الرؤية الشرعيه ...

[بارقةأمل]

من اللي جاي يشوف الثاني ، ووش اللي متعارف عليه بين الناس ، البنت تشوفه او هو يجي يشوفها
لاتلفين الموضوعين ..... الوضع غلط ، والبنت تعرض كنها بضاعه ، ياتعجب الشاري يا يروح ، بغض النظر
عن النتائج ..

كلامك مخالف للسنة وزيادة من قال إنه هو اللي جاي يشوف وبس هي بعد لازم تشوف وأعرف كم وحدة يوم شافوا الخطيب رفضو ه
وأعرف وحدة الخاطب شايفها بهذه الطريقة اللي قلتوا عنها بس هو شافها بالصدفة في عزيمة وطار عقله فيها
المهم جاء وتقدم وأبوها متشدد طبعاً لايمكن تشوفين لو الموت أو يشوفتس
المهم البنت قالت لأمها والله لوتموتون ما آخذه لين أشوفه أنا ورتبت أمها وأخوها مو عد في غياب الأب
وشافت عريس الغفلة ووافقت بعدين

وكيف تقول بضاعة ليش هي في حراج بن قاسم للي يدفع أكثر ولا أبوها عارضها للبيع عند مكتب عقاري

هالحين رجعتي لفكرتي بالنظر غير المباشر ودون معرفة الطرفين لما قلتي
"هو ممكن تخليه يجلس في مكان ماتدري عنه البنت في البيت ممكن يجي للمجلس ويجلس بالشباك وأبوها يناديها تعالي شيلي الأغراض من هنا وأنا أبوتس

بالعكس أنا كنت كاتبة ماتعجبني هذي الطريقة بس شكله طاحت الحروف

بس ريعجبني هالأسلوب فيه ناس تشوف أشكالهم يعجبونك بس يبدون يتكلمون تقول يااااااااااااااااااليته ماتكلم ويازينه ساكت ويا صبر الأرض عليهم إلى ألأحين شايلتهم

خطأ مطبعي والصح ما يعجبني هالأسلوب لأنه غير وافي لأنه فيه ناس تشوف أشكالهم يعجبونك 0000000000الخ المقطع
بس تراني كنت أكتب بسرعة وعندي ناس يعني ما راجعت اللي كتبته إلا من شوي

يعني داخليا غير مقتنعه ، بفكرك الأول ، شئ طيب الرجوع للحق فضيلة..

لا مو مقتنعة مرة مثال لو أنا في الموقف إذا الخاطب يبي يشوفني من غير ما أدري كيفه لكن أنا لا لازم شوفه وجهاً لوجه
وهي النظرة ليست اللي بتخلي الأمور تمشي لكنها على الأقل يبدأ منها القبول ثم يأتي دور أشياء أخرى مثل الأخلاق والتفاهم والتوافق أو على الأقل التقارب في الطباع

[الطائر المهاجر]

يوم صادوه ، راح للسنه
القاعدة الشرعية تقول : لاضرر ولا ضرار ، هذا فيه ضرر على البنت ، والناس اليوم
غير الناس في وقت الصحابه ..

[بارقةأمل]

المشاركة الأصلية كتبت بواسطة الطائر المهاجر

يوم صادوه ، راح للسنه
القاعدة الشرعية تقول : لاضرر ولا ضرار ، هذا فيه ضرر على البنت ، والناس اليوم
غير الناس في وقت الصحابه ..

ليش يوم صادوه ومن اللي صادني هذا رأيي لكن يبدولي إنك أنت تقصد إنو كل واحد جاي يخطب يشوف البنت
لا إنا طريقتنا إذا الرجل موافق على البنت خلاص من خلال كلام الأهل وغيره يعني جاي وخلاص باقي الملكة
لازم يشوفها قبل هذا إللي إحنا ماشين عليه أما إن كل واحد توه جاي يبي يخطب ماعنده خلفية عن البنت أبد ولا ندري هو جاد ولا بس جاي يقول أشوف تصلح ولا ماتصلح لا هذا مايصلح عندنا لكن الشوفة عندنا تتم بعد إن أبوها يتفق الخاطب على أغلب الأمور إنه خلاص مافيه خلاف وأعرف ناس ماشافوها إلا بعد الملكة وقاموا من على الملاك يعني تطلقوا لأنه يوم شافها ما صارفيه بينهم قبول إما من الزوج وهذا هو الغالب أو من الزوجة

[الطائر المهاجر]

"إنا طريقتنا إذا الرجل موافق على البنت خلاص من خلال كلام الأهل وغيره يعني جاي وخلاص"
وين كلامك عن السنة قبل شوي ؟

[بارقةأمل]

المشاركة الأصلية كتبت بواسطة الطائر المهاجر

"إنا طريقتنا إذا الرجل موافق على البنت خلاص من خلال كلام الأهل وغيره يعني جاي وخلاص"
وين كلامك عن السنة قبل شوي ؟

كلامي هو هو ماتغير والسنة ما قالت خل بنتك لزعيط ومعيط كل شوي يتفرجون لازم يكون الواحد جاي وجاد في الموضوع مو جاي توه يبي يخطب أو متردد
وطبعاً لازم يكون عنده موافقة ومعلومات من خلال كلام الأهل وتكون أنت عارف مطالب الخاطب إذا يبي ملكة جما والله وبنتنا على جريف من الزين وشوله نخليه يشوفها على طول بنتنا ماتناسبك
وأنا قلت لك فيه ناس كثير خلاص باقي الملكة بس يوم شافو بعض تغير الوضع وإتفركش كل شي
يعني مو خلاص عشان باقي الملكة بيشوفها وحتى لو ما عجبها أو ما عجبته الموضوع بيتم لكن هذا يثبت إن الإنسان جاد ولا وش اللي يخلي ناس تقوم من الملاك هو كذا بيروح عليه المهر ومع ذلك تلاقيه ما يهمه
لأنه ماراح يتزوج وحدة ما تقبلها من البداية وأرف لك ناس ليلة الزواج نفسها طلعوا من عند العروس ما قدروا يجلسون ماصار فيه قبول وهذا خطأ اللي يرفضون الشوفة قبل الملاك لأنه بعد الملاك الزوج غالباً بيخسر المهر
عاد نصفه أو كله وأنت أكيد تعرف الحكم متى يروح عليك المهر ومتى تاخذ نصفه
هاه أي أحسن عندك يشوف قبل ولا عقب

[الطائر المهاجر]

"بعد الملاك الزوج غالباً بيخسر المهر
عاد نصفه أو كله وأنت أكيد تعرف الحكم متى يروح عليك المهر ومتى تاخذ نصفه"
اجل ما تدرين وش يسوون بعض المطاوعه وبعض المنحرفين ، ينكد عليها ويهبل بها ، الين يدفعون اهلها المهر ومعه ضعفه لتخليصها منه

[بارقةأمل]

اجل ما تدرين وش يسوون بعض المطاوعه وبعض المنحرفين ، ينكد عليها ويهبل بها ، الين يدفعون اهلها المهر ومعه ضعفه لتخليصها منه

إذاً الآن صار كلامي هو الصح خله يشوفها قبل الملكة وتحويلة من أول الدرجة ولا تحويلتنننننن من أعلاها

[الطائر المهاجر]

هذا ماله علاقة بالشوفة من عدمها ....
بل يمكن يخدعهم بكلامه ومظهره وانه ابن عيله ..
على العموم ...انت لك طريقتك وانا لي طريقتي
والخطان المتوازيان لايلتقيان

[بارقةأمل]

والله الإنسان يسوي اللي عليه عشان لا يندم بعدين
أول شي يسأل عن الشخص سؤال كامل خاصة في عمله
والناس ماتعلم الغيب وهو بعد وهو لوالمسألة الشوفة لوحدها هانت المسألة حتى بعد الشوفة والزواج تبدأ تظهر الأمور على حقيقتها تروح المجاملات ويبدأ كل شخص يعرف طباع الآخر وممكن
مايقدر يندمج معها
لكن مهما فعلت ماراح تقضي على الطلاق لأنو لو على النظر لوحده هذوليهم في مصر وغيرها كاشفين
من الأصل وتشوفه ويشوفها ومع ذلك أعلى نسب طلاق عندهم وعند الغربيين اللي يعيش مع بعض قبل الزواج
ومع ذلك إذا تزوجوا تطلقوا والسبب أقول لك هو إن أعظم عمل يقوم فيه الشيطان هو التفريق بين الأزواج

[منيع]

الحق احق ان يتبع
والرؤية الشرعية تحمل مشروعيتها من اسمها
وماعدى ذالك اجتهادات شخصية وعادات وتقاليد يحرص البعض على التمسك بها من باب حاجة في نفس يعقوب لااكثر ولااقل
تحياتي