أبوأنس/الشرقي .. والقوافي المشبوهة !!

[ابو أنس]

لااله الا الذي حنا نطيع=خالق ا لأكوان وحده ما عتنز
جاعل الخرفان حكام القطيع=وفاتنن التيس في حب المعز
جاعلن قلب الذكر قبله تبيع =يتبع الأنثى ولو لحقه لزز
في حياة النحل يطردها سريع=وان تمكن مات في لحظه نجز
ودايم(ن) في الغابه قتال(ن) فضيع=والعنود تراقب المشهد تقز
سنة(ن) في الكون ماعنها رجيع=دايمن والرجل فيها مستفز
وش يقول المغرم وقلبه صريع=من بني آدم وله قلب(ن) يفز
كلما شاف البدر يلمع لميع=والمبيسم وصفها حبة كرز
لويصادفها ولو عبر السريع=صار كنه فوق بطناج(ن) يهز
صابته نفّاظة البرد الصقيع=صوته مهدّج ولو منه احترز

[الشريف الشرّقي]

جاعل الخرفـان حكـام القطيـع***وفاتنن التيس فـي حـب المعـز

الله يجازيك ياشيخ

نشري غلاكم ياسعد مانبيعه = ومنك نتعلم كان في النت تعليم
التيس وان بعبع يبي له نفيعة = خيشة فصم ! ولا شوارٍ وبرسيم
ماعذبه راعي العيون الوسيعة = ولا اشغلنه بيضها والمجاهيم
ولا راح للمركز ولا مر هيعة = ولا مِسك في الشارع يوزع براشيم
ولا حفظ تاريخها و الشريعة = ولا عَرف بالمدرسة سين أو جيم
بس يتبطح جنب عنزٍ صقيعة = ويومي لها بالقرن يرسل ترانيم
ياليتني مثله (خخخخخ) حياتي مريعة = ولا عرفت اسواق بندة ومكسيم

[ابو أنس]

ياالصاحب اللي صحبتي له رفيعه=اساسها واضح ولا فيه تعتيم
مقامكم ياصاحبي في الطليعه=ثابت ولا يحتاج دق المراسيم
ياصاحبي كلن يدور ربيعه=والتيس ينصى صيدته باوسط(التيم)
ولا عليه خلاف ما احدن يريعه=ما يلحقه جمس(ن) عليه التخاتيم
لا وا هنيه لادبغ في النفيعه=ثم(ن) تشهوى بالحلا كف برسيم
والى صدح بالصوت يطلب تبيعه=جاوب من اقصى الحوش باحلا تقاسيم
فتوى الغرام بشرعهم فيه ميعه=تقول ف اوربا على شاطي مقيم
ما يحسبون حساب شرطه وهيعه=ومايحسبون حساب غبر(ن) مجاهيم*
الشكوى لله يوم نفسي دنيعه=تختفّ الى شافت رهيف التباسيم
اسرح مع الهوجاس والقلب اطيعه=واعيش مع طيف المها سيد الريم
وابني له بيوت القصايد سريعه=واخش جوّي واتبع الحلم (بحليم)....*

* الحسّاد
* الله اعلم

[ابو أنس]

أخي الفاضل ...........
اعذر لي هرطقة وجدتها تنساب فكتبتها لاأدري عن مناسبتها
ولو لم يكن منها سوى التحديث والتحفيز

ياساكنن في الشرق في شاطي الهاف=وش تكملة اسمه أكيد انه المون
والمون اسم(ن) للقمر مابه خلاف=تدرون ياهل العرف او ماتعرفون
والبحر يرتاده من الناس اصناف=ماهم سوا كلن وله شكل او لون
لكن عذابي شفته (بمون ) شفاف=صافي بوسط الشهر ابيض ومزيون
بالسيف ماشي ليّن العود غرياف=ربعه معه هو بينهم أشهد (المون)
الى ضحك سنه كما ضو كشاف=كلن لضحكه يدعق الضحك بجنون

[الشريف الشرّقي]

يابوأنس من دونك النت ينعاف = لولا وجودك ياسعد كان وشلون
تشكي غريرٍ كنه الليت كشاف = يمشي مع ربعه على السيف في مون
هذا عذاب القلب يانسل الاشراف = خلى مناعير النشاما يونون
خابرك أنا للترف بالحيل عساف =الخوف منك ‍‍‍.. مير ياخوي بالهون
ارفق ترى قلب القوارير شفاف = يذوب مثل الملح في وسط ماعون
كني بكم خزيتها خز عراف = ثمٍ ضربت بريك حتى يمرون
وناولتها رقمك على كرت نشاف = ويمكن كتبت الرقم في وسط كرتون
براي لله ناظري مابعد شاف = بس اتوقع .. والجماعة يقولون

[سناعيس]

والله ونعم
بأبو أنس والشرقي
أيه يامالا الغنيمه وراكم ابطيتوا

تحياتي

[الشريف الشرّقي]

المشاركة الأصلية كتبت بواسطة سناعيس

والله ونعم
بأبو أنس والشرقي
أيه يامالا الغنيمه وراكم ابطيتوا

تحياتي

هل علي من لومٍ حين قلت :

بالله خذ مهجتي ياحادي العيس = وبلغ الصحب عني دون تدليس
إن كان للمجد من فوق الثرى قدم = فهامة الفخر في دار السانعيس

[ابو أنس]

العيون اللي تلاقط يالشريف=من ورا قماش الحداد مبرقعه
ذبحها امضى من الحد الرهيف=لحظة(ن) ثمّ(ن) سهمها يوجعه
ان رفع شوفه على الجنس اللطيف=عجز لو حاول مرار(ن) يرجعه
ان غمز بالرمش لحظه فيه حيف=وان فتح عينه تعجب ما اوسعه
كنهن البحر لكن فيه سٍيف=بس هن كل البحور مجمعه
كنهن السحر بس السحر طيف=والسحر فيهن جناه ومنبعه
كنهن لسان في المعنى حصيف=يوصل المعنى بحكمه مااسرعه
في القشر يظهر لهن نظره تخيف=الشرر من موق عينه ما اشنعه
وان رمى نظرة حنان(ن) يالطيف=لخبط الأسلاك والضغط رفعه
وان تصنّع نظرة الخل الوليف=سيّح (كويلك )عجزتا تجمعه
وان نواك بهزوة(ن)صرتا سخيف=صرت ما تسوى قصاصة اصبعه
الوكاد ان المبرقع فيه حيف=من ورا ترسانته جيشه معه
ان مشى بالسوق او فوق الرصيف=صايد(ن) صيده ولا احد(ن) يمنعه
واعذابي ...صحت واسمع ياشريف=وش علاج اللي تقرح مدمعه

[الشريف الشرّقي]

الله الله .. ما أجمل القوافي ما أروع المعاني !! لله أنت يا أبا أنس ولله لغتك العذبة ..

العيون اللي تلاقط يالشريف=من ورا قماش الحداد مبرقعه

في الأمر قولان .. يفتيك الشريف = والسند مرفوع للي يسمعه
بعضهن ياشيخ مايسوى رغيف = العيون وساع والخافي بعه
وبعضهن ياسيدي شيٍ مخيف = القدر وطابقته لو ترفعه
لو تمشى في دواعيس (الطريف) = كان قام سعود واطلق مدفعة
من جماله كل ماحوله سخيف = للفتايا من قهرن طرطعة
كنها قطعة حريرٍ وسط ليف = نعنبوا هالليف الله يقطعه
ليت للمزيون -قطعيا- رصيف = والجياكر عن رصيفه نمنعه
آه واويلاه ياحرب الصريف = دون حايل أو شمال المجمعة
ليت شينات العرب فيها قطيف = اذبحوهن حرقوهن في سعة
وكان تنشد عن علاجك يا حصيف = هاك اجماع الأئمة لربعة
اترك المزيون وازبن في عفيف = وابن لك مسجد بوسط المزرعة
والبس القفطان من ذاك النظيف = واضبط العِمة وبالك ترفعة
منهج الاخوان منهج يا لطيف = باعوا الدنيا وذبوا الامتعة

[سناعيس]

الأساتذه الشعراء أبو أنس / الشريف الشرقي الأعزاء
أسمحولي أعبر عن الشعور الداخلي لوقع مساجلتكم على قلبي

شاقني القاف في دم خفيف=ياحلو وقعه الله الله ماروعه
في سهوله مايجي منكم عسيف=ولايجي منكم نشاز وقربعه
ولاهو شعر كني أغص برغيف=لاقدرت أرميه وازريت أبلعه
مثل صوت للشجر يسمع حفيف=يطرب الأغصان وتتراقص معه
ميزه ربي مثل فصل الخريف=ميزه بين الفصول الأربعه

تحياتي