من شعراء الأحساء ولادة والحريق أصلاً عاصر شاعر الأحساء سليم بن عبدالحي وتوفي 1280هـ
صاحب قصيدة :البارحه يوم الخلايق نياما ، المنسوبة خطأ لنمر العدوان
نهج محمد المسلم نهج محيسن الهزاني في بعض اشعاره ، ولا غرابة في ذلك فالأثنين من بلدة واحده ، وان كان محمد قد رحل مع والديه إلى الأحساء فليس هناك ما يدل على انقطاعها من الإتصال ببلدتهما الأصليه مثل الكثير من اهالي نجد ، وقد توفرت لنا الكثير من الأدلة التي تؤكد ان القصيدة له ، وقد تمت مناقشة هذه الأدلة في الروابط التالية:
http://www.alriyadh.com/2007/09/19/article280710.html
http://www.alriyadh.com/2007/09/16/article279976.html
http://www.alwatan.com.kw/Default.as...4230&pageId=69
البـارحـة يـوم الخـلايـق نيـاما=بيّحـت من كثر البكـا كل مكنـون
قمت اتوجد وانثر الماء على ما =من موق عين دمعها كان مخزون
لـي ونّـهٍ مـن سمعـها ما ينـاما=ونّة صويبٍ بين الاضـلاع مطعـون
والاّ كمـا ونّـة كسيـر الســلاما=خلـوه ربعـه للمعاديـن مرهون
فـي ساعـةٍ قـل الرجـا والمحـاما=فيمـا يطالـع يومهـم عنـه يقفـون
وإلا كما ونة رعابي الحماما =غاد ذكرها والقوانيص يرمون
تسمـع لهـا بيـن الجرايـد حطـاما=من نوحها تدعـى المواليـف يبكـون
والاّ خـلـوجٍ سـابـتٍ للهـيـاما=على حوارٍ ضايـعٍ فى ضحا الكـون
والاّ حــوارٍ نشقــوه الشمــاما=وأمه تطالـع يـوم جـرّوه بعيـون
يردون مثله والظوامي سياما =ترزموا معها وقامو يحنون
والاّ رضيـعٍ جـرّعـوه الفطــاما=أمه غـدت قبـل أربعينـه يتمّـون
عليـك ياللي شرب كـأس الحمـاما=صـرفٍ بتقديـرٍ مـن الله مـاذون
جاه القضاء من بعد شهر الصياما =صافي الجبين بثاني العيد مدفون
كسوه من بيض الخرق ثوب خاما =وقاموا عليه من الترايب يهلون
راحوا بها حروة صلاة الاماما =وعند الدفن قاموا لها الله يدعون
برضاه والجنة وحسن الختام =ودموع عيني فوق خدي يهلون
وحطوه في قبر غطاه الهداما =في مهمه من عرب الاموات مسكون
يا حفرة يسقي ثراك الغماما =مزن من الرحمة عليها يصبون
جعل البختري والنفل والخزاما =ينبت على قبر به العذب مدفون
مرحوم يالي ما مشي بالملاما =وجيران بيته راح ما منه يشكون
يا وسع عذري وأن هجرت المناما =ورافقت من عقب العقل كل مجنون
أخذت أنا وياه سبعة عواما =مع كثرهن بالكيف مامثلهن لون
والله كنه يا عرب صرف عاما =يا عونة الله صرف الأيام وشلون
وأكبر اهمومي من بزور يتاما = لا شفتهم قدام وجهي يصيحون
وأن قلت لا تبكون قالوا علاما =نبكي ويبكي مثلنا كل محزون
ولاقلت وش تبكون ؟ قالو يتاما =قلت اليتيم اياي وانتم تسجون
قمت اتشكا عند ربع عداما =وجوني على فرقا خليلي يعزون
قالوا تجوز وانس لامه بلاما =ترى العذارى عن بعضهن يسلون
قلت إنها لي وقفت بالولاما =ولو جمعتم نصفهن ما يسدون
ما ظنتي تلقون مثله حراما =ايضا ولا فيهن على السر مامون
وأخاف أنا من عاديات الذماما =اللي على ضيم الدهر ما يتاقون
أوخبلة ما عقلها بالتماما =تضحك وهي تلذع على الكبد بالهون
توذي عيالي بالنهر والكلاما =وانا تجرعني من المر بصحون
والله لولا هالصغار اليتاما =خايف عليهم يعدها لا يضيعون
لقول كل البيض عقبة حراما =واصبر كما يصبر على الحبس مسجون
عليه مني كل يوم سلاما =عدد حجيج البيت واللي يطوفون
وصـــــلّـوا على سيّد جميع الاناما =على النبي يللى حضرتوا تصلون