تدري شعورك وحبك يوم حسيتـه =زلزل فؤادي وهدم كامـل اركونـه
حسيت كنـه حلـم ليـلٍ تمنيتـه =بالليل اشوفه وحال الصبح من دونه
ياللي سلبني وانا راضـي وهنيتـه =حبك تحايل علـى قلبـي وقانونـه
القلب ضامي ويومك جيتـه ارويتـه =هتان حبك تشتي يا الغـلا مزونـه
وصفك فريدٍ واسمك ذايـعٍ صيتـه =وطيفك سكن عين خـلانٍ يحبونـه
وقدرك بقلبـي تعاظمتـه وعليتـه =اعظم من اعظم ملك لجواد ينخونه
دونت بسمك شعر سقتـه وغنيتـه =فيك القصايد تجي عذبه وموزونـه
وبعذب الابيات والقيفـان خصيتـه =حبرٍ يدون وله واشـواق مجنونـه
ولا مر ليلي وطيفه غاب ما ريتـه = يضيق صدري واقرابـي يحسونـه
نادى هواكم ومن لـ عمـاق لبيتـه =غصبٍ على القلب واشواقي يلبونه
عزف لحون الغلا والحـن جريتـه =لحن الهوى يعزفه نايـه وقانونـه
قلبٍ مشرع له ابوابه غـدى بيتـه =وعروق قلبي يحرسونه ويفدونـه
طيفه لفاني وصاحبتـه وخاويتـه =ولا زالت اعيون خله فيه مفتونـه
في جوف ليلي الى منـي تحريتـه= طوقت جيدي بعقـدٍ باهـرٍ لونـه
واليا جذبه العقـد جيتـه واهديتـه =هديتٍ تشفي الغالي مـن اطعونـه
كله حلم عشت احداثه ويا ليته = يتحقق الحلم وقلبي تنجلي احزونه