سؤال ودي ألقى له جواب ؟؟

[وجدان القلوب]

الموضوع مره أعجبني يبيله نقاش لا وحاد بعد..
المهم الموضوع هذا يرجع لنفس الأنسان هذا ..والله إذا كانت البنت غنيه لكن فاهمه وعارفه إنها لمن تاخذ واحد أقل من مستواها المادي راح تقدر تتعايش معه في هذا الوضع... وتعرف إنها مع الأيام ماراح تحسسه إنها أفضل منه .. وقتها عادي أيدها تاخذه.. بس إذا تعرف نفسها ماراح تقدر تتقبل هذا الشي تتركه من البدايه.. ونفس الشي الرجل..

بس في نظري الغني أو الغنيه لاتاخذ من هو أقل منها بكثير.. لإنها مهما جاملته راح تعيش بصعوبه..

والمفروض الأباء مايعطون عيالهم كل شي يتمنونه (ماقلت مايعطونهم أبد) بس يحسسونهم إن مو كل شي يجي بسهوله .. حتى تقدر تتعايش مع الوقت .. ماتدري حياة بكره اشلون بتكون..


( أصابع اليد مو مثل بعض) ... صححححححححححححححححححح
الناس يختلفون..
فيه من الناس تتأقلم وفيه اللي لا ...
(هذا من وجهة نظري)

الأخت الهنوف رأي ممتاز جداً وأعتقد يلامس الواقع

الأخت وجدان رأيك جميل وهو صحيح برضه

وأنا رأيي لن قوله الآن بل سأتركه في آخر شيء لما تنتهون وبقفل الموضوع بحيث مايقبل ردود نهائياً

رايي انا ياعهود:
ان الانسان المفروض ماينظر لغيره غني ؟؟فقير؟؟ لأن بالنهايه كلنا فقراء عندالله والفلوس ترى مو كل شيء
والانسان نعمته زواله يعني ماراح تتدوم لكن الاخلاق بحسب الشخص اللي يتصف بها نتوقع انها بتدوم
1-
مو كل واحد غني راح يسعد اللي بياخذها لان المره صح تتمنى كل شيء يتحقق لها بس في النهايه هي عندها احاسيس وتحتاج للكلام الحلو والطيب اللي يسعدها يعني إذا كانت تبي تغطي فقرها بالفلوس راح تغطيه بفقر العيشه الهنيه والموده
لكن في حالة الرجال والله غني واخلاقه ماشاء الله فهو راح يسعدها دون ماتفقد اللي تبيه من الاثنين من تلبيه كل شيء تتمناه ومن سعادتها

2-
يعني لو تزوجت المره رجال فقير يقدرون هم اثنينهم الرقي بانفسهم للأفضل
لكن إذا كانت البنت مدلعه ومنفذه كل طلباتها عند اهلها واخلاقها يعني عاديه فمااتوقع استمرار حياتهم لانها راح تسيطر عليه وتضغط عليه وتقول انا يوم عند ابوي يسوي لي كذا وانا وانا.....
وهذا مايصير في حق الرجال
لكن إذا كانت مدلعه عند اهلها بتلبيه كل طلباتها واخلاقها ماشاء الله فيتوكل على الله لانها بتكون عاقله وبتقدر ظروف زوجها

ويتذكر بعد ان الرسول صلى الله عليه وسلم قال في مامعنى حديثه:
"تنكح المرآه لأربع لماله وجمالها وحسبها ودينها فاظفر بذات الدين تربت يداك"
يعني الزواج من طبقه غير طبقتك الماديه تعتمد على اخلاق ودين الانسان
لان كل ماكلنوا يخافون الله بيسوون كل ماعليهم من واجبات وحقوق وبيعيشون بعيشه هنيه فسبحان الله مايأمر بشيء إلا لحكمه

عهود والله عقلك ماهوب على شكلك ماشاء الله عليك الله لايضرك

بالنسبه لرأيك جيد بس ماتلاحظين أو خلينا نقول تخيلي معي لو أن فيه أمرأة غنيه وزوج على قد حاله وكانت المرأة تسكن قصر ثم جت من قصر لشقه والرجال من أطيب الرجال والكل يتمناه بالله أسألك حتى مع مواصفات الرجال المغريه هل ممكن تتحمل هذي العيشة وسط شقه وتطبخ وتعيش معه ويمكن مايروح بها ألا للبر هذي سياحتها وهي سياحتها في أرجاء القارات مع اهلها تتوقعين بالله تستطيع تصبر حتى وأن كان زوجها طيب وحبوب ويصبحها بأشعار ويمسيها بحنان بالله بالله بتصبر وهي وين كانت ووين صارت جيبي كلام واقعي ياعهود

تبي كلام واقعي
واقسم بالله العظيم ان بنت خالي يعني مو وحده بعيده واقول ماصدق وتحدى ((اقولك قصتها))
خالي ماله الابنت وحده وولد واحد ومدلعهم اخر تدليع والحمدلله ربي منعم عليه يعني ماتقول ابي كذا الا وصاير لها
وجايبه لها
بس هي ماشاء الله عليها متدينه واخلاقها حلوه وكل الجماعه يحبونها
تزوجت ولد خالي الثاني وهو على قد حاله يعني يادوب سياره تقصيد من راتبه وشقه اجار يعني راتبه نصه طار
وشوفها الحين عايشه معه وبكل سعاده الله يدوم السعاده بينهم
ولا ماتاخذ ولا شيء من ابوها علشان ماتزعله ويقول ليش انتي بغيتي شيء ماجبته لك يعني تغيرت حياتها 180 درجه من تنفيذ لكل طلباتها ليادوب ينفذ شيء لها
يعني هم اللي يسعادون بعض في حياتهم دون اي احد يدخل فيها ولاتقول ماتدوم
هذاهي الحين معاها بنت وعمر بنتها 3 سنوات وش تبي واقع اكثر من كذا


وياذيب الرسول صلى الله عليه وسلم جمع بين الجمال والدين والحسب والمال
فقال الحسب والجمال والمال لانه عارف ان النفس طماعه والزمن فيه عادات تتغير وعقليات بعد تتغير بحسب التطور اللي يحصل في العصور يعني قبل يفكرون فيها في عصر الرسول صلى الله عليه وسلم بس كان الدين اهم شيء عندهم
لكن في عصرنا هذا لا تغير كل شيء وعلشان كذا الدين والاخلاق شيء مهم في شريك او شريكت الحياه
والانسان المتدين مو مهم كيف المكان اللي عايش فيه المهم عنده كيف هو يرضي ربه
والمهم عنده بعد مين اللي عايش فيه وكيف يرضيه


صح ومعك حق في ان الواقع يعكس لنا اشياء كثيره زي كذا لكن في الواقع نفسه يوجد ناس يسوون اللي قلته
يعني بااختصار شديد الناس مو زي بعض

عهود والله عقلك ماهوب على شكلك

وش تقصد ترى انا كنت ناويه مااكتب فيه بس حسيت انه موضوع يستحق النقاش فايدي اكلتني لين كتبت
دايم تطلع الحاجه غصب عني على اني مابي بس يالله وش اقول الشكوى له

[سناعيس]

الأخ الغالي ذيب السنافي

شكلك ناوي على نيه !!!

أما ان بغيت رأي أخوك سناعيس المتواضع فهو كالتالي :

أن تكون الزوجه قريبه من الطبقة التي أنت عليها ولا ينبغي أن يكون الفارق المعيشي (الاقتصادي) بين الزوجين كبير جدا لأن التفاوت الكبير بين الزوجين في الحياة الماديه لابد أن يكون له أثر واضح على التفكير والثقافه وردود الفعل تجاه أي قضيه وأمور كثيره يصعب حصرها . مع العلم أن لكل قاعده شواذ اذ أن ذات الدين والتي أوصانا بها خاتم الأنبياء وسيد المرسلين لاتهتم بجميع هذه الأمور وهي بالنسبة لها أمور دنيويه فقط .

وآمل بأنني قللت الكلام فدللت .

تحياتي

أنا من رأي الهنوف الوضع صعب جدا

حكمتي بالحياه: قليل يسعدك ولا كثير يشقيك

انا معهم ومب معهم باللي قالوه
يعني وحده فقيره او انها محرومه من ابسط حقوقها كفتاة في بيت اهلها وتاخذ لها واحد شبعان
راح يكون فيه كثير من الملاحظات
يعني بكل صراحه ماراح تصدق عمرها وكله هات جيب لي ابي كذا
بالاول راح يسكت ويجامل
بس بعدين خلاص

وهنا ابقولكم قصة وحده اختي تعرف اخت الرجل
هذي وحده باول ثانوي عمرها لم يتجاوز 16 سنه تزوجت من واحد شبعان
ولظروف اهله الصحيه ماسافر
مر اسبوع على الزواج الا والبنت تقول لزوجها توديني الملاهي انا واعدت صديقاتي وخلاص
ادري بتقولون عشانها صغيره بس حتى بنت محرومه
بس بصراحه ماادري وش اللي صار بعدها

البنت كانوا اهلها متشددين معها تخيلوا انها كانت متخيله الزواج بس طلعات وومشاوير

حتى العكس راح يكون كثير عليها ملاحظات

لكن الواحد المفروض مايهتم بهالاشياء

يعني هالغني والا الغنيه يمكن يجي يوم مايصير معهم غير الثياب اللي لابسينها
انا من وجهة نظري ان البنت الفقيره اهون عندي تاخذ غني
ولا العكس
ليش لان البنت يمكن تنكد عليك عيشتك
وتقول انا ببيت هلي كذا وكنا نروح كذا وكنا كذا
بتقعد تعير فيك
وبتكره اليوم اللي فكرت فيه تاخذ بنت عز على قولتهم

مثل ماقلت لكم قليل يسعدك ولا كثير يشقيك

عهود يسلمك ربي أنا أتكلم من باب الواقعيه ولا لين جينا من ناحية الدين أنا عارف كل شيء بس كلامك جيد وراح أقول رأيي في الأخير

الأخ الغالي ذيب السنافي

شكلك ناوي على نيه !!!

أخوي سناعيس لا والله

بس حبيت أعرف مستوى التفكير عندنا في مجتمعنا وهذا السؤال صدقني أني سألته حتى لشيبان كبار في السن
أم ريان نحتاج لرأيك الشخصي

حكمتي بالحياه: قليل يسعدك ولا كثير يشقيك

نجود كلام عقال بصراحه ومشاء الله عليك

والله يسهل على الجميع وبأنتظر لأشوف أن كان لأحد إضافة أو رأي وبعدها بقول رأيي

[الطائر المهاجر]

المشكلة في الشباب والشابات إنهم إذا حبوا اندفعوا وانعموا ، مثل اللي نايم ، واذا صحى ، لقى نفسه
وقد طاح من السرير ...
الموضوع لا تساهلون به .... أي فوارق بين الطرفين ، يعتبر بركان خامد يمكن أن ينفجر في أية لحظة
وخاصة الفوارق المادية وبالذات لما يكون الشاب فقير والشابه من بنت غنيه ، قد يقول البعض إنها تأتي
وهي مشبعة من كل شئ من الماديات ولاتحتاج إلا للحب والحنان ، لكن مع مرور الوقت يذبل الحب والحنان
ولو هي سكتت فحواليها من يذكرها بالفارق ، فهي ترى كيف تلبس اخواتها وما يتمتعن به من ميزات ماليه
هي لاتستطيع التمتع بها ، وحتى لو فرضنا أن الشاب تغاضى عن دعم العائلة لبنتهم ، فإنه سيتنازل مقابل ذلك
عن الكثير من الأمور التي تميز شخصيته كزوج ، لنرى الشابة تبدأ تفرض عليه ما تريد ، والحماة تطالب بمزيد
من الحرية لبنتها ، وبالتالي يشعر بالدونية ، ليتحول إلى تيس ، يجر بحبل في رقبته ، ولكن الذي لايزال يفرض
رجولته ، ويرفض تدخل عائلتها في شئوونهم ويطالبها بالعيش في حدود ما يوفره لها ، سرعان ما يواجه الكثير من المشاكل التي تحول البيت إلى جحيم ، ليفر بجلده في النهاية .. وقد يكون الضحية الأطفال ..