يسعدني ان اشارك معكم بهذه القصيدة وهي قصيدة موقف وذلك اني كنت في مكان مزدحم بالناس وجاءت فتاة جميلة ودفعتني وقالت/ لو سمحت ياجد ، وقد اثارت هذه الكلمة مشاعري واسندت القصيدة الى الشاعر صالح العديني الحويطي واليكم القصيدة
عزيل قلبي يالعديني من الود = يوم الهوى دالت عليه جيوشه
جيش الغرام اللي لقلبي تعمد = قايد جيوش الحب جاني يحوشه
يوم التفت لي داعج العين والتد = ثم طالعت بعيون سودا بشوشه
الرمش مرخيته على زاهي الخد = مثل المظلة فوق خده رموشه
وا صبحت من ماشفت فاهي مبلد = كني صغير تاه في وسط طوشه
وقلت السلام وقالت اهلين ياجد = ويش فيك يا الشايب عيونك طشوشه
هوانت ضايع والا مضيع الك احد = ولا عيونك صار فيها غبوشه
قلت العفو يا زاهي الزين والقد = ماغير شوفك صاب فكري بدوشه
وتوي دريت أن الهوىجد في جد = وانا احسب انه كان حاجه فشوشه
ليت الزمن يرجع الى الخلف ويعد = وارجع ولد عشرين منفوش شوشه
حتى اخذك يازين علم موكد = بالطيب يالمجمول ماهو بهوشه
وكل لعذارى في زواجي تزعرد = واجلس انا وياك في وسط كوشه
وا عزم شعار الملاعب هل الرد = واحجز لهم يومين قصر بحوشه
لكن قولة ليت ماتبني الغد = واللي مضى من العمر ولت طروشه
ويش رايك باللي صار يابو محمد = يالطيب اللي كل طيب يحوشه
لوني صبغت الشيب باللون الاسود = هو ينفع الرجال دقن مغشوشه ؟