غيمة أفكار

[سعيد الغامدي]

أحترت كيف أميـز الفكـره بشعـرٍ مستطـاب=حتى تعالج قلب مشغـولٍ مـن الهـم التهـى
رغم إنني عانيت من كثر المتاعب والصعـاب=أشعاري اللـي ترتقـي بالفكـر مـا هملتهـا
يشهد على قولي دموعٍ لا تهامـت كالسحـاب=تجرح شعور قلـوب مـا تـاوي إذا هملتهـا
وأنا الذي خاطِره من درب الهوى والغي تـاب=والنفس عن درب الغوايـه والهـوى كبلتهـا
يا غمية افكارٍ بعد ما التمت أنهـارت ضبـاب=لا يروي الضامي وتبطي هقوتـي مـا طلتها
دونتها في صفحـةٍ مـا ظـن يحويهـا كتـاب=الصفحة اللي لو يطـول الوقـت مـا كملتهـا
لكنها لـو تكتمـل تنهـي متاهـه واغتـراب=من غلطـةٍ حـرى بقلبـي وحـدي تحملتهـا
الغلطه اللي عرضت عمري على اقواس النشاب=مالـت علـي أحداثهـا واقفـت ولا عدلتهـا
يا صاحبي والوصل مهما طال يمحيـه الغيـاب=ذي غيبتـك فـي غربتـك بالثانيـه سجلتهـا
أنا الذي عايشتهـا مـن دون شـكٍ وارتيـاب=وأنت الـذي حرمتهـا وأنـت الـذي حللتهـا
الهم لامنِّه سطـى مـا يستـره ثقـل الثيـاب=هذي ثياب الهم فوقـي وأنـت لـي فصلتهـا
فصلتهـا ولبستهـا ولقيتهـا ثقـل الهضـاب=أهديتهـا يـا صاحبـي واضفيتهـا واسبلتهـا
يا خشيتي لا يعتري نفسـي مخافـه واكتئـاب=باسباب من باغلى مشاعـر مهجتـي جملتهـا
رغم إنها لا تقبل اعذاري ولا ترضـى عتـاب=من شأن ترضى كل حيلـه بالوجـود أحتلتهـا
العمر رحله والمشيب اقفى بهقـوات الشبـاب=وأخشى صعاب الوقت يمضي عمر مـا ذللتهـا
إن كان ما ذللتهـا والحـظ فيمـا فـات خـاب=وأعميتها يا صاحبـي مـن بعـد مـا كحلتهـا
فاترك لنا بعض الأمل لو نطرده مثل السـراب=يمكن يجي لحظـه تفـك أبـواب قـد قفلتهـا

شعر

سعيد بن عبد الله الغامدي

[داعي الشوق]

الله الله يابو عبدالله

رائعة عانقت سماء الابداع

حاولت اقتبس بيت وكلها جزله

والحمدلله ع السلامه وصح لسانك يامبدع

[الطائر المهاجر]

جزله من راس جزل
صح لسانك واعتلى شأنك
ولاهنت
تحيتي واحترامي

[منيع]

مبدع ورائع
شكرا لكم
تحياتي

[ملكة الشرق]

الله
جميله بل من اجمل ماقرأت
راقتني جدا
بالمعنى والمظمون
صح صح لسانك مدد بلا عدد
ملاين صح كلك ولا يكفون

بانتظار ما تتحفنا به من
بوح ذائقتك
ونزف قلمك
الشاعر الراقي
سعيد الغامدي

ابدعت
وامتعت

لك ودي واحترامي

[الطامي]

صح السانك
ولاهنت

[بنت النور]

كتبت فأبدعت واجزلت
صح لسانك ولا هنت
تحياتي الطيبة