ما بيك تزعل

[محمد السواط]

ثابت وصادق ما يغيرني الوقت=وإذا تغيرنا تغير للأفضل
بس الخطأ مرضاه ابد منك لأهنت=وأكيد من غيرك ابد فيه مقبل
قول الصراحة كان من ودنا عفت=قلي بلا تجريح يا محمد ارحل
على المحبة ما جبرناك يا بنت=أنته بنفسك جيت للود تحمل
واليوم أشوفك يا غناتي تكبرت=وتمر من جنبي ولا فيك تسال
غيري بدنيا الحب معلوم حصلت=وغرك كلامه يوم قال أنته أجمل
صحيح أنا حبيت وأعطيت وأخلصت=ومن عينك النجلا ترى كنت بخجل
ولا يوم معكم يا أريش العين قصرت=ومنكم كثير الهم كنت أتحمل
وحطيتكم وسط النواظر وغمضت=وفتحت صدري لك وقلنا تفضل
وسهرت ليلٍ مظلمٍ وأنتِ أبه نمت=ساهر على جمرة غلاك أتململ
وما دام يا سيد الغنادير قررت=ترحل وتتركني وبالوصل تبخل
الله معك ما دامها يا الغلا جت=منكم وكل شيء في حياتك تبدل
لكن إلي عندك رجاء لو تكرمت=وقفه على الأطلال فيها تأمل
ولو كان خانتك المدامع وهلت=اسق الورد بدمعتك قبل تذبل
ولو جاتك أخباري وقالوا لكم مت=اطلب لي الرحمة ولا بيك تزعل
ولو عشت في الدنيا وبالرجل سيرت= حبك بقلبي ثابتٍ ما تبدل
هذي حقيقة شامخة لو تنكرت=تفضح مشاعر من هواكم تغربل
أنت الأمل وأنت الغلا وين ما رحت=وأنت غرامٍ في خفوقي تغلغل

بقلم "محمد السواط"

[عمر ال شيبي]

تغلغل

الله عليك قلتها من قبل لك سوق طيب
صح لسانك وكل عام وانت بخير

[الطائر المهاجر]

صح لسانك واعتلى شأنك
رائعة من شاعر رائع
ومتجدد الإبداع
ودام ابداعك
تحيتي ومودتي

[منيع]

اكثر من رائعة
تسلم اخي الكريم
تحياتي لكم

[فارس القوافي]

مرحبا بك يامحمد
كل عام وانت طيب

صح لسانك يالغالي ولاهنت
يعطيك العافية

دمت بخير

[سمّار]

اذا القاف ما يطيع السوطه فمن يطيع؟
جزل ووافي يامحمد
سلم فكرك وصح قلبك ولسانك
لاهنت

[بنت النور]

صح لسانك وعتلى شانك
رائع وجزل من شاعر مثلك
تقديري لك

[أم ريما]

هـــــذي حـقـيـقــة شـامــخــة لـــــو تــنــكــرت

تـفـضـح مـشـاعــر مــــن هــواكــم تـغـربــل

أنت الأمل وأنت الغـلا ويـن مـا رحـت

وأنــــــت غــــــرامٍ فــــــي خــفــوقـــي تـغــلــغــل

صح لسانك

قصيده جميله

يعطيك العافيه

[داعي الشوق]

صح لسانك مليوون يا محمد

و الحمدلله على السلامه

والشهر مبارك

سعدنا بعودتك و حضورك الجميل دائما

و صح لسانك يالشاعر

[بنت النور]

و صح لسانك يالشاعر

قصيدة جميلة وحضورك اجمل

و حياك الله من جديد

وصح لسانك