اسبرانزا و غزوة ابوظبي

اسبرانزا و غزوة ابوظبي

الجزء الثاني

زوجتي ضاعت

نسيت اذكر لكم في الجزء السابق إن المعهد اللي من المفترض احضر عندهم الدورة في فندق الحمراء بلازا غير الفندق و نقل الدورة إلي فندق أخر أسمة هيلتون كورنيش رزدينس ، طبعاً المعهد بلغني بالشي هذا في اليوم السابق لسفرتي و زودني بخريطة توضح الطريق من فندق الحمراء بلازا إلي فندق الهيلتون.

و كان يبدو من الخريطة إن المسافة بين الفندقين قريبة و يمكن ما تأخذ أكثر من عشر دقائق مشي ، و تأكدت من قرب فندق الهيلتون يوم شفت فندق الميريدين اللي من المفترض يكون قريب منه و هو فقط في نهائية شارع زايد و كنت اقدر أشوف فندق الميريدين إذا وقفت في الشارع إمام فندق الحمراء بلازا.

المهم أصبحت ثاني يوم و أول شي سويته هو إني أخذت كم صوره لتقاطع الطرق الموجود إما فندق الحمراء من شباك غرفتي.













هذي صور لتقاطع الطرق الموجود إمام الفندق


بعد ما أخذت الصور السابقة و كانت الساعة تشير إلي السابعة و أربعون دقيقة توكلت على الله و طلعت في الشارع عشان أوقف لي تكسي يوديني لم الفندق المذكور ، وقفت في الشارع و بديت بالتأشير لسيارات التكسي من المواقف المخصصة لذلك ، لكن لا حياة لمن ينادي ، التكاسي ما كانت على استعداد توقف لي أو توقف لغيري من اللي ينتظرون ، و لان الدورة من المفترض تبدى عند الساعة 8 و خوفي من إني أتأخر قررت امشي للفندق ، مشيت الين قطعت حدود 2 كيلو و وصلت إلي فندق المريدين ، دورت حول المريدين عن فندق الهيلتون بس ما لقيته ، شفت لي واحد خواجة يمشي في الطريق معي فسألته عن مكان الهيلتون ، المفاجئة انه قال لي إن فندق الهيلتون يبعد حدود 30 دقيقة مشي من المكان اللي إنا فيه ، قفلت معي و قررت اتصل على شركة الغزال ، خلال 5 دقائق وصلت سيارة شركة التكاسي حقة الغزال و اخذوني من قدام مطعم بيزا هت الموجود عند تقاطع شارع الشيخ زايد الثاني و تقاطع شارع الظاهر أسمة السلام ، طلبت من سواق الغزال يوديني للهيلتون ،و بالفعل و خلال 10 دقائق وصلت للفندق ، دخلت الفندق و سألت عن مكان الدورة من استقبال الفندق فقالو لي انه ما عندهم دوره منضمة باسم المعهد إلي إنا مسجل معه ، و قالوا لي إن الدورة احتمال تكون في فندق الهيلتون الثاني.

طلعت من الفندق و لقيت وحده من سيارات شركة الغزال و طلبت منه يوديني لم الفندق المطلوب ،و خلال 5 دقائق و صلت للفندق و كانت الساعة حدود 8:30 .

دخلت القاعة اللي فيها الدورة و اكتشفت إن الأشخاص الثانين اللي معي فيها حصل معهم نفس الالتباس في الفنادق لذلك 2 منهم كانوا ما بعد وصلو يوم إنا وصلت.

الدورة كان فيها 4 أشخاص ثانين غيري و كلهم يشتغلون في ابوظبي و الفرق بيني و بينهم إني إنا دافع تكاليف دورتي من حسابي الخاص بينما هم على حساب الشركات اللي هم يشتغلون فيها ، كان معي في الدورة وحده إماراتية تشتغل في شركة ادنوك و احد لبناني و معه إماراتي يشتغلون في بنك المشرق و واحد هندي يشتغل في بنك بس مدري وش اسم البنك.

يوم جئ وقت الغداء طلبوا مننا نروح و نتغداء في مطعم الفندق على حساب الدورة ، إنا ما كنت أبي غدا و كان اللي في بالي رأس معسل يعدل الرأس ، سألت سوداني كان واقف في الفندق عن مقهى قريب فقال لي إن فيه مقهى قطع الشارع عن الفندق اسمه (ليالي زمان) ، إنا يوم قال لي اسم الفندق على طول تذكرت إن الأخت (ام المداويخ) قالت لي عنه ، مشيت للمقهى و اكتشفت انه مهوب قطع الشارع مباشرة إنما على بعد حدود 5 دقائق مشي منه ، وصلت للمقهى و طلبت لي رأس تفاح و قعدت امخمخ عليه.












هذي صور من مقهى ليالي زمان و العمائر الموجودة خلفه.


اثنا ما كنت في المقهى اتصلت على المعزبة عشان اتطمن عليها فقالت لي أنها اتصلت على شركة الغزال و خلتهم يوصلونها لم سوق المرينا عشان ودها تتقضي شوي و اتفقت معها إني ألاقيها في السوق بعد ما اخلص من دورتي.

بعد ما خلصت راسي دقيتها رجليه و رجعت للفندق و كملت دورتي لليوم الأول (تراني نسي أقول لكم إن الدورة هي في مهارات إجراء المقابلة الشخصية).

طلعت من الفندق و اتصلت على حقين الغزال مره ثانية و خليتهم يوصلوني لم سوق المرينا.

يوم وصلت للسوق و رحت للمكان اللي اتفقت مع المعزبة إني ألاقيها فيه ، لقيتها غايصة بين أكياس الإغراض اللي هي شاريتها (ما أشور عليكم تأخذون زوجاتكم معكم لم بلد أجنبي و تخلونها تتقضي بلحالها ) ، إنا بحلت يكثر الإغراض اللي هي شرتها ، لذلك اضطررت اكلم حقين الغزال مره ثانية عشان يجون يرجعوني للفندق و أحط مقاضي المعزبة ، و بعد ما حطيت المقاضي في الفندق رجعت إنا و المعزبة مره ثانية للسوق عشان نتفرج لنا على فلم في السينما.

بعد ما تفرجنا على الفلم مشينا لم مقهى هافانا و تعشينا و بعدين رجعنا و أمرحنا في الفندق.

ثاني يوم جدولي كان هو نفسه ، لكن الفرق إني اتصلت على الغزال و خليتهم يوصلوني لم فندق الهيلتون اللي كان فيه الدورة ، إما المعزبه فهي أيضا راحت لم سوق المرينا مره ثانية.

بعد ما انتهيت من الدورة حقتي و استلمت شهادة أنها الدورة أخذت احد سيارات الغزال و رحت أيضا للسوق ، و إنا في الطريق للسوق اتصلت على المعزبة عشان تقول لي وين ألاقيها فيه في السوق لكن المشكلة أنها ما كانت ترد على الجوال ، اتصلت و اتصلت عليها حدود مئة مره لكن بدون فائدة ، وصلت للسوق و بديت أدور فيه و أدور على المعزبة ، لكن أيضا ما لقيتها.

إنا الحقيقة خفت من الأسوأ و جئ في بالي انه ممكن يكون صر لها شي ، رحت على كاونتر المعلومات حق السوق و خليتهم ينادون عليها لكن أيضا بدون فائدة.

إنا هنا استسلمت و ايقنت أنها أكيد صار لها شي ، ما عرفت وش أسوي ، هل أدور على المستشفيات أو اتصل على الشرطة أو وش أسوي ، فكرت اتصل على أبو أو أم زوجتي و أقول لهم إني ضيعت بنتهم ، بس ما كان الشي هذا منطقي ، يعني وش بيقدرون يسوون.

إنا استسلمت للموضوع و رحت قعدت في احد الطاولات التابعة لكافيه موجود في لدور الثاني من السوق و بديت أفكر وش الحل.

خلاص زوجتي ضاعت ولا في اليد حل.

(يتبــــع)

كمل ترى متابعين يابعدي نبي نشوف وش صار؟؟؟

هل وجدتها ولا ضاعت ؟؟

ذيب السنافي

مشكور على المتابعة

و في الجزء القادم نشوفانا القاءها او لا

[ابو أنس]

اسبرنزا ..............
من معركة الى معركه . ومن اثارة الى اثاره
ونحن فقط نتابع ابداعك وتميز حرفك
لك التحية والشكر

[ثار التميميه]

رحله جميله جدا

امتعتنا فعلا

شكرا لك

أبوأنس
ثار التميميه


مشكورين و ربي يعطيكم الف عافية على مشاركاتكم الكريمة


لكم اجمل تحية

اسبرانزا و غزوة ابوظبي

الجزء الاخير

تمشية في ابوظبي


جلست على طاولة الكافية و بديت اهوجس في المشكلة اللي إنا طحت فيها ، مشكلة زوجتي اللي ضاعت.

طلعت جوالي من مخباتي و شغلت الآلة الحاسبة و بديت احسب و احسب و احسب ، بعد حساب مطول اكتشفت إني محتاج حدود سنة إضافية عشان اقدر اجمع حق المهر و الشبكة عشان أدور لي على زوجة جديدة.pb034

لا تفهموني غلط ، إنا إمام أمر واقعي ، زوجتي و ضاعت و الحين إنا مضطر أدور على زوجة جديدة ، صحيح إن العزوبية لها مميزاتها ، بس المشكلة إني خلاص تعودت على وجود زوجة في حياتي.pb094

و إنا في خضم (والله خطيرة كلمة خضم هذي) حساباتي تفاجأن بباب ينفتح من ممر صغير قدامي و زوجتي تطلع مع الباب هذا ، شعوري في اللحظة هذي كان مختلط ففرحتي في توفير قيمة المهر و الشبكة الجديدة كان يقابله الحزن باني منيب قادر اخذ زوجة جديدة ، انتم تدرون إن الرجاجيل زايغة عيونهم و ما يصدقون على الله يجي سبب يخليهم يتزوجون مره ثانية.

قمت و رحت لم زوجتي و الدموع تنهمر من عيوني و خميتها في وسط السوق و أظهرت لها فرحتي الكبيرة باني لقيتها.pb131

بعد اخذ و عطي في الكلام مع زوجتي قالت لي أنها دخلت المحل اللي توها طالعة منه و اللي كان محل كوافير نسائي و أنها ضبطت مناكيرها.

طلعت أنا و زوجتي لم السينما في السوق و تفرجنا لنا على فلم و بعدها مرينا على كافي هافانا و تعشينا فيه و بعدها رجعنا للفندق و أمرحنا ليلتنا.

اصبحنا ثالث يوم من وجودنا في ابوظبي و كان يوم خميس حدود الظهر و ضفينا عفشنا و طلعنا من الفندق.

كان خروجنا من الفندق إجباري لأنهم رفضو يمددون حجزنا لمدة يوم واحد فقط (كانوا قليلين خاتمة والله) .
و لان أخر موعد للخروج من فندق الحمراء بلازا كان الساعة 12 الظهر ، بينما وقت الدخول (الشك ان ) في فندق الهيلتون كورنيش اللي كنت حجزت فيه غرفة قبل يوم هو الساعة 3 بعد الظهر ، فضلت إني إنا و المعزبة نروح لم سوق المرينا و نتفرج لنا على فلم الين تجي الساعة 3 .

اتصلت على حقين الغزال و جتني السيارة و توجهنا لم السوق.





هذا مدخل صالات السينما في السوق.




بعد ما شفنا لنا فلم ، طلعنا و تمشينا في السوق شوي.







هذي صور من السوق.





بعد ما خلصنا من الفلم و الدوران في السوق طلعنا و ركبنا السيارة حقت الغزال اللي حرصت أنها تنتظرنا في السوق عشان ما نتوهق لأنه كان في بعض الأوقات كانوا حقين الغزال ما يرسلون سيارة بسبب عدم توفر وحده ، و كان سعر السيارة بالساعة 65 درهم فكانت معقولة نوعاً ما.

طلبت من سواق السيارة يمشينا في ابوظبي شوب ، فكان أول مكان ودانا لمه هو فندق قصر الإمارات ، و كان هدفي دخول الفندق و تصويره من الداخل لكن لان الفندق كان بيحتضن القمة الخليجية بعد كم يوم كان محوط بالشرطة و ممنوع دخول الزوار له.

لذلك اكتفيت بالدوران من حوله و تصوير الصور التالية:



































صور لفندق قصر الإمارات من الخارج.





بعد كذا طلبت من السواق ينزلنا على كورنيش ابوظبي في الجزء الموجود على الطريق إلي منطقة المرينا.

نزلت و بديت امشي على الكورنيش و كان فيه اعتقد سباق لزوارق الفورميلا ون في ابوظبي فكان البحر الموجود على الكورنيش مليان بالزوارق اللي كل شوي ماره وحده منها.






















هذي صور للبحر المقابل للكورنيش و يظهر في الصور بعض الزوارق و مدينة ابوظبي.








و هذي صور لفندق قصر الإمارات من الكورنيش.















و هذي صور أخرا من الكورنيش.





بعد كذا اتصلت على السواق و جئ أخذنا من على الكورنيش ، و بدا يلف فينا على منطقة المرينا ، فالتقطت الصور التالية:






الصور هذي أخذتها و إنا في السيارة لمطعم اسمه مطعم السفن





و هذي سارية عالية لعلم الإمارات في المنطقة.














يم وصلنا إلي طرف الكورنيش في المرينا نزلت و صور الصور هذي.








بعدين ركبت السيارة و حركنا و وقفت في منطقة ثانية على الكورنيش مقابلة لسوق المرينا و أخذت الصور هذي.



















و هذي صور لسوق و منطقة المرينا أخذتها و إنا في السيارة.






بعد ما خلصنا من اللفة هذي طلبت من السواق يودينا لم كافيه هافانا عشان نأكل لنا شي و في نفس الوقت اعل راسي برأس معسل.






هذا مبنى الكافية من برا





هذا المرسدس حق الغزال اللي كنا مستأجرينه.







و هذي صور للكافية من الداخل.









و هذي صور من نادي اليخوت المجاور للكافية.




بعد ما أكلنا في الكافية انطلقنا في طريقنا لفندق الهيلتون.

حجزي كان في غرفة في الدور التنفيذي بسعر 1000 ريال لمدة ليلة وحده بس (سعر الليلة في الفندق هذا كانت أكثر من ثلاث ليالي في فندق الحمراء بلازا).

بس الحق يقال إن الفندق كان في قمة الروعة على إن غرفته كانت اصغر بكثير من الغرفة في الفندق السابق.

نزلنا عفشنا في الغرفة و انطلقنا من جديد و كانت وجهتنا المره هذي إلي سوق اسمه مركز مدينة زايد.




هذا المركز من برا.





دخلنا المركز و اللي كان أشبة ما يكون بسوق العقارية القديم في الرياض ، لكن للأسف كانت اغلب الأماكن في السوق مسكره لأنهم كما قيل لي يفتحون الساعة 5 العصر.

لذلك طلبت من السواق يودينا لم سوق أو محلات يبيعون أقمشة بمختلف الأنواع و بالذات الحرير. تصدقون ما عمري سفرت محل مع المعزبة إلا و مريت على أسواق أقمشة لان المعزبة تعد نفسه هي و أمها مصممة أزيا و كانت دائم تشتري الأقمشة من كل مكان و تصمم فساتين و جلابيات و تبعها على الناس ، و إن كان احد منكم يبي يشوف هالازياء يسير على الموقع اللي سويته لها و الموجود على الرابط التالي:

www.50005000.com/Shatha

مع العلم بان الموقع ما زال تحت الإنشاء.


المهم أن السواق ودانا لم بعض المحلات الموجودة خلف سوق أسمة مركز حمدان و شرت المعزبة منه مجموعة من الأقمشة الحليوه.

بعد ما خلصنا من المحل قررنا نروح نشوف لنا شي ثاني نأكله فجى في البال احد المطاعم اللي وصتني عليها (ام المداويخ) و كان أسمة مطعم أوتار.

المطعم على ما اعتقد لبناني في الأصل و يظهر هذا في المقبلات اللي يجيبونها لك قبل ما يجيك طلبك الأصلي.

أكلنا في المطعم المقسوم من الأكل و اللي كان الحقيقة جداً لذيذ و بالذات في أنواع السندوتشات المختلفة.

عاد انتم تعرفون إن الأكل لازم يلحقه رأس معسل ، لذلك طلبت من السواق يوينا لم قهوة تكون قريبة من المنطقة اللي إحنا فيها و تكون القهوة زينة فودانا لم قهوة اسمها (مقهى دار الحي) ، واجهة المقهى كانت للعزاب و كان فيه قسم عائلي بس موجود في قبو المقهى ، توجهنا للقبو و كان مقسم على شكل غرف بحيث كل عائلة تقعد في غرفة و يصيرون معزولين عن الباقين.

أخذت لي رأس سريع في المقهى بعدين طلعنا منه لأنه الحقيقة ما كان زين و كان مكتوم و مضلم بشكل ملحوظ (يسمعون في الجو الرومانسي).




هذي صورة المقهى من الخارج.





بعد ما طلعنا من المقهى قررنا نروح لم سوق ثاني في ابوظبي كانوا مدحوه لنا (مركز ابوظبي) ، توكلنا على الله و رحنا للسوق ، نزلنا السواق في المواقف الموجودة أسفل السوق و دخلتاه.

الحقيقة السوق كان اكبر من سوق المرينا و فيه محلات كثيرة ، بس مشكلته كان مزحوم بزيادة بالمقارنة بسوق المرينا.
المعزبة لقت لها محل يبيع عبايات نسائية فشرت لها عباءة من الحل لكن بعد ما كسرت رأس مدير أو صاحب المحل اللي الظاهر كان إيراني ، أيضا استغلينا الفرصة و تفرجنا لنا على فلم في السينما.

الفلم اللي شفناه كان في صالة صغيره بزيادة و الظاهر ما كان فيه إلا 20 كرسي ، بس اعتقد كان شي طبيعي صغر الصالة لأنه ما كان يتفرج على الفلم إلا حدود 5 أشخاص بالإضافة لنا.

















هذي صور للسوق من الداخل.





يوم جت الساعة حدود 10 بالليل رجعنا للفندق حقنا للنوم و الاستعداد لرحلة العودة للرياض في الصباح.


















هذي صور من الطريق للفندق







و هذي صور من بلكونة غرفة الفندق للشارع المقابل له.






في الصباح ضفينا عفشنا و أخذت احد سيارات الغزال و انطلقنا في الطريق للمطار.

وصولنا للمطار كان بعد 30 دقيقة ، نزلنا عفشنا و توجهنا ألي كاونتر الخطوط السعودية ، بس لقيته مقفل ، استغربت من الموضوع فمريت على كاونتر طيران الخليج عشان استفسر منهم فقالو لي أنهم هم و الخطوط السعودية مشتركين في الخط إلي الرياض و أنهم هم اللي بيودونا إلي الرياض على متن احد طياراتهم.

و الأغرب من هذا أنهم قالوا لي انه تم تأجيل الرحلة إلي الساعة 6 المغرب لان طيارتهم تعطلت.

الساعة كانت 1130 الصباح و الطيارة وقت إقلاعها كان الساعة 6 المغرب ، الحقيقة مدري وش كان الحل عشان كذا رحت لم كاونتر خدمات العملاء التابع لطيران الخليج (امحق من عملاء لو الأمر بيدي ما قبلت عليهم) ، مسكت سرا عند الكاونتر مع اللي كانوا ماسكين سرا و الشي الغير مستغرب إن كل اللي كانوا في السري كانت عندهم نفس مشكلتي ، المهم يوم وصل دوري و قابلت موظفة خدمات العملاء ، قالت لي أن الخط هذا اللي أنا عليه (يعني من ابوظبي إلي الرياض الساعة 11 الصبح) أساسا ما يشغله إلا طيران الخليج ، و قالت لي انه إذا أبي أطير مع السعودية فإنها ممكن تحول تذكرتي على رحلة السعودية اللي عند الساعة 10 بالليل (إنا مدري وش أقول لها ، يعني قالوا تيس و قالت احلبوه) طبعاً أنا قفلت معي و قلت لها أن رحلتي الساعة 11 الصبح و يتم تأجيل الرحلة إلي الساعة 6 المغرب و الحين تشاوريني إذا كنت أبي اطلع على رحلة الساعة عشر بالليل ، فقامت و ردت على و قالت أن طيران الخليج بلغ الخطوط السعودية أن الطيارة عطلانه من أمس و طلبت منهم يبلغون الركاب (يعني تتوقعون إني كنت أبقدر أرد عليها يوم قالت لي إن الطيارة متعطلة من أمس، طبعاً سكت) ، قلت للموظفة "المهم وش الحل ألان" فقالت لي "ارجع لم بيتك و تعال الساعة 6 المغرب و احني نؤمن لك السيارة اللي توصلك ألي بيتك و ترجع مره ثانية للمطار" ، طبعاً لأني سويت شك اوت من الفندق ولا كان يسوى أني ارجع و اخذ غرفة ثانية اتفقت معهم أنهم يوصلوني لم مقهى ليالي زمان و يرجعون يأخذوني منه.

اعطتني الموظفة ورقة و قالت لي اعطيها حقين التكاسي الموجودين برا و أنهم بيتولون توصيلي ، و بالفعل طلعت برا المطار و رحت لم حقين التكاسي و أعطيتهم الورقة و اتفقت مع المشرف حقهم على المكان اللي ينزلوني فيه و بعدين يجون يأخذوني منه ، فعطاني كرته و طلب مني اتصل عليه أول ما أكون جاهز عشان يجون يودوني للمطار.

خلال كم دقيقة جت السيارة اللي بتوصلني و للعجب كان السواق كما اعتقدت في البداية فلبيني ناعم بزيادة ، لكن أول ما ركبت السيارة و بديت أتكلم معه تفاجئت بأنه فلبينية مسترجلة ( والله هالفلبينيين غريبين يا يجونك رجاجيلهم مستحرمين (على وزن حرمة) أو حريم مسترجلين (على وزن رجال).

وصلتنا الفلبينية لم مقهى ليالي زمان و كانت تمشي على الخط الظاهر بسرعة 80 كم في الساعة ، يوم وصلنا للمقهى تغدينا و أنا عدلت الراس بعدين كلمت حقين الغزال مره ثانية و خليتهم يجون عشان يوصواوني لم سوق المرينا.
























هذي صور من ابوظبي و أنا في طريقي ألي مركز المرينا و صور و أنا راجع من مركز المرينا إلي مقهى ليالي زمان.




وصلنا مركز المرينا و تمشينا فيه شوي ، و كان المركز أكثر زحمة من الأيام السابقة و يمكن يكون السبب انه يوم الجمعة.

أكثر شي لفت انتباهي في ذاك اليوم هو الإماراتيين اللي في العادة قليل ما تشوفهم ، و تبون الحقيقة أعجبني في رجاجيلهم أنهم ركزه و كاشخين في ملابسهم ولا يؤذونك يا الواحد من كثر ما يطيرون عيونهم في الرائح و الجائي ، بالإضافة اللي الإماراتيات اللي كانوا كاشخات و في نفس الوقت محترمات ، بس الظاهر كثرتهن زعلت المعزبة و جرتني من يدي و قالت خل نروح نشوف فلم.

بعد ما انتهينا من الفلم و كانت الساعة حدود 5 العصر رجعنا مع نفس سواق الغزال اللي طلبت منه ينتظرنا لم ليالي زمان ، و في المقهى اتصلت على المشرف حق التكاسي في المطار و أرسل لي سيارة ، بس اشوا المره هذي ارسلو لي رجال حقيقي.

و وصلنا للمطار حدود الساعة خمس و نصف و قطعت البوردنق باس حق الطيارة و عديت الجوازات و رحت لم صالة الترانزيت في المطار.

يوم دخلت صالة الترانزيت نصيت الشاشات اللي يكتب فيها مواعيد و بوابات الرحلات ، بس للعجب ما لقيت أي اثر للرحلة حقتي اللي بتودين للرياض.

توجهت لم كاونتر حق طيران الخليج عشان اسألهم عن الرحلة فقالو لي انه تم تأجيل الرحلة إلي وقت غير محدد.

طيب الحين وش الحل ، تبون الصراحة ما كنت ادري وش الحل ، لذلك اضطررت إني اقعد أدور في المطار مع المعزبة الين يجيب الله الفرج.

دوراني في المطار استمر الين الساعة 9 بالليل و إنا كل 5 دقائق أتوجه للشاشة حقت الطياران عشان أدور على رحلتي لكن بدون فائدة ، الرحلة ما كان لها أي اثر على الشاشات.

توجهت مره ثانية للكاونتر حق طيران الخليج (الله لا يوفقهم هم و الخطوط السعودية) فقالو لي إن الرحلة بتقلع من البوابة رقم 20 على ما اعتقد ، لكن ما يدرون متا موعد الرحلة.

توجهت للبوابة و لقيت عندها حدود مليون هندي و بنقلاديشي و باكستاني (كل جنسيات العالم كانوا عند البوابة إلا السعوديين)

قعدت عند البوابة مع الجالسين و بعد حدود الساعتين فتحو البوابة و صفو الناس تقل غنم في باصات و نقلوهم للطيارة.

الحمدلله الطيارة ما كان فيها إلا درجة سياحية و كل راكب كان قاعد فوق الثاني من كثرهم و حتى ما كان فيه احد متقيد برقم كرسيه ، كان كل واحد يقعد في الكرسي اللي يناسبه.

بعد جهد جهيد و حب خشوم البنجلاديشية عشان يقومون من على كرسيي و كرسي المعزبة جلسنا في اماكنا و انطلقنا للرياض.

و بعد حدود الساعة و نصف وصلنا للرياض.

إنا أكثر شي قهرني في الطيران هو إني لو أبي أطير على طيران الخليج كان شريت تذكرة على طيرانهم بسعر ارخص من السعودية.

و هذا حلف مني ، إذا سمعتو إني اطريت اني سافرت على الخطوط السعودية مره ثانية فوالله العظيم إني منيب اسبرانزا ولد ابو اسبرانزا.pb151

و بهذا تنتهي غزوتي في مدينة ابوظبي


استودعكم الله

بصراحه يا أوخيي يا اسبرانزا الرحلة ذي تواليها عزاري

موب مثل الرحلات الحلوووة الثانية الي قريت لك

بس عموماً يعجبني في رحلاتك خصوصاً بعد زواجك أنك صاير عاطفي وتخاف

علشان كذا الين جيت أتزوج بمر عليك تعلمني أصول الرومانسيه الإسبرانزيه خخخخخخخخخ

بس هاه موب تتبرأ مني وتسحب علي ناتعطيني وجه أبي لين دقيت عليك تنقز كنك أسد ونتقابل وتعلمني السوالف من طق طق لين السلام عليكم

[الغريب]

والله انا اول ماشفت ابو ظبي

وتمشيت فيها بصراحه مدينه خياليه بس للاسف ما خدمها الاعلام

مثل دبي

وفي راي انها اجمل مدينه خليجية

مشكور على ها الرحلة والاقتحام

ذيب السنافي

تراى العزوبية زينة يا ديب

بس ان كانك توهقت و تزوجت فبشر بلي يفزع معك في اي وقت



غريب الآه

من جد ابوظبي اجمل و افضل من دبي بمراحل ، بس للاسف محد يعرفها زين


لكم الشكر و التحية