الرد على منتقدي طاش

[الطائر المهاجر]

ابو انس فكره نظيف التباقيش= ماهو مثل بعض الذي بالفكر طاش
امبرمج بآثار هرج الدراويش = اللي بليا علم يفتون بخياش
اذا بغيت تنبهه قال حتيش= يقرا ولايفهم ويلقاك بهواش

[فهد الغنام]

ابو عبدالله ... ادري كثّرنا عليك بس عاد انت كبيرنا لازم تحملنا .....

اتت هذه الابيات على عجل ارجو ان تقبلها ..

بعض العرب ما وقفوه التفاتيش = وإن شاف له نقطه مع الدرب ينحاش
يا اللي تركت الصيد وتجمّع الريش = الظاهر إنك تا تعوّد على ماش
لوّ نظهر الغلطه بروس المناقيش = كثرت مناقيش الخطايا على طاش
والتالفه لوّ زيّنتها الدناديش = ما من وراء راس الضبي عيش وعراش

ولها بقيه سوف تأتي ...

[الطائر المهاجر]

يالشمري فكرك ترى يازن الجيش= تكفى تركد بالرمي تفهم الكاش
خل التعجل تفهم الباش والبيش= صدري الشمال خابره واسع الجاش

[فهد الغنام]

ابو عبد الله .... انت تبيلك قعدها ... مطوله .. خل نعطل بس ..

السالفه ما هيب لبس الطرابيش = السالفه فيها مشاعيب وهواش
جهّز لنا سلك المحطه وجب فيش = وحطوا لنا الدكتور في صورة فلاش
إمّا لقينا من وراهم عراميش = وألاّ ترا من فوقهم طلقت اكلاش

[الطائر المهاجر]

دختورك اللي تذكره فاهم الحيش = ودارس علوم الشرع من غير تغباش
المفتي استاذه بعلم وتهاميش = وحتى ابن جبرين وشيوخ كالشاش
ماجاب علمه من فراغ وتلطيش = ولا قام يفتي مثل بوم وخفاش

[فهد الغنام]

الله يعين عليك ... يابو عبدالله ... بس ركز على بعض الكلمات الحساسه ...

الحر في راس المراقيب ويعيش = والبوم لولا السيف والحق ماعاش
حنّا فهود (ن) للعقيده معاطيش = والفن وأهل الفن قشران وقشاش
ما جاك من مزن السحابه تراشيش= عوّد ترا توّ المطر ديم ورشاش

لا والله قامت
مير تركدوا واتفلوا ابليس
هههههههههه
أنا عارف إن هذا اختلاف
والاختلاف من قديم وليس وليد اللحظة
وتبي الحقيقة يا أبو عبد الله
أما في هذي جانبك الصواب من وجهة نظري
تقول لي تعال نتناقش ونتفاهم
أقول لك لا
لأني أعرفك ما تقتنع بالساهل
عموما بيض الله وجيهكم
المشرف
فهد
تقبلو تحيتي

[الطائر المهاجر]

ما نيب كافر تطلبه يصبغ الريش= ولانتاب مفتي كلمته مابها ارهاش
الحال من بعضه ولا فيه تكييش= وكل بعقله قابل لو به هواش
خلك على حالك فلا فيه تفتيش = دامك صليب الراس ماباقي عراش

المشرف العام


صح لسانك


وعلى شانك

لاهنت

[فهد الغنام]

ابو عبدالله ... وسع صدرك .. لاتشد على عمرك بالحيل توّنا ...

القاف شاب ولا نبيها تعاشيش = ولا نقبل التأجيل خذ ردّها كاش
لا تقلبه يالقرم دقّه وتلّطيش = خلك ثقيل ورابط القلب والجاش
واللي زعل من طاش وش حده يطيش= ليته عن ديار العرب عند الاحباش
واللي نجاحه فيه دفّه وتغشّيش= قد قيل ما حاش المواجيب غشّاش