أبوأنس/الشرقي .. والقوافي المشبوهة !!

[ابو زياد]

يامرحبا ببيوت شاعر وغواص=خصن الى من صار بيته يرصه
اطعم من الرمان واحلى من الجاص=الي من المملوح بيده يقصه
ابها من الياقوت والمع من الماص=وافخم من المرفوع فوق المنصة
باللي بدا بالبيت يطرب على اص=واللي يختم البيت زين على اصة

الاخوة الاعزاء اسمحوا لي بس جازت لي الابيات وحبيت اجاريها
ولا كملت ما ادري ليش بس هذا الي جاكم اقبلوه او ارفضوه
واصلوا واحنا معاكم

الابداع دائمآ مغري ولا يقاوم

[سناعيس]

الدرس هذا لازم له سعر خاص=واعطوا لمن حاز الأدب زود حصه

أشهد بالله انكما ثنائيا أمتعتمونا ولازلتما كذلك

الشرقي
أبو أنس

لكما تحياتي

[الطائر المهاجر]

صوت وصدى يطرب لها شايب الهاص = ومعه الأكك والبنت غنت بغصه
وتاريخ حافل من منولوج مشقاص = واللي كشف للسر ما سلم عصه
ما فيه غصنٍ ما تمايل ولا حاص = ومنهو نكر ذلك فهذا يخصه
بين البحر والشط او رشفة قلاص = حس قديم ولو بقى منه نصه
سنايدي ياللي تحدر بمقناص = وجاب الخبر ماهاب عينٍ تتصه
وإلا المطوع لو توزى ورى الباص = يمشي ويعرف لو وقف وسط رصه

[نجم الإبداع]

ياسلام عليكم

ابداع وايما ابداع

تحياتي لكم جميعا

[ابو أنس]

كلن ترى يرقص على ايقاع رقّاص=وكلن يترجم ما يبيه ويخصّه
واللي يقول العشق تمثيل هقّاص=والزين كلن يشتهي منه بصّه
والناس قسم مفرط وقسمن حراص=ولايستوي هذا وهذا بحصه
ولو كل من يبغي القنص صار قنّاص=وما به قوانين وسلومن ورخصه
كلن شهر بارودته واتعب الشاص=يطلب خشيف الريم والحبل قصّه
وما كان يترك للفتى رشفة قلاص=أحدن رمى واحدن بقرشه يمصّه

[نجم الإبداع]

باركب مع الركاب ياصاحب الباص = وانا معي لاشك للود رخصه
لاشك نظم الشعر في بحركم خاص = تزهي الدرر والقصر يشجيك جصه
نظم القوافي والحكم كنها رصاص = منطق سليم يكايد الي يلصه
من فكر متميز للاحداث خراص = بين المشاعر واضح اليوم شنصه
اصبحت خلف اثاركم مثل قصاص = وابني مع اهل القاف لو جات فرصه

[ابو أنس]

فلاح حنّا لك ترى ربع وحراص=يزين معك القاف نظمه ورصه
تجوز لك زين المعاني وقنّاص=اتركز المنظار واتصيب فصه
اطرب ويطرب لك ترى سايق الباص=اقصد ترى الشرقي زعيم المنصه
القايد الربان ما احجم ولا ناص=يرسم صعيبات القوافي بنصه

[الشريف الشرّقي]

معشر الفطاحلة ..
في الأبيات التالية من التكلف والحشو الشيء الكثير !! ‍‍‍‍"فزحلقوها" - جعلت فداكم- على ظاهرها من غير تأويل ولا تعطيل .. يقول الشرقي هداه الله :

ياسعد يا اخوي ضيعت الملاذ = ياملاذي بعد رحمنٍ مُعيذ
وصف نفحاتك على الخاطر رذاذ= وطعم منطوقك على الصفحة لذيذ
قدرك بقلبي توزى ثم لاذ = لوذة الجوعان في قِدر الحنيذ
والقرار الصعب قوة اتخاذ = والشجاعة ما يهجدها (هذيذ)(1)
"صاحبي".. ياصاحبي للزين حاذ = واشهر السكين ناوي به( حذيذ)(2)
صورته في القلب ماتبغى( لجاذ) = وجرحهم من حبهم شف : له (خذيذ)(3)
قبلنا ناصر ومنصور ومعاذ = والحريقي ياسعد ايضا (بذيذ) (4)
لابساتٍ من حرير الصين (لاذ) = هم عذاب الروح والقلب(المريذ )(5)

(1) الهذ سرعة السرد
(2) الحذ : القطع المستأصل نسأل الله السلامة
(3)اللِجَاذ الغِراءُ و خذيذا : الجرح سال صديده
(4) البَذِيذ المِثْل
(5) اللاَّذُ ثيابُ حرير تنسج بالصين واحتدته لاذَةُ // والمريذ هو المريض .. مشي حالك

[الشريف الشرّقي]

أبوزياد / سناعيس / المشرف العام/ فلاح ابن منشار
لكم الشكر والفضل ولي شرف معانقتكم من جديد بعد ان يجف الدم المسفوك أعلاه

[ابو أنس]

طاب نظم الشعر ياالشرقي هذاذ=من حلاوة ما قريته جا هذيذ
والمعاني كنها هتف الرذاذ=حيثها يمّك توجه يالذيذ
وان كبر قدر الهدف طاب الجذاذ=ياكبير القدر ربي لك يعيذ
وانت رجل(ن) قرم من ترثة فذاذ=ومن تعزوى بك فلا يصبح وخيذ
كيف تشكي من رمى سهمه ولاذ=مدعين قلبك على الصالي حنيذ
قلبه اشهد قاسين مثل الفلاذ=كيف ما يعطف على قلب(ن)بذيذ
كنّي بهرجه نغم ماهوب شاذ=وان ضحك يسكر ولو ماهو نبيذ
وانت يالصاحب تبي عنه الملاذ=كود يبقى لك من قليبك (فذيذ)1
ما أظن اللي وطى صمغ الجراذ=يقدر انه من مطيحه يستعيذ

فذيذ أي شيئ قليل