يعين الله يادنيا تغيّر كنها الطاروق= بيد مستشعرٍ يجهل اصول الشعر وفنونه
كتب ابيات من بوحه بحس العاشق المعشوق= يحسبنه على اليمه مادام توافق لحونه
واذا منه نشرها في الفطاحل يحسبه في السوق= يقال ارجع ودققها تراها غير موزونه
وانا عمري قصيده في يد المستشعر المطفوق= مضى ماهو على اليمه بوقتٍ واضح جنونه
احاول قد ما اقدر ارقّع حظي المشقوق= ابي لو ينستر مره ويكفيني من شطونه
يعاملني مثل غيري لو انه ما يعرف الذوق= ولا يحرك همومٍ ساكنه بالقلب مدفونه
الا ياعمري الضايع الا ياقلبي المحروق = متى اصحى واشوف الحظ والبسمات بعيونه
تعبت اشكي من الأيام تحطمني بليا رفوق= وانا صابر وصاح الصبر في عبرات مكنونه
يقول اتعبتني غيّر ولا عمرك تناظر فوق= وخل الفوق للي ساير التيار ومجونه
لبس ثوب المكر وافلح بكسب الطاق والمطبوق= ومثلك رجعي المبدأ تعيش وتحيا بسجونه
فخله ينفعك في وقت اعلن هجمته بعقوق= تنكر للمبادي اللي شرعها الله في كونه