منتديات الفطاحله - عرض مشاركة واحدة - دليل اسبرانزا للكاميرات الرقمية

ابو ياسر · 07-09-2006, 02:27 AM

السلام عليكم ورحمة الله

دليل اسبرانزا للكاميرات الرقمية
Esperanza’s Digital Camera Guide

إنا مثلي مثل غالبيتكم ماني محترف تصوير ولا اعرف في الكاميرات و بالذات الرقمية أكثر من إني اضغط الزر و الكاميرا تصور ، و مع كثر التصوير عرفت بعض الأشياء الإضافية مثل انه كل ما ارتفع الميقابكسل في الكاميرا فهي تكون أفضل.

لكن حتى الميقابكسل إذا إنا فكرت فيه وش يعني؟ ، هذا غير انه أكيد في مواصفات إضافية في الكاميرا يخليها تطلع الصور بشكل أفضل ، بعدين بغض النظر عن الشركة المصنعة للكاميرا ليه بعض الكاميرات أغلا من غيرها.

الحقيقة كان في بالي الكثير من التساؤلات لذلك قررت إني اخذ لي رحلة عبر الانترنت في عالم الكاميرات الرقمية.

وما تتصورون كثر استفدت من الرحلة هذي اللي أخذت مني أكثر من 4 أيام متتالية بما يقارب 6 ساعات في اليوم.

المهم اقدر أقول إني ألان وبعد الرحلة هذي صرت خبير صغير في عالم الكاميرات الرقمية ولأني أحب أفيد الغير بما اعرف قررت اكتب لكم هذا الموضوع عشان تستفيدون انتم معي فيه.

أهم شي إذا احد من فطاحلة التصوير مر على هالموضوع ولقاني غلطان في أي شي إنا كاتبه ينبهني وله الشكر مقدماً.

أهم مواصفات الكاميرا الرقمية:

1) درجة وضوح الصورة
Megapixel

في السابق يوم كان الواحد مننا يشتري كأميرة كان دائم يحتار و يسأل وش أفضل كاميرا اشتريها و بعد ما يشتري الكاميرا يحتار و يقول وش أفضل فلم اقدر اشتريه عشان تطلع صوري مضبوطة وزينة ، في الكاميرات الرقمية معاد فيه فلم وصارت الكاميرا هي في نفس الوقت الفلم ، لذلك نوع الكاميرا هو اللي يحدد جودة الصور لوحده.

في الكاميرات الرقمية يتم تسجيل ألصوره بواسطة ما يعرف بالبكسل الموجود على حساس عدسة الكاميرا ، لذلك عدد البكسلات هو اللي يحدد جودة ألصوره.
لذلك عندما نقول 1 أو 2 أو 3 ميقابيكسل فنحن نقصد مليون و مليونين و ثلاثة ملايين بكسل...الخ في البوصة المربعة (ميقا تعني مليون) وبمعنى أخر عدد البكسلات (النقاط) في كل بوصة مربعة مكونة للصورة بالطول و العرض هي اللي تحدد جودة ألصوره ، فكلما كانت عدد البكسلات اكبر كلما كان التقاط صور بحجم اكبر ممكن و كانت ألصوره أكثر وضوح.

فيه شي مهم بالنسبة لحجم ألصوره ، فكلمى كان بالإمكان التقاط صور اكبر كلمى كانت درجة وضوح ألصوره أفضل عند تصغيرها.

فلو مثلاً التقطنا صوره بحجم 768x1024 بكسل و صغرناها لحجم 480x640 بكسل تكون ألصوره أوضح و أفضل من لو التقطناها بحجم 480x640 بكسل.
و كل ما كانت ألصوره اكبر كل ما كانت درجة وضوحها أفضل عند تصغيرها و كذلك عند طباعتها.
و ميزه أخرى في التقاط صور بإحجام كبيرة هو انك تكون قادر على اقتطاع جزء من ألصوره و إظهاره بشكل واضح وكأنك تقرب ألصوره.

انا اتعقد بان كاميرا بدرجة وضوح 4 الي 6 ميقابكسل كافيه جداً لمصور هاوي.

امتدادات ألصوره الملتقطة
Image Format

من الأشياء المهمة أيضا عند شرا كاميرا رقمية هو امتداد الصور اللي يتم التقاطها ، غالبية الكاميرات الرقمية الموجودة في السوق تلتقط الصور بامتداد JPEG ، و النوع هذا من الامتدادات يتم استخدامه في الكاميرات الرقمية لأنه يخرج صور بحجم اصغر من الامتدادات الأخرى فينتج عن الشي هذا قلة الوقت ألازم لحفظ ألصوره بعد التقاطها بالإضافة إلي انه ما يأخذ مساحة كبيره في ذاكرة الكاميرا.
لكن مشكلة امتدادات صور ال JPEG إن درجة وضوح الصور و ألوانها تكون اقل جودة من بعض الامتدادات الثانية ، طبعاً الفرق بسيط جداً وقد لا يعني لمستخدم الكاميرا الهاوي كثير و التركيز على الخاصية هذا يكون لدى محترفي التصوير اللي يستخدمون صورهم للطباعة بالدرجة الأولي.

لكن هذا طبعاً ما يمنع إن الواحد يبحث عن كميرا تعطيها مجال أوسع في امتدادات الصور ولو على الأقل امتدادين مختلفة.

سرعة فتح وغلق عدسة التصوير
Shutter Speed

و المقصود هنا هو فترة بقاء عدسة الكاميرا مفتوحة من لحضه ضغطك على زر التصوير حتى لحضه التقاط الكاميرا للصورة وتخزينها، الشي هذا مهم لأنه كل ما كانت سرعة فتح و غلق عدسة التصوير عالي كل ما كانت فرص خروج ألصوره بشكل مرتعش اقل ، و هذا ينطبق اكثر عند تصوير أجسام متحركة أو عندما يتم التقاط ألصوره و المصور نفسه يتحرك وغير ثابت.

في بيئة مستقره (في النهار وبدون وجود ريح و يتم تصوير جسم ثابت و المصور نفسه ثابت وغير متحرك) اغلب الناس يكونون قادرين على مسك الكاميرا بشكل ثابت تماماً بحيث يتجنبون حركتها فتظهر الصور بشكل صافي وغير مرتعش و في العادة تكون سرعة التقاط ألصوره في حدود 1/60 ثانية. (60 جزء من الثانية)
و ممكن تكون أيضا الكاميرا ثابتة بشكل كبير و تظهر الصور بشكل جيد عند سرعة تصوير تقل إلي 1/30 ثانية وفي الغالب عند السرعة هذي يكون المصور إما يستخدم قاعدة للكاميرا أو يقوم بتثبيتها بشكل تام بكلتا يديه ، لكن وبصفة عامه المصور بحاجة إ;لى قاعدة لتثبيت الكاميرا اللي تقل سرعة التقاط ألصوره فيها عن 1/60 ثانية.

لذلك وبناً على ما ذكرت أعلاه هواءه التصوير وليس المحترفين يجب إن يحرصوا دائم على شراء الكاميرا اللي يتوفر فيها سرعة عالية عند التقاط ألصوره ، الأفضل هو إن يتم شراء كاميرا بسرعة تصوير لا تقل عن 1/350 ثانية فعند مثل هذه السرعة وعند التقاط الصور فان احتمالية ظهور الصور بشكل مرتعش تختفي بشكل تام و يكون بالإمكان التقاط صور أجسام متحركة وكأنها شبه ثابتة و كذلك التقاط صور غير مرتعشة و المصور نفسه في حركه اثنا التقاط ألصوره.

لكن حطو في بالكم انه كل ما زادت سرعة فتح عدسة الكاميرا و التقاط ألصوره ومن ثم إغلاقها كل ما كان من الصعب التقاط صور ليلية واضحة ، و السبب في الشي هذا هو إن العدسة حقة الكاميرا تحتاج إلي وقت أطول عشان تلتقط ألصوره الليلية منها في النهار.

و عشان يوضح لكم الكلام اللي إنا ذكرته بشكل أفضل هذه مجموعة من الصور التوضيحية:

الصور هذي لسيارة متحركة و استخدمت كاميرا بسرعة تصوير مقدارها 1/45 ، ومثل ما هو واضح ألصوره ظهرت بشكل مغبش و واضح إن السيارة تتحرك.

الصور هذي هي لنفس السيارة ولكن تم استخدام كاميرا بسرعة تصوير 1/350 ، و مع إن السيارة كانت تتحرك لحضه التقاط ألصوره إلا أنها تبدو في ألصوره و كأنها واقفة و ألصوره واضحة تماماً ، لكن دققو أكثر في كفرات السيارة من الواضح أنها متحركة.

هذي نفس السيارة و مثل ماهو واضح فالكفرات في واضع ثابت تماماً مع إن السيارة كانت تتحرك لحضه التقاط ألصوره ، الكاميرا المستخدمة لالتقاط ألصوره كانت سرعة التصوير فيها 1/1000 .

لذلك كل ما كانت سرعة تصوير الكاميرا عالية كل ما كانت ألصوره أكثر صفاء و وضوح وكأنها حقيقية.

و هذي مجموعة من الصور المتلاحقة اللي توضح لكم شكل الصور اذا تم التقاطها بكاميرات ذات سرعة فتح وغلق عدسة مختلفة ، في أسفل الزاوية اليمين يظهر لكم سرعة فتح و غلق عدسة الكاميرا ، أول صوره و اللي فيه الشلال بشكل رهيب طلعت لان ألصوره كانت بسرعة 1 ثانية ، إ;ما ألصوره اللي بعدها فكانت بسرعة 1/3 (يعني 3 أجزاء من الثانية) ، و ألصوره الثالثة كانت بسرعة 1/30 و اللي بعدها بسرعة 1/200 و اللي بعدها 1/800 ، و مثل منتم شايفين من ألصوره هذي فكلما كانت سرعة فتح و غلق عدسة الكاميرا أسرع كلما كانت ألصوره تظهر بشكل حقيقي ، لكن في نفس الوقت فانه كلما كانت سرعة العدسة اقل كانت ألصوره تظهر بشكل جميل و كأنها مرسومه رسم.

إ;ما في التصوير الليلي و كما سبق وذكرت فانه إذا كانت سرعة فتح وغلق عدسة الكاميرا اقل كلما كانت ألصوره أكثر وضوح، وعشان تعرفون الفرق هذي بعض الصور التوضيحية:

هذي صوره تم التقاطها بالليل و كانت سرعة فتح وغلق عدسة الكاميرا 1/8 ، ومثل ماهو واضح فان ألصوره طلعت مظلمة وغير واضحة و السبب هو إن العدسة أغلقت قبل ما تتمكن من امتصاص جميع الأضواء الموجودة.

ألصوره هذي هي نفس السابقة ومثل منتم شايفين فهي طلعت جميلة و واضحة ، السبب في وضوح ألصوره هو لان العدسة بقة مفتوحة لمدة 10 ثواني كاملة فكان الوقت كافي لامتصاص الأضواء بشكل جميل، طبعاً من الصعب جداً خروج صوره بالشكل هذا و العدسة مفتوحة للمدة هذي إذا ما استخدم المصور قاعدة للكاميرا.

و هذا مثال أخير لنوع من الصور اللي كان دائم يدهشني و كنت أتسأل كيفية تصويره:

الموضوع سهل ، لازم تبقى عدسة الكاميرا مفتوحة لمدة لا تقل عن 20 ثانية ، طبعاً تصوير ألصوره هذي مستحيل بدون قاعدة.

بصفة عامه يفضل دائم شراء كاميرا يكون فيها سرعة فتح و غلق عدسة التصوير متنوعة و ممكن الواحد يختارها إما بنفسه أو بواسطة أوضاع التصوير المختلفة.

نصيحة سريعة:

إذا الواحد حب يصور صوره تتطلب فتح عدسة الكاميرا لمدة طويلة مثل صورة الشلال أو مثل الصور الليلية السابقة و الكاميرا اللي معه مافيها السرعة المنخفضة الأزمة لمثل الصور هذي فهو ممكن يقوم بالشي هذا بشكل يدوي مع وجود قاعدة للكاميرا ، فقط اضغط زر التصوير على الكاميرا نصف ضغطه (إذا ضغطت نصف ضغطة تنفتح العدسة بدون ما تلتقط ألصوره) وخلك ماسك الزر كثر الوقت ألازم اللي أنت تحتاجه و بعدين كمل ضغط زر التصوير و انشاءالله بتطلع لكم الصور كما هو في الأمثلة السابقة.

أوضاع التصوير المختلفة
Modes

أيضا من الأشياء المهم وجودها في الكاميرا الرقمية هو توفر أوضاع تصوير مختلفة فيها مثل التصوير الليلي و التصوير الذاتي (يعني توقت الكاميرا و تخليها و تحطها إمامك و تخليها تصورك) و تصوير المناظر الطبيعية و تصوير الشواطئ و الثلوج و غروب الشمس و التصوير من خلف الزجاج وما شابه ذلك من أوضاع التصوير المختلفة.
و بالمناسبة فان أوضاع التصوير المختلفة ليست إ;لا عملية إبطاء و تسريع لعملية فتح وغلق عدسة الكاميرا.

عدسة التقريب الرقمي و البصري (الزوم)
Digital & Optical Zoom

عدست الزوم الرقمي هي الحقيقة لعبه وتمويه يستخدمه صناع الكاميرات لان الزوم الرقمي و بعكس الزوم البصري حتى لو استخدمته فنت بتحصل على صوره قد تبدو اقرب لكنها في الواقع ليست إلا جزء صغير من أي صوره تلتقطها وكأنه تم اقتطاعها من ألصوره الأصلية بدون زوم وتم تكبيرة ، سوق الكاميرات يحتوي ألان على عدسات زوم من 10X الي 60X (يعني تقرب ألصوره 10 الى 60 مره)، وعشان تفهمون اللي إنا اقصده بشكل أوضح هذي بعض الصور الإرشادية:

ألصوره هذي تم التقاطها بكاميرا 6 بكسل و حجم ألصوره الأصلي هو 3024 x 2016 وتم تصغيرها إلي حجم 267x400

و ألصوره هذي ورغم انه قد يبدو بأنه تم التقاطها باستخدام الزوم إلا أنها في الحقيقة ليست إلا نفس ألصوره السابقة بعد إن تم اقتطاع هذا الجزء منها و جعله بنفس حجم ألصوره السابقة ، فلو تم استخدام أقصى زوم في الكاميرا لكانت ألصوره اللي بتطلع هي بنفس درجة وضوح ألصوره هذي.

أكيد السؤال اللي يجي في بالكم هو كيف تطلع صور بزوم حقيقي ، و الواقع هو إن فيه نوعين من الزوم في الوقت الحالي في الكاميرات ، الزوم الرقمي و اللي إنا شرحته فوق و الزوم البصري و اللي هو كأنك تنظر عبر تلسكوب تقريب ، لذلك إذا كان يهمك تصوير الأشياء البعيدة احرصوا على الزوم البصري (optical zoom).

فيه جيل جديد من الكاميرات بدت تستخدم شي اسمه الزوم الذكي (Smart Zoom) و النوع هذا من الزوم عشان يقرب لك ألصوره بشكل حقيقي يستلزم من المصور عدم التقاط ألصوره بأقصى ابعاد صوره موجود في الكاميرا ، مثلاً كاميرا 5 ميقابكسل تلتقط صور بابعاد أقصى مقداره 1944x2592، لكن إذا ضبطنا قياس التقاط الصور و نزلناه الى حجم 480x640 كان بالإمكان التركيز على نقطه محدده في ألصوره و من ثم تكبيرها لتظهر بشكل أوضح ، وهذى صور تشرح الشي هذا:

ألصوره هذي تم التقاطها بكاميرا 5 ميقابكسل وبابعاد 480x640 ، لو تم اقتطاع الجزء اللي حول الباب في ألصوره و من ثم تم تكبيره لظهرت المنطقة المقتطعة و بإبعاد 480x640 كما هو في ألصوره التالية

تصوير فيديو برؤية كبيرة

تقريباً كل كاميرات التصوير الرقمية يكون باستطاعتها تصوير أفلام فيديو إ;ما طويلة أو قصيرة وكل هذا يعتمد على سعة شريحة التخزين في الكاميرا مع العلم بان اغلب الكاميرات تأتي بشرائح صغيرة ولكن بالإمكان دائماً شراء شرائح بسعة اكبر ، ما يهم لمن يرغب في موضوع تصوير الفيديو هو ظهور ما يتم تصويره بحجم كبير بقدر المستطاع و يكون أيضا أجمل إذا الواحد كان قادر يتحكم بحجم تصوير ورؤية أفلام الفيديو عند تصويرها.
إنا اعتقد إن الحجم الإ;دناء المفضل هو الروية بشاشة حجمها لا يقل عن 480x640.
بس حطو في بالكم انه كل ما كبر حجم رؤية أفلام الفيديو كل ما تم استهلاك شريحة التخزين بشكل أسرع.

لذلك أهم نقاط يجب مراعاتها عند شراء كاميرا رقمية هي كما يلي:

- الميقابكسل ، فكلما ارتفع عدد الميقابكسل في الكاميرا كانت الصور أوضح و اكبر.
- امتدادات الصور، احرصوا إذا أمكن انه يكون فيه أكثر من امتداد واحد للصور الملتقطة.
- تنوع واسع في سرعة التقاط الكاميرا للصورة ، فكلما كانت السرعة أعلا كانت ألصوره بدون تغبيش و تظهر بشكل أكثر حقيقية ، الأفضل دائما هو سرعات تزيد عن 1/350، وكلما كانت السرعة اقل كان بالإمكان التقاط صور ليلية واضحة ، و الأفضل هو سرعة تصل إلي 4 ثواني.
- أوضاع التصوير المختلفة ، هذي تعتبر ميزه مهمة في الكاميرا و بالذات فيما يخص التصوير الشخصي و التصوير الليلي.
- عدسة التقريب البصرية ، الزوم البصري قد يكون مهم فقط لمحترفي التصوير أكثر من الهواة.
- تصوير فيديو برؤية كبيرة لحجم الصور.
- وزن الكاميرا مهم أيضا فالوزن مرتبط بالحجم و كل ما صغر الحجم كان التعامل مع الكاميرا و شيلها أسهل ، إنا أشور بالكاميرات اللي يقل وزنها عن 200 جرام لأنه بالوزن هذا يكون بالإمكان وضع الكاميرا في جيب البنطلون للمسافر أو داخل كف اليد.

______________

ألان و بعد ما عطيتكم معلومات عن كاميرات التصوير الرقمي و المواصفات الأفضل فيها ، ولاني ادري ان اغلبكم ما يدري وش الطبخة فنا ممكن احدد لكم انسب كاميرا لكم إذا جاوبتو على الأسئلة التالية:

سؤال: من متى تستخدم كاميرا رقمية

1) من مدة طويلة حتى اني شريت كميرا رقمية اول ما نزلت في السوق.
2) من مدة ماهي قصيرة حتى اني الي الان غيرت الكاميرا مرتين او ثلاث مرات.
3) من مدة بسيطة، و انا الان املك كميرا رقمية .
4) ما عمري شريت كاميرا رقمية ولا اعرف عن الكاميرات هذي شي.

سؤال: ماهي اهم خاصية في الكامير الرقمية بالنسبة لك

1) لازم تكون صغيرة وحليوه او ما يخالف لو تكون باللوان تتناسب مع فستاني
2) لازم يكون استخدامها سهل فنا والله ما اعرف الا اضغط زر التصوير.
3) ابغاها بشاشة كبيرة قد تلفزيون بيتنا و تكون الصور جميلة.
4) مرونة الاستخدام ، ابغى التحكم فيها يكون يدوي و اقدر أبدل بين عدسات الكاميرا المختلفة.

سؤال: كم تبي حجم الصور يكون

1) ما يهم كثير ، انا احرص دائم على تصغير الصور عشان استخدمها في اليميل و على الانترنت ولا احرص على طباعتها.
2) انا احرص على الطباعة ، بس ما عندي مشكلة لو كان اقصى حجم طباعة في حدود 5x7.
3) ابغى صور كبيره عشان تكون واضحة في الطباعة.
4) ابغى صور عملاقة عشان اجلد بها جدران غرفتي.

سؤال: كم ممكن تدفع في الكاميرا

1) ما بين 400 و 750 ريال (كل دراهمي خسرتها في الاسهم)
2) ما بين 750 و 1000 ريال (ممكن اجطل من اهلى المبلغ هذا)
3) ما بين 1000 و 2000 ريال (ايه ما يخالف عندي دراهم تحت البلاطه)
4) ما بين 2000 و 4000 ريال (الحمدلله الخير واجد واهم شي الواحد يبسط نفسه)

سؤال: كم يبلغ سعة التخزين على كمبيوترك

1) كبيرة مره ، من كبرها اقدر اخزن اخوي الصغير فيه.
2) كبيره الي حد ما ، والله اني معبي الكمبيوتر افلام قراندايزر و هايدي.
3) عادية ، و الحقيقة مدري لاني بس اعرف اشغل الكمبيوتر.
4) صغيرة ، لعبو على حقين محل الكمبيوترات.

سؤال: وش كثر تستخدم الكاميرا الرقمية

1) في المناسبات الخاصة و السفر.
2) تقريباً مره كل كم اسبوع.
3) بشكل منتظم.
4) دائماً ، وفي الواقع الكامير بين يديني الحين وقاعد اصور بها

سؤال: وش اهمية جودة الصور بالنسبة لك

1) مهم جداً ، انا محترف تصوير قد الدنيا
2) مهم الي حد ما ، انا في طريقي للاحتراف
3) ابي الصور يكون شكلها جميل وبس ، انا وش لي في وجع الراس
4) ما يهمني كثير دام اني اقدر استمتع بالصور و افرجها على اهلي وربعي.

________________

اما اذا الواحد منكم يقول قلعتك يا اسبرانزا و انا اعرف في الكاميرات الرقمية اكثر منك فنت ممكن تطلع على معلومات عن افضل الكاميرات الرقمية الموجوده في السوق من حيث جودة صورها (الميقابكسل) ، فقط اضغط على رابط جودة الصور اللي في بالك:

افضل كاميرات 3 ميقابيكسل

افضل كاميرات 4 ميقابيكسل

افضل كاميرات 5 ميقابكسل

افضل كاميرات 6 ميقابكسل

افضل كاميرات 7 ميقابكسل

افضل كاميرات 8 ميقابكسل

افضل كاميرات 9 ميقابكسل