تدليت يا قطف المحبه من الداله

[عناد الرواد]

تحت دالية شعري تدلّى حروف القاف=كأنها عناقيد ٍ من غصون ميّاله
بعد مستوى حمل العنب والقطاف اقطاف=تدليت يا قطف المحبه من الداله
واشوف الندى إكليل ورد ٍ وغصن ٍ جاف=تبسَم لزهرات البنفسج على جاله
اذا طل وجه الصبح طار الحمام وناف=وحبيبي على الشباك يسقي ويسقاله
قرنفل وفُل وياطبيعه على الاوصاف=تحشرج بي الكلمه قبل وصف اطلاله
لآليء ندى والوان قوس وقزح واطياف=موسيقى الشجر وانغام بُعده وترحاله
فصول السنه هذي على وجنته تنشاف=واحسّ الورود الحُمر كلْها تثنّاله
يهبّ النسيم وتنتشي رقّة الاطراف=على زيزفونة مدخل البيت والصاله
هدوء المكان وشمعة العيد والاصداف=وناي ٍ يغني بين عقده وسلساله
و بنْدول هالساعه مثل قلبي الميلاف=يحين الوَعد ويدق, وآجرّ مواله
وتبدا المشاعر رحلة الميل والآلاف=على شمعة ٍ ذابت واناقول كرماله
أجرّ الحزن والأوف من قلبي الشفّاف=عساها تلامس جرّتي دنية آماله
واحس المكان يضيق لو ينشحن بخلاف=إذا طال منديله وإذا فكّ فنجاله
تفتّق معه كل المواجع بدون انصاف=والمّ الحزن اشلاء بس ينشرح باله
رياح الزعل لا مشّطت مايل الصفصاف=تبعثر ورقه ان شفت حاله ويرثاله
تفيض الدموع الطاهره والامل مجداف=يجدف بعيد وليه ما جدّف اقباله ؟
محد إشعره بيني وبينك تبي ماخاف؟=امانتك امانه شف قلبي وغرباله
هنا بقلب الصفحه واقول الحزن قد طاف=وترجع لي الصفحه على أسوء الحاله
تفلسف عجيب و وآقعه جرحي النزّاف=اعيش العمر كله تحت رحمة اوصاله
على قد ساقك مدّها لو غطاك الحاف=قبل يختنق طفل الامل داخل احباله
ولا بين حظي والقدر يالحبيب اجحاف=ولكن يحرّك هالقدر أصبع الآله
يعرّاف لا تقرى كفوفي وانا عرّاف=قريت الصدف من قبْل لا يستره شاله
تراها محبه ,عشق, ما هيب هزّ اكتاف=ولا هيب فخّ ولا تصيّد بمحباله
إذا ما فهم قصدي وقال الهوى مهياف=يحل عن سمايا فال ربي ولا فاله

[الطائر المهاجر]

جزل ومبدع
صح لسانك
ولاهان راسك
تحيتي واحترامي

[داعي الشوق]

صح لساانك مليوون يا عناد

تصوير مبدع و جزل من شاعر مبدع و جزل

لي عوده للتمعن بجمالها اكثر

و صح لسانك

ولاهنت

[الثميري]

مليار صح لسانك
على هالطيبه من راس طيب
ودي واحترامي

[أبوالطيب]

جميلة سلمت الأنامل

[منيع]

ياسلام
كل الروعة والابداع
ودي وتقديري لكم
تحياتي

صــح لسانك ،، ويعطيك العافيه

تـحــيــاتـــي

[سعيد عوده الحويطي]

صح لسانك الشاعر عناد الرواد صور جماليه وشعريه رائعة وجزاله شاعر متمكن
تقبل مروري واحترامي

[نهير النمش]

الله الله

عناد الرواد

صح قلبك وسلم فكرك الشاعري ايه الجزل الراقي

هنا ابداع شعر جميل وعذب ومفرده راقيه فاخره

حقيقه نص يستحق الاحترام وكاتبه متمكن بأقتدار

تقبل كل التقدير

[الجنيدي]

الحضور في حرم الجمال جمال
صح لسانك مليار ولا تكفي
ولاهان راسك
تقبل ودي واحترامي