من المواقف الطريفة:
احد الدكاتره واعتقد أنه فوق الخمسين ، بعدما وصل الزملاء ، حاول أن يتعرف على بعضهم ومعهم زوجاتهم ، فكان يسجل المعلومات على يده بنوع من الحبر الذي يستمر لعدة ايام حتى لاينسى ، وكان أن سجل اسم احد الزملاء ولنقل اسمه أحمد ، وأسم زوجته ليلى ، وبعد يومين التقى بهما فأول ما شاف الزميل صاح به أهلا ياليلى
واخذ الزميل في خاطره ، وأعلمه بإسمه واسم زوجته مرة ، اخرى ، وفي كل مرة يلتقي به يصيح به أهلا ياليلى
فلم تنفع الكتابة على اليد ..
كنت في مادة الأحصاء من الفاهمين للمادة وكلفني المدرس بمساعدة بعض الزملاء الأمريكان ، وكان من ضمنهم
هكالوحده اللي كنها شمعه ، وتلبس شورت ، فاللي خفيف ، يبي يطير في العجة ، المهم البنت اصرت أنها تجي لي في البيت اوسع وقت حتى افهمها بعض مالم تفهمه ، اخبرت ام العيال بأن فيه وحده رايح تجي لهذا الغرض ،
وبالفعل جاءت ، ونظرة لها المعزبة بنظرات معينة ، وفي الحوش وامام الجميع فرشت ذاك البساط وجلست انا وياها اشرح لها ، وكنت الاحظ المعزبة كل شوي تطل علينا ، شئ طبيعي أن المرأة تغار على زوجها ، المهم
خلص اليوم الأول ، وجت تودع زوجتي قالت قل لها ثاني مرة تجي ومعها زوجها ، قلت والله مدري هي متزوجة وإلا لا ، فسألتها فقالت نعم ، ليش ، قلت زوجتي تحب إنه يشرفنا ويتقهوى معنا ، قال حاضر . وفي اليوم التالي
جت ومعها زوجها هكالعبد الهامة ، اللي راسه يطق في السقف ، وسلم الرجال ، وقال هاه وش تبي بي زوجتك ،
قلت لها هذا الرجال انتي تبينه في شئ ، قالت ، خله يقعد معه انثاه ، لايقعد معنا ، وإذا خلصت من الدرس ياخذها
صراحه انحرجت ، الرجال ماله علاقة بالدرس ، ولانيب مبعد ومخليه مع عيالي وامهم ، والصاله صغيره ، قلت خليهم يتقوهون ونسولف وياهم شوي ، ويكون خير .. بعد السواليف والقهوه ، قلت للبنت أنا آسف زوجتي عندها
موعد مع الدكتور وتوها ذكرتني ، وش رأيك نؤجل موعد الدرس ليوم آخر ، قالت لابأس بذلك ، وطلعوا ، وبعدها
قلت للمدرس ، أنا آسف ما اقدر اعطيها دروس ، فوقتي اثناء وقت الجامعة ضيق وفي البيت مشغول بالعيال والمدام ، وبالفعل تخلصت منها.
في التدريب العملي ، كان علينا أن نستقبل الطلبة والطالبات اللي عندهم مشاكل ، ونساعدهم على حلها ،
في غرف مخصصة للتدريب ، بحيث في احد جدران الغرفة مرايه ، للي يشوفها من جو الغرفة ، ومن الخلف
يجلس المشرف والطلاب ، يشوفون وش زميلهم يسوي ، حتى بعد ما يمشي الطالب او الطالبة من عنده يتناقشون
في سير العملية فإذا لاحظوا أن زميلهم اخطأ في شئ يعلمونه. ذاك اليوم كان نصيب بنت طلقه ، ايامها كنت شباب
ويبدو أن شكلي كان جذاب ، المهم في منتصف الجلسة ، بدأت تتغزل ، شعرك حلو ، أنت وسيم ، ساعتك حلوه .. الخ من هالسواليف ، انا رجال ، جدي ، ولا أحب هالسواليف ، قلت لها : شوفي أنا رجال متزوج ، وانت ابعدتي بنا عن موضوع الجلسة ، المخصصة لمساعدتك ، وبالفعل تم التركيز على مشكلتها ، وطلعت ، بعد ما جيت للمشرف من خلف المرايه ، والا الرجال معصب ، خير إن شاء الله وش فيك ، قال ، ليش تسوي كذا معها ، ليش تقول إنك متزوج ، قلت له البنت بدأت تغزل فيني ، قال وبعدين ، قلت ماعاد بقى إلا شوي وتطمر علي ، قال ، كان خليتها
تطمر ، وحتى لو قالت لك ابيك، فمفروض ما تقول لا ... المهم تعالج مشكلتها مهما كانت الطريقه ،فبعضهم هذي مشكلتهم الرئيسية ، قلت له آسف ، أنا رجال ما اصلح لهالأمور ، مدام فيها هيك شغله ، لاتحولون بنات علي ..
للحديث بقية..