كل من عاش في الدنيا يشوف العجايب
كل من عاش بالدنيا يشـوف العجايـب=مثـل ماشفـت بالدنيـا وشفتـه باهلهـا
قمت ابرق وافرق بين مخطي وصايـب=مثل فرق الجبـال النايفـه مـن سهلهـا
والتوافيـق عنـد حظـوظ و وهـايـب=عند رب يجـازي كـل نفـس بعملهـا
اشهـد ان الهـدوم يستـرن المعـايـب=اثرها تستـر الحرمـه وتستـر فحلهـا
الاوادم بعضهم مثـل وصـف الجلايـب=لو توحد بها ذيـب الخـلا كـان اكلهـا
كم صبـي تحسـب انـه ع الضرايـب=وان بخصته , كرهت الديره اللي نزلهـا
مايسر ان حضر , وان غاب ماقيل غايب=مار الارزاق عنـد ربٍ لخلقـه كفلهـا
مايضـد الضديـد ولايفيـد القـرايـب=يوم نفسـه تعـدى حدهـا مـن زعلهـا
وفيه رجـل يحـل المشكلـه والنشايـب=كـل ماحملـوه الواجـبـات احتملـهـا
وااقـفٍ للـزوم ومرتـكـي للنـوايـب=والحمـول الثقيلـه مالهـا الا جملـهـا
ليت روحه قبل تركز عليـه النصايـب=حط عنه اربعين مـن الزلايـب بدلهـا
وفيه منهـو مسالـم مايحـب الطلايـب=مشتقى من رضى نفسه ولا من زعلهـا
وفيه منهو اذا كبرت عليـك المصايـب=ساق وجهه وجاهه لـك ونفسـه بذلهـا
وفيه منهو يبـا الجـودا فلاشـك هايـب=كل ماناض صدره جـى عضـوده خللها
وفيه منهو يحـل المعجـزات الصعايـب=اصغر افعاله الجـزلات محـدن فعلهـا
وفيه منهو يعيـش وعيشتـه بالسبايـب=كل ماسمعله غلطـة مـن رفيقـه نقلهـا
وفيه منهو على نفسه رضـى بالغلايـب=الله اللـي رفـع نفـس ونفـس خذلهـا
لـو تبـي تنصحـه لله نجـر الهبايـب=انكـرك والنصيحـه ردهـا ماقبلـهـا
اشهد انه عقوبـه مـن كبـار العقايـب=قاصر المعرفه قلبـه كمـا قلـب بلهـا