أبوأنس/الشرقي .. والقوافي المشبوهة !!

[ابو أنس]

ياسناعيس الوفا حكيك لطيف=طبعك الوافي ولا تتصنعه
وكان ماتدري تسمع ياعريف=طلتك مطلب ورايك نسمعه
البها والجود يعرفه الشريف=يكمل بحظرة جنابك مـ.. اروعه
لك تحيات(ن) وتقدير(ن)كثيف=ولك مكان(ن) في فؤادي مـ..ارفعه

[ابو أنس]

افتني ياشيخ خبّرني وقل=وانت في شرع الهوى قاضي امتياز
كان عين الريم ماتوخذ مثل=لوّها خلف البراقع عين باز
هات حكمك في حديث(ن) مايمل=نغمته ترنيمت(ن) ماهي نشاز
فيه غنّه فيه بحّه فيه دل=نغم(ن) حالم ولاهو بوق جاز
ان ضحك في ضحكته كل الغزل=تنثره نثر الخرز فوق القزاز
فيه من لهجة هل الشام ان سأل=وفيه من لهجة بنيات الحجاز
وان تجاهلته وعصّب وانفعل=شاب صوته نبرة فيها اهتزاز
اختلج صوته وزاد بي العلل=قلبي المسكين صابه خاز باز
تهت من صوته وشوفه ماحصل=صغت له صوره بتعبير المجاز

[الشريف الشرّقي]

مرحبا يانجم ساطع ما أفل = نور رباني !! بلا كهرب وقاز
أنت سيدنا ومفتينا الأجل = مستشار وكلمته لازم تُجاز
والشريف اليوم بالفتوى بحل = حده المسكين ( في سوي نماز )*
بجتهد.. والرب يغفر ماحصل = والعذر منك إذا حكمي نشاز
أولا .. الصوت ما يعطي مثل = كم من الودرات صوته امتياز
شوف ابو نورة إذا مخمخ عسل = وشوف ( عتوبه )من اكناف الحجاز **
صوتها نرجس وغصنه من بصل = ولا مشت كنه توطى له قزاز
والحقيقة قالها ( الوردي ) وفل = أشهد انه قال من دون احتراز
"اعتزل ذكر الأغاني والغزل" =لا يحوشك من عناهن خاز باز

* الذي لايعرف معنى هذه العبارة يسأل أقرب هندي في الشارع : أنتا في سوي نماز ؟ إذا قال : نهي !! فاعلم انه هندوسي
** عتوبة = عتاب .. أسأل الله لي ولها الهداية ( وجه معبر )

[ابو أنس]

قلت الي ذي مسأله واخرى وعدّت=في جواب(ن) من حكيم(ن) منطقي
بس عندي مسأله أخرى استجدت=طالب(ن) حكمك واعرف انك (شقي)
لك مع الخفرات نظره ما تردّت=باخص وقلبك خضر ..أو فستقي
لين شفت الريم في السوق يتلفت=ماشين والكعب (دفّ) يطقطقي
لابس الكاب المخصّر (صبّ) مصمت=راسم(ن) جسمه ولا شي(ن) بقي
ان نطحك تقول ...ياربي(تسمّت)=وان قدمك تقول هذا محرقي*
وان تقفّته الهبايب منك همّت=زفرة(ن) تطلع ....عليها مشفقي
وان ملت خشمك روايحها تنهّت=ينبهج صدرك خطير يشقشقي

* تسمّت........كلمه عاميه في نجد بمعنى تحفظ

[الشريف الشرّقي]

قتلني العي يا أبا أنس فارفق بمحبك ..

لين شفت الريم في السوق يتلفـت///ماشيـن والكعـب (دفّ) يطقطقـي

لين شفت الريم في السوق يتلفت = اعرف ان الريم لعابٍ شقي 1
أصلا البنت هذي ماتربت = قل لها: يابنية للعزيز اتقي
يابنية تغطي .. !! كانها ما تغطت = امحطه بالعقال وخله يطقطقي
وابتعد عنها وبالك لاتسمت= حط رجلك مع اقرب مفرقي 2
والله ان المصايب كلها يوم عمت = من سبايب لا بس الفستقي
لابسات البواشي ودها لوتمنت= تذبحك يا سعد أنت والمشرقي3

(1) ملطوش من قول حميدان :
لا تضـم الـذي تلتفـت فـي الطريق /// حــط بـالـك لـهـا فــي قـفـا الـعـايـري
وقل لها وش مريبـك علـى الالتفـات /// يـاضـراب الـخـنـا بـالـثـلاث اظـهــري
إلخ ماقال رحمه الله .
(2) تسمتنا غير تسمتكم يا أهل نجد!! يقولون : فلان سامت ويهه يعني راز وجهه.. أو شيء نحو ذلك .
(3) بواشي جمع بوشية وتجمع بوشيات وهو المشهور عند جمهور البصريين وهو قماش أسود تغطي به المرأة رأسها ! وقد يستخدم في حفلات اللهو والمجون كقول طرفة ابن العبد :
قومي ارقصي لي وارفعي البوشية /// خليني أروي ضامري العطشاني

[منيع]

ابوانس
الشريف لشرقي

الابداع مستمر والمتذوقون ينهلون

[ابو أنس]

الفاضل منيع..........................
ونحن من متابعتكم نستلهم الإستزاده ونستمطر الجمال
وننتظر مرور الأفاضل امثالكم ونسعد بكلماتهم وقراءتهم
لك كل الشكر وعاطر التحايا

[الذيب]

مافيه احد فاهم هالدنيا مثل طرفه ابن العبد (الله يرحمه)

وان تقفّته الهبايـب منـك همّـت = زفرة(ن) تطلع ....عليها مشفقـي

هههههههههههههه (ترى هذي زفره(ن) مهيب ضحكه )

الله يعطيكم العافية

[ابو أنس]

الشريف الشرقي...

لي زمان(ن) ماكتبت الك البيوت=صرت مثل اللي فقد شي(ن) عزيز
المنادم معْكْ طعمه طعم توت=او كما قالوا مثل طعم الفريز
والقدر ماهو بتشخيص البشوت=وما يجي بركوب لكزز من حفيز
القدر من ربنا حض وبخوت=يستحقه شخص له عقل(ن)وميز

/

مـاشـاء الله ..

/

رغــم .. الـ مـعـاجـــم ..


ومـفـرداتـهـا ..


سـ يـظــلان .. نـادران ..

/

كـنـت .. هـنـا ..


وسـ .. أظـــل .. هـنــا ..


إلى .. أن .. أرتـــوي ..


رغم يقيني ..


بـ أنه لا ارتـــواء .. مـن مـعـيـنـهـمـا ..


/