قصة سلطان النحاوي ونجره مع كلب جاره

الطامي · 24-09-2012, 11:14 AM

هذه القصه كما يرويها شخصيا:-

هذا جار لي درس في إمريكا وتأثر بهم وعوّد من عندهم ومعه كلب الله يكرمك ويكرم القارئ مشتريه من إمريكا الشاهد إني استأجرت بيت قريب منه وبجنبنا مسجد المهم كنت إذا طلعت من المسجد أعزم جيراني للقهوة ويعزموني مثل مايتعازمون النشاما بينهم بين.
المهم الجار هذا إذا عزمته يصد مني ولا يكلمني لاهو باللي يدعي لي بالغناه ولاهو باللي يقلط للقهوة.
المهم أنا بنيت خيمة في حوش البيت ودايم نصلح قهوتنا فيها وتعرف النجر ودندنته له صوت مسموع وعاد صوت النجر بحد ذاته كيف عند هله .
المهم كان عندي ذاك اليوم نشاما يتقهوون إلا وجرس البيت يدق طلعت للباب إلا عند الباب عسكري من الشرطة اقلط ياولد قال : الله يسلمك أنا جايك أبيك تخاوينا للشرطة قلت : عسى ماخلاف قال : موضوع بسيط قلت : له لاحقك للمركز استأذنت من ضيوفي ورحت للشرطة إلا وذا جاري عند الظابط أنا شفته وقلت أكيد إنه صاير عليه خلاف سلامات ياجاري عسى ماشر ياجاري وهو مير يتصدد مني قال : لي الظابط يا سلطان جارك يبي كفالتك قلت : ايوالله بكفله قال تراه في مبلغ 75000 ريال قلت : هي عزوة وانا عند عزوتي قال : الظابط سلامتك ياسلطان جارك مشتكيك يقول : إنك مزعجه بناقوس عندك يقصد النجر قلت : هذا ماهو بناقوس الناقوس لليهود والنصارى لكن اسأله وش اللي عنده دام إنه يسمى النجر ناقوس .
قال : الظابط وش عندك يافلان قال : ماعندي شئ . قلت : إلا عنده كلب وديك وكلها مزعجتنا وحن حاشمينه لأنه جار قال : هذا كلب امريكي مشتريه بأربعة ألاف ريال والديك رومي مشتريه بألف ريال .
عاد قال : الظابط دام إن هذا علمك روّح يالنحاوي جعلك ماتشوف شر وجارك خل شغله عندي .
سويت لي بيوت في هالقصة ماعادني بلازم منها إلا أربعة بيوت.

أقول فيها :

يانجرنا من شان جاري هجرنـاك=أخاف يزعل جارنا يوم يوحيـك
أخاف تزعل جارنا الصبح بعواك=حيثه ماهو بمن لابة تعتني فيـك
وجداه ياوجـداه يالـدور هـذاك=يوم الرجل في مجلسه يفتخر فيك
ماهو بجارٍ يشتكيني ليـا اوحـاك=سلط عليك الوقت ما اقشر بلاويك