السلام عليكم ورحمة الله وبركاته
محاوره بين الشاعرين الكبيرين / غنيم الخبيش السهلي و زيد العضيله المطيري
زيد العضيله
ألا ياهبوب الريح هبّي لنا بغنيم=نبا ناخذ أخباره بعد طوّل الغيبه
أنا خابره رحّال واليوم صار مقيم=وأخبْره ولد مير الولد رايحٍ شيبه
غنيم الخبيش
ألا يالمطيري صايرٍ في سماكم غيم=وأناخابرك رجّال والطيب تحري به
ولانيب كنّي زيد تال السنين مسيم=ذلوله مع الطاروق تقبل وتقفي به
زيد العضيله
أشوف الولد راحت عيونه عيون يتيم=عيونه يقلّبها بسفرة معازيبه
طروق الهوى غنوا بها في غزال الريم=عسى اللي ضوى باللي ورى الحد يضوي به
غنيم الخبيش
أخذ الاوله يازيد من صاحبك تكريم=ولن عادها لي زيد أباأشذب عراقيبه
طروق الهوى مدفونةٍ في عروق خريم=تسلاّ بها زيد المطيري وأصاحيبه
زيد العضيله
أعلّمك للتكتيك والحرب والتلغيم=على شان نعطيك اللغم ثم ترمي به
زمانٍ مضى تارد طوال العدود محيم=وتشرب ولوعنتر فتل رؤوس أشانيبه
غنيم الخبيش
أنا أقدّر الرجال لومنه أشوف الظيم=حقوق العرب محفوظةٍ في طرف جيبه
ولوتحسب إنّي لوتنوم الذيابه نيم=أدوّر كبير القوم وأقطع مطاليبه
زيد العضيله
ليال التجارب عرّفتني خشم وخشيم=وأبوخشم قاصر ماعرف وش يصلّي به
ألا ياخيال الوسم مع درب سيلك ديم=عسى من سبح به مايغثرب مشاريبه
غنيم الخبيش
ليال التجارب ظمّتك في كتاب سليم=وأنا أخبر أبوك العام ينشر مكاتيبه
تبينا نجي ونلحّم السالفه تلحيم=وأخلّيك بين الشك يازيد والريبه
زيد العضيله
ترى هجرة النعمه تعلّم على التنعيم=ومنّا مخابر شي لازم يهذري به
ألايالبيب القلب خلّك حكيم فهيم=ترى من ضحك لابليس يكفى محاليبه
بواسطة ناصر السهلي