تدري وش اللي يفرق الحي من ميت = انه بنبضٍ ينعرف من عروقه
نبضه مبادي في ضميره بتثبيت = يأبى المذله لو يوقّف خفوقه
عزيز نفس رافع الراس له صيت= يهابه الأنذال لا دار موقه
قانع برزقه ماركض خلف هلفيت = حتى ولو ضاعت بوقته حقوقه
والميت ميّت ضامره لاجل حلتيت = عبدٍ ولوهو حر لو قام سوقه
يركض ورا السارق بمدحٍ وتربيت = ويقول ياعمي ابي منك حوقه
يبيع كلش لاجل يشرى له البيت = هديةٍ من خادمٍ صار فوقه
يطلبه تال الليل ويقول له جيت = خدامك اللي شوفته لك ريوقه
من يوم جانا النفط في غير توقيت= صرنا خيولٍ للدراهم سبوقه
لا دين لا مبدا نعيش بتوابيت = جسم بليا روح تروي عذوقه
واللي على المبدأ حياته بتشويت= من كل واوي بالرماح الدروقه
يا حيسفا العربان صاروا خراتيت = كلٍ يبي مرعى يناسب لذوقه
خذوا قشور الغرب فكرٍ وشربيت = ونسوا جدودٍ مجدهم له بروقه
شروا مذلتهم وصاروا مصاليت = مطمع حصاني خادعاتٍ شبوقه
من دون دينٍ صادق بكل تثبيت = ماللعرب هالوقت ايّات فوقه