ابراهيم الشيخي وصقر سليم
صقرسليم
سلام واهني هل الميدان بالشهر الكريم
وانته يابن زهران ياجعلك بخير وعافيه
انته تبى تغزي مع العتبان والا مع سليم
الحر يفهم بالاشاره والاشـاره كافيـه
ابراهيم الشيخي
يامرحبا والله غفـور ياصقـر والله رحيـم
وش كثر معك من الذنوب الظاهرة والخافية
العنصرية ياصقر راحت من العهـد القديـم
الله يديم الروس في ظـل البيـوت الدافيـة
صقرسليم
اما الذنوب الله يعينك ما حد(ن)منها سليم
انته على قول المثل نيتك ماهي صافيـه
يعني تبى تبقى كذا لافي نعيم ولاجحيـم
نقول وش دورك تقول الشر ناره طافيـه
براهيم الشيخي
مانته غريمي لا وصلنا للصراط المستقيم
يكفيك عن ذنب العمل ذنب الوزن والقافية
حنا مانبدي لين يغلي الدم فعروق الغريم
واللي نشوفة حرب حزبية ولعبة مافيـه
صقرسليم
الله عطاك العقل لاتقعد تعلم من غشيـم
الله واكبر وين تلقى الحـق والانصافيـه
اليا لزمك الصبر لين النار تالع فالهشيم
ماعاد لك فيها نصر تسفى عليها السافيه
براهيم الشيخي
ماني برب الهيم من جا وادي الهيما يهيم
ياكثر خوفي منك تترك خطـة العرافيـة
دام البلا من حفية الاقدام والشوكة تضيم
جلد النمر محد يحذي به قدمه الحافيـة
صقر سليم
اللي يبا يخلف مواثيق العهود امه عقيـم
خايف تصير ام المعارك قصة الصحافيـه
واخيبة اللي يجلبون التمر عند اهل القصيم
الاولـه والثانيـه والثالـثـه متقافـيـه
ابراهيم الشيخي
بلغ معزبنا يبو تركي يكثـر فاليديـم
اما غدا والا عشا وخلاف ماش خلافية
لولا انتظار العيد مافصلت ثوب لليتيـم
ياعيد مانته عيد مادام العرب متجافية
صقر سليم
يابو خليل اليا بغيت الصدق والله العظيـم
الوافيه ما يحتسيها غيـر راع الوافيـه
اليا برق برق الخيال وهب وذعذاع النسيم
الزمل تطرب للمساري والرقاب عجافيـه
ابراهيم الشيخي
لاتشتكي كثر الضما مادمت عند الما مقيم
بعض العرب لا ما ولا شاهي ولانسكافية
حنا تعبنا مالقينا بشـت لقمـان الحكيـم
كل العرب قامت تفصل فالبشوت الضافية