المغرور=وصرت العاشق المغرم أسير المبسم الخمري
زمان" كانت توصّي خفوقي لا يجيه البور=تقول أبغاك (توعدني) وقولك دايما" مقري
كتبت الوعد قبل اسمع وقلت ادللي يا حور=علا أمرك على أمري من أول ما ابتدا أمري
بنيت لحبنا موطن به الأحكام والدستور=مجرد جملة وحدة ((احبّك يا بعد عمري))
اغنّي بك واغنّي لك قصايد كلها بلور=تنيري ليلتك فيها الين الليل بك يسري
على مينائي الغالي تجيني مسرح وجمهور=واسلّي قلبك الخالي وأصافي نهري وبحري
وردت بس!! يا شاعر ولا ندري عن المستور=كلامك انرسم احمر وأنا اللي اطلبه زهري
آنا أبغى (تواعدني) على مينائك المشهور=وأمانة صلح آذانك عشان أشممك عطري
ولكن راحت وراحت حياتي والحزن مسرور=حسافة ودي افديها حياتي وافخر بعذري
فداني كل ما فيها من أول نور لآخر نور=إذا شمس البشر غابت أنا شمسي وسط حجري
فداها كل ما املك وما لا املكه مقدور=عشان عيونها اقدر على ما اللي ما هو بقدري
صحيح البعد يمنعني وكل الدرب ظلم وجور=وأنا خابر جزا الفرحة إذا كانت على بدري
ولكن صبحنا طول وغرد بالحشا عصفور=متى ليل الهنا يرجع مثل أول على خبري
متى مدري متى لكن مصير إن الزمان يدور=مدام الحظ كاتبها (جنون العالم السحري)

وسلامتكم،،

أخوكم الشاعر: محمد عبدالعزيز الغنام.