طرقه طويله وين راعي الجزاله

[عمر ال شيبي]

المشاركة الأصلية كتبت بواسطة نجم الإبداع

مني سلام الله على اصحاب الامثال=الي لهم بالشعر والعرف طاله
الي ليامن صاغوّ القاف يختال= يشوق عين الناظر ين ارتجاله
اهل القلوب الصافيه واهل الارحال=ابداعهم معروف بالناس جاله
لن طالت الطرقه مشو دون منزال=مايكتبون الا حروف الجزاله
متفحصين القول وان زل حلال =بالكلمه الحسنى يردون قاله
الي الوفاء فيهم ويوفون مكيال = مايزعلو وان ظل راعي الجهاله
فكرن عريب الجد والعم والخال =واليا تكلم مامدح في خلاله
حسه شبيه الكهرمان وكرستال=صافي السريره سارحن في خياله
لالامس الكلمه زهت ساع الارسال=متناسق المعنى وعذب الرساله
يرسم حروف الشعر في كل الاشكال=صوره بهيه تجذب الفكر طاله
اليا تكلم شهد بين احرفه سال=واليا تباهى بالجمال انحنى له
هذا هو الفكر الذي هز الاجيال= نقض القوافي دام بان اختلاله
ودي بشاعر مارغى تحت الاحمال=او شاعره تبحر وفيها بساله
على القوافي والعدد مثل سلسال=تشبه لعين القطر لاجت مساله
يوصف جمال الحب في قلب رجال=والا تبيّن للهوى كل حاله
والي يسلم لاوصل يدرس الحال = ويقيس قبل الغطس قوّة حباله
فان كان له نيه يواصل ويجتال= وكل شاعر محترف في مجاله
شرقه وغربه سارّ وجنوبه شمال=والي يوافي طاب عندي وصاله

صح لسانك لا هنت واستلم طال عمرك

ارحب هلا به يا هلا رحبِ لارجال=بتصوغ قولن من حكيم الجزاله
منشار رد ٍ عارف ٍ كلّ ِ ما جال=والردّ ردّ القول ساع ِ ارْتجاله
يا مرحبا ترحاب معروف لامثال=من ساهرن بالليل خضري مقاله
العين تبغى العين والقلب مرسال =والشوق طاف الكون مدفع رماله
وش فيك يبن ناخي همومك وصال =لا زالِ غمّك عِنْدِ عِنْدك وِصاله
هات الكلامي وبسط الخال خال=لن طالَتِ مْداد الرحالي لمطواله
خلك قريب النول من طيف ِ منال = يا مذهب ٍ تلعاب سعيك مزواله
وسْمع عريب القلب لا جاك مقوال=من صحرة الإسبال فيها سعاله
أسْعَلْكْ عن طيرٍ يراوده منزال=من قول حكمه ما عرفنا مثاله
وان جاد قلبه بالعلوم إلْيَ يختال=يا زين ذوقه والوصايف رحاله
وارجع اقول الهم ما جاك احوال=خلوة بديره دارَتِ رْحا خلاله
مني سلام الله يا زين مال=كسبة يميني والصحب من جماله
يا مرعبن بالقاف اشناب وزوال=حكمك جبير الدال والكسر مدواله
ما بين كي والمي رحابك حلال=يا مهتني روق الوصايل حِباله
شدّيتَها شدّ البعيرَ الحِمال=والعاف منبوع الأصايل حِماله
واختص براح العين وشرب ل ِهال=كيف ٍ لنا صبّة نقا هال فنجاله

[الطامي]

حوريه
صح بدنش
وشكرا لمرورش
لاهنتي اختي

[الطامي]

عمر ال شيبي
صح بدنك والسانك
وننتظر فلاح يعود لك

لاهنت اخي

[عمر ال شيبي]

المشاركة الأصلية كتبت بواسطة الطامي

عمر ال شيبي
صح بدنك والسانك
وننتظر فلاح يعود لك

لاهنت اخي

سلمت لا هنت ونا انتظر بعد صح قلبك

[نجم الإبداع]

يابو محمد عارفن درب الاغمال =ماني من اصحاب الهوى والخطاله
وانت اتعرّفني قبل من ساق الامثال=والوقت عناني وصعب احتماله
ماشفت ضبي ولا نبي شوفة غزال=يكفي من الوقت الردي مانناله
انا على وضح النقى بين الاهوال=واليا نويت الصيد عارف جلاله
ماناخذ الا در بمحار لازال = مانقرب السوره وذات الشماله
قلبي عليه من الهوى خمسه اقفال=من سنة احمد مابها من كلاله
الي يصد ويلتوي وقت الاقبال = ماهو رفيقن لي ولا ابي سواله
الطيب لاهل الطيب واهل الردى اغوال=اهل القفى ومسوقين الرخاله
ماجيت محضور العرب بين الاطلال=والبيت مع بابه نجي وقت طاله
واهل القلوب السود مامنهم اشكال = احقادهم بقلوبهم جمر ماله
شكرا لفكرك شكر في كل مرسال=ماشفت غير الطيب والغير ماله
صح اللسان وقلب متريح البال = يعيش راس الطيب يازين فاله
تسلم ويسلم حسك الي به الظال=يستهدي ويعرف علوم النكاله
واما المعادي يبشر بكثر الانكال = الين يعرف له جنوب وشماله
يابو محمد نكتفي بالذي صال = واليا نويت الورد فانحر صلاله

[الطامي]

فلاح
صح السانك ملايين
وختامها مسك
لاهنان راسك يالغالي

[عمر ال شيبي]

المشاركة الأصلية كتبت بواسطة الطامي

فلاح
صح السانك ملايين
وختامها مسك
لاهنان راسك يالغالي

حياك يبو محمد ما نبيك سهوله تسلم لا هنت

اجمح ظهير الخيل خلّك مُحال = وشْحَن حرَيك الفِكر عِرْفك وِصاله

رد على القصيده الاخير وبعدها انسحب
ههههههههه
طال عمرك لا هنت ابد

[الطامي]

عمر ال شيبي
هو اللي اراد ذلك وانا اطيعه
طبعا صاحبي اعرفه زين ماله خلق على كثرة الردود لأنه مشغول هالأيام الله يعينه

[عزيزه العزيزه]

صحت ابدانكم
ما شاء الله يعطيكم الصحه

[عمر ال شيبي]

المشاركة الأصلية كتبت بواسطة الطامي

عمر ال شيبي
هو اللي اراد ذلك وانا اطيعه
طبعا صاحبي اعرفه زين ماله خلق على كثرة الردود لأنه مشغول هالأيام الله يعينه

حياك الله

ونحن سعيدين بالتعرف عليك ولنا الشرف

تبارك الله عليكم

وكان الله بالعون