وصفات لتصبح مثقفاًاليوم ببلاش بكره بفلوس

[شوق]

1. كثّر من الكلمات اللي تنتهي بـ "قراطية " مثل : الديمقراطية البيروقراطية ,الارستقراطية ,الأوتوقراطية, وإذا انزنقت "فخربط " لك أي كلمة واختمها بـ" قراطية "مثل : التيبوقراطية , والخربوقراطية ولا تخاف ما فيه احد يبي يسألك ويقول وش معنى ذا الكلمة عشان ما ينكشف " جهله " ويدرون الناس انه مهوب مثقف .

2. إذا سالك احد من تسمع له قل لفيروز وشوبان حتى لو انك ما تسمع إلا لمزعل وسعد جمعة .

3. إذا قالوا لك من شاعرك المفضل قل محمود درويش و ادونيس حتى لو انك ما تقرا إلا لـ"ضيدان بن قضعان " .



4. انتبه ليكون تؤرخ بالهجري حتى لو كان هو تاريخ المسلمين ترى المثقفين ما يؤرخون إلا بالميلادي يا خبل ... ويفضل بعد انك إذا كتبت قصيدة حداثية تكتب الشهر كتابة مهوب رقم زي كذا " مارس 2007 , حزيران 2006 " وينصح بعد انك تحط تحت التاريخ اسم أي عاصمة أوربية " لندن , جنيف , باريس " حتى لو انك كاتب القصيدة في رياض الخبرا او ابيار الماشي .

5. إذا سالك احد وش الجرايد اللي تقراهن انتبه تقول له الجزيرة و الرياض !! عشان ما يدري انك قروي , لا .. قل له : اللوموند و البرافدا وان حبيت تزودها وتحبكها زيد عليها الواشنطن بوست لو انك ما بعد شفتهن " على الطبيعة ".. بس لزوم الثقافة .

6. إذا قال لك احد وش الأجواء اللي تجد فيها نفسك , لا تفضحنا وتقول إذا جلست مع أهلي وإلا إذا طلعت للبر وإلا إذا صرت أضبب !! لا يا حبيبي , قل له : أنا تأسرني الليالي البيروتية المقمرة وخصوصا في فصل الخريف حتى لو انك ما تفرق بين الخريف و " المربعانية " .

7. حاول دايم انك تفلسف وتلف وتدور في كل شي و في كل إجابة حتى لو إن الجواب حرفين خله عشرة سطور , وكثر من الكلمات اللي ما تفهمها عشان ما يفهمونها الناس ويتأكدون بما لا يدع مجالا للشك انك من كبار المثقفين .

8. احفظ لك شوية اسامي مثل فولتير ... غي دي موباسان ... فكتور هوجو ... موزارت ... واحشرهم في كلامك مع خوياك ... لا تخاف ما احد راح يعرفهم او حتى فاضي يسأل عنهم .

9 . كمان لا تنسى تحفظ بطريقك شوية مصطلحات زي : بروستريكا ... العولمة ... القروسطية ... ، وكلامك لا يصير عادي خلك ذرب وقول : يتماهى ... يعتصرني ... الضجر ... مسآات .... انكفئ ...

10. اذا تقدر تشرب تتن اشرب ... بس مو زي العرابجة ..لما تشفط خلي شفطك عميق هاديء وعيونك تجوب السماء وكأنك سارح تلتقط الأفكار المتطايرة لتجمعها وتحل بها مشاكل المعدمين والبوساء في هذا الكوكب ...

11. شعرك .. لازم يكون طويل ومنفوش ... ولبسك خله قديم شوي ... تراك صرت انسان غير عادي ولا تشغلك هذه التفاهات التي تشغل السطحيين عن مهمتك الجليلة التي تسعى لها ... وازلط اللحيه مع الشنب .. خلك احلس املس ..

وبكذا ... اصبحت مثقفاً ومانت هيّن ... بس الله يرحم والديك لا عاد تجي عندنا :d

منقول

[داعي الشوق]

اعتقد ان اللي قريته ذا

يسمى شوقو قراطيه مع الكثير من الحنكو قراطيه

و يسلموووووو شوق

[سناعيس]

شكرا شوقراطيه
شرايك فيني اكيد مثقف ههههههههه
تحياتي

[الطامي]

ههههههههههههههههههههقوراطيه
شوقراطيه

شوكراطيه
علاقراطيه الموضوعراطيه
لاهنتيوراطيه

رائع يعطيك العافيه شوقراطيه

[حوريه]

هههههه .... يعطيك العافيه شوق

[شوق]

المشاركة الأصلية كتبت بواسطة داعي الشوق

اعتقد ان اللي قريته ذا

يسمى شوقو قراطيه مع الكثير من الحنكو قراطيه

و يسلموووووو شوق

هلا داعي الشوقراطيه

شوكرقراطيه على مرورك هههههه

وياهلا ...

[حنان الكون]

هههههههه
يسلمو شوق