تكمله أموت وأحيا بك

الجزء الرابع والستوووون

نص الليل دخل حمدان حجرته وهو يبتسم بخبث..فر تيلفونه عالشبريه وسار يتسبح...ويوم طلع وهو لابس وزار وفانيله انسدح عشبريته..برقده مريحه جدا...مسك تيلفونه ورد طلع رقم فطيم اللي خزنه بسرعه بارقام عشوائيه....وابتسم...وباس شاشه التيلفون مستانس انه حصل الرقم اخيرا..غير الاسم وحطه "الشيوخ" .. وفكر ..يطرش لها مسج؟؟ ..لالا...واذا عصبت بانه عنده الرقم..؟؟ شو بيسوي.؟؟..بعدين الوقت متاخر واكيد احين راقده فديتها...برايها اليوم..باجر بفكر شو اسوي....
حط التيلفون عداله عالطاوله وبند الليت ورقد...

حصه ذيج الليله مارامت ترقد..من تذكر رمسه خليفه وعدم تفهمه تحرقها عيونها...اخر شي توقعت منه انه يظلمها جي... احين انا ماباه؟؟...انا مابستانس من زواجي منه..؟؟؟ ..كيف اقدر افهمه وجهة نظري كيف..؟؟ .. كيف اتزوج واخوي مب حاظر عرسي..مايسلم علي..مايقولي مبروك ويتمنالي حياة موفقه..!!!...كيف.؟؟.. وهو اللي ماقصر معاي ووقف معاي فكل الحالات...اجازيه جذي..؟؟..شوفيها يعني اذا صبر له سنه او سنه ونص لين مايرجع ناصر لحالته ويقدر يرجع...مافيها شي...
انجلبت عالشبريه للطرف الثاني تحاول تحصل رقده مريحه..بس الشبريه صايره مزعجه اليوم على غير العاده... عقدت حصه حياتها وهي تفكر... باجر بكلم ناصر..بسويله تيلفون وبخبره باللي صار..وبساله متى بيرجع.. الكل يشوفني غلطانه ليش الله اعلم...

الساعه 12 وصل خليفه عبدالله البيت وطلع وسار بيتهم...كان عبدالله يحاول طول الليل يغير مزاج خليفه النكدي... اتاقلم معاه شوي وسولف لكن كان يحس دايما انه قلبه مجروح....شو بلاها حصه عليه كل ما بغا شي وقفت بحلجه ورفضت...عيل ليش وافقت عالزواج من الاساس يوم هي متردده فكل شي..!!..راقب سياره خليفه وهي تريوس وتطلع من البوابه...ودخل بعدها البيت وسكر الباب وراه ...دخل القسم...كانت عنود يالسه في الصاله بقميص نوم بطيخي...وفاتحه شعرها وشكلها فيها رقاد وهي اطالع التلفزيون...اطالعها عبدالله باعجاب وابتسم.. وسكر باب الصاله وراه..
عبدالله: ليش مارقدتي غناتي..؟؟
مشى صوبها...
عنود: وين كنت..؟؟؟
عبدالله: كنت مع خليفه...
عنود: وليش غالق تيلفونك..؟؟؟؟
عقد عبدالله حياته ويلس عدالها..
عبدالله: اوووووووه والله نسيت اني غالقنه....سوري عيوني..جان دقيتي على خليفه انزين...!!
عنود: مايا في بااااالي... وين سرتوا.؟؟
عبدالله: نحوط...خليفه مظايق شوي..
عق سفرته وفرها على الكرسي عداله..وانسدح عالكرسي اللي هو يالس فيه وحط راسه على ريولها...يتبزى عليها كالعاده...
عنود: شو بلاااااااه..؟؟
عبدالله: حصه مب طايعه تعرس...اون بتريا ناصر...والكل يعرف ان ناصر شغلته مطوله..سنه او سنه ونص ويمكن سنتين...لين متى بتصبر الريال؟؟ عيب عليها والله....جانه متعذب عشانها من متى وهي تدلع..
برطمت عنود وماعرفت فصف منو توقف...حصه ربيعتها واكثر من اختها...وخليفه اخوها...
عنود: وخليفه شو قال..؟؟
عبدالله: خليفه مينون..اون قولها اذا ماتبغيني ترمس بنفج الخطبه...
عنود: لااااااااا...مينون هذا..ماصدقنا على الله نحن...
عبدالله: اقولج عصب من الخاطر...رمسيها عنود...رمسي حصه اقنعيها...بتظيع الريال من ايدها بهالطريقه...منو يروم يصبر سنه او سنتين لين يعرس..؟؟ وانتي تعرفين كيف كانت حاله خليفه قبل...
عنود: بحاااول والله... تعشيت؟؟
عبدالله: هي تعشيت...لايكون انتي ماتعشيتي؟؟
عنود: انا تعشيت لكن خليت لك عشا خفتك تي مب متعشي..
عبدالله: تعشيت لكني يوعان...يوعان رقاد...قومي يالله شليني..
عنود: ههههههههههههه وين اروملك..؟؟
عبدالله: مالي خص انا دوم اشلج هالمره دورج...
تمت عنود تظحك... مب عارفه بشو اجاوبه..نش عبدالله وسحبها من ايدها ودخلوا الغرفه ينامون...

خليفه بعد ذيج الليله مارام يرقد...يفكر بموقف حصه من كل خطوه يحاول فيها يتقرب منها.... دايما تحط عراقيل بينهم...ياربي ليش انا منحوس جي...وبعدين وياها هالبنت متى ناويه تريحني..؟!...بوي برايها اذاماتبغيني وايد بنات يبني .... بخطب منهن اللي ابغيها... وماعليها غير انها تقول هالشي بس...
احين انا استويت اناني يوم اني ابغي اعرس... من متى وانا صابر.. بكمل سنه الحين من بديت احبها..وبعد تباني اصبر سنه والا سنتين زياده..؟؟؟؟ لا الصراحه وايد جذي وايد...محد يروم يتحمل...بس ماعليه السباله بتشوف...
غمض عينه بالغصب عشان يرقد...ومع كثرة الالحاح...استرخى فعلا ورقد...

بالباجر الساعه 9 ونص بعد العشا..رد حمدان على غير العاده للبيت من وقت...ودخل حجرته وسكر الباب ..عق ثيابه ويلس عالشبريه...مسك تيلفون وكتب مسج..
" عطيني رقم استاذج الكمبيوتر عشان العن خيره عن الحركات اللي يسوييهن لج.. حمدان " ..
وتردد قبل مايطرش..خايف من ردة فعلها...لكنه تشجع...اليوم الاثنين..واكيد فطيم في السكن الحين ومحد معاها..واذا عصبت..بتكون اول مره واخر مره يطرشلها...لانه مايبا المشاكل..لكن متوله عليها موت..ويبا اي طريقه يقدر يتواصل فيها معاها ولو بشكل مبسط وعلى فترات...المهم يقدر يطرشلها ويقولها اللي فخاطره... بدون وسيط..
تشجع وظرب ارسال...وراحت الرساله...وتم قلبه يدق بالقو بعدها...الانتظار صعب..

فطيم ساعتها كانت قاعده مع ربيعتها اللي ساكنه معاها في الغرفه..واسمها شمسه وهي من بوظبي...كانت فطيم تقرا مجله بعد ماخلصت دراسه..اما عن شمسه فكانت يالسه تتعشى وكل شوي تطلع تكلم وحده من البنات في نفس القسم..طبيعتها جي..ماكانت تقر مكان..مرحه وحبوبه..لكنها محترمه وحشيم..ولين الحين فطيم ماشافت منها شي غلط...ماعدى فضولها اللي يذبح...سمعت فطوم المسج ..وكان التيلفون عدالها ساعتها.. مدت ايدها ومسكت التيلفون...رسالة وارده..فتحتها وقرتها...على طول توترت انفاسها وارتجفت ايدها...حمدان..؟؟؟ شو هالمزحه الثقيله.... اكيد هاي نوروه تمزح...بس هالرقم اول مره اشوفه... مب رقم عمووه... يمكن رقم عبدالله اخوها والا شي..ماعليه انا اراويج..
" يالسباله يانوروه بلا مزح...طيحتي قلبي..تحيديني ماروم اصطلب يوم اسمع طاريه!!"
فز حمدان يوم سمع صوت المسج..صح كان يتوقعه فاي لحظه بس مع ذلك فز لانه كانت متوتر حده...مسك تيلفونه وقرا المسج... ابتسم...وبعدها ظحك...
" فديت قلبج... قسم بالله اني حمدان...ونوره ماتعرف عن هذا كله...خليه بينا...شحالج يالطويله؟".
قرت فطيم المسج وانصدمت...حمدان..!!..حمداااااا ااااااان.... عرف رقمي وقاعد يطرشلي مسجات...لا ويقولي فديت قلبج بعد.؟؟؟ ياويلي بموت..كيف عرف كيييييييييف..؟؟؟....فرت فطيم التيلفون عدالها وعقدت ايديها حواليها كانها بردت فجأه...مع ان الجو دافي... وفكرت شوي بتعقل..
هو ذكر استاذ الكمبيوتر...وانا امس رمست نوره عن هالسالفه... هي خبرته.؟؟؟ والا ..والا هو سمعني بنفسه.؟؟ وااااااااااي يالفشله اكيد شل رقمي من الكاشف...حسبي الله عليج يانوره شحقه مامسحتيه..؟؟؟ ...لو مسحته مابيحصل رقمي...ولا بيطرشلي مسج..بس فعلا انا ابا هالشي والا لا.؟؟...مب كانه بروحي طالبه رقمه.؟؟..
ابتسمت...ورجعت مسكت التيلفون وقلبها يدق مثل الطبل...
" بخير..فاجأتني يالطويل...شحالك انته.؟؟.. وشحالها ايدك المكسوره.؟؟"
مسكت فطيم التيلفون بالقو بايديها الثنتين وهي متربعه على شبريتها الصغيره وعينها على دبدوب حمدان الكبير على زاويه الغرفه....ماتعرف اللي تسويه صح او غلط....ماتعرف.؟؟؟ اكيد تعرف...وهو غلط × غلط... بس هذا حمدان...وانا اشتقت لسوالفه....شو اسوي...الله بلاني فيه شو اسوي..!!!..
اما بخصوص حمدان...فارتاح شوي بما انها ماهزبته من اولها...وتسال عن حاله ومهتمه...بشاره زينه..
" انا بخير يوم اني قادر اكلمج....وايدي بخير الحين والجبس عقيته...فطيم...آسف بخصوص اللي صار بينا وسعيد..ماتتصورين شكثر متلوم.."
حن قلب فطيم عليه....لاول مره تتسائل برده فعل حمدان من السالفه..كانت مشغوله وايد بنفسها وبسعيد .. مافكرت بانه هالشي بياثر على حمدان بعد... قالت له بغلاسه..
" ندمت انك عرفتني فيوم صح.؟"
عصب حمدان..كيف تقول جي هذي...؟؟
" لا والله وعمري مابندم...انا ماكنت العب فطيم...وتوصلت لتفاهم مع سعيد بخصوص موضوعنا"
" شو هو التفاهم ممكن تقولي.؟"
" اكيد ..اقنعته اني احبج من خاطري...لكن بعد ما اتخرج واشتغل بيي وبخطبج ان شاء الله.."
قفطت فطيم وظحكت... واطالعتها شمسه باستغراب وهي تراقبها من الصبح لكن فطيم كانت فعالم ثاني..
شمسه: شو سالفتج بالمسجات انتي.... منو يطرش لج؟؟
فزت فطيم بقو... منزعجه من هالاقتحام لعالمها الوردي اللي كانت عايشه فيه....
فطيم: هههههههه محد...
شمسه: يالله عاد قولي....
فطيم: انتي ليش فظوليه جي..؟؟
شمسه: احب اعرف كل شي يدور حواليه ...
فطيم: هههههه اظن هذا يدور حواليه انا مب حواليج انتي...
شمسه: وانتي ادورين حواليه بكل سوالفج ههههههههههاي..يالله قولي..
قالت فطيم بجرأه..
فطيم: خطيبي ....
فجت شمسه ثمها متفاجأة..
شمسه: ماكنت ادري انج مخطوبه ويا راسج...
فطيم: احين تعرفين لكن بليز لا تنشرين الخبر... ممكن...
نطت شمسه مستانسه وطارت صوب فطيم وقعدت عدالها..
شمسه: اكيــــــــــــــــد...يالله راويني هالخطيب شو يكتب لج...؟؟
ظمت فطيم التيلفون لصدرها....
فطيم: لا والله ماراويتج ....روحي...
شمسه: حراااااام عليج احب سوالف الحب...
فطيم: نحن قاعدين نتنازع احين ما نسولف سوالف حب..يالله روحي ..
شمسه: حلااااااااااااته راويني شو يقولج بليييييييز...
فطيم: قتلج لا..يالله روحي قاعد يتريا ردي سيري خليني اكتب...
شمسه: ههههههه ماعليج يالحماره...ليش عاد ماتبين تراويني...
فطيم: كيفي...اغار عليه... سوالفنا حقنا مب للنشر...
قامت شمسه وراحت لشبريتها وهي تظحك...
شمسه: ياعيني عليكم.. انزين بس قوليلي شو اسمه؟؟
فطيم: آآآآآآآآآآه اسمه قلبي وروحي ونظر عيني....
ظحكت فطيم ومسكت تيلفونها وهي تسمع شمسه تنطق بكلمات غلسه وتظحك... وكتبت لحمدان.
" جان استحي" ..
كان حمدان مستغرب من التاخير بالرد...ويوم وصلته المسج اخيرا مات من الظحك...ماكان ناوي يحرجها بس يخبرها باللي صاير...عشان تكون على علم بانه مانساها وبانه حاول وبذل جهده عشان يصلح وضعهم..
" فديت المستحى انا...قسم بالله يافطيم اني ولهان عليج وعلى سوالفج وظرابتج فوق ماتتصورين..لكن صابرين والله مع الصابرين ان شاء الله" ..
" حتى انا...وان شاء الله خير"
" ماقلتيلي...موافقه انه نتواصل بالمسجات.؟؟.."
" هي بس انته لااطرشلي الا يوم انا اطرش لك...وانا بطرش لك فوقت اكون فيه فاظيه وبروحي..عرفت؟"
" عرفت...وفالج طيب...اهم شي اسمع منج....بس عاد طرشيلي كل يوم"
" عاد هذا اللي يقول طرار ويتشرط"
" هههههههه بليز"
" ههههههه بحاول ان شاء الله... "
" على فكره لا تخزنين رقمي عندج اخاف سعيد يشوفه والا شي...لكن حفظيه"
" حفظته من اول ماطلع هههههه"
" شاطره..بخليج احين ترقدين..تصبحين على خير...وانا فرحان الليله"
" ان شاء الله دوم..حتى انا فرحانه..وانته من اهل الخير"
" وبلا حركات مع استاذ الكمبيوتر لا احسّن راسه واخليه اقرع...باي"
ظحكت فطيم وماردت عليه... ومن بعدها قعدت تقرا المسجات كذا مره لين ماحفظتهن في قلبها...من بعدها حذفتهن كلهن... ولاول مره تحس بالراحه الفظيعه..اطمنت عليه..واطمنت انه مب ناسنها..وباذل جهده عشان يتواصل معاها...الله يستر...ان شاء الله الله مايعاقبني وانكشف عاللي اسويه...لكن والله ماقدر اقاومه..ماقدر...!!


نفس الليله الساعه 11 .. مسكت حصه التيلفون واتصلت برقم ناصر في المانيا...ماكانوا يقدرون يتصلون فيه وايد على طول النهار لانه يكون يسوي تمارين وعلاج طبيعي وغيره ..ومايتفرغ الا بالليل...
ناصر: آلووو...
حصه: هلا نااااااااصر... السلام علييييييييك..؟؟
ناصر: هلا والله بحصيص...وعليج السلام يالقاطعه..
حصه: هههههه اسمحلي والله...شوو حالك؟؟ عساك بخير .؟
ناصر: الحمد لله ماشي الحال...قبل شوي ياي من التمارين...
حصه: الله يعطيك العافيه ويشفيك يارب....والله اني ادعيلك دوم...
ناصر: ماتقصرين يالغاليه...شحالهم قوم امي..واخوانج وخواتج؟؟.. وحمده شحالها مادقت لي اليوم..
حصه: كلهم بخير وعافيه ويسالون عنك...واكيد بيسووولك عقب ان شاء الله.. شحاله خالد؟
ناصر: خالد مسكين تعبان وياي..بخير...رخصته يسير يرقد دوم الا موازرني مسكين مايفظى لعمره...والله اني متلوم فيه...لكني بعد محتاجنه هالفتره...والله يعديها على خير...
حصه: آمين يارب...ولا تتلوم هو يسوي هالشي من خاطره مب لانه الواجب او شي ..هو يبا يكون معاك ..حتى يوم قال عبدالله انه هو اللي بيسير وياك لانه دكتور ويفهم اكثر وجي..ماطاع ..كان هو يبغي يسير بنفسه وياك..
ناصر: والله كلهم مايقصرون وهو بعد ماقصر مسكين...قام بالواجب وزياده...
حصه: مطولين ياناصر عن الرجعه.؟؟
ناصر: اظن..جي بعده يبالي ست شهور لين مايخوزون المسامير عن ظهري...وعقب العمليه هذي مادري بعدني كم بتم عشان العلاج الطبيعي لين يرخصوني...
تنهدت حصه بزعل..
حصه: حوالي كم يعني؟؟ سنه؟
ناصر: اظن اكثر...يوصلن سنتين للاسف ...ليش حصه..شو في الخاطر؟
حصه: خليفه ولد عمي..
ناصر: بلاه؟
حصه: مستعيل عالعرس...
ناصر: انزين وانتي شو وراج ماتعرسين..تخرج وتخرجتي خلاص فاظيه الحين...
برطمت حصه...كيف اخوها يقول هالكلام...ليش مايفهمها عالطاير؟؟؟ والا قاعد يمثل انه عادي عنده هالشي.؟؟
حصه: انا ماريد اعرس الا يوم تكون انته موجود وتحظر عرسي...
سكت ناصر..وابتسم شوي بزعل...فرحان انه اخته تحاسب على وجوده ويهمها انه يكون معاها...لكن زعلان لانه مايقدر يحقق لها هالطلب...كان وده يحظر..لكن حالته ماتسمح..
ناصر: وشو بيفيدج وجودي او عدمه...المهم المعرس موجود وولي امرج موجود..خلاص..
حصه: لا تحاول تقولي ان موضوع عرسي وعدم حظوورك شي عادي بالنسبه لك لاني مابصدق...
ناصر: هههههههه مب عادي..وانا ماقلت انه عادي....لكن حصه فكري...وين ابا احظر عرس وانا على كرسي متحرك...؟؟؟؟.... وانا اللي طول عمري اتحرك وماخلي مكان ماسيرله ولا شي ما اسويه اخر شي انحبس في هالكرسي..!!!..
عورها قلبها...
حصه: لا تقول جي...الله بيشفيك ان شاء الله وبترد احسن من اول...السالفه يبالها صبر..
ناصر: ادري..لكن العرس مايبا صبر...وخليفه مابيصبر هالكثر...انا شغلتي مطوله...لين مايرجع العصب المعطوب اللي فظهري مثل ماكان مابيكون شي تحسن في حالتي..ولا بقدر احرك شي من ريولي...
حصه: يعني تباني اعرس وانته مب موجود؟؟؟
ناصر: انا قلبي وياج وبتمنالج التوفيق لو كنت فاخر الدنيا....لكن ماقدر احظر جسديا العرس..حالتي ماتسمح لي.. خليفه ومابروم ازفه وانا على كرسي وهذا شي معروف... وعرس الرياييل انا اروحي بنقهر ان اخواني ايولون ويعبرون عن فرحتهم وانا على كرسي مب رايم اتحرك ...ترضينها لي؟
دمعت عيونها...
حصه: ...لا... عيل ماريد اعرس...
ناصر: اوووص...جي العرس مب لعبه...وولد عمنا مابتسويبه جي اسميج وانتي بنت الشيبه...جي مب لعبه في ايدينا هو..بعدين بتكونين مينونه ان ظيعتيه من يديج وهو شارنج من خاطره..
حصه: بس هو مش متفهم...
ناصر: انتي اللي مش متفهمه.... انتي الحين حرمه وتعرفين ان الحرمه العاقل ماتمشي ريلها على مزاجها وتعاند فيه...سولي اللي ابغيه والا ماريدك...الحياة مب جذي..وبهالطريقه مابتحصلين حد معاج... لازم تسايسييينه..وهو بصراحه معاه حق...كم تبينه يصبر الريال..؟؟....
حصه: ناصر...ماريد...ابا اخواني كلهم عندي ماريد جي..علىالاقل اشوفك جدامي قبل العرس وتبارك لي حتى لو ماتحظر بس اشوفك في عرسي..
ناصر: يالغاليه والله حتى انا خاطري بهالشي...ولا يهمج بتصلبج قبل مايزفونج وببارك لج ...وانتي كل اللي عليج تغمضين عينج وتتخيليني ههههههه شو رايج.؟؟
حصه: ........ لا تمزح ...
ناصر: ما امزح....اكلمج جد....خليفه لا تظيعينه من ايدج...ترا انا مايرضيني هالشي..وبزعل عليج من خاطري ... يالله قوليله انج موافقه عالعرس... لاتنسين ان اختج وراج متعطل عرسها بسببج....لا تستوين انانيه انتي بعد وماتفكرين غير في نفسج واللي تبغينه...يعني العرس بيصير بيصير ان شاء الله سواء كنت موجود او لا..ووجودي مب هو اللي بيخليج تتوفقين في حياتج مع خليفه... تفاهمكم وعطفكم على بعض هو اللي بيخليكم تتوفقون...فهمتي.؟؟؟
حصه: .................هي...فهمت....
ناصر: صدقيني انا بكون معاج فخاطري..وبتمنالج التوفيق وين ماكوون..وتراني مسامحنج عالعرس لكني مب مسامحنج بشهر العسل...صح هالمنطقه بون 2 تلوع بالجبد لكن غصب تون هني وتقعدون عندي اسبوع بعد العرس على طول..تفهمين؟؟
حصه: هههههههههه...من عيوني..هالشي اكيد ان شاء الله لا تحاتي...
ناصر: تمام...الله يوفقج ياحصه... صدقيني حصلتي الزوج المناسب لج... وانتي مناسبه له... من استويتوا اصلا وانتوا جي...هههههه..
حصه: هههههههه ظنك يعني.؟؟ .. بطلعها من عينه صدقني هالعرس المستعيل واخويه مب حاظرنه بعد..بنتقم منه...
ناصر: هههههههه كيفج عاد انتي وهو عقب العرس..
حصه: خلاص ياناصر... مابكسر كلمتك..وانا ماقتنع بشي الا من بعد ما اكلمك فيه... صح انا ما ابغي اعرس بغيابك لكن اشوف اني مضطره عشان ترضون علي....
ناصر: اهم شي رضا ريلج خصوصا انه عنده حق...
حصه: الله كريم...خلاص عيل مابطول عليك..تامرني بشي..
ناصر: سلمي عليهم كلهم..وديري بالج على عمرج..
حصه: ان شاء الله وانته بعد دير بالك على نفسك وسلم على خالد وايد..
ناصر: يوصل...مع السلامه..
حصه: فمان الله..

سكرت حصه عن اخوها...وهي افكارها مشوشه..مب عارفه ترتاح والا تنقهر...هي مرتاحه بانه هو نفسه راضي بعرسها فغيابه...لكن هي نفسها ماتبا تعرس بغياب اخوها...لكن تشوف نفسها مضطره ..عشان ترضيهم كلهم كالعاده على حساب نفسها... على شان نوره عالاقل اللي كملوا الحين ست شهور وهم خاطبين بدون مايتحركون ... حتى ملجه مب رايمين يملجون بسبب حصه...مع انه مافي سبب منطقي يمنعهم من هالشي..لكنها تعرف ان هذا منطق نوره... اكيد نوره اللي رافضه الملجه والعرس بسبب حصه ..لين ماتطمن بانه حصه عرست...مابتعرس هي...


مر يومين على هالسالفه... وفطوم لين الحين ماطرشت لحمدان ولا مسج..لسببين...ماكانت تباه يفكر بانها مستلغثه وماصدقت تحصل رقمه عشان اطرشله..ثانيا كانت مشغوله ببحث العربي المستوى الثاني اللي يباله عباله وايد..هذا غير بحث المجتمع اللي خذته بعد ماخلصت انجليزي مستوى ثالث..
وحمدان كان متحرقص...كل شوي يشيك عالتيلفون يمكن طرشت وهو ماسمعها...وماكان يفارق تيلفونه دقايق... ومايخلي اي حد يشوفه او يفتشه....قبل كانوا ربعه عادي يمسكون تيلفونه ويطالعون فيه احين صار من المحرمات عليهم...كان وده هو يطرش لها بس هو وعدها...بانه مابيطرش الا يوم هي اطرش...واليوم الاربعاء...وفطيم اكيد بترجع الشارجه..يعني بعده بيصبر لين السبت...ماعليه براويها يوم بطرشلي...بلعن خيرها..
اما بالنسبه لحصه...ماخبرت حد بقرارها بموافقتها عالزواج... ماكانت تختلي بامها او ابوها لوقت طويل عشان مايفاتحونها بالموضوع...من تشوفهم تشرد...وعنود مرتين حاولت تفتح الموضوع لكنها كانت تسكره على طول وتغير السالفه وتشغلها بامور ثانيه..وهي تعرف ان عنود بسرعه تنشغل بالسوالف... كانت تتريا خليفه ايي بيتهم...لكنه طول اليومين الفايتات ماياهم...معقوله معصب لهالدرجه.؟؟ زعلان علي..؟؟؟...مجرد هالفكره كانت تخلي حصه تزعل....ماتتخيل خليفه زعلان عليها.. المصيبه ماتعرف كيف تراضيه...ماتعرف كيف تتواصل مع الانسان اللي بيكون زوجها....ماتعرف تكلمه لفترات طويله....يازين هالعرس هاا..؟؟؟.. بنتم ساكتين انا وهو...
يوم الجمعه عنود من الصبح كانت عند اهلها..والمغرب بينما عبدالله كان في دوامه في المستشفى...وصلها خليفه للبيت لكنه مانزل من سيارته... شافته حصه من دريشه الصاله واستغلت غياب امها وابوها في العزبه ..وعبدالله في المستشفى... وطلعت لخليفه بسرعه قبل مايريوس ويروح..
نوره كانت في الصاله...اتابع المسلسل.. تلاقت حصه مع عنود عند الباب...وقالت لها وهي تمشي بسرعه..
حصه: هلااا عنود...
وخطفت عنها...
عنود: هااااااااي وين سايره..؟!!!
حصه: بكلم خليفه....دشي دشي..
ظحكت عنود ودخلت الصاله عند نوره... بينماحصه عدلت حجابها ولبست نعالها الخفيف ونزلت الدري... وهي تشوف خليفه يطالعها من داخل سيارته وهو معقد حياته...ويوم شافها يايه صوبه بطل بابه ونزل عشان يسلم...
وقفت حصه عدال سيارته مب متجرأه تتقرب اكثر وقلبها يدق بالقووووو... هالحركه بنفسهاتعتبر جرأه منها..بس شو تسويبه يوم هو مب ناوي على خير...وكله مطنش وقام مايزورهم ولا يسال عنها.!!!..لازم هي تسال عنه وتتنازل شوي... مايقولون ان اي اثنينه اذا يبون يتفاهمون ويستانسون لازم يقدمون تنازلات..؟؟ ..مافيها شي بتنازل شوي لولد عمي...
حصه: السلام عليكم...
وتساندت عالسياره ..
اطالعها خليفه وهو مرصص عيونه بشكل حلو ويطالعها من فوق لتحت...وتاخر بالرد...
خليفه: وعليكم السلام...
كان معصب عليها بعده....لكنه فيه فضول حاليا ..حصه اول مره تتعنى له وتيه تسلم عليه مخصوص..وشكلهاعندها سالفه...
عقدت حصه يديها جدام صدرها..
حصه: شووووو...اشوفك مطنشنا من كم يوم لا تي تزور ولا تسال ولا شي...ناقص بس اغنيلك اغنية عيضه مشكلتك...ههههههه..
ابتسم خليفه ونزل عينه لريوله ..وهو يستذكر كلمات الاغنية كامله...ياترى تعني كل الكلمات والا بس المقطع الاول.؟؟؟..
خليفه: غنيها شو وراج...؟؟؟..
حصه: مشكله صوتي نشاز...
خليفه: ههههههههههه ماظن.. بس قدها انتي كلمات الاغنية كامله..؟؟؟
قفطت حصه...
حصه: انته شرايك؟؟
خليفه: انا مؤخرا ماصار لي راي فشي...الراي كله لج يابنت حمد...
حصه: افااااااااا والله ياولد عمي.... انا مب قصدي امشي راااي عليك.... وعمري مابسويها... واذا على سالفه العرس..نتفاهم عليها...انا اترياك من متى تي عشان اكلمك بس انته ما تتعايى..
خليفه: نتفاهم نتفاهم....وانا موجود جدامج...شو ورانا..
تنفست حصه تستجمع شجاعتها...
حصه: انا...اناموافقه عاللي تبغيه...تبانا نعرس..بنعرس..
عقد خليفه ايده جدام صدره العريض..
خليفه: ومنو غصبج على هالشي.؟؟؟
حصه: محد غصبني....
خليفه: همممممممم...حصه....انتي تبيني والا لا؟؟ اذاماتبيني رمسي...محد بيغصبج عليه..خصوصا انا...
انصدمت حصه...
حصه: رديت تقول هالرمسه مره ثانيه....والله ان قلتها مره ثانيه بزعل عليك ولا برضى بعد...انا شو قلت لك في المستشفى يوم شاورتني؟؟؟؟
خليفه: قلتي انج موافقه...
حصه: حد جبرني؟؟
خليفه: ماعرف ياحصه...احس بج مب مقتنعه كفايه فييني...مب سادنج وجودي....والله لو انا ماحظروا اهلي كلهم وكنتي انتي موجوده...مابهتم ذاك الزود...المهم اني اخذج..وباسرع فرصه ممكنه ...مابحط العراقيل بينا مثل ما انتي تسوين...
حصه: ...... مب قصدي...خليفه والله ماقصد اسوي هالشي...خلاص انا موافقه على اي شي تبغيه..
خليفه: لا...انا مابغصبج على شي...ولاتوافقين لاني بس انا ابغي....
حصه: عيل شو تبا والله احترت معاك..؟؟
خليفه: انا ابغي تكونين انتي تبين هالزواج..قد ما انا ابغيه... ترحبين باي فكره ممكن انها تقرب بينا...مثل ما انا اسوي...من نفسج...مب لاني انا ابا...
حصه: والله اني ابا....عيل ليش وافقت...
خليفه: ماعرف صراحه ليش وافقتي...خذتي اربع ايام تفكرين وحسيت انج متردده...ومب واثقه.. وانا اللي توقعت اني توصلني الموافقه بالباجر مب بعد اربع ايام...
حصه: ظلمتني ياخليفه....انا كنت افكر فيك مب فيني انا..بالنسبه لي انا كنت واثقه باني بكون سعيده معاك ومرتاحه...لكني خفت اظلمك معاي..خفتك انته تندم انك خذتني وماترتاح معاي...
خليفه: كيف تقولين هالكلام..؟؟؟؟ ... انا من متى وانا اتمناج اخر شي بندم.....شو هالخريط...؟؟
حصه: المهم هذا راح الحين ونحن مرتبطين ببعض...وانا كلمت ناصر وخذت موافقته ومافي اي اعتراض على عرسنا الحين مني...انا موافقه و " ابا" اي شي تبغيه انته...
تردد خليفه وتلفت حواليه بتوتر...وتاخر وهو يفكر...
خليفه: متاكده حصه بانج تبيني..؟؟..
حصه: ..هي متاكده.... من فتحت عيوني على هالدنيا وانا متاكده ...وهذا خبر يديد لك..شو رايك؟؟؟
ابتسمت حصه وهي اطالعه بدلع... تشجعت وقالت هالشي عشان تفرحه...تحس انه كئيب ومهموم بسببها....باختصار.. ماهان عليها...
رفع خليفه نظره صوبها مستغرب... مب مصدق...شو تقول؟؟؟؟؟؟ قمت ما افهم اللغه العربيه ...
خليفه: شو قصدج؟؟...حصه...شو تقصدين؟؟؟
كان متلهف لتفسيرها.... متلهف بانه يتاكد بانه سمع وفهم صح.. لكنها الخبيثه ظحكت وصدت صوب ثاني...
حصه: بعد مانعرس بقولك...هههههههه لا اطالعني جي..وقولي شو قررت...؟؟..
لكنه هو ماكان مستعد بانه يترك الموضوع....ظل يطالعها بنظره تفحص..وفكره شارد بعيد بعيد...شو تقصد حصه..؟؟ شو تقصد بمووت واعرف واتاكد ...وتم علىهالحال فتره...لين ما هزت حصه ايدها جدام ويهه محاوله انها ترده للواقع...
حصه: هاااااااااي...!!!!!
هز خليفه راسه وغمض عيونه شوي وظحك..
خليفه: مب رايم افكر ههههههه...
وغطى ويهه بيده فتره يسترجع تركيزه...وحصه قافطه وتظحك وبنفس الوقت مستانسه بانها زعزعت ثباااته وشتت تفكيره...
شل خليفه ايده عن ويهه وتنفس بقو...قرر يترك الموضوع لانه اذا اصر عليها بتنحرج ومابتقوله..لكنه بيطلع منها هالسالفه فيوم...
خليفه: آآآآه...مادري..شو تبينا نسوي؟ ..تبينا نملج وناخر العرس شوي يمكن سبحان الله يقدر ناصر يرجع ساعتها.؟؟؟ والا نعرس على طول..؟؟؟
فكرت حصه...ناصر بنفسه قالها انه بيتاخر..يعني الاقيس ياخرون العرس..
حصه: نعرس..
خليفه: هههههههههههههههههههه...اووكي.. متاكده؟
حصه: هي متتاكده.... بس تراني واعده ناصر بشي..
خليفه: شو هو...؟
حصه: اول مانعرس نطير المانيا ونسير عنده نسلم عليه ونقعد اسبوع...
خليفه: اهاااااااااااااااااا قولي انج تبين تستعيلين بالعرس عشان تسيريله بس...يالمكاره..
حصه: هههههههههههه لالا حرام عليك والله..بس ناصر قالي بنفسه انه بيتاخر يعني مافيه فايده التاجيل...بعدين عشان نوره وسعيد...حرام يبون يعرسون...
ابتسم خليفه مستانس..
خليفه: خلاص..ترتيب...والحمد لله انج اقتنعتي...امبوني عايش فحاله مايعلمها الا الله...
حصه: اسفه والله...مب قصدي...انته فهمتني غلط...
خليفه: يمكن لاني ماعرفج عدل....ماعليه جدامنا وقت ان شاء الله بعرفج احسن عن اي شخص ثاني...
حصه: ههههههه ان شاء الله....عطلتك خليفه...
خليفه: افا عليج...احلى تعطيل..
حصه: هههههههههه يالله يالله سير اخاف قوم ابويه يدغروون احين ويشوفوني متوقفه معاك...
خليفه: ههههه اوكي..شي فخاطرج؟
حصه: سلامت راسك...
خليفه: الله يسلمج...مع السلامه..
حصه: فمان الله..
ركب خليفه سيارته مستانس..وتريا حصه لين ابتعدت عن السياره وركبت الدري.. وريوس بسيارته وطلع من البيت وهو ميت من وناسته..خصوصا جمله حصه اللي شغلت تفكيره...معقوله تعني اللي قالته؟ والا بس جي اجامله عشان يستانس..؟؟؟؟.. فيوم من الايام بيعرف وبيتاكد من المعنى....!!

الجزء الخامس والستون

قرار حصه المفاجئ بالموافقه علىالزواج خلى الكل ينصدم..خبرت امها وابوها اللي استانسوا بدون ما يسالون شو اللي اقنعها...لكن المهم انها اقتنعت...اهم شي يطمنون على مستقبل بنتهم... وبيكونون مطمنين وايد اذا تزوجت من خليفه... لانه هو بعد ولدهم.. وبيحشمها وبيكرمها... اكثر عن الغريب ..نوره استانست بعد لكنها اشترطت اول شي تتخرج بعدين تعرس حصه..في اول 7 ... عشان ياخذن راحتهن بالتجهيز مب تعرس في خلال الكورس..يعني جدامهم شهرين ونص..وعندهم شغل وايد يسوووونه خصوصا حصه...تجهيزات العرس يبالها وقت طويييل...وحواطه ماتخلص...

يوم السبت الساعه 11.. بعد ما تاكدت فطيم بانه الاخت شمسه الفضوليه نايمه...طلعت تيلفونها من الشنطه وطرشت مسج لحمدان..متلومه لانها ماطرشت له من يوم الاثنين اللي طاف..يعني اربع ايام ..وخافت انه يكون راقد..بس هي تعرف حمدان يسهر..ومايرقد قبل الوحده في الليل..
" لا تكفخ اوكي.."
ابتسمت وهي تظرب رقمه وادق ارسال... وظحكت..لا تكفخ.؟؟ والله لو يوصلني انه بيكفخني ونص بعد...
حمدان كان في ميلس ربيعه خالد ساعتها.. يلعبون كيرم..وكان حمدان منقهر ساعتها لانه خالد توه مدخل الخمسين عنه...
حمدان: بتحطها في الدور الياي صدقني..
وخش ايده فمخباه وطلع تيلفونه.... يوم شاف الرساله فز من مكانه...
حمدان: والا اقولك ماشي دور ياي...فمان الله...
خالد: تعااااااااااااااااال وين تبا...وين تبا..؟؟؟..شفيك؟
حمدان: ماشي بس اذكرت شي...وبسير ارقد احسن لي.. بنكمل لعب باجر...
خالد: الهرم شفت عمرك مغلووووب...وشردت..
حمدان: هههههههه عيل خل اللعبه مثل ماهي لين باجر وفلوسي انا عادنهن...وبنكمل لعب تومورووو..
خالد: ههههههه اوكي..باي..
طلع حمدان من الميلس وركب سيارته وحط التيلفون فحظنه..
حمدان: شو اسويبها هاي احين...اكفخها...تستاهل والله...
" زعلان عليج...اقولج كل يوم تقطعيني خمس ايام.؟؟؟"
ارسلها وشغل سيارته وتحرك ساير البيت... ووصلت له المسج بعد شوي..
" افا بس..سووري والله كنت مشغووله...واخر الاسبوع تدري ماروم ارسل لك لاني اكون في البيت..شحالك؟"
"بخير طويلة العمر...انتي علومج؟"
" الحمد لله... حمدانوه ماروم اطول وايد ماشي باقي فرصيدي وماشريت بطاقه اليوم نسيت"
حمدان مات من الظحك يوم شاف المسج...وكان بالصدفه طايف عدال دكان حارتهم اللي يفتح لين الساعه 1.. وقف عنده وخذ باونتي وبيبسي وثلاث بطاقات تيلفون... وبما ان تيلفون حمدان خط فما يحتاج البطاقات.. فتح ارقامهن كلهن وكتبهن فمسج لفطوم.وطرشهن...وهو يظحك عليها.. ويتصور ردة فعلها..وصل بيتهم..شل الباونتي والبيبسي وباقي اغراضه ونزل...
داخل البيت كانت العيوز يالسه مع خليفه.. يسولفون...وبما انه درى بموضوع العرس عرف انهم يتكلمون عن العرس وترتيباته... لازم يودون لحصه فلوسها عشان اجهز نفسها ..
حمدان: سسسسسسلام عليكم...
خليفه+ام سلطان: وعليكم السلام والرحمه..
خليفه: شو عندك؟..باونتي..الله...هاااات عطني...
عطاه حمدان نص الكافي وسمع مسج..
"حمدان شو هالارقام.؟؟؟"
ابتسم ...وقالهم..
حمدان: تصبحون على خير...
خلاهم بسوالفهم وسار فوق وهو يكتب مسج لفطوم..
" ارقام بطاقات توني شارنهن..دخليهن ..بسرعه..1...2...3.."
ظحكت فطيم على خبال حمدان....اسميه احراج محد يقوله شي هالريال...
" ليش عاده..؟!..عبلت على عمرك ماكنت يالسه اطلب انا..بشتري باجر"
" ماكنتي تطلبين لكن تتعلثين علشان ماترمسيني..وبعدين انا كريم بما اني شيخ وانتي تستاهلين بما انج الشيخه فطيم"
دخل حجرته وسكر الباب.. وعق ثيابه ويلس عالشبريه...
اما فطيم فيوم بغت ترسل المسج خلص رصيدها...وظحكت..اضطرت تستخدم ارقام حمدان..يالله هو مب غريب.. ودخلتهن كلهن...ورجعت طرشت له..
" مشكووور...انته وين؟"
" في الحجره الحين.. متى بتون بيت عمي...فطوم ابا اشوفج"
" تخبلت انته؟.. مب ناقصين سعيد ينط علينا"
" لو من بعيد انزين...مابرمسج بس ابا اشوفج"
" فعرس اخوك ان شاء الله"
حاس حمدان بوزه..
" خيبه بعدني بتريا شهرين وشي..!!!.."
" ويمكن مانتلاقى بعد..خلها للصدف..احسن"
" اكرهج انزين"
ماتت فطوم من الظحك...
" حتى انا تصدق"

وتموا يتسابون ويتظاربون لين نص الليل..عقب قالت له انها بترقد ورخصها..مسحت المسجات كلهن ورقدت..ورقد هو بعد... وكانوا كل يوم على هالحال.. يوميا لازم يكلمها بالمسجات شوي قبل مايرقدون... وصار مايرتاح الا يوم يمسي عليها اول...وهي بعد ماتروم ترقد الا يوم تقوله تصبح على خير.. يعرفون اللي يسوونه غلط... والخطر واارد بانهم ينكشفون.. لكن ماعندهم طريقه ثانيه... مايقدرون يتحملون شهور ويمكن سنوات مايسمعون عن بعض.. ومحد يتفهم تعلقهم ببعض... ماعندهم طريقه غير هذي...وعلى الله يتم سرهم هذا بينهم..وماينكشفون..لين ماتنحل المساله..

حصه قعداتها مع عنود كثرت...يرتبن ويسترجعن الاشياء الظروريه اللي لازم يسونها قبل العرس..ماشي وقت..شهرين ونص مايكفن...لازم مايظيعون وقت...وباسرع وقت تروح تحجز لها فستان للعرس لانه ماشي ولا فستان بيخلص خلال شهرين ونص...مستحيل..فماشي حل جدامها غير الحجز... وكانت يوم تستذكر الاشياء اللي لازم تاخذها وتسويها اييها صداع... وكانت كل ماتشوف خليفه ودها تكفخه لانه مستعيل جذي..ماخلالها فرصه تجهز...
فيوم كانت فيه قاعده في الصاله مع عنود..حاطات الدفتر عالطاوله ويالسات عالارض يكتبن عليها القائمه المعتاده عشان ما ينسن شي..بادق التفاصيل...دخل عبدالله..وشاف الصاله لايثه...المخدات مفرره..وكواب الشاهي كلها مشروب فيها ومب مغسووله..وهن بروحهن متلعوزات..
عبدالله: السسسلام عليكم..
ردن عليه السلام...
عبدالله: شوووو هذا الدنيا لايثه جي...؟!!!..وانتن تتفرجن عليها..
حصه: من شوي كانت حرب دايره بين حمدان ونوروه..راح هو..وسارت هي تدرس.. وخلوا الدنيا لايثه..
عبدالله: هممم هذيلا متى يتوبون عن الظرايب الله اعلم...المهم حصه تحجبي..خليفه ياي وياي...
بطلت حصه عيونها..شكلها منعفل ويلوع بالجبد...الله يهديك ياعبدالله...تحجبت حصه بسرعه بينما صد عبدالله وراه وزقر خليفه يدش.. دخل خليفه وهوماسك تيلفونه لابس كندوره لونها بيج غامق مايل للبني ومتسفر حمدانيه بسفره نفس اللون.. قامت حصه وعنود عشان يسلمن عليه وحصه اطالعه واول مره تحس ان خليفه وسيم وااايد..ياي كاشخ اليوم شو عنده الله اعلم...!!!..
عقد خليفه حياته وهو يطالع بهدلة الصاله قبل مايرفع عينه صوب خطيبته...وحياته...
خليفه: السلام عليكم..
ردن السلام وسارت عنود توايه اخوها..
عنود: شحالك فديتك..؟؟
عبدالله: احم احم...
خليفه: بخير عنود شحالج انتي؟؟
عنود:الحمد لله...بلاك تتحنحن عبادي.؟؟
عبدالله: اغار..لا تتفدين حد غيري..
عنود: ليش متى تفديتك انا اصلا.؟؟؟
عبدالله: هي هي..تنكرين الا جدامهم بس وحياتج كلهم يدرون انج ..تموتين..فدباديبي..
ابتسم خليفه وخلاهم يتظاربون وسار صوب حصه اللي قاعده تجمع اكواب الشاي..شكلها بتروح تغسلهن.. وقف جدامها بينما سمع عنود تقول..
عنود: ليته فيك دباديب عشان اموت فيهن..كلك هيكل..
عبدالله: بعطيج طراق عنود...اصطلبي..
ظحكت عنود بينما خليفه يطالع بويه حصه اللي جدامه محمر..وابتسم...وكالعاده..شرفت الاضطرابات المعويه..
قالها بصوت واطي وهو يسمع عنود وعبدالله يتناقرون بعدهم..
خليفه: شحالج حصووه..؟!!..
رفعت حواجبها وهي تبتسم..
حصه: احين حصووه استويت من بعد حصه..؟؟ بخير ولد عمي شحالك انته.؟؟
خليفه: هههههه بخير... كنت بقول..حصوتي..بس..استحيت..
ورفع عيونه للسقف بحركه تظحك...وظحكت حصه على شكله..
حصه: اذا انته تستحي انا شو اقول..؟؟ استريح..بسير اغسل الكواب..
ويوم صدت هي وخليفه شافوا عبدالله وعنود يراقبونهم باهتمام ويبتسمون بمكر...نزلت حصه عيونها وطلعت من الصاله عشان تغسل الاكواب.. بينما خليفه طنش ويلس بنفس المكان اللي كانت حصه يالسه فيه .. ويلس عبدالله عداله..وعنود قعدت تلم المخدات وتردهن مكانهن... مسك خليفه الورقه اللي جدامه عالطاوله وابتسم... وتقرب من عبدالله وصاصره..
خليفه: طالع طالع... ..!
وقربوا روسهم من بعض بتآمر وقعدوا يقرون شو في الورقه ويظحكون بصوت واطي..اول مره يشوفون هالشي..مايعرفون سوالف الحريم.. عنود كانت لاهيه عنهم بالترتيب ولا انتبهت لهم.. لكن حصه يوم ردت بالكواب النظيفه شهقت وهي توقف عند الباب...رفعوا روسهم لها وظحكوا..وعنود انتبهت بعد وظحكت... بس حصه تمت فاجه حلجها ...قمه الاحراااااااااااااااج... الورقه مكتوب فيها امور خاصه ومحرجه لها... يت بسرعه وحطت الاكواب في الصينية.. ومدت ايدها تاخذ الورقه...رجع خليفه على ورا وتساند عالكرسي وهو يظحك..بينما عبدالله مط الورقه وحطها ورا ظهره...وكيّــف خليفه وهو يطالع حصه تظارب ويا خوها عالورقه..
حصه: حراااااااااااام عليك عبود هات الورقه...
عبدالله: ههههههههههههه عيبتني الورقه ابا اقراها كامله...
عنود: عبوووووووود عيب عليك سوالف حريمية...
عبدالله: انزين عشان جي انا عايبتني...
خليفه: هههههههههههههههههههههههههههههه هههه..
عنود: شووووووووووووه...حصوووه مطيها مطيها عنه...وابوي عليج ماتروميله ماعطيتج شوي..
عبدالله: هي انتي هوغن يوم تظاربين..غشيتيني برقتج قبل العرس...
عنود: شفت انه ماينفع وياك غير هالاسلوب شو اسويبك..؟؟
حصه:عبود يالله عاد هاتها عيب عليك... آآآآي ايدي ويا هالراس...
تجدم خليفه في كرسيه ومسك عبدالله ومط الورقه عنه بالغصب....وعبدالله ميت من الظحك على خليفه..يدريبه عصب يوم انه عور حصه بايدها.. حشى اسميه مايتحمل شي اييها...
مسك خليفه عبدالله من رقبته وقرب راسه صوبه وهو يقوله بصوت واطي..
خليفه: حرمتي لا تصكها لا اكسر راسك....
عبدالله: ماصارت حرمتك...بعدها..
خليفه: بالنسبه لي انا..حرمتي ونص...
ظحك عبدالله وعنود بغلاااسه.. بينما حصه حمر ويهها صدق..من وصلوا وهم يحرجونها شو هذا...!!..
عبدالله: اوه اوه اوه...خوزوا عنه...الريال واصل حده ..ههههههههههههه....
ابتسم خليفه ومد ايده بالورقه لحصه..وهو يطالعها بنظرة عطوفه وحلوه من عيونه السود... خذت حصه الورقه وهي عيونها تحت..
حصه:....... مشكور...
خشت الورقه فمخباها وقعدت تصب جاهي حق خليفه وعبدالله..
عنود: شحالهم قوم امايه خليفه.؟؟
خليفه: بخير الحمد لله...يسلمون عليج..
قال عبدالله بغلاسته المعتاده..
عبدالله: حصووه دشي داخل..
التفت خليفه بعصبيه..بينما حصه تحركت عشان تطلع...
خليفه: طالع.!!...يلسي حصوه..والله مااطلعين....
وقفت حصه مكانها مرتبكه ... وعبدالله كاتم ظحكته...
عبدالله: شو تبابها...خلها ادش داخل..دشي دشي..يالله....
مشت حصه...
خليفه: قلت لج يلسي ...ولا تخليني اعيد رمستي مرتين...
وقفت حصه محتاره منو اطيع منهم...
حصه: خبلتووووبي ترا...انتوا يايين اليوم ناوين عليه نيه... اشوفكم مب معينين من الله خير...
خليفه: خوج هذا... عنلااااااتك زاد جانك من تشوفني يلست قلت لها طلعي...جي انا ياي اجابل ويهك عيل..؟؟؟
عبدالله: دقيقه بس...
خليفه: شو دقيقته.؟؟؟؟
عبدالله: نسييييييينا ماكلينا.؟؟... يوم تحدد لي بالدقيقه والدقيقتين..؟؟
خليفه: يوم انته ثور تسمع الرمسه شو اسويبك.... يلسي بوي حصه يلسي...
عنود: تعالي يلسي عدالي...خلها عبدالله .. عنبو هن عليهم شوي ...
عبدالله: عشان خاطر عنود بس..
يلست حصه عدال عنود..
خليفه: شو خلصتي حصه؟..خلصتي شي جهزتي شي.؟؟؟
حصه: لا والله ماسويت غير التخطيط و..و اكتب في الاوراق..
وظحكوا ثنيناتهم يوم تذكروا الورقه...
خليفه: وليش ماخلصتي شي..؟؟؟ شو اترييين.؟
حصه: اتريا حد يتكرم ويوديني ..؟
عقد خليفه حياته..
خليفه: يوديج وين؟
حصه: دبي والا بوظبي...عشان اشتري واحجز فستان وهالسوالف..
التفت خليفه على عبدالله..
خليفه: وراك انته ماتوديها ويا هالويه.؟؟ ان تعطل عرسي مابلوم حد غيرك..
عبدالله: شو مكتوب فشهادتي.؟؟..دريول والا دكتور.؟؟!..
عنود: حليله والله ماعنده وقت خلوووف يوميا دوامه كم ساااعه واوقات مختلفه مب نفس الدوام..
خليفه: عيل منو بيوديها...نوره اداوم في الجامعه وتشغل الدريول...
حصه: الا جان اشل الدريول انا.. ونوره نخلي حمدان يتكفل فيها.. هو عنده تصريح عسيارته...
عبدالله: ههههههههههه دام الصاله جي سوووبها جلبوها فوق تحت كيف لو تكفل فيها اييبها ويوديها.؟؟..
عنود: لا ماعليهم بيعقلون يوم محتاييين...
خليفه: حاولي تخلصين حصه ماباقي وقت طويل ترا... واذا احتيتي توصيله خبريني بوديج والله..
عبدالله: هي هيييييييييييييه اللي بيخليك عاد... هههههههههه..
عنود: احين شو بخصوص غرفتك خلووووف...
خليفه: الله يسلمج بندمج غرفتج بغرفتي..بنسوي غرفتج صاله هههههههههههههاي..
عنود: حلاااااااااااااااال جانها الا حق حصه ..ترتيب حلو..متى بتيبون العمال؟ ..
خليفه: والله هذي مهمة امايه انا مالي خص..حصه عندج طلبات معينه..
حصه: ههههههه لا حشى على ذوووقك امررره انته وعموه....
خليفه: انزين والعرس...وين تبينه..؟؟
حصه: والله مادري...قرروا انتي انا مالي خص يكفيني اللي عندي...
خليفه: شقا مالج خص عرسج تقولين مالي خص...نحن شو قلنا..؟؟
حصه: ههههههههههه قلنا المهم نعرس....
خليفه: ههههههههههههههه...شفت اختك تعرف تقفط بعد...
عبدالله: انا عشان جي مابغيها تقعد..يفلت لسانها....قومي يالله قومي...
خليفه: ماعليج منه يلسي....
دخلت ام خالد في هالحزه وسلمت على خليفه وقعدت معاهم تسولف وياخذون علوم الترتيبات للعرس..ويتشاورون شو يسووون وشو مايسووون... ويوم لاحظت ام خالد ان الوقت يظيع وهم ماتحركوا..قررت تقبل باقتراحهم وتوكل توصيلات نوره لحمدان..وهي وحصه بيسيرون يومين للشارجه عشان هي تتشرى من دبي مع اختها هناك..وبيرجعون...

نورة يوم درت بهالخبر احتشرت..
نورة: كيف تروحون الشارجه بدوووووووووني..ماحصلتوا الا نص الاسبوع تقررون فيه تروحون؟ حرام عليج حصه خليه اخر الاسبوع..
حصه: يابنت الناس انتي اولا الاسبوع الياي عليج امتحانات منتصف..ثانيا معظم المراكز تسكر بالجمعه..وين تبينا ندق بروسنا؟ بعدين اخر الاسبوع زحمه في دبي.. رابعا ماشي وقت نوروه ما روم اظيع ولا يووووم..
برطمت نوره..يعني مابشوف سعيد...
نورة: الله يسامحج...

ويوم قعدت على كمبيوترها من زود قهرها استلمت سعيد برساله عتاب..

" هااااااااااي انته يالقاطع...
امحق خطيب... لا تسال عني ولا تفتكر فيني..افااااااااااااااااااا... نسينا ايام قبل؟؟؟
هذا بعدنا ماعرسنا لبستني...شقايل عيل عقب العرس..؟؟؟

سعووود...قوم حصه بيووون باجر عندكم...انا مابروم ايي عشان دوامي..حصه تبا تتشرا زهابها وتخلص شغلها ومافيها تتريا لين اخر الاسبوع... شو اسوي؟؟؟ ابا اييي...

سعود والله ليش جي استويت الفتره الاخيره مووول ما تفتكر فيني والله...لايكون بعدك زعلان؟؟..خلاص انا آسفه اعتذرت لك من قبل لين متى الزعل يعني..؟؟؟ ماتعودت على لبستك لي والله...
عرس حصه قرب..بعد شهرين ونص.... نحن متى بنعرس؟؟
والا اخافك كنسلت عني خلاص ماتبغيني....
مسولي طااااااااااااااااف..
والله انا حاطه بخاطري الصراحه.... احس اني وحيده... ماتشوف خليفه كل يومين ناط بيتنا ..ماشاء الله عليهم... مبين عليه شكثر يحبها....مب انته كل ماتشوفني تشتر بي وتهزبني..
لالا انته استويت ماتحبني خلاص...
براااااااااااااااااااااايك انا بسير..
والا اييك شور..؟؟
بروح بدخل شاااات غياظا فيك...
يمكن احصل اهتمام من حد غير
باااااااااااااي"


وصلها الرد بعد عشر دقايق..لانه سعيد كان هو بعد في نفس الوقت عالنت... ووصلته الرساله وقراها على طول ورد عليها..
" اول شي وقبل السلام...لوغ اوففف يالله...طلعي عن الشات الحين...لا اييج اكسر راسج...

بل...
صدقج والله كل ماشووفج اشتربج ..ههههههههههههاي..
شخبارج حبيبي...لا ياعمري انا مب زعلان..مساله وطافت..مافي داعي نعيد ونزيد فيها..
بس انا كل سالفتي اني تعبت...
من متى وانا خاطبنج وصارلنا شهور ولا تحركنا من مكانا....
كل ماقولج بملج قلتي

لا

كل ماقول بعرس قلتي

لا

شو تبيني اسويبج..!!!
قلنا بنهرب لج تيلفوووووون عشان ترمسيني بالدس..
طحتيبي تشتييييييير وتهزييء ...
قلنا بنيبلج كاميرا للنت ومايك تركبينهن عشان نسوووولف فيس تو فيس
سبّــيــتــيني ولعنتي خيري بعد...
هههههههههههههه
والله احترت وياج...كله لا عندج..
ماشي تام غير هالرسايل... حتى الماسنجر رافظتنه...لي يقول انا غريب بلعب عليج فتره وبخليج
انا سعيييييييييييييد ...سعيد ويا هالراس جانج ناسيه
وحتى في الرسايل بعد اطقعيني ...كلام حب وغزل ماتقولين لي...كله دفاشه..
ويوم اعاملج نفس الشي احتشرتي علي..(انته ماتحبني..!!) ..
اذبحج؟

بس خلاص انا قررت شي... وانتي ان رفضتي هالمره صدقيني...
صدقييييييييييييييني...
بفركش الخطبه.
















بس لا تخافين برد اخطبج بعدها لاني ماصبر عنج الله بلاني فيج امووووت فيج شو اسوي

المهم لا تشقين الحلج سمعي قراري..

ملجتنا وملجه قوم خليفه... واحد...بيوم واحد...وبوقت واحد...
فــــــــــــــجهزي نفسج..
لاني بطلب هالشي من شيبتكم واكيد انه مابيرفض..خصوصا انه مابنطول بالملجه نحن بعد بنعرس وراهم ان شاء الله...
فهمتي؟؟
يعني ملجتنا متى؟؟؟... بعد شهرين....شهرييييييييييييين.... لا اكثر..

بخصوص قوم حصه ووصوولهم للشارجه باجر ان شاء الله
حياهم الله..
انا علي منج انتي
ادري عليج امتحانات
مابغيج تشغلين نفسج
تعرفين ليش؟
اخافج ترسبين
وتعيدين مساق
على الصيفي او الكورس الياي
ومنو بيروح فيها؟؟؟
طبعا المنحوس سعيد ...لاني بتريا فتره اطول للعرس...
شدي حيلج وان رسبتي فشي صدقيني بعرس ومابخليج تكملين جامعه
لووووووووول..

احبج نواري والله
تصبحين على خير عيوني.."

استانست نوره من رساله سعيد...اصلا هي ماكانت داخله شات وماتحب هالاماكن بس عشان تغايظه قالت هالشي.. وقراره بخصوص الملجه ناسبها وماتت من الفرحه...بس ماجهزت شي...لا فستان ولا شي...مايصير جي..ماعليه يوم بيطلب هالشي من الشيبه بتفكر ساعتها بالسالفه ...
ضغطت على ريبلاي وردت عليه برساله ثانيه.
" فدييييييييييييييييت اللي متفيزر عالنت...
وانا موافقه على قرارك ..ناسبني..لاني صراحه بديت اغار..عبود وحرمته مستوين قيس وليلى .. الله يكمل عليهم بس صراحه والله اغار... حتى قوم خليفه صاروا شي ثاني الحين اطورت العزبه..
باختصار انا اغار
وافتقدك
وايد
ليش انته ساكن في الشارجه ها؟
ليتك ساكن في العين
والا انا ساكنه في الشارجه
عشان اشوفك دوووووووووووم....
وان شاء الله مابرسب لا تفاول عليه انا باذله جهدي ومازلت بانتظار الهدية بمناسبه امتياز المنتصف....

سعودي شخبار بيتنا..؟؟؟ وين الصور اللي واعدني بهن؟ قايل بتصوره وبطرشلي الصور...
انا اترياااااااااا...طرشهن مع قوم امايه يوم بيرجعون اوكي؟؟

حتى انا احبك سعودي والله
وانته من هل الخير"


الاثنين الصبح بعد ماراحت نوره للجامعه...سارت حصه وامها مع الدريول للشارجه..معاها الورقه والفلوس عشان تخلص شغلها هناك مره وحده...وكانت زعلانه بانه عنود مابتكون معاها.. كان ودها تشلها بس مشكله عبدالله مايصبر بلاها...ولا رخصها اصلا تروح وياهم... عشان جي استسلمت للامر الواقع وراحت مع امها بس...

الساعه ثلاث ونص فطوم يت الرسبشن مع نوره عشان توصلها ومن بعدها تروح للسكن...
فطيم: هاااااااا...الدريول يا؟
نورة: وييييييييييييييه نسيت السالفه انا بعد....
فطيم: اي سالفه..؟؟
نورة: قوم امي وحصه عندكم الحين في الشارجه..وشالين الدريول..على اساس حمدان بييبني..بس حمدان شكله مايدري عن السالفه هذي كلها...
فز قلب فطيم..وتعلقت عيونها بنوره...
فطيم: حــ...حمدان بييبج..؟؟؟
ابتسمت نورة
نورة: هي حمدان بييبني... وانتي وقفي عند الدريشه وطالعيه ههههههه..
فطيم: هههههههه لا توصين حريص..ياوييييلي من متى ماشفته متولهه على ويهه..
نورة: شحقه ماتين معانا السياره تسلمين عليه..؟؟
فطيم: تخبلتي انتي..؟؟؟ وييييييين تبين المشرفه تمسكين وحده من طالبات السكن شارده..!!!!
نورة: دخيلج اللي يقول تفتش عاد هي..واصلا بعدها تذكر ويهج وتتحسبج من طالبات العين..ولا بتسالج ..تراها ماتسالني انا ولا تفتش على بطاقتي..
فطيم: لالالالالالا ابويه انا اخاف...الله مايظرب بعصا...ربج وحده غيرها محطوطه يديده وتفتش...!!..بيسوولي فظيحه...لالا مافيني..بس..سلمي عليه واايد وقوليله اني واقفه اشوفكم هههههههه..
نورة: تمام..تعالي بندق له تيلفون...
راحن للتيلفوناات واتصلن من هناك على رقم حمدان...اللي كان ساعتها في غرفته المظلمه والمبرده كانها ثلاجه..لاوي عالمخده وراقد...
تافف وهو يمد ايده للتيلفون..
حمدان:.......آآآآلووووووووو... !!
ظحكت نوره وقالت لفطيم " ههههههه راقد" ... ولصقت فطيم اذنها عالسماعه عشان تسمع حمدان وهو توه ناش من النوم ....
حمدان: آآآلووووووه ..!!!!!!!
نورة: آلووو هلا حمدان...
حمدان: شوووووووووو تبين..؟؟؟
نورة: بسم الله منك...جذي يرمسون الناس..؟؟
حمدان: نوروه قسم بالله مافيني عليج راسي يعورني وراقد...شو تبين.؟؟ وبعدين شو هالرقم؟؟ وين انتي؟
نورة: انا في الجامعه واباك تيبني..
حمدان: نورووووووووووووه مافيني دخيلج..وين دريولكم.؟؟
نورة: ماخبروك؟ شلوووه الشارجه قوم حصه وامايه...ماعندي حد اييبني عبدالله ماعنده تصريح..
حمدان: انزين وشووو عليه يوم ماعنده تصريح بيوقف برا وانتي بتطلعين له..مافيها اذا شويه تمشين للبوابه...
نورة: حمدااااااااان...عرب هني عيونهم عسليه يبون يشوفونك...قم فز...
حمدان: .................. احين بييج..باي
نورة: ههههههههههههههههههههههه باي..
سكرت نورة التيلفون وهي ميته من الظحك..
نورة: ياربييييييييي يالغراااااااااااااااااااام...ا ممممره من سمع طاريج وافق...
ابتسمت فطيم ..
فطيم: فدييييت رووحه والله...

حمدان كان ميت من وناسته..على باله بيشووووف فطيم...فهم من كلام نوره انه بيتلاقى ويا فطيم...وناسه..وناااااااااااااا ااااااسه...نش من الشبريه وتغسل وبدل ثيابه وتكشخ وتسفر وتعطر..وشل اغراضه وطلع يركظ....اربع الا ربع واصل هو الجامعه .. متحمس..يالله طلعي فطيم طلعي خليني اشوفج... بموت واشوفج من متى ماشفت هالويه الحلو....
في الرسبشن فطوم لاصقه بالدريشه..ماسكه نوره وتقولها لاتروحين الحين خليني اشوفه اكثر...وكانت ذاااااايبه من حلااااااته بنظاراته الشمسيه.....وماتت من الغيره لانه لاحظت بنات غير كانن يطالعنه ويرمسن بعد..كان خاطره تروح تخبق عيونهن...عشان مايطالعنه...ولهالسبب بس خلت نوره تروح عشان حمدان يسير ومايطالعنه البنات...ولاحظت بقهر انه كذا وحده خطفت من عدال سيارته متعمده..بس زين انه حمدان ماكان يتصدد لهن..كانت عينه عالباب كانه يتريا حد يطلع.....حد معين...!!
طلعت نوره من الرسبشن وركبت عدال حمدان...وهو يطالعها بنظره غريبه كانه محبط..
حمدان: وينها..؟؟
نورة: منوه؟؟ فطيم..؟؟ داخل لاصقه بالدريشه اطالعك....
صد حمدان صوب الدرايش اللي مايقدر يشوف منهن شي...ورد اطالعها بقهر..
حمدان: ليش مايت هني..؟؟
نورة: ماتروم تطلع لانه مب من بنات العين...
حمدان: انتي قلتيلي بشوووفها..
نورة: انا قلت لك عرب يبون يشوفونك ..وهم قاعدين يشوفونك الحين مب العكس...
حمدان: عنلااااااااااااااتج ....قومي..نزلي من السياره...مالي خص مابتحرك الا يوم اشوف فطيم مب ناش من رقدتي بلااااااااااااااش..!!
نورة: يابني وين تباني اييبها لك..؟؟ تبا تمشكلها انته.؟؟
حمدان: مااااااااااااالي خص تصرفي نوروه مابتحرك الا يوم اشوفها...
نورة: هممممممممممممممم....اوكي...
تغشت نورة ونزلت من السياره ودخلت الرسبشن من بوابه الخروج...اللي ممنوع الدخول منها اصلا.. لفتت المشرفه انتباهها...بانه هالشي ممنوع تدخل من هني....ظحكت لها نوره بسياسه وهي تعرف هالمشرفه من قبل وتسلم عليها..
نورة: هههههههههه..توني طالعه انا..نسيت ازقر بنت خااااااااااالي... احين بنرجع نطلع..
وطافت هالسالفه عالمشرفه ابتسمت لها وخلتها ادش..دخلت نوره الرسبشن ادور فطيم اللي لاحظت ان نوره راجع للرسبشن وان حمدان ماتحرك من مكانه....فيهم شي..
فطيم: شو بلاج؟؟ ليش رديتي..؟؟
نورة: حمدان مب طايع يتحرك الا يوم يشوفج...
شهقت فطوم..بينما نورة كملت..
نورة: انا رتبت الموضوع مع المشرفه ...بتخلينا نطلع عادي ...بس انتي لا تبينين انج زايغه ..خلج نوورمال مثل ماكنتي تدخلين بثقه من قبل...وهي تذكر انج من بنات العين ..شدراها انج حولتي..؟
فطوم: ويوم برجع؟؟
نورة: دخلي من بوابه الدخووول... عشان هذي اللي هني ماتشك...هذيج بقره اللي هناك سوي عمرج داخله مستعيله عليج امتحان وطوفي عنها..مابتسالج...
هزت فطيم راسها خايفه ....
فطيم: الله يستر منج لا توديني فداهيه...
نورة: يعني انا لو مب واثقه بورطج بالله.؟؟؟ ان شاء الله بتمشي الامور اوووكي..يالله نسير..
فطيم: صبري صبري...نسير الحمام بشوف شكلي...
نورة: ياويلي انا....
راحن الحمام وشافت فطيم شكلها في المنظره..وحطت غلوس خفيف على شفايفها..اما الباقي طبيعي وحلو.. طلعت مع نوره من الحمام مروورا بالرسبشن ..ويوم وصلن عند المشرفه تم فطيم قلبها يدق..بس مثل ماتعودت خطفت بثقه...تغشت مع نوره وطلعت...وماصدقت انها طلعت....ومن طلعت..يتها رغبه فظيعه بانها ترجع داخل...كانت خايفه مووووووت من هالحركه....مسكتها نورة من ايدها وسحبتها...
حمدان يوم شاف فطيم يايه مع نورة ماقدر يقرر عالكرسي...كان وده يناقز...يصارخ...ينزل يشلها ويدوربها...والا يمسك غزوزها بقوووووووووو...كله من غلاها...قعد يراقبهن وهن يتقربن..ونوره تركب جدام..وفطيم وراها....
فطيم: اس...اسسســلام ...عليكم...
افتر حمدان فمكانه وصد ورااااا بالكامل..وهو يبتسم...
حمدان: وعلييييييييييييكم السلااااااااااااااااااام والرحمه...هلا والله هلا...نوورت السيااااااااره طويلة العمر..
نورة: احم احمممممم....
حمدان: جب انتي.... شحالج فطيم؟؟
فطيم: بخير ..شحالك انته حمدان..؟؟
حمدان: عقي الغشوه.... ابا اشوفج...
ابتسمت فطيم وعقت غشوتها...تنهد حمدان وهو يطالعها ومارمس...بينما نوره ظحكت..
نورة: هههههههههههههه طاع شكله..ذاب...
حمدان:.......................
هزت فطيم راسها بخوف...وارتباك..
فطيم: والله اني زايغه لااتورط...
حمدان: عطيني سبب واحد يخلييني ما اسوي عمليه اختطاف الحين...؟؟؟
فطيم: هههههههه لانك ماتبالي المشاكل...!!!
حمدان: بس والله مستانس بوجوودج...وايد..
فطيم: تسلم..بس ماقدر اطول...نوره انزلي معاي...
نورة: ماقدر فطوم انتي سوي مثل ماقتلج.. ماقدر ادخل يوم بطلع بتشوفني المشرفه اني طالعه مرتين بتشك...
فطوم: اخاف نوروووه...
نورة: لا تخافين سوي مثل ماقتلج وانا اول ماوصل البيت بتصلبج عشان اطمن..صدقيني مابيصير شي اعرفها اللي هناك بقره...
رجعت فطيم الغشوه مكانها...وتجهزت عشان تنزل..
حمدان: وين وين..؟؟؟ بتسيرين احين...
شكله حمدان ماشبع..
فطيم: حمدان لازم انزل ..
حمدان: صبري انزين لا تمشين لين بوابه الدخول..بوصلج لين هناك...
حرك السياره ووداها عدال الباب..وقبل ماتنزل فتح السده وعطاها كيسه صغييييييره فيها ثلاث او اربع حبات حلاة باتشي..
حمدان: اندوج فطيم...ماخذنهن عن ربيعي اليوم طلعن من حظج..
خذته فطيم مستانسه....تموت عالحلاوه....
فطيم: ههههههههه مشكوووووووور وماتقصر...شي فخواطركم؟
حمدان: سلامتج الغاليه..
نورة: سلامتج فطيم..بس مثل ماوصيتج..خلج ثقه ومستعيله...
فطيم: هههههه اوكي..ادعوولي...يالله فمان الله..
نزلت فطيم عن السياره ودخلت بوابه الدخول...وحمدان ماطاع يتزحزح من مكانه...الا يتاكد بانه فطيم دخلت الحرم الجامعي باماااااااان بدون محد يسالها...
وفعلا مثل ماوصتها نوره...سوت عمرها مستعيله وكلها ثقه...والمشرفه عرفتها وماسالتها...لانها تذكر شكلها وبانها من طالبات العين...وخلتها تدخل بدون مسائله...راحت فطوم السكن مرتاحه... وتحرك حمدان عشان يوصل نوره البيت وهو قلبه مرتااااااااااااااح....ومستانس. ..

هانت بقى عشر أجزاء

الجزء السادس والستون


اخر يوم من الامتحانات النهائية... فطيم ونوره قررن يتاخرن عشان يقعدن مع بعض اطول فتره ممكنه... نورة مب مصدقه انها خلاص تخرجت...شعور غريب يخليها تبغي تصيح...وهي تذكر كل ايامها الطوييييييييييييله في الجامعه... وكل المشاكل والمناسبات الحلوه مع ربعها... اللي خصصن يوم لنفسهن يروحن فيه الحديقه ويسون حفله معتبره بمناسبه تخريجهن كلهن... لكن نوره اعتذرت بسبب ظروف عرس اختها...وملجتها هي بعد اسبوع..فما تقدر تحظر....فطوم ونوره كانن قاعدات عند النافووره ساعتها..وكان الوقت 5 العصر.. باجر الصبح سعيد بيي يشل فطوم من السكن..وبالمره يحط عليا عن بيت اهلها ...
فطوم: احين بين الملجه وعرس حصه اسبوع واحد بس.؟؟
نورة: هي... حصه ماتبغي الملجه اطول...تقول مالها داعي اطول..
فطوم: حرام فتره الملجه حلللوه...
نورة: شو نسويبها عنيده هذي...آآآآآآآآآخ يافطيم ماصدق بعد اسبوع واحد بستوي حرمه سعيد...واخيرااااا...
فطوم: هي والله...تستاهلين وهو بعد يستاهل...احسه تغيييييير هالفتره الاخيره.. من حصل الموافقه عالملجه تم طول الوقت مستانس ماشاء الله....ورد يسولف وياي مثل قبل..شكله نسى السالفه...
نورة: فديته والله...هو قلبه طيب...لو انه عصبي...بس طيب...ويعزج وايد...
فطوم: ادري والله....سكتي قسم بالله مب مصدقه اني بتم في الجامعه بروحي احين...
نورة: ههههههههه عندج شمسه... وربيعتها خديجه..
فطوم: يووووه سكتي دخيلج...هي زيينه لكنها تدخل صراحه باشياء مالها خص فيها..
نورة: يالله عاد يافطيم من كثر الاسرار اللي عندج.؟!!..
فكرت فطوم بالمسجات اليوميه بينها وبين حمدان اللي نوره مازالت ماتعرف عنهن شي.....
فطيم: حتى لو... لو طاحت شعره من راسي بتربع تقول للبنات فطوم قام شعرها يحت...
نورة: انزين هالكورس وخلص..بتاخذين صيفي.؟؟؟
فطيم: اذا حصلت... ياختي ابا اخلص بسرعه... احس الوقت جدامي طويل وايد لين اتخرج..
نورة: شدي حيلج انتي وامشي عالخطه الدراسيه...وان شاء الله بتخلصين بالوقت المحدد..وانتي شاطره ماشاء الله ماينخاف عليج... بس على شو مستعيله..؟؟
فطوم: عنلاااااتج..ابا اعرس..هههههههههه والله...كلكن بتعرسن وبتخلني بروحي...!!..
نورة: ههههههههههه احلى شي قلتيه ...بروح ابشر عرب مزايييين....
فطيم: ياحليلهم هالعرب اللي ماكد قلتي جدامهم انهم مزاييين عشان يستانسون..الا من وراهم..
نورة: ياختي يغتررررررررر يوم اقوله انته حلو.... اخر شي خلاص حرمت امدحه.. الناس كلها تمدحه يباله حد يحطمه شوي...عشان يستوي متوازن...
ظحكت فطيم وهي فرحانه بطاري حمدان...حبها له صار جنووني..حمدان يستاهل..يخبل بالواحد...تموت عليه يوم يغايظها ويرد يراضيها...ومايقصر معاها ابد من حيث الاهتمام والسؤال والمحبه....ولين الحين وهو يوفي بوعده لها...ومايطرش لها اي مسج الا يوم هي ترسل له...لو غابت عنه شهر بعد مايطرش..بس عشان مايسويلها مشاكل محتمله...لكنه يسال عنها عند نوره ويطمن عليها...وكان هالشي طبيعي لانه حمدان ماوقف سؤاله عن فطيم عند نوره ..عشان نوره نفسها ماتشك وتقول بانه ماقام يسال عنها...وتتسال عن السبب...فاحسن له انه يحسسها انه مب قادر يتواصل مع فطيم ومايعرف حالها..بانه يستمر بالسؤال...

سلمن نوره وفطيم على بعض وتواعدن على اللقا بعد اسبوع فبيت قوم نوره..يوم بتحظر فطيم للملجه...

حصه في هاللحظات كانت في غرفتها..توها طالعه من الحمام متسبحه..وناشله شعرها الطويل عشان يجف.. وقافله باب الغرفه عشان محد يدخل عليها... قاعده عالشبريه..وفارشه جدامها صور سيف..والورود اللي يابهن..والبطاقات اللي وصلت مع الباقات..وكل باقي الاغراض الصغيره الثانيه...وعيونها مليانه دموع... وهي تلمس صورة سيف بصبوعها البارده... قالت بهمس كانها تكلم سيف جدامها بويهه المبتسم دايما..
حصه: خلاص..مابقدر اصيحك او اتذكرك مره ثانيه ياسيف...خلاص بصير زوجه خليفه...ماقدر اخونه حتى بالتفكير فيك...تشوف هالشي عدل.؟؟؟....انته بعد كنت زوجي وبنحرم من التفكير فيك...لكن للاسف هذي الدنيا... وانته غبت عنا..ونحن بعدنا عايشين ولازم نكمل...

كان احساس حصه غريب...كيف تقدر تحب شخصين بنفس الوقت...واحد منهم ميت والثاني على وشك يستولي على حياتها كامله... وله كل الحق..بكل حبها وتفكيرها...شو بيكون موقف خليفه لو يدري بان حصه مازالت تحب المرحوم.؟؟..لكنها بنفس الوقت..وبشكل غريب..تحبه هو اكثر..!!..شعور غريب ومتناقض فعلا..والله يعينها على التأقلم على هالوضع... بعد اسبوع بتتزوج مره ثانيه..وكل اللي قدرت عليه انها تدعي من ربها بانه يوفقها هالمره ..ولا يحرمها من خليفه..ولا يحرم خليفه منها... لانها بنفسها لمست شكثر هو يحبها ويحشمها.. ومايرضى عليها ابد..
قعدت ساعه او يمكن ساعتين مع ذكرياتها...ورجعت لمتهم مره ثانيه وحطتهم بالصندوق.. وقفلته.. وحطت مفتاح الصندوق الصغير فسلسلتها .. عشان تكون دايما مطمنه بانها صندوقها مازال مقفول وبامان...بس ما تامن تخليه بالغرفه...اي فضولي يقدر يكسر الصندوق... قامت من الشبريه ولمت شعرها اللي قرب ينشف...ولبست شيلتها..وخذت الصندوق معاها ونزلت... ودخلت عند امها اللي كانت تتكلم بالتيلفون مع ام فيصل ساعتها ترتب معاها امورهم عشان ملجه نورة مع حصه...وكيف بتكون الترتيبات..ام خالد مرتبشه...ومتحمسه...وفرحانه لبناتها..يوم انها بتيوز كل عيالها وبتستقر امورهم...ماعدا ناصر المتغرب اللي الله يعلم كيف بتكون الحال عليه..بيمشي او لا...
سكرت ام خالد عن حرمه اخوها وهي تظحك...تقربت حصه من امها...
حصه: ان شاء الله دايمه هالضحكه يامايا...
حطت الصندوق عالشبريه...
ام خالد: والله يابنتي كل اللي اباه اني اشوفكم متوفقين ومستقرين..من بعدها بتحصليني دوم اظحك ان شاء الله...
حصه: آآمين يامايا...
اطالعت ام خالد الصندوق..
ام خالد: شو عندج ياحصه..؟؟
حصه: امايا هذا صندووقي...هممم...فيه ..صور سيف المرحوم..ووو..كم غرض عطاني اياهم..ذكريات يعني..ماقدر اشلهم معاي طبعا...وماقدر اخليهم بالغرفه...خليهم عندج..ما امن عليهن الا وياج...
ام خالد: ان شاء الله... بخشه في الكبت ...

اتفقت حصه مع امها على هالاساس وعقب ما اطمن ان الصندوق بامان ..طلعت من غرفة امها.. ووكانت بتركب الدري ..وبترجع غرفتها..لكنها قبل ماتوصل التفتت للبوابه..وشافت خليفه وعبدالله نازلين من السياره يظحكون وسايرين صوب الميلس...ابتسمت حصه وكملت طريقها لفوق... خليفه مستانس وايد هالايام...وايد متحمس وفرحان لعرسه اللي ماباقي له شي... يالله... هي سنه وحده من حياتي بالضبط..لكن صارت اشياء وايد وايد.... غيرت حياتي فيها... مثل هالوقت من السنه اللي طافت..كانت عنود تستعد لملجتها... ونورة تزاعلت هذيج الزعله العووفه مع سعيد...وفطيم تعرفت على حمدان....وخليفه في نفس الفتره..حبني.. وتعلق فيني وقرر انه يخطبني...وفي نفس الفتره بعد...سيف كان يستفسر ويحقق بموضوعي عشان يخطبني هو الثاني.....وصار اللي صار...

رجعت ركبت فوق والقت نظرها على الشنط والاغراض .. كل شي جاهز.. اسبوعين باقلي بعيشهم في هالبيت.. ومن بعدها بطلع لبيت عمي.....خليفه يقول القسم طلع رهيب بعد التعديل..مسكينه عنود..حرموها غرفتها اللي فبيت ابوها ...بس هي مستغنيه عنها بطيب خاطر لحصه..وقالت بمزح انها يوم بتيب ولد والا بنت..بتسكنهم فحجره حصه..بعد ماتعرس نوره بعد..القسم الفوقي بيكون كله لعبدالله...طبعا يباله تعديلات وايده عشان يستوي مناسب لهم..وهذا الكلام طبعا بعد سنين وسنين من الحين..
طلعت حصه المغربي اللي بتلبسه في الملجه...قررت هي ونوره بما ان الملجه عائلية جدا..بانهن يلبسن مغربي..لكن مغربي فخم عاد... ويحطن ميك اب خفيف بدون تكثيف..كله مراعاة لشكلهن في العرس..عشان شكلهن في الملجه مايغطي على شكلهن في العرس..خصوصا حصه...
فستانها للحين مايابووه..قبل العرس بيومين بيكون جاهز.... عرس حصه بيكون في فندق الانتر..الطابق الارضي..في قاعه الاحتفالات.. وعرس الرياييل بيكون بنفس المكان لكن في المنطقة الخلفيه الوسيعه من الفندق..تصلح للربشه هناك وعرس الرياييل بترتيب حلوو...المهم انهم رتبوا امورهم كلها لهالعرس...
على قولة خليفه...
~( المهم نعرس) ~


خليفه كان مبسوط حده... اسبوع وبيملج..واسبوع ثاني وبيعرس...من قده... اخيرا بيتحقق حلمه...صار قريب منه لدرجه انه يقدر يمد ايده بس ويمسكه... حلم تعذب عشانه وايد..وتحمل عشانه اكثر...
(حصــه...حصه بتكون لي..زوجتي..جدام الله والناس...بتكون لي انا بس...)
صح ان الاهل وعبدالله خصوصا راصين عليه من شهر...من شهر ماشاف حصه ولا سمع صوتها حتى...يطرشلها سلامات مايدري اذا وصلت او لا...الاهل الله يسامحهم راصين عليه رصصصصه مب مخلينه يشووفها.. وكان ناوي يكلم حصه بالتلفوون بعد الملجه...ومسكين حتى كان شارلها التيلفون ومسوي الرقم والخط وكل شي.... لكن يوم درى من عند عنود بتفاصيل حركات سيف في الملجه...ابتداءا من باقات الورد اللي ورا بعض لصندوق الحلاوة وفي وسطه التيلفون...كنسل..مايبا يسوي نفس ماسوا ربيعه المرحوم...مايقدر يسوي اي شي يذكر حصه بسيف في ليلة ملجتها على خليفه... بالتالي خلى التيلفون لعقب العرس..بيعطيه لها هدية بسيطه..وبيفكر بشي ثاني للملجه... اما بخصوص كلامه معاها...بيتصبر لين العرس... لانه يدري بقوم عمه..بيقولون له عرسك بعد اسبوع وين تبا.؟؟ بتشوفها بعد العرس..اصبر بعدك اسبوع.... والله يعينك ياخليفه علىهالصبر اللي مايخلص..!!!

بخصوص ناصر...حالته في تحسن مستمر...تحسن طفيف جدا..بالكاد يكون ملموس...يعني ماحرك ريوله..لكن يحس انهن دايما ينملن..مثل النمل يمشي فيهن... سلطان كان وده يحل مكان خالد..لكن مايقدر يتخلف عن عرس اخووه..بالتالي واحد من ربع ناصر وايد وياهم..سار المانيا وقعد معاه.. وخالد رجع للبلاد قبل الملجه بيومين...
واول ما شافوه استلموه بالاحظان...يسالونه عن حاله وحال اخووه..كان يايبلهم صور فوتوغرافيه مصور فيها ناصر ..وغرفته في المستشفى..بكذا وضعيه...وصورته بعد وهو على كرسي يتحوط مع خليفه في الحدايق..كان مسموح له يطلع ويروح وين مايبا..شرط مايكون في وقت التمارين والعلاج الطبيعي... وكان هالشي مريح للضغط والنفسيه...
ميره حرمه خالد كانت موصل..وتدعي ربها انها ما تربي الا بعد عرس خليفه..عشان تقدر تحظر عرسهم...مافيها تربي ويطوفها كل العرس والوناسه.... بينما حمده ظامنه انها بتحظر كل شي لانها مازالت في الشهر الثالث ونص.. ولو انها ماكان لها مزاج بسبب وضع ناصر الصحي..لكن كله عشان خاطر عمتها وخاطر حصه ونوره.. هذا فوق ان ناصر موصنها بالتفاؤل...

قبل الملجه بيوم...
هل الشارجه توجهوا للعين محملين من كل شي.. يساعدون بالفواله والذبايح وغيره.. هذا غير زهاب نوره.. والشبكه وغيره..اشياء بسيطه اصرت ام فيصل انها تاخذها لنوره مع انهم يدرون بان نوره بتجهز نفسها بنفسها وعلى ذوقها لكن كان كل شي هدية من ام فيصل...اللي يت مع شيبتها في السياره اللي فيها اغلب الاغراض والشنط.. وفيصل ياب معاه اخته امنه وشيخه...لانه عليا من قبل يايبنها سعيد يوم شل نوره من السكن...اما فطيم والبنات منى ومنال مع سعيد..المرتبش.. ومصدع روسهم باغاني الربشه من كثر ماهو مستانس ...
كان مضبط اموره ويايب لنوره تيلفون وماعليه من حد... ماصدق على الله يملج...محد يقدر يمنعه الحين عن انه يكلمها ويشوفها... صح بيكونون بايتين فبيت واحد وبيكون الوضع مضحك بانهم على بعد ممر من بعض ويتكلمون في التيلفون...!!..بس ماشي حل ثاني...يدري بانه نوره مابتظهر له...لانها قايلتله عن هالشي.. يوم قالها في اخر رساله ارسلها انه بيبوسها جدامهم كلهم ..قالت له والله ما اطلع لك..وعن الفظايح..!!

وفطيم صح كانت مستانسه لاخوها..ونوره...لكنها حست بشعور غريب بانها سايره بيتها اخيرا...اللي هو بيت عمتها..اللي سكنت فيه احلى ايامها...حست بحنين وشعور غريب بانها بترجع تبات فيه ولو ليله عالاقل لكن ماعليه...ويممكن تشوف حمدان بعد..محد يعلم.. في ربشة الاعراس والاحتفالات تصير سوالف ماتكون عالبال... ماتعرفت هي على حمدان فملجه عبدالله..!!!... منو كان يتوقع ان حمدان بيدخل بذيج الطريقه الوقحه...ويقدم نفسه بتفاخر..!!... وظحكت وهي تتذكر شكله... التفت لها سعيد مستغرب..
سعيد: تظحكين علي مسودة الويه..!!!..
فطيم: ههههههههههههه لالا ماظحك عليك...ياحليلك ياسعيد وايد مستانس اسميك...
ابتسم سعيد..
سعيد: هي والله...الله يكمل على خير ...باجر بتصير نوره حرمتي ان شاء الله... عشر سنين وانا احلم بهاليوم..واترياه...لازم اني بستانس..الا بموت من وناستي بعد..
فطيم: الله يخليك...وصلنا سالمين بعدين كيفك جان تبا تموت..ههههههههههه...
سعيد: مسودة الويه تفاولين على اخوج..!!!!!!!!!...
فطيم: هههههههههه اسولف..الله يعطيك طولة العمر..... وتشوب ويطيحن ظروسك...
سعيد: هي توج...
وصلوا هل الشارجه العين... وكل حد نزل من سيارته... بو فيصل وقف سيارته عدال المطبخ عشان ينزلون الاغراض منها للمطبخ على طول... كانوا يايبين فواله وايد... شنط نوره كانت فسيارة سعيد...اللي وقف سيارته مؤقتا جدام البيت عدال سيارة فيصل.. عشان ينزلن قوم فطيم وينزلون الاغراض منها وعقب بيرد يوقفها في الغراج..
استقبلتهم ام خالد وعليا وحصه...نوره على حلفتها .ماطاعت تطلع..لكنها توايج من دريشة الصاله وتتفدى...سعيد شكله متكشخ.. مع انه لبسه كالمعتاد لكن ملامح ويهه والفرحه اللي باينه عليه..عاطتنه شكل حلوو... شكله جنان يوم مايكون عابس او مهموم...عسى ايامك دايما افراح...

راحوا الرياييل بعد ماسلمواعلى ام خالد وحصه للميلس...وين مااكانوا خالد وعبدالله يالسين...ولحقهم عقب بو خالد...اما الحريم فدخلن كلهن الصاله وسلمت على نورة وحمده وميره وعنود.. وهل الشارجه شكلهم يفصفصون في نوره على غير المعتاد...والا هذا شعورها هي بس لانهم الجماعة اللي بتسكن معاهم..؟؟؟؟ الله اعلم... بس ام فيصل فعلا كانت اطالع نوره بنظرات اعجاب...شكلها تشوفها اول مره...خلاص بتستوي حرمه ولدها.. من بعد عليا..اختها العوده...هي من الاول قايله انها مابتحصل احسن من بنات حمد لعيالها...والحمد لله حققت مرادها ومراد عيالها...والكل مستانس ومستقر..

يوم الملجة
من اصبحوا الخلق يعدلون ويرتبون.. صحيح عائلية ..لكن يبالها ترتيب..ام خالد رفضت اي تدخل من حصه ونوره...عشان يهتمن بعمارهن اليوم...بالتالي ساعدتها عنود وعليا وفطيم وحمده على قد مقدرتها وام فيصل بعد كانت معاهم.. لكن ميره ماقدرت بسبب الحمل..لانها في الشهر التاسع...
نورة بالامس كانت سهرانه مشغووله بالسوالف مع فطيم اللي نامت فغرفتها..لين الساعه ثلاث ونص.. بالتالي تمت راقده لين 2 الظهر..نشت وعيونها ميفنه..لكن مستانسه...اليوم اخر يوم لي كآنسه...عقب العشا بتسوي سيدة.. ول علي...منو يروم لي.؟؟؟ .. نشت ودخلت الحمام تتسبح...
بينما حصه من الساعه 11 ناشه..مارامت ترقد اكثر بسبب الارتباك والتوتر...لكنها تستهدي بالله وتهدي نفسها.. عنود يابت لها سندويشات بعد مارفضت حصه تنزل للغدا..عشان تاكل لها شي عالاقل...خوفها اطيح في الملجه وهم يلبسونها وتستويلهم سالفه..!!... وتمت حصه حبيسة حجرتها...تفكر وكل شوي تعيد ترتيب الاغراض...توها حست بس باحساس عنود وقت ملجتها...لكن اكيد بعد ماكان مثلها..عنود مامرت بمثل ظروف حصه... بالتالي خوف وتوتر عنود اكيد اقل بوايد....
العصر بدن البنات ..عرايسنا...يجهزن..حصه رحبت بصحبه عنود ووقوفها معاها ومساعدتها لها في التعديل.. لكن نوره راغت كل حد من الغرفه عشان تتعدل بتركيز وراحه..وبعد ماتخلص بتفتح لهم....

المغرب فبيت محمد الكتبي.....
خليفه لابس سفره وعقال ومتكشخ...وماخلى قطره في مظرب الدهن عود ما تعطر بها...وواقف في نص الصاله ويزاقر امه اللي مب طايعه تخلص لين الحين...
خليفه: اماااااااااااااااايه ياماااااااايه خلصينا ترا والله بسير عنج...
نزل حمدان وهو متسفر ومتكشخ هو الثاني...
حمدان: بلاك محتشر..تو الناس...
خليفه: وانته ماتعرف تحط العقال عرااسك..؟؟ دومك الا متسفر...!!!
حمدان: خلينا الكشخه لك...انا بعدني صغير عالعقال هاااهاهااااااي...بعدين انا احلى جي...اطيح البنات...
عقد خليفه حياته...
خليفه: البنات اللي تبا اطيحهن كلهن ملجتهن اليوم... ماله داعي...
حمدان: ههههههههههههاي.....ماودي اصلح معلوماتك لكن ماقاوم...غلطان..فيه غيرهن...
هز خليفه راسه يائس من حال اخوووه اللعاب....ماكان يدري ان حمدان كان يقصد فطيم بكلامه...خليفه مايعرف منو هذي فطيم ولا مهتم...لانه ماكد صادفها الا مره يمكن او مرتين وماشافها بعد لانه ينزل راسه او يلتفت عنها ..وهي اصلا تتغشى عنه..كل اللي يعرفه انها اخت سعيد سكنت في بيت عمه فتره وخلاص..
ورد يزاعج..
خليفه: اماااااااااااااااااااااااااايه .....ترا والله....واااااااااااااااااحد. ..اثنيـــــــــــــــــــن.... .
طلعت ام سلطان متكشخه لابسه ذاك الثوب والذهب العربي...والبرقع اللي يصوولج يديد..
ام سلطان: هااااااهاااااااه يابووويه ذبحتنا خلصت..
ابتسم حمدان بوسع حلجه..وهو يطالع امه المتكشخه..
حمدان: اوووووووووووش اوووووووووووش يالعيوووووووووووز...شو هذا شو هذا..صراحه تغطين عالليتات اللي في الشارع... او قصدي تغطين عالقمر يعني....تنورين الليله...
ام سلطان: بياع حجي انته...
خليفه: ههههههههههههههههه خسك الله...
حمدان: وانااااااا اقوووووووووول شو عايبنه ابويه فيج .....ثرج تتكشخين له جذي هاااااااا...
ام سلطان: ياناس هالولد مافيه مذهب..!!!! تعايييتبه...
حمدان: افاااااااا وانا اللي قاعد امدح فيج وارفع معنوياتج...
ام سلطان: يالله يالله نسير...
حمدان: طالع والله اطنش بعد..!!!!!
خليفه: احين انتي المستعيله هاااااااا...؟؟ من الصبح اقولج يالله...
ام سلطان: وابوي..تباني اسير لوووث عن العرب...ماتخلي الواحد يتعدل...
طلعوا كلهم للحوش.. بو سلطان كان سابقنهم وسار لاخوه...من اول... بينما سلطان وحميد كل حد شل حرمته وطلعوا رباعه مع خليفه وحمدان...حمدان طلع بسيارته بروحه..وخليفه شل امه معاه....ماطاعت تركب عند حمدان تقول سواقته مثل سواقة ابوه...

المغرب نورة سمحت لفطيم انها تدخل..وتاخذ رايها بالميك اب والشكل العام.. نورة كانت طالعه ناعمه لابعد حد.. ميك اب خفيف لكن متقن... مع المغربي الفخم الي لونه كان مموه بين البطيخي والوردي والبرتقالي والاصفر..يعني مزيج من الالوان... بالتالي الوان الميك اب بعد كانت فاتحه.. نورة كانت فاتحه شعرها بعد ماسشورته ...وسوت له تسريحه خفيفه من فوق وجدام...وطالع شكلها وايد كيوووت.. بينما حصه مافتحته لانها كانت ناويه تفتحه في عرسها... لمت شعرها بشكل حلوو على اخر راسها وغرزت فيه ورود صغيره صفرا على اطراف اللفه طبعا هذا كله بمساعدة عنود لانه حصه كانت متوتره وايد وماتقدر تمسك اي شي بدون ماترتجف ايدها....

يوم وصلوا جماعه بيت محمد .. الرياييل دخلوا الميلس مع باقي الرياييل هناك..وام سلطان وحريم عيالها دخلن البيت...
في الميلس حمدان تم يالس عدال سعيد...بينما عبدالله قعد مع خليفه..صحيح انه عبدالله ماقر كل شوي يطلع ويرجع ويطلع ويرجع..لكن مكانه محجوز عدال المعرس.....لين ما يا الكاتب...المأذون على قولتهم.. ساعتها بس اطمن سعيد..وارتاح قلبه..كان وده يصارخ من وناسته....اما خليفه فلين الحين مب مصدق...ماينلام..

وبعدماتم التوقيع وخلافه طرشووه للبنات مع عبدالله.. اللي خلاهن يوقعن ..وبارك لهن ورجع بالدفتر للميلس...
من بعدها نزلوا حصه ونوره..للحريم..وكانن ميتات من المستحى مع انه محد غريب بس واقع انهن صارن متزوجات خلى الاحراج يزحف بالغصب لنفووسهن ...قعدن في الصاله ولبسوهن الشبكه والدبل وكل شي ..فطيم كانت ماسكه كاميرا الفيديو وتصور كل شي... والكل يبارك ويتمنى التوفيق للبنات...

بعد العشا ركبن البنات فوق كل وحده لحجرتها..وراحوا الاهل كل حد بيته..هل الشارجه طبعا بيباتون ليلتهم هناك.. طلعوا الرياييل من الميلس وكانوا كلهن يظحكون مستانسين... خلاهم خليفه شوي وراح لسيارته وطلع منها كيس صغير...واتصل بعنود...
عنود: هلاااااا..
خليفه: هلااا عنوووود شحالج.؟؟
عنود: مبروووووووووووووووووك يالمعرس..من قدك..؟؟
خليفه: ههههههه الله يبارك فيج..
عنود: الله يوفقك يارب ويهنيييييك..
خليفه: وياج ان شاء الله....شو حصه.؟؟ علومها.؟؟
عنود: اتنااافض من اصبحت..هههههههه...
خليفه: جي متروعه مني يعني..؟؟
عنود: لااااا وحليلها بس مرتبكه...وانته اصطلب..امرره مستوي عالدقه وتفسر اي تصرف يصدر عنها كانه موجه لشخصك الكريم..ويا راسك..
خليفه: هههههههههههههههه انزين ماقلنا شي.. المهم خبريني هي ماترددت حزت التوقيع..؟؟
عنود: لالالا ابداماترددت الصراحه...
خليفه: الحمد لله...اخبرج..طلعي شوي بعطيج غرض لها..بسرعه انا عند سيارتي..بييج لين الباب..
عنود: اووووووكي احين بييك..باي...
سكرت عنود عن خوها وطلعت له برااا.. وعطاها كيس صغير شلته ودخلت به داخل عند حصه...اللي كانت يالسه تفتح تسريحتها البسيطه وتخوز الورد..
عنود: هاللوووووو شو تسوي العرووس..
حصه: العروس تسحي كشتها..شو تسوي بعد العروس...!!!
عنود: ههههههههه عاد انتي لو شوو ماتحاولين مايستوي شعرج كشه..سااااااايح...
التفتت حصه لعنود وهي تبتسم..ويوم شافت اللي في ايدها اختفت الابتسامه...
حصه: شو هااا اللي في ايدج..؟؟؟
عطتها عنود الكيس وهي تغمز بمكر..
عنود: هدية من المعرس... بخليج ..فتحيها على راحه...بسير اعاون عمووه...
طلعت عنود عن حصه وخلتها اجلب الكيس بين ايدها...كانت شاكه من اول انه تيلفون...كل المعاريس يسوونها احين هالحركه...واولهم كان سيف..المرحوم..لكن صغر حجم الكيس وخفته انكر هالشي... فتحت الكيس وشافت علبه صغيره وظرف...ابتسمت.. كانت مهتمه بالظرف وبالكلام اللي فيه اكثر من العلبه...خذت الظرف متحمسه تقرا كلام خليفه اللي كاتبنه لها.... لكنها انصدمت يوم فتحت الرساله وقرتها...وكانت..





ماتت من الظحك يوم شافت هالرساله الغريبه... وايد عليك ياخليفه...!!!..هاللي قدرت عليه... وسكتت وهي تتامل الرساله.... معاه حق...ماتكفي هالراسله لوصف الشعور... والسطور الفاظيه تعطيك مجال تتخيل قد ماتبا من الكلمات اللي توصف المشاعر...جذي احسن...ريلي ذكي...الله يديم فرحتك ان شاء الله...
سكرت الرساله ورجعتها في الظرف..فتحت العلبه وكانت خاتم الماس...رقيق جدا..هذا غير الدبله.... هذا كان هدية بسيطه منه...لانه بصراحه ماعرف شو اييبلها غير عن ها...

اما بخصوص المعرس سعيد..فمن الظهر نورة واصلنها التيلفون مع الهدية اللي كانت عبارة عن ساعه رهييبه وعصريه...لكنها ما اجرأت تفتح التيلفون الا يوم تاخذ الاذن من ابووها...صح سعيد صار ريلها لكن بعد ماقدرت...وهالشي بيخلي سعيد يصفعها لانه قايل انه يبا يرمسها بعد ماتخلص الملجه... وهي غالقه التيلفون ولا فتحته... ياكثر ماتعاند فيه مسكين...!!!
ياويلج من سعيد يانوره...

الجزء السابع والستين


ليلة الملجه.. دخل سعيد غرفة عبدالله الجديمه اللي بيرقد فيها...بدل ثيابه وتسبح...وبعدها صلى الشفع والوتر + سجدتين شكر لله لانه كمل كل شي على خير..وحقق مراده اخيرا...وبعد ماخلص فتح تيلفونه... وابتسم...انسدح عالشبريه واتصل على رقم نورة... وانصعق يوم درى بعد شوي انه مغلق...كيف مغلق.؟!!.. وانا موصنها مسودة الويه... سكر واتصل على تيلفون فطيم...
فطيم: هلاااا بالمعرس..مبروووووووووووووووووو وووك..
سعيد: الله يبارك فيييج ...وين انتي.؟؟
فطيم: هني يالسين تحت...
سعيد: نوره وين؟؟
فطيم: فحجرتها...
سعيد: فطوووم..سيريلها وقوليلها سعيد يقولج فتحي تيلفونج لا ايي يفتح راسج الحين...بسرعه ..بتصلبها بعد خمس دقايق...
فطيم: ههههههههههه اوكي..باي
سعيد: باي..
سكرت فطيم تيلفونها ونشت عنهم وين هم متيمعين في الصاله وركبت فوووق... دقت على نوره الباب... اللي كانت فعالم خيالي منسدحه عشبريتها وتفكر بالوناسه اللي هي فيها..
فطيم: بطلي البااااااااااااب....
ظحكت نورة ونشت تبطل الباب عن فطيم ..وردت سكرته بعد مادخلت...
فطيم: عندي رساله ابا اوصلها...
نورة: شو رسالته..؟؟؟
فطيم: ههههههه يقولج سعيد فتحي تيلفونج لا ايي يفتح راسج...
نورة: ههههههههههههههه ايوا ايوا...قام يطلع شخصيته الاصليه عقب ماطاح الفاس فالراس...كله يتعامل بالتكفيخ اخوج...
فطيم: ههههههه حرام عليج تلقينه مستقطع يبا يرمسج...
نورة: قوليله آآسفه.. ما استأذنت من ابوويه ولا امايه ولا خواني...
غمزت لها فطيم..
فطيم: يالله يالاعذار..يعني ظنج بيعارضون.؟؟؟
نورة: همممممممممممم لا مابيعارضون...بس لازم استاذن..
فطيم: يعني انتي جي والا جي بترمسينه..وكذا مره مرمستنه تراج في التيلفون يوم اكون انا وياج..وتكون بينكم سالفه...ليش ماترمسينه احين يوم صار ريلج خلاص...
نورة: والله تبين الصدق استحي ...ادريبه بيطلق العنان لعمره وبيقول رمساااات وانا ماتحمل...
فطيم: هههههههههههههههههههههههههههههه هههه ياهو عذر..فتحي فتحي تيلفونج ورمسيييه..بيحشرني انا كل شوي بيقولي رمسيها...دخيلج مافيني على عوار الراس...
حاست نورة بوزها متردده...نشت فطيم عن الشبريه..
فطيم: وين حاطتنه...؟؟
نورة:.........في الكبت...فطوم مافيني...استحي ويا هالراس...
فتحت فطوم الكبت وطلعت التيلفون من صندوقه الصغير...
فطوم: خلي عنج الخريط....
فتحت التيلفون وماواحاااا..شوي والا هو يصيح.... ظحكت نوره وظحكت فطيم بعد..
فطيم: آآلوووو....
عقد سعيد حياته....
سعيد: خس الله هالصوت شو ابغيبج انتي.!!!!!!!!!....
فطيم: تونا فاتحين التيلفون ونقول بسم الله.....امررره مافيك صبر...
سعيد: هي مافيني صبر...عطيني حرمتي يالله...
فطيم: حرمتك متردده ترمسك او لا...ا ون تقوووووول...
ربعت نورة وشلت التيلفون عن فطيم عن تقول شي ثاني....
ظحكت فطيم وطلعت برا الحجره عشان نوره تاخذ راحتها..ورجعت تحت عند باقي السهرانين...
قفلت نورة الباب ويلست عالشبريه..وقلبها يدق بالقووو..حطت التيلفون على اذنها تتسمع....
سعيد:..وينج.؟!!..آآللوووووووو. ..!!..
نورة: ... هلالا سعيييد....السلام عليك...
ابتسم سعيد وعظ على شفايفه عشان ما تطلع منه رمسات من اولها....
سعيد: هلا والله وغلاااااااااااا....وعليج السلام...مبرووك غناااتي...
على طول احترق ويه نورة...صح يقول وايد من هالرمسه عالنت لكن التيلفون شي مختلف كلياااااااااااااا....
نورة: الله يبارك فيك..مبروك لك انته بعد...
سعيد: الله يبارك فيج....شحالج نواري..؟؟؟؟؟؟؟
نورة: بخير الحمد لله...شحالك انته؟
سعيد: واااااااايد وااايد مستانس....
نورة: هههههه ان شاء الله دوووووووم...
سعيد: آآمييين...واخييرا نوروووه....من متىى نتريا هاليوم..والله مب مصدق انه تحقق..احس حد مسوي فيني مقلب...والا انا عايش حلم ماريد انش منه...
نورة: والله حتى انا... الله يوفقنا ويوفق قوم حصه ان شاء الله..
سعيد: آآمين...وليش ماتبين ترمسيني ويا هالويه...؟؟؟
ظحكت نورة يوم شافت سعيد رد على طبيعته وقعد يفاتن..... لو يسوي عمره رومانسي شوي بس مايتوب عن هالمفاتن...
نورة: هههههههههههه سعيييييييييييييد...بعدني ما استاذنت من ابويه ولا امي...
سعيد: ماعليج انا مخبر عمووه امس .. وظحكت...ماقالت شي يعني يفسر انها بتعترض...
نورة: بس لازم صراحه استاذن منهم بنفسي...ومن ابوويه..بخبرهم باجر...
سعيد: كيفج...صورتووا..؟؟؟ ابغي اشوف الصور..
نورة: صورت فطيم..مايندرا عاد بالصور كيف طلعن..!!! وانتوا صورتوا؟؟
سعيد: وابوي عليج نحن بعد شو نصور ؟؟؟
نورة: هههههههه مالي خص انا بعد ابغي اشوف ريلي....
سعيد:.....شو..؟!!
نورة: اقولك انا بعد ابغي اشوووف....
سعيد: لا ..شو قلتي اخر شي...
استهبلت نورة..
نورة: شو قلت؟ ماذكر...
سعيد: نورووه بصفعج....
نورة: هههههههههههههه...قلت ريلي...
ابتسم سعيد...
سعيد: again...!!
نورة: ريـــــــــــــــــــلــــــــ ــــــــــــي....!! ماي هازبند...اييبلك اياها بعد بالهندي...؟؟؟
سعيد: ههههههههههههههههههههههههههه فدييييييييييييييييييييييييت هالكلمه محلاها منج....ياربي بمووووت نوروووه... !!
نورة: بسم الله عليك...
سعيد: اخبرج..محد في الممر..طلعي وانا بطلع ..نوروه ابا اشووفج بلييييييز...
نورة: هههههههههههههههه ظحكتني والله.. مستحيييييييل...قصوورنا بعد...!!
سعيد: نوروه فديتج...شوفه بس شووووفه...
نورة: لالا اعرف شوفاتك انا واعرف سوالفك...
سعيد: شو بسوي يعني..؟؟ بلوي عليج مثلا ؟؟
نورة: ههههههههه تسويها بو عسكور...
سعيد: فيوم من الايام ان شاء الله....ماعليه من حد انتي احين حرمتي..؟؟
نورة: والله.؟؟ خلاص عيل بجهز اغراضي وشلني وياك الشارجه...
سعيد: والله.؟؟؟؟؟؟؟....غااايته عيل...
نورة: ههههههههههههه..والله انك.... شو اخبار بيتنا الكتكوت؟؟..
سعيد: يسرج حاااااااله....باقي اشياء بسيطه...توصيل الكهربا والماي..والتنظيف والتشطيبات والصبغ...طبعا الديكورات بخليها لج تتعبثين فيها وتسوين على ذوقج...
نورة: وناااااااسه...متحمسه سعييد ابا اشوووفه....
سعيد: بتشووفينه ان شاء الله...تعرفين بشو افكر..؟؟... اييبلي زراااع... بعد مايخلص البيت وكل شي..بييب لي زرّااع يزرع لي الحووش بورد وحشيش ويرتب ويسوي حركات في الحوش..عشان يوم نسكنه مايكون صحراااا...هههههههه..
نورة: ونااااااااااسه...يوم بنسير الشارجه ابا اشوووفه...مالي خص توديني..
سعيد: من عيوني الثنتين ياعيوووني انتي....
نورة: تسلم لي عيوووونك يالغالي...

تمت نورة تكلم سعيد المغرم حوالي ساعه الا ربع..وعقب سكرت عنه عشان يرقد...وهي نفسها اصلا كانت تحس بارهاق مع انها ناشه متاخر...

بالنسبه لحصه...كانت مرتاحه بعد ماعدى الموضوع على خير وبدون مايصير شي..وصارت متزوجه مره ثانيه.. وهالمره من الشخص اللي طول عمرها وهي تتوقع انه يكون زوجها في النهايه..وهذا اللي صار..!!
وبعد ماخلصت الملجه وراحوا قوم عمها...تموا قوم عليا وامنه وشيخه وفطيم سهرانات..وحصه مابغت تقعد بروحها..كانت تحس بالراحه..بشكل غريب جدا...وكانها اخيرا حصلت مرادها.. فغيرت ملابسها ولبست شيلة بيظا ونزلت تقعد معاهم..وتسولف وتظحك..

خليفه من جهة ثانيه مارام يرقد...مع انه ميت من التعب لكن الحماسه متملكه على كل ذره منه...بس لازم يرقد لانهم باجر معزومين عالغدا فبيت عمه...بعد صلاة الجمعة..بس مب رايم يقر يبا يعرف ردة فعل حصه بعد الرساله الغريبه..كان يبا يعرف اذا رامت تكتشف سر الرساله والا بعدها... واذا مادرت..يبا يخبرها..ان الرساله مب فاظيه..وانه كاتب لها كلام وكلام بقلم سحري...اول ماتعرض الورقه للظو يبان الكلام واضح... .. بس العيازه مايعتقد انها انتبهت...والا يخليها لين كم سنه بعد العرس عقب يخبرها بالموضوع عشان تتفاجأ..؟؟؟ جذي احلى صح..!!.. مسك تيلفونه واتصل على عنود بدون ماينتبه للساعه...همه بس يعرف ردة فعل حصه...
بطت عنود لين ماردت عالتيلفون...ويوم ردت كان صوتها مليان رقاد..
عنود: آآآلووووووه..!!
خليفه: هلا عنوود...راقده شوو..؟؟؟
عنود: ...هممممممممم.؟؟!... هييييه راقده....خير خليفه..؟؟
نش في هاللحظه عبدالله منزعج من اللي يقاطع رقادهم...عقد حياته وهو يشوف حرمته ترمس في التيلفون وهي منسدحه عداله...مد ايده وشل التيلفون...
عبدالله: آآآآآآآآلووووه..!!
خليفه: بسم الله... ماباك انته عطني اختي...
عبدالله:...........خلوف..!!... كم الساعه عندك بوي.؟؟؟
عقد خليفه حياته واطالع الساعه عالايدار..وشهق.. 2 ونص..!!!!!!!!...يالفظيحه..
خليفه: ههههههههههههههههههههههههههه.. سوري والله سوري..
عبدالله: ياخي شو تبا...محد غيرك ملج في الدنيا..؟؟؟...
خليفه: هههههههههههه ( خليفة ميت من الظحك على عمره وعلى عبدالله)...سووري والله عبود مانتبهت للساعه على بالي واعييين...
عبدالله: انته ارووحك واعي والا الخلق كلها راقده..ارقد يالله ارقد....
خليفه: ان شاء الله ارباب...سوري والله..
عبدالله: هههههههه..عادي ويا راسك...بس يوم تفكر مره ثانيه تتصل وتحصله مغلق لا تحس بالاهانه اوكي..؟؟؟ ترا نحن بعدنا معاريس فريشش ماصارلنا ثلاث شهور..
ظحكت عنود..وظحك خليفه..
خليفه: مالت عليك انزين...هههههههههه يالله تصبحون على خير..

سكر خليفه عنهم وويهه قافط...كيف داق عليهم نص الليل وهم رقوود...!!!...عنبوا مب هامني غير نفسي انا بعد غير شكل نسيت ان البنت عندها ريلها.... اووفف ابا اعرف ردة فعل حصه....ماعليه باجر بمسك عنود بخليها اطلع لعلووم كلها....

باجر الساعه 12..دخل حمدان حجرة خليفه وهو منقهر..الشيخ خليفه بعده راقد..وامه حاشرتنه هو تحت عشان يسير يوعي اخووه ..وهو متعايز يركب فوق لكن من حشرتها ركب..والاخ راقد وفوق هذا لاوي على المخده... آخ يالقهر.. يتحلم من احين بالعرس الريال..
وقف على راسه عدال الشبريه وهو حاط يديه في خواصره...
حمدان: اييييييييه....خلوف...خلووووووو وووووووف...قم ويا هالكشه..!!
خلوف مطنش وانجلب الصوب الثاني... مسكه حمدان من جتوفه واقم يهزه عشان ينش...
حمدان: خلوووووووف...صلاة الجمعه قمممممممم..!!...جي بنسير عند قوم عمي بعدنا....ايه قوووووووووووم...!!

نش خليفه منقهر وهو معقد حياته..
خليفه: هااااااااااااه هااااااااااااااااااااااااااه.. ..حشى جذي يوعون الناس حمدان..!!!
حمدان: كيف تباني اوعيك عيل..؟؟
خليفه: بهداااوه ...بنش بهداوه..مب جذي تعفسلي يومي كامل...
ابتسم حمدان بسخريه...
حمدان: خلينا التوعي برقه وهداوة ودلع حق حرمتك...
رد خليفه عق راسه عالمخده وهو يتنهد..
خليفه: اوووووووووووه انا ناقص بعد تزيدني انته...لا تطريها لين عرسي.. ..
حمدان: ههههههههههههههههههههههههه آآآآويلييييييييي عالغرام.. يالله قم قم صلاة...
طلع حمدان وهو يظحك على اخوه من عقب مادخل وهو منقهر... مسكين خليفه...متولع... وياحيه يوم افتك...باقي انا..متى بتفك؟؟؟ بعدني سنه...واكثر يمكن...الله يعيني ويصبرني بس....

قبل لا ياذن الجمعه بشوي طلعت نوره وهي لابسه شيلة سودا ومتعدله...عشان الضيوف...صح محد غريب بس بعد مايصير اجابلهم بشيلة بيظا..اول ماطلعت من حجرتها ..طلع سعيد بعد لصلاة الجمعه وصبعه في اذنه اللي دخل فيها ماي وهو يتوضى...اول ماشافها خوز صبعه وشق الحلج..وهي وقفت منصدمه...
سعيد: هـــــــــــــــــــــــلااااا ااااااا والله ....
ردت نورة على ورا قافطه تبا تدخل حجرتها...
سعيد: تعاالي تعالي....وين تبين....؟!!
سار صوبها بسرعه ومد ايده عشان يمسكها قبل ماتدخل حجرتها..ومالحق منها غير شيلتها...يوم مسكها امتطت شيله نورة شوي عن راسها..ردت مسكتها وهي توقف مكانها عشان مااطيح كلها..وتمت تظحك وظربت سعيد على ايده اللي ماسكه شيلتها...
نورة: سعيــــــــــــــــد..!!!...عي ب عليك...فجني...
سعيد فج الشيله ومسك ايدها...
سعيد: عيل الحماره من تشوفيني تشردين...!!!..
مطت نوره ايدها وهي اطالع ايده بصبوعه الطويلة والقويه اللي ماسكه ايدها بقو...
نورة: سعييد خلني اسير ....
سعيد: سلمي على ريلج اول...
نورة: هههههههههه انته ماجنك ساير للصلاة..؟؟ بعد الصلاة بسلم عليك...
برطم سعيد..
سعيد: نوروه بعد الصلاة بسير الميلس وبنتم هناك لين مانروح الشارجه بعد الغدا....
ابتسمت نورة وهي بعدها تحاول تسحب ايدها بس نووو واي...
نورة: ههههههه انزين بينا التيلفوووووون سعيد..والاسبوع الياي تراك بتي عشان عرس حصه... بنتلاقى ان شاء الله...
سعيد: مابا...يكفي اني ماشفتج امس في الملجه....

سمعوا في هاللحظه باب ينفتح..ردت نورة تسحب ايدها بخوف وبقوة اكبر بس سعيد بعده ماسكنها وهو يتريا يبا يشوف منو طالع...وكان عبدالله اللي طالع متلبس للصلاة..كانت عنود معاه لكنه طلع من الممر قبلها ويوم شاف سعيد اشر بايده لها عشان ترد تدخل الغرفه...وسار صوب سعيد ونورة اللي موخيه وميته من الارتباك مب عارفه شوتسوي...
وقف عبدالله مجابلنهم هم الثنينه...وحط ايديه على خواصره..
عبدالله: شو تسووون..؟؟؟؟ شحقه ماسك ايد اختي.؟؟
ظحك سعيد...
سعيد: انا ماسك ايد حرمتي...
عبدالله يموت ويغلس عليهم....ذالنهم بخواته...
عبدالله: ماعتقد سمحنالك او طلبت منا الاذن عشان تشوف حرمتك...
سعيد: وماعتقد اني فكرت فيوم اطلب الاذن عشان اشوف.."حرمتي"... ههههههههه
عبدالله: لا والله... ترا حشرتونا انتوا..جنه محد ملج غيركم...مرررررررره مستقطعين..يالله يالله فج ايدها وخلنا نسير...
سعيد: سير وبلحقك.سلام ماسلمت عليها انا لين احين...
عبدالله: مابتحرك من هني الا وانته وياي...ويالله بشوف شو بتسوي...
ردت نورة تسحب ايدها..
نورة: سعييد....سيروا صلوا ...
التفت سعيد لها..
سعيد: اوكي عيوني..تامريني على شي..؟؟
قالها بصوت واطي وهو يقرب راسه من راسها....االشي اللي خلا عبدالله يرفع حواجبه مستغرب من قواة عين سعيد...
نورة: لا سلامتك..
ابتسم سعيد..يبا بس يحرج نورة زياده ويقهر عبدالله....تقرب وباس راس نورة بوووسه طويييله...ونورة مغمضه عينها مدوخه...وتحس عمرها بطيح من القفطه والاحراج...وعبدالله فج ثمه يبا يعطي سعيد بكس على خشمه..
عبدالله: والله ولا عليك من حد بو عسكوور...قمممممممممم.....يالله خل عنك هالسوالف نسير صلاة...
مسك عبدالله سعيد من ايده وسحبه بعيد عن نوره وسعيد يظحك...ويقول لنورة..
سعيد: ههههههههه بكلمج بعدين... لا تغلقينه لا اكسر راسج...
نورة: هههههههههههههههههههه
وقف عبدالله...
عبدالله: لحظه.....تغلق شو..؟؟
سعيد: التيلفووون...
عبدالله: أي تيلفووون؟
سعيد: اللي يايبنه انا لها...
عبدالله: عنبووو..متى واحيت..؟؟ وليش ماحد شاورنا ولا درينا نحن بالسالفه...؟!!!
حاس سعيد بوزه...
سعيد: انته بعد بتقعد تسويلنا سالفه...طوف طوف اسمعه ياذن...
وتم عبدالله يتحظى على سعيد ويتقحطن عليه....وسعيد يظحك ويسوولف معاه..
بعد ماتاكدت نورة انهم نزلوا..دقت الباب على عنود وقالت لها الدرب امان...ونزلن رباعه تحت....عند باقي الحريم...

ساروا الرياييل يصلون وبعدها على طول شرفوا بيت العم لبيت حمد...واستوت الخبصه والربشه.. الحريم كانن وايد يسوولفن ويظحكن .. ام سلطان وايد تلومت بينها وبين نفسها انها رفضت فالبدايه بنت مثل حصه...بعد ماتمت الملجه على خير...لمست بنفسها حشمه حصه ورقتها وهداوتها واحترامها لنفسها واهلها..صراحه مابتحصل احسن منها لولدها وهي من البدايه تقول هالشي ..والحمد لله ان الامور عدت على خير...
سعيد وحمدان في الميلس كانوا ماخذين زاويه بعيد يسولفون ..ويظحكون...علاقتهم ردت مثل قبل يوم اصطلبوا (ظاهريا) حمدان وفطيم...بالنسبه لسعيد الامور تحت السيطرة... كان حمدان مطفر بسعيد قاعد يغايظه ويعيب عليه...بس يوم ذكروا نوره في السالفه بان حمدان مب مقصر بزياراته وسوالفه مع نوره طبعا اكثره مبالغه من عند حمدان..لكن سعيد انقهر وغااار صدق..وبدوا يظاربون بمزح طبعا...لكن بالغلط ظربت ايد سعيد على ايد حمدان المكسووره...مسكها حمدان بسرعه يوم حس بالم مفاجئ...شكله العظم ما التحم كليا...
تلوم سعيد من الخاطر ومسك ايد حمدان كردة فعل فوريه هو بعد..
سعيد: آآسف آآسف والله حمدان...تعورك.؟؟؟
عظ حمدان على شفايفه عشان يكتم الالم شوي...
حمدان: ...لالا عادي ماعليك...
سعيد: صدق صدق والله...ماشفتها ولا قصدت..
حاول حمدان يمزح..
حمدان: عنبوووو جذي يغارون الناس كسرتني...هههههههههه...
سكت سعيد متلوم...
حمدان: ياريال عادي عادي والله..بتخف بعد شوي...شكلي الا برد الربطه مكانها اشوفه مايقهر الصك هالعظم...
سعيد: ليش انته مخوزنها قبل وقتها..؟؟؟؟؟
ابتسم حمدان..
حمدان: بيني وبينك..هي...عفتها ياخي حارمتني من كل شي..وشفتها بخير ساعتها...المهم انته لاتحاتي...

تم سعيد متلوم طول الوقت على هالظربه الغير مقصووده... سعيد من النوع اللي بسرعه يتلوم يوم يعور حد...
بس حمدان كل شوي يطمنه انه بخير.. التفت سعيد لعبدالله اللي قاعد يسولف مع خليفه وحميد وخاله هلال..
سعيد: عبدالله.....حوووه الدكتور...
التفت عبدالله لسعيد ...
سعيد: تعال شويه...لو سمحت يعني...
نش عبدالله وسار صوبهم وحمدان يطالع سعيد مستغرب ليش زقر عبدالله...!!..
يلس عبدالله عدال حمدان من الطرف الثاني...
عبدالله: خير..؟
سعيد: الخير بويهك..(مسك ايد حمدان اللي تعوره ومدها لعبدالله)... شوف ايده..ظربتها بالغلط وردت تعوره...
مسك عبدالله ايد حمدان مستغرب...
عبدالله: انا دكتور اشعه مب عظام...
حمدان: ماله داعي هذا اروحه سعيد يحاتي...
سعيد: عنبوو ماتعرف تفحصها...
تم عبدالله ماسك ايد حمدان ويفحصها ويهوس عليها بايده الثانيه...
عبدالله: مكان الكسر يعورك لاه؟!!..
حمدان: هي...
عبدالله:.. عندي شاش فوق صبر بتصل لعنود اطرش العلبه...
حمدان: مب لاااااااااااازم ياريال طبه طبه...
عبدالله: لالا احسن تنربط...
اتصل عبد الله على حرمته ووصاها اطرش العلبه مع الخدامه... ويوم يابوها قعد يلف ايد حمدان كانه طول عمره كان يسوي هالشغله..لكنه الصراحه في شغله ماكانت شغلته تجبير الكسور ومعالجه العظام.. لانه مايخصه في هالشغله...وبعد مااطمنوا على ايد حمدان ردوا يسولفون كالمعتاد...وحطولهم الغدا وتغدوا...

بعد الغدا والراحه شوي.. جهزوا هل الشارجه اغراضهم عشان يسيرون...طلعوا الرياييل كلهم برا عشان يسلمون على بو فيصل وفيصل وسعيد..بينما من الطرف الثاني جدام البيت كانت ام فيصل /امنه/ شيخه وفطيم متلبسات عبيهن ومتغشيات يسلمن على ام خالد وعليا.. حصه كانت طالعه معاهم عشان تسلم بس يوم شافت خليفه مجابل جدام الميلس دخلت بسرعه مستحيه..بس مب بالسرعه الكافيه..لانه خليفه شافها...وابتسم ونزل راسه عشان محد ينتبه على ابتسامته..بينما حمدان لا انفاسه ولا عيونه ولا حتى روحه كانت معاه...وعيونه متعلقه بجسم متستر بالسواد من فوق لتحت..ظعيف وطويل.. ومجابل...فطيم...اخيرا شفتج...!!!! فديت هالشوف والله...يعلني ماخلى...
كان شارد بعيونه صوبها ولا بحاس باللي حواليه.. بمن فيهم سعيد اللي مجابلنه وقاعد يراقبه..ويراقب انفاسه..ونظراته...وتعابير ويهه الملهوفه....وهو حاظن ايده اللي تعوره لصدره العريض.... اول مره يشوف حمدان بويه مثل هذا...وعرف انه قاعد يطالع اخته...وبشكل غريب..ابتسم ..كسر خاطره حمدان..الظاهر انه صدق يحبها وبشكل جنوني بعد..
التفت سعيد التفاته خفيفه يشوف الحريم..وتاكد بانه اخته متحشمه ومع الحريم...فخلاه يطالع على راحته...تساهل معاه هالمره لانه كاسر خاطره...واقتنع فعلا بانه يحبها مثل ماقاله...
فطيم كانت تدري بانه حمدان موجود فمكان معين بين الرياييل..وتعرف بعد بان سعيد اكيد معاه..عشان جي ماكانت متجرأه تصد واطالع عن يغسل شراعها...لكن يوم خلصن سلامات صار لامحاله تلتفت عشان تروح لسيارة سعيد..ويوم التفتت...طبعا كانت متغشيه...لكنها بشوق فظيع ميزت حمدان كانه الوحيد اللي واقف...وشافت بعد ايده اللي المضمومه والملفوفه....وانشغل بالها...لانه قايللها ان ايده بخير...يجذب عليها؟؟...سلامات ياعمري..!!..
يوم التفتت فطيم ابتسم حمدان ونزل ايده وحطها فمخباه...عشان ماينشغل بالها..ماكان يدري بانها ميزت وشافت الايد ...حس بايد تظربه على صدره بخفه... انتبه على عمره وشاف سعيد يبتسم..
سعيد: بسّـــــك طويل العمر...
ابتسم حمدان وارتبك...وتصدد لمكان ثاني...
ركبوا هل الشارجه سياييرهم وروحوا.وماشلوا عليا لانها مصره تقعد هالاسبوع بعد عسب العرس ..الشي اللي خلا فيصل يظايق...اسبوعين تغيب عنه هي وعياله..وايد..!!... وبعدهم بنص ساعه روحوا بيت محمد بعد لبيتهم...

العصر طار خالد بميره للمستشفى وشل امه معاه وخلوا العيال عند قوم حصه... الظاهر انها من تعب امس عجلت بموعد الولادة... وميره على غير ويعها كانت تصيح قهر لانها ولادتها يت قبل عرس اخوها... لكن هذا مب وقته الحين...اهم شي تتخلص من هالويع وتربي بالسلامه...
امابالنسبه لخالد كان مرتبش.. يبا يعرف جنس المولود... لانه ميره رفضت الفحص في البدايه تبا تتفاجئ به..وكان مستانس لانها بتربي وهو موجود في البلاد ومب بعيد عنها...لانه بعد عرس خليفه ..اللي مقررين يسافرون المانيا على طول بعد العرس..قرر خالد انه يسافر معاهم..صح بيكون رزززه لكن شو يسوون...هم سايرين وهو بعد ساير ولازم يبالهم حد يدليهم هناك..

كانوا في البيت مرتبشين يتريوون خبر من المستشفى.. وكل شوي عليا تتصل بخالد تسال...لين يت الساعه 7 ونص...وربت ميره بالسلامه...ويابت بنوووته....وخالد ميت من وناسته...ولدين وبنتين.؟؟... شو يبغي من الله اكثر..؟؟ الحمد لله على كل حال.. وسماها على امه..موزه...ومن عقب ماربت انتشر الخبر عند الكل..
الساعه 8 ونص في الليل شحن حمدان حريم البيت ماعدا حمده ( عليا وعنود وحصه ونورة) والعيال خلووهم عند حمده... وماشلهن عبدالله لانه من العصر كان عنده دوام بالمستشفى..ومب موجود...
طافوا عند جنائن حفيت وخذوولها باقه ورد جنان... وساروا المستشفى...
يوم وصلوا الغرفه ودخلوه...كان خليفه موجود مع خالد وام خالد..يسلم على اخته ويشوف البنوته وبيسير..
حصه قفطت يوم شافت خليفه موجود...وكانت مابتعق غشوتها..بس دام نوره اللي هي نوره عقتها ..قررت تعقها هي بعد وهي مستحيه...وخليفه كان مستانس لانه كان ياي وهو حاس انه بيشوووفها ...سلمت عليه وسلمت على ميره وتشكرت لها بالسلامه.. البنوته ماكانت موجوده كانت في الحضانه...
نورة: مالي خص..مابطلع من هني الا يوم اشوف البنوته...
خالد: في الحظانه عاد سيريلها هناك...
نورة: اسير بروحي..؟؟ تعال وياي...
خالد: يالله نسير..خليفه بعد يبا يشوفها...
عليا: كلنا بنسير نطالعها قبل مانروح لانه مايايين بنطول وايد...
الخلاصه انهم طلعوا كلهم مع خالد وساروا الحظانه يشوفون البنوته اللي صغر حجمها كان غريب...صغيره بشكل.. شلها خالد وحطها بين ايد خليفه اللي واقف عداله...هذا ارتبك وزاغ من صغر البنت..قام باسها بسرعه وحطها بين ايد حصه بشكل غير مقصوود... الكل قعد يتبسم ويظحك بان خليفه يعني شي بهالحركه...لكن هو فعلا ماكان يقصد..بس كان همه انه يعطي البنت الصغيرونه هذي حد ثاني عن اطيح من يديه...وتلقائيا توجه لحصه يمكن لانه يطمئن لها اكثر وهي اقرب له من الكل..... وحصه استغربت توجه خليفه لها سيده لكن نست السالفه يوم طاحت الصغيرونه في ايدها ..تخبلت عليها..حصه تحب اليهال..
بعد ماشاف خليفه البيبي ورجعوا البقية الغرفه عند ميره... روح هو البيت عشان يكمل رقدته مالت الصبح يوم قطع عليه حمدان...

الجزء الثامن والستين


يوم الاحد رجعت ميره مع البنوته وخالد لبيتها..... ومرت الايام اللي بعدها سريعه جدا..ومليانه احداث...
حصه كل يوم ساحبتنها عليا وتوديها الصالون..كل يوم حق شي معين..واذا ماطاعت تروح الصالون اييبون راعيه الصالون للبيت.. حصه ماكانت تشوف انه هذا كله له لزمه...ومافي داعي لهالاشياء اللي يشوفونها ظرووريه..صح هي متحمسه لعرسها لكن عاد قاموا يطلعون لها سوالف غريبه لازم تسويها قبل عرسها..!!!
يوم الاربعاء الصبح..بدال مايسيرون صالون عشان يتحنون...اتفقوا مع مجموعة حنايات .. حناهن رووعه.. على اساس اين البيت ويحننهم فيه..اريح لحصه وللكل... ومن الصبح انخشت حصه فحجرتها مع 2 يحننها.. حد للريول وحد للايد.. اما قوم نوره وعنود وعليا وحمده وميره..وام خالد..تكفلن فيهن باقي الحنايات.. لانهن مجموعه كبيره.. وخلصن كلهن الظهر..ماعدى حصه لانه شغلها مختلف شغل عرايس...
بعد ماتغدن الحريم ..حطت نوره غدا لحصه وشلته فوق حقها وعنود معاها...يوم دخلن شافنها مسكينه مبتلشه... مب عارفه تيلس عدل..ومش مرتاحه بانها لابسه قميص قصير بدون اكمام على طلب الحنايه عشان الحنا مايخترب... كانن الحنايات مخلصات وروحن قبل شوي...اطالعتهن حصه بيأس..
حصه: ماجنها مصختها..وصلت لي الحنا لين الجتف...!!!!!!!!...
وبرطمت...
ظحكت نوره ويت حطت صحن الغدا عالطاوله عدالها ويلست..
نورة: بس طااالع رووووووووعه والله...اشووووف...!!
قعدت نوره اجلب اييد حصه ورا وجدام واطالع الحركات...
حصه: يحرقني الله يخسها....
عنود: هههههههه ماعليه تحملي حصه...
نورة: تعالي بغديييج...
حصه: مابا غدا...ابا اعق الحنا...
نورة: ياويلج والله بزقرلج عليا تلعن خيرج...
حصه: محد قاص عليه غير عليا انا...كل يوم طايحتبي بشي...
نورة: فجي حلجج انتي وكلي وانتي ساكته....
قعدت نوره تلقم حصه وحصه مالها خاطر عالاكل..تشوف الكل مرتبش وهالشي خلاها ترتبك وتتوتر...باجر عرسها...!!!..معقول.!!...
دق عبدالله الباب ودخل راسه...قفطت حصه لانه يديها كلها برا وفوق هذا حتى ريولها المحنايه والبنطلون مرفوع والحاله لله...وهي مب متعوده تطلع جي جدام خوانها...
ظحك عبدالله ودخل...
عبدالله: هاااااااااااااه العروس...شو هذا شو هذا..!!..
حصه: اسكت عني عبدالله دخيلك...
عبدالله: ههههههههههههه والله انتي وريلج...كل حد يسكتني من صوب..ذاك من ارمسه قالي جب...
ابتسمت حصه.. ونوره بعدها تلقم.....مد عبدالله ايدها وحطهن على جتوف عنود وشدها صوووبه شوي..
عبدالله: ثرها جي خدمتج قبل مانعرس..؟!!!...
عنود: هي بس انا كنت في الصالون...ههههههه....
عبدالله: يعني جي كنتي متكشفه جدام الحريم..!!!!!!!...
عنود: ماكان شي حريم وايد..وكنا يالسين فمكان مخشوش شوي..
عبدالله: النتيجه نفسها...
عنود: عاد انته لاتقعد تسويلنا سالفه احين خلاص عرسنا...
عبدالله: اشوف حناج..!
مدت عنود ايدها تراويه حناها... مسك ايدها وحطها على ويهه يشم ريحة الحنا اللي يموت فيها...ونوره وحصه فاجات حلوجهن يطالعن خوهن وفيهن ظحكه...وعنود تظحك متعوده عليه لانه عقب ماعرسوا وايد كان يسوي هالحركه عشان الحنا.. ...يحب ريحه الحنا في الايد....
عقب ماشبع من الشم باسها وتم ماسكنها في ايده...
عبدالله: احححححح محلات ريحت ايدج..
عنود تبغي تغايظه...
عنود: عااديه ريحتها لو تشم ريحه ايد نوره بعد نفس الشي تحصلها...
عبدالله: لا ريحة ايدج انتي غير....
تصنعت عنود الاستهبال...
عنود: ليش يعني غير كلنا متحنين من نفس الحنا...!!!.
زم عبدالله على شفايفه وهو يطالع عنود بقهر...وعنود كاتمه الظحكه...
التفت عبدالله لخواته...
عبدالله: قسم بالله بنت عمكن هذي مافيها ذره رومانسيه...( ودز عنود بخفه عالكرسي)..قومي عني مناك محد يسويلج سالفه انتي...!!!؟؟
طاحت عنود عالكرسي وهي ميته من الظحك....بينما عبدالله يبتسم وسار صوب نوره..
عبدالله: تصدقين غرت...ماتغديت توني ياي من الدوام...لقميني...
نورة: وابوي عليك..!!!
عنود: جي ماتغديت تحسبتك عند الرياييل انا....
عبدالله: جب انتي..من متى مفتكره فيني اصلا...نورة يالله لقميني...بطعم العروس من شو تاكل..
ظحكت نوره وحطت فحلج اخوها لقمه...والاخ تقولون من سنه مب ماكل..متمتع فيه...
عبدالله: هممممممم لذيذ والله... عنودوووه...حطييلي غدا بسير اتسبح...مثل هذا ابغي...
عنود: من عيوووووووووووني ياعيوني انته...
عبدالله: توج.؟؟؟ .... ماعليه انزين...

طلع عبدالله من الغرفه وهو يتصنع الزعل...وبعد شوي عنود لحقته عشان تراضيه..وبعدها سارت تحطله غدا...
العصر عند الاذان اصرت حصه انها تعق الحنا...ماتقدر تصبر اكثر من جي..ودخلت الحمام وتسبحت..وكانت نوره بعدها في غرفه حصه تتامل فستان عرس حصه اللي يابوه امس الصبح مع فستان نوره...فيصل ريل عليا مسكين تكفل انه اييبهم...كان الفستان ملائكي...حلوو..ومدموجه معاه الوان وورود..وطالع وايد ناعم..يناسب حصه..والطرحه طوييله وراقيه...في الوقت اللي طلعت فيه حصه من الحمام..دخلت عليا وفي ايدها تيلفونها...شافت حصه متسبحه...
عليا: متسبحه..؟؟..زين سويتي.. اشوف حناج..؟
راوتها حصه الحنا اللي صار لونه برتقالي..طمنتها عليا بانها باجر بيسود...
عليا: زين يالله تلبسي...بسرعه...
حصه: وين تبيبي بعد اليوم..؟؟
عليا: بنسير نقص شعرج ونرتبه...
انصعقت حصه..
حصه: نعم.؟؟؟؟؟؟؟؟؟؟؟؟...لالالالالال الالالالا عيني خير ..شعري مايصكه مقص...يزعل..
عليا: يابنت الحلال تراج بتفجينه باجر..تفجينه وهو جي مب متساوي من تحت..؟؟..بعدين لونه شوي باهت مستوي بنسويله حمام زين ويمكن نسويلج خصل حمرا..شرايج؟ بيطلع فنان...
حصه: لالالالالالالالالا...
نورة: تبين امي تحتشر عليها انتي.؟؟
حصه: مب الا امي....خليفه بيحتشر بعد...
عليا: احين خليفه شدرااه وين شاف شعرج هو اصلا...انتي سمعي رمستي..
سكتت حصه ماتبا تبين لهن انه فعلا انتبه لشعرها كذا مره..
حصه: سمعي...هالكبييروو بس يقصون اكثر مااافيه..والله ياحش روسهن ان قصن شعري وايد...بعدين الوان فشعري ماريد... بحنيه اليوم في الليل وبحط صبغه سودا مع الحنا ...وبس...
عليا: خلاص انزين مب مشكله...تلبسي انتي وانزلي عشان مانتاخر..
طلعت عليا مستعيله ..وحصه خوزت الفووطه عن شعرها وقعدت تنشفه شوي..واخرشي سحته بعد حرب وياه..ولمته وتلبست ونزلت تحت...ونزلت نوره معاهن ..وبما ان العيوز مشغوله بمشاويرها... فالدريول ماكان مووجوود بالتالي شلهن فيصل ووداهن..وبعد نص ساعه من روحتهم..رن تيلفون نوره اللي كان فمخباها...ابتسمت..ماكانت عاطيه رقمها حد..محد يعرفها غير سعيد..بالتالي سعيد هو الوحيد اللي يتصلبها..
طلعت التيلفون وردت عليه..
نورة: هلااااااااااا...
سعيد: هلا والله بغنااااااااتي...شحالج نواري.؟
نورة: بخير وعافيه شحالك انته..
سعيد: زين زين..اقوووولج..وين انتي؟؟؟
نورة: انا هني في الصاله..ليش؟
سعيد: منو عندج.؟؟؟
نورة: محد ارووحي..
سعيد: انزين..اخبرج..طلعي برا البيت...
نورة: وابوي.!!!..ليش؟؟
سعيد: انتي طلعي ابا اقولج شي وماريد حد يسمع كلامج وياي.....
استغربت نوره ..لكن انطلت عليها الحيله...
نورة: اووكي...دقيقه..
نشت نوره وطلعت برا البيت عند الدري الامامي....
نورة: طلعت...يالله قول...
سعيد: صبري شوي..
دقيقه الا وهو داخل بسيارته من الباب الجدامي....فجت نوره حلجها مستغربه..وظحكت ...
سعيد: هههههههههههههه فديت اللي لابس ازرق انا....
نورة: هههههههه يالسبااااااااااال...قصيت عليه..يالله باي...
وسكرت فويهه وهو يظحك..وقفت سياره سعيد مجابلتنهم وسياره خالها هلال عداله...اول حد نزل من سيارة خالها هلال هي فطيم..وحاطه ايدهاعلى خواصرها...
فطيم: قص عليج يالبقره..!!!!!..
نورة: شو السالفه.؟؟
فطيم: مجاكر وياي اونه بتشوفين اذا نوره ماتريتني عند باب البيت..!!!
نورة: هههههههههههههههه..
نزلت امنه وعيالها وشيخه من سيارة سعيد.. ونزل سعيد بعد..ومن السياره الثانيه نزل خالها هلال مع ام فيصل وفطيم ومنى ومنال...
انحرجت نوره..برووحها في البيت..بتجابل هذيل كلهم...لا ماتقدر..
تجدموا كلهم وهي نزلت بعد وسلمت على حرمه خالها وخالها..وعلى فطيم والبنات..والحريم......وسعيد... اللي صار يسلم بحريه جدام الكل مستانس بانها صارت حرمته...
نورة: قربوا داخل البيت..محد غريب...قرب خاااااالي...
ام فيصل: وينها ام خالد عيل.؟؟
نورة: امي سارت فشغله وبترجع بعد شوي..تعرفينها امي عاد ماتقر...وعليا شلت حصه قبل شوي الصالون.. مابيتاخرت...قربوا داخل ..
دخلوا كلهم ونوره واقفه عند الباب تترياهم يدخلون كلهم عشان تدخل بعدهم...ويوم بغت تدخل مطها سعيد من كندورتها...
نورة: ياااااربييييييي انته دومك جي تمطط..سعيييييييييد...!!
ابتسم سعيد بغلاسه... ومسك ايدها..
سعيد: اشوفج تحنيتي..!!
ومسك ايدها الثنتين وجلب فيهن يطالع الحنا..
نورة: تحنيت اليوم الصبح.....ايه اييه..شو تسوييييي..؟؟
كان سعيد يرفع كمها يبا يشوف الحنا لين وين واصل.. بس الكم ماطاع يرتفع زياده.. وبعده الحنا ماخلص..!!
سعيد: جي لين وين ايد فستانج..؟؟؟
نورة: هههههههههههه لين هني...
واشرت نوره لين تحت جتفها بشوي...نص كم...
سعيد: قولي قسم بالله انتي..؟؟؟؟
نورة: ههههههههه والله...
سعيد: والصدر كيف لايكون كله عاري ويا هالراس..؟؟
نورة: هي كله عاري وجتوفي براااا بعد ومابلبس شيله في العرس...
سعيد: بيييب اخرتج...
نورة: ماعليه قبل ماسير العرس بيي وبراويك بتشوووف كيف فستاني...
سعيد: والله ان طلع كلامج صادق ماخليج تشبرين العرس..طوفي طوفي...
ظحكت نوره ودخلت مستانسه انها قاصه على سعيد.... حشى..ياكثر مايحاسب ويغار..دواه حد يغايظه شوي...
دخل سعيد الصاله من بعد نوره..اللي قعدت شوي عندهم وبعدها استاذنت ونقزت برااا...مسكت تيلفونها واتصلت على رقم عبدالله..وقالت له ينزل بسرعه لانه قوم خالها هني.. ويقول لعنود تنزل بعد لانها بروحها هني...
نزل عبدالله وتحنحن قبل مايدش...كلهن ماتغشن لكن تحجبن عنه..يعني امنه اكبر عنه بوايد وشيخه كبره في السن ...اما فطيم سكنت معاهم فتره وتعودت عليه... دخل عبدالله وسلم على خاله وعلى سعيد..
عبدالله: شحالكن حرمات..؟؟؟
كتمن ظحكتهن الحريم وردن له سلامه...حرمات هذي ماخذنها من عند ابووه الشايب..يوم يدش على حريم قالهن شحالكن حرمات..!!..
وبعد السلامات طلع عبدالله مع خاله هلال وسعيد للميلس عشان ياخذن الحريم راحتهن...وبعد ماطلعوا دخلت عنود عشان تساعد نوره وتقوم بالواجب...
وماطولت ام خالد برا البيت ..رجعت قبل صلاة المغرب... وشافتهم وسلمت عليهم...وبعد المغرب رجعوا قوم عليا بعد من الصالون...

من جهة ثانيه خليفه هو واخوه سلطان وحمدان مرتبشين بالترتيبات...كل حد ماسك شغله ومن تخلص هالشغله مسك شغله ثانيه يخلصها...وتعبوا من الخاطر...يوم يت حزت صلاة العشا ..صلوا العشا وردوا البيت وهم ناوين مايطلعون منه...الا باجر الصبح...
تعشوا عشا دسم... وكل حد عقبها انزرب فحجرته ...ناوين يرقدون... بس عالرغم من التعب..خليفه ماقدر يرقد عدل..كانت توها الساعه تسع.. كان يفكر بحصه الحين..شو تسوي..والاهم...بشو تفكر.؟؟؟..دايما عنده خوووف بانها تتراجع او تتردد...ماكان يتحمل فكره انه يخسرها مره ثانيه...وفنفس الوقت..مب قادر يصدق وناسته بانه كسبها زوجه له بتم معاه طول العمر ان الله راد...لازم يعرف..بيسال عنها وبيطمن...
مسك تيلفونه واتصل بعنود...
اللي كانت في هالفتره مع باقي الحريم في حجره حصه يشوفن الفستان..وكانن على وشك انهن يطلعن ويرجعن تحت عشان يتعشن.. واللي تم في الغرفه بس البنات + عنود...
كانت عنود يالسه عالكرسي..وحصه واقفه جدام التواليت..فتحت شعرها لنورة وفطيم عشان تراويهن كيف قصووووه لها...بطريقه وايد حلوه وطالع شكله حيوي ... ردت عنود على تيلفونها.
عنود: هلا والله بالمعرس...
سمعت حصه كلمه معرس وفز قلبها...وبخجل واضح رجعت تلم شعرها بايد مرتجفه...وفطوم ونوره يعلقن ويظاحكن...
خليفه: هلا عنووود.. شحااااااااالج..؟؟
عنود: بخييييير فديت ويهك شحالك انته.؟؟
خليفه: والله منهد حيلي..توني ياي انا وحمدان وسلطان..مساكين ماقصرووا..
عنود: الله يعطييييييك العااافيه ويوفقك ويكمل هالفرحه على خير...
خليفه: آآمين الله يسمع منج...وين انتي احين.؟؟
يت حصه ويلست عدال عنود ولصقت اذنها بالتيلفون عدال راس عنود..
عنود: انا... يالسه فحجره حصه مع البنات والعروووس...
خليفه: هههههههه وشو تسوي العروووس.؟؟؟
عنود: هههههههههه والله العروس ملصقه اذنها حاليا تتسمع...
ابتعدت حصه وكفخت عنود على راسها. وردت تلصق اذنها تسمع... بينما خليفه ظحك وتفداها فخاااطره..يستحي يتفداها وهو يعرف انها تتسمع...!!
خليفه: ههههههههه.. برايها خليها تتسمع...تخافني احش فيها والا شي..!!!
قالت حصه بدون قصد..
حصه: لااااااااا والله....
خليفه: لا والله هااا..؟؟...شخبارها هي...شووو حالتها..خبريني.؟؟
عنود: والله انا اشوفها مبسوطه الحمد لله...صح حصه.؟؟..هي صح ...سارت الصالون وقصت شعرها اليوم...
بطلت حصه عيونها وخليفه طلعن ينووونه..
خليفه: شووووووووووووووو..؟؟؟؟؟؟
حصه: شويه شويه والله نتفه...
عنود: ههههههه تقولك شويه بس عشان تساوييييه...
خليفه: الله يهديها بس...ولا تستاذن مني بعد.؟؟؟...عنبوو سووولي شور..!!
حصه: قوليله اني بفجه باجر...
سمعها خليفه..
خليفه: ياااويييييييييييييييييلها..... ممنوع..
عنود: يقولج ممنوووع..ياويلج..
حصه: لا ااااااا حرام انا مظبطه امووري اني بفجه باجر....ما اتفقت مع المزينه على اني بسوي تسريحه..
عنود: سمعتها.؟؟
خليفه: قوليلها ممنوع مافيييييه....!!...
عنود: حصه مصر على رايه ريلج...
حصه: شو ابا المه هالكبر وين ينلم حراااااااااااام عليك خليفه..!!!
خليفه: يووووووووووووه علينا....اوكي بس على شرط..
عنود: يقولج على شرط...
حصه: شووو؟؟
خليفه: تقرا عليه عموووه قبل ماتطلع للعرب...مافيني يحت شعرها علي عقب العرس..!!!
عنود: ههههههههههههههههههههههههههاي.. .
حصه: شو يقوووول ..قوليلي...
عنود: يقولج لازم عمووه تقرا عليه قبل مااطلعين ...مايبا شعرج يحت عقب العرس...
حصه: هههههه موافقه....
خليفه: الله يهديها...والله بياكلونها بعيووونهم...
عنود: ياعيني عاللي يحاتي ويخاف..
خليفه: ماعليه ليلة عرسها مابنقووولها شي..خلها تسوي اللي تباه...بس اخافها تندم...
عنود: لا ان شاء الله مابتندم بنقول لعموووه تقرا عليه وتستحيط عليه من العين...ان شاء الله مابييها شي..
خليفه: الله كريم...خلاص عيل انا بس حبيت اسال عن احوالكم..سلمي عليها وايد اوكي...بسير ارقد انا..
عنود: ان شاااااااااء الله ...وتصبح على خيييييير..
خليفه: وانتي من اهله..فمان الله
عنود: مع السلامه..
سكرت عنود عن خليفه وتقربت من حصه وباستها على خدها..
عنود: قالي ابوسج بالنيابه عنه...!!
شهقت حصه متفاجأه...ونورة وحصه ماتن من الظحك....
حصه: جذاااااااااااابه خليفه مايسوي هالحركات..
عنود: سالييه باجر...ههههههههه
حصه: هههههههه سباله انتي...خلونا ننزل عشا...

بعد العشا..عينت ام خالد لحصه حنا...وحطوا فيه صبغه سوودا..وحنووا راسها..ومنعوها من السهر وياهم عشان ترقد...وترتاح..ويبرق ويهها فعرسها.... بس هيهات حصه اييها الرقاد..هذي اخر ليله تباتها فبيت اهلها قبل عرسها... باجر مثل هالوقت بتكون مع خليفه...وماتدري هو شو مخطط لبعد العرس...خلت صدعة الراس هذي عليه لانها كان كافيها اللي عندها من الشغل في هالمهلة القصييره اللي خصصوها لها قبل العرس.... والله يعدي الامور باجر على خير...

قامت حصه الساعه 1 الظهر ..وكانت تبا ترقد زياده لكن عنود ذبحتها من كثر ماتوعيها...فنشت بالغصب..دخلت تسبحت وطلعت تصلي الظهر...بعد ماخلصت صلاة حست ان كل البيت تيمع فحجرتها بشكل غريب...يقولولها شو لازم تسوي الحين..
لازم على حصه تاخذ شنطتها اللي جهزتها لفتره طويله..لانه خليفه ماخبرها وين بيسيرون بعد مايروحون المانيا...!!..بالتالي ترست شنطه كبيره كلها ملابس واغراض ولوازم ظرووريه..+ شنطه صغيره مربعه حاطه فيها كل ادوات الزينه..من اكسسوار وميك اب وشباصات وكل شي ممكن تحتاجه...عروس..لازم تتكشخ...
ومافي داعي تخاف بخصوص جوازها والفيز لانه خليفه شالنه من اول عشان يفيز لهم وكل اوراقها عنده...
وبعد ماتخلص تجهيز هالشنطه العووده..تتلبس وتودع الغرفه وتتوجه على طول لغرفتها في الفندق..وين بتيها المزينه وبتعدلها.. ومن بعدها ماتعرف حصه شو بيصير..كله بايد خليفه...
يعني باختصار..ربشتهم هذي خلت حصه تخاف غصب طيب...
بعد ماتغدت وجهزت الشنطه وكل شي ظرووري وحطوا كل شي في السياره..راحت حصه مع امها صوب الفندق اللي بيكون فيه العرس...وخلتها هناك في غرفتها بعد مايتها المزينه مثل ماهو متفق..ونزلت ام خالد تعاون ام سلطان على باقي الترتيبات في القاعه...
اما بخصوص باقي الحريم... عنود وعليا ونورة وفطيم سارن صالون ثاني يتعدلن..اما حمده وميره( اللي اصرت تحظر العرس على الرغم من تعبها وعدم قدرتها على الحركه بارتياح بسبب الولاده).. متواعدات مع مزينه ثانيه تيهن للبيت...وامنه وشيخه قالن انهن بيتعدلن معاهن بما ان المزينه بتي البيت...
الساعه ست رجعن عليا وعنود ونورة وفطيم من الصالون متكشخات... نورة كانت تسريحتها غريبه..شي منه مفتوح وشي ملفوف..باختصار كانت حللوه..وحاطين فشعرها ورد طبيعي مع اغصان وغيره بما ان فستانها كان اخضر رهيب.. ماكان الفستان مثل ماقالت نورة لسعيد عاااري.. صحيح كان نص كم لكن الصدر كانت فيه حركه ماتكشف..وطبعا كانت بتلبس شيله في العرس مابتعقها...قالت رمستها بس عشان يتم يحاتي وينقهر..

المغرب يوا الشباب يبدلون ثيابهم ويتسبحون ويصلون المغرب..وبالمره يشلون الحريم ويودوونهن للفندق...
دخل سعيد وعبدالله وركبوا فوق ..كل البنات والحريم في الحجر يتلبسن ويجهزن...سعيد كان بيتسفر عادي لكن حمدان اتصل له وقاله انه بيلبس سفره وعقال وغصبن عليك تلبس وياي...ولانه يعرف عمره سعيد بيقعد مع حمدان اكثر شي...فماحب انه حمدان يطلع كاشخ اكثر عنه.. فاتصل بعبدالله وطلب منه عقال..
وبعد ماخلص وتكشخ وماخلى قطره في العطر ماتعطر بها..مسك تيلفون واتصل بحرمته...
نورة: آآلووو..
سعيد: وين انتي.؟؟
نورة: ههههههه فحجرتي...
سعيد: خلصتي؟
نورة: هي مخلصه بس بلبس نعالي...
سعيد: انزين انابطلع احين مع عبدالله ..طلعي ابا اشوفج قبل ماسير...
نورة: تخاف اني متكشفه.؟؟
سعيد: هههههههه هي..
نورة: مابطلع اخافك ماتخليني اسير العرس...!!
سعيد: والله ان ماطلعتي بدخل عليج الحجره....
نورة: هههههههههههههههه انزين انزين يابوك...دقايق بس..
سعيد: يالله باي..
سكر سعيد عند نوره واتصل بعبدالله مره ثانيه يقوله انه بيطلع عشان يطلع معاه ويسويله درب..
طلع من الحجره وطلعت بعدها نوره عشان تلاقي سعيد...وابتسمت يوم شافته متكشخ..
نورة: اوووش اوووش عليييييييييييك ...على شو ناوي بو عسكور مادريت انه عرسك...؟!!.
سعيد صح انعجب فيها لابعد حد...خصوصا انها مب مغطيه شعرها عنه لانه خلاص ريلها...وصار هالشي عااادي..بالتالي طالعه احلى واحلى من المعتاد.. بس اخفى دهشته شوي وظحك..
سعيد: ههههههههههههههههه اوهووووووو الحديقه هناك ابووي مب هني في الممر...اسميها عموه ماعندها ذوق زارعتلنا شيره هني..!!!
حطت نوره ايدها على خواصرها معصبه على تطنييزه...
نورة: ويااااااااا ويهك...انا امدح فيك وانته تطنز علي..مب منك من اللي يظهرلك...
ظحك عليها مستانس وتقرب..نورة كانت لابسه عباة وجاهزة للطلعه...مد ايده وسحب عباتها بعيد عنها عشان يشوف الفستان من داخل...نورة احترق ويهها..
نورة: والله انك طفس...
سعيد: صبري صبري انا ابا اشوف شو اللي داستنه عني...
نورة: سعووووووووووووووووووود....بيطل ع عبدالله احين وبيشوفك..
سعيد: برايه يشوف ..ابا اشوف الفستان...عقي العباة الحين...
ظحكت نوره وراوته الفستان من داخل...عشان بس يطمن انها مب متكشفه...ويوم اطمن ابتسم...
سعيد: مايصير نعرس وياهم.؟؟
نورة: هههههههههه ياويلهم شاركناهم في الملجه وحتى العرس بعد.؟؟!!!..
سعيد: هي والله نوروه مستعيل ابا اعرس...
نورة: حتى انا ابا اعرس..بس مب احين..اصبر خلنا نتنفس شوي..ماشاء الله اعراس ورا بعض..!!!
فتح عبدالله الباب وطلع وهو الثاني متكشخ...ولابس سفرة وعقال.. شاف وقفتهم المريبه وقال فخاطره هذيلا مايتوبووون...؟؟؟
عبدالله: اشووووووووف..؟!!!
قال حق نوره بحمااس يبا يشوف كشختها..طايحيبها هي حتى انه لا عليا ولا حصه موجودات...
سعيد: هههههههه انته بعد.؟!!!..لا اسمحلي حرمتي لا اطالعها...
نورة: عدال..توك تقول عني الحديقه مب هني ..!!.. المهم خلصوونا انتوا نبا نسير ابا اسير عند اختي اشوف شو حالها ..!!
عبدالله: يالله نحن بنترياكم تحت... استعيليهن.. يالله سعيد روحنا...
سعيد: يالله...
روحوا الشباب ونزلوا تحت عند سياييرهم ووقفوا عدال فيصل اللي كان يتريا من اول... وشافوا خالد وهو طالع بسيارته شال معاه حرمته وعياله وحمده وعيالها بعد...

اول ماوصلوا الفندق..دخلت نورة وعنود وفطيم على حصه..كانت بعدها مالبست الفستان..ويحطون لها اللمسات الاخيره على مكياجها الرهيب..والمتقن... وشعرها كان طايح على ظهرها كانه شيله من سواده...وشكله وايد كان طالع عجيب..
بس هي كانت مرتبكه وايد وتناهي كانها راكظه ميل...وشكلها شوي وبتصيح...
اول ماشافتهن ارتاحت شوي..
حصه: خااايفه..!!!
عنود: من شو تخافين من خوويه..؟؟؟
حصه: مادري ..من كل شي...ماريد اعرس..
نورة: هههههههههههههههههههههههههههه كرري هالجمله عشان اعطيج بكس على خشمج..شو ماريد اعرس.!!!
سكتت حصه وبرطمت وهي مجبوره تسكت وتثبت عشان الميك اب...مسكينه هالمزينه تعبت معاها وايد...من كثر ماعيونها ادمع..وتخرب الجحال.. بعد ماخلصت الميك اب..امبونها حصه بتدخل الحمام تلبس فستانها.. بس قالولها لا ادخلين الفستان داخل الحمام عن يتلعوز...بالتالي راغتهن كلهن برا الحجره..بما في ذلك المزينه ..تمن واقفات عدال الباب وهن يظحكن.. لكنها عقب فتحت الباب وطلبت عنوود عشان تساعدها لانها مارامت له بروحها...دخلت عنود وساعدتها على لبس الفستان...ودخلوا الباقي..رتبت المزينه شعر حصه وهي كل شوي تذكر الله عشان مايقولون بتحسده..بس فعلا كانت معجبه جدا بشعر حصه...بيجنن على قولتها...وثبتوا الطرحه الطويله على راسها... كانت رهيبه كلها...فاتنه ...بجمالها الملفت للنظر والميك اب الناعم والغير مبالغ فيه....راحت المزينه بعد ماخلصت شغلها وخذت اجرها...ويتهن ام خالد تسمي وتبارك وتذكر الله على جمال بنتها...حتى ان عينها دمعت... ويابت لها الذهب ولبسووها...وقعدت ام خالد تقرا على بنتها وعلى شعرها عن الحسد مثل ما موصي خليفه..وماواحوا الا ويت المصوره...واستلمتها هي الثانيه بتصوير لا له اول ولاتالي... .استغلن البنات الفرصه وتصورن معاها قبل ماتطلع لانه بعد ماتطلع مابيصير لها فرصه لانه التصوير كله بيكون مع خليفه ساعتها...وعقبها خلنها ونزلن تحت عند المعازيم... بعد مايت مييره وقعدت معاها لانهاهذي الثانيه ماقدرت تمشي وايد تحت وتعبت..وقررت تروح عند حصه وترتاح وتقعد معاها بالمره..

عرس الرياييل كان ربشه صدق....خليفه اخيرا اطمن بانه حصه خلاص صارت له ...من الحين مافيه تراجع...كان يعيش اللحظه..ومايفكر عقب شو بيسوي...مب مثل عبدالله اللي كان متروع في عرسه ومتوتر..هو كان يظحك ويسولف ويستقبل التهاني بصدر رحب وفرحان...حتى انه رزف وايد وعبر عن فرحته..لكنه ماقر بعد هو عبدالله ..يعابلون ويشرفون على كل شي...
سعيد وحمدان مسوين تييم...يرزفون رباعه ويقعدون رباعه ويحوطون بعد رباعه...حمدان كانت طالعه عليه السفره والعقال كشخه اكثر من السفره..لكن هو يعيبه بالسفره اكثر لانه يبين شيطان...على طبيعته يعني..لكن السفره والعقال خلته يستوي رزين غصب طيب...واللي يشوفه يقول هو وسعيد من سن واحد...حتى بالرزفه واليواله قاموا يجاكرون..لكن من الاول حمدان محد يغلبه بحركاته المبتكره...ياكل الجو اكل...
عبدالله كان ملاحظ الفرحه مرسوومه بوضوح على ويه خليفه...وكان مستانس له من الخاااطر...لازم انه بيفرح هالكثر دام هذا اليوم اللي يحلم به من متى...حتى ابوه وعمه واخوانه..الكل مستانس لهالارتباط...كانه كان حلمهم كلهم وتحقق..بانه خليفه ياخذ حصه....باقي نورة و هالمخروش حمدان...ومايظن انه بيعرس قريب...!!




وقت الزفه رفضت حصه انها تنزل...
حصه: مالي خص ...مالي خص انتوا واعديني اماااايه..!!
ام خالد: يابنتي اخووج مايرد على تيلفووونه تلقينه عنده تمرين الحين...بعد العرس بترمسينه..
حصه: لا....مابا...ما انزل الا وانا مكلمه ناصر اليوم...
ام خالد: لا حول ولا قوة الا بالله....
ردت ام خالد تتصل للمره الالف لناصر..اللي كانوا يعرفون كلهم انه هذا وقت علاجه وتمرينه الحين...ومابيرد عليهم..
ارتبشت الام مب عارفه شو تسوي..قامت واتصلت بعبدالله..
عبدالله: مرحباا امايه..
ام خالد: هلاا ابوويه..هااا شو علوومكم..؟؟
عبدالله: والله علوومنا زيينه..وانتوا؟؟
ام خالد: يابوويه اختك مب طايعه تنزل الا يوم ترمس ناصر اول...وناصر مايرد علينا...
عبدالله: وابووويه عليها انا....ناصر يمكن مشغوول الحين بترمسه في الليل... ماعليج منها...
سمعه خليفه اللي كان واقف عداله وعصب على عبدالله..ومط التيلفون منه...
خليفه: آآلوو.مرحبا عموووه..
ام خالد: هلاا ابووويه...شحاالك؟
خليفه: بخير يطولي بعمرج انتي شحالج؟
ام خالد: بخير ابوووويه...
خليفه: شو بلاها حصه..؟؟؟
ام خالد: حصه ياولدي تبا ترمس خووها قبل ماتنزل...وناصر مايرد علينا..
خليفه: خليهاعمووه..انا واعدنها ترمسه قبل ماتنزف...لا تغصبوونها...بتم مظيجه عقب..
ام خالد: يابوويه بس مايصير الوقت تاخر الحين...
خليفه: انتي خليها شوي نص ساعه ..انا بحاول اتصل بناصر لين مايرد عليه..وبقوله يتصلبج على تيلفونج...
ام خالد: على خير يابويه بس لاتبطون..
خليفه: ان شاء الله مابنبطي...فمان الله..
سكر خليفه عن حرمه عمه واطالع فويه عبدالله...
خليفه: ماعليج منها هااا.؟؟؟ .. شكثر تبانا نرص عالبنت يعني..؟؟؟
عبدالله: وابوي عليك انته بعد ثرك اممممره بتبزيييها...
خليفه: برااايها ابزييها حرمتي..... وبعدين انا واعدنها بهالشي...وهذي مب بدايه حلوه لحياتنا جاني من اولها بقوم اخلف بوعووودي لها....
سكت عنه عبدالله وهو يبتسم...برايه اليوم يومه خله يبزي على كيفه.... وخليفه مسك تيلفونه وقام يتصل بناصر ...المره الثالثه رد عليه ناصر وكان فعلا توه طالع من التمرين...وسلم عليه وبارك له وسولف معاه شوي وعقبها قاله يتصل بتيلفوون امه عشان ترمسه حصه قبل ماتنزف...

اتصل ناصر وهو يظحك على حصه..على تيلفون امه...ورمسها شوي وعقب عطته حصه يرمسها..
ناصر: هلااااااااااااا العروووس...!!
حصه فيها الصيحه وخانقتنها العبره....
حصه: هلا والله فديت هالصوووت ياربي...
ناصر: مبرووووك مبروووك ياحصه..الله يوفقج ياربي ..
حصه: الله يبارك فيك ياناصر..والله ليتك هني...
ناصر: حتى انا ليتني عندكم..لكن لا تنسين اني اترياكم هني باجر المسا...
حصه: ان شاااااء الله عاد مادري الترتيب كيف عند خليفه..انته شحالك؟؟
ناصر: بخير وعافيه والله وتوني ياي من التمرين...
حصه: والله متولهه عليك وايد...
ناصر: هههههه تشتاقلج العافيه حتى انا مشتاقلج انتي وكلكم..بلاج مب طايعه تنزلين؟..
حصه: واعديني اني ارمسك قبل ما انزف واحين يقولولي لا انزفي قبل عقب رمسي اخووج...
ناصر: هههههههه سوري والله اشوفكم منقعين تيلفوني..كنت في التمرين...المهم انتي لا اتاخرين على عرسج.. وهالله هالله بعمرج عاااااااااد... وقولي لخليفه اييب وياه فلم رزفه الرياييل ..صورتوا.؟؟
حصه: والله مادريبهم ياناصر...بقووله اذا فيه اييبه وياه..خلاص عيل انا بخليك ترتاح اكيد تعبان..
ناصر: مبرووووك مره ثانيه ياحصه...سلمي عليهم كلهم..
حصه: الله يبارك فيك ياخويه...يوصل ان شاء الله..انته دير بالك على نفسك...
ناصر: ان شاء الله....فمان الله..
حصه: مع السلامه...
.. سكرت حصه وهددت عيونها بانها تنزل دموووع.....
عنود: دخيلك لاتسويينها...مافيني اصلح لج الميك اب اقوم اعفسه على ويهج...
ظحكت حصه وهي تتخيل شكلها...
حصه: مابصيح ان شاء الله...
ام خالد: هااااااا..خلاص احين بتنزلين..؟؟
حصه: ......... هي...الله يستر بس لا اطيح عليكم...


بندوا الليتات في القاعه...وسلطوا الاضواء اكثرها على حصه اللي انزفت بروحها ولطيفه بنت ناصر وشما بنت خالد وسلامه الصغيره بنت عليا...يمشن جدامها وينثرن الوروود... كانت زفه حلللللللوه...وكانت حصه ميته من الخوف والارتباك...لكن ويهها هادي وناعم...وحلو..مابين عليها الارتباك وايد...وصلت للكوشه ووقفت هناك بينما نورة وعنود يعدلن لها فستانها وطرحتها عشان ماتخترب وقت ماتقعد ...

كان العرس ربشه...بنات العايله الصغار يرقصن بشكل وايد حلو ومظحك...والرقاصات اللي ملبسات عربي رابشات العالم... وحصه بعد ما استرخت تمت تتفرج وتظحك.. خصوصا ان سهيل ولد ناصر اللي عمره 8 سنوات الحين..وولد سلطان اللي فنفس سنه..ماسكين كل واحد عصا ومسوين عمارهم يرزفون..يرزفون شوي ويتوزووون البنات والرقاصات بالعصي اكثر...يعني الربشه والخبصه من الخاطر...

فجاه اختفت ظحكه حصه..وقت ماشافت ام المرحوم سيف حاظره العرس...كانت يايه تسلم عليها لانها ماتقدر تتاخر وايد على عيالها في البيت...قامت حصه من مكانها ووقفت احتراما لها...
يت ام سيف وحظنتها وباستها...
ام سيف: مبرووك يابنتي..مبروووك...
غمضت حصه عيونها تخاف انها تصيح..مب قادره تمسك نفسها...ومشاعرها المتضاربه...
حصه: الله يبارك فيج ياعموووه.... اسمحييلي..
اطالعتها ام سيف وعيونها كلها دموع...
ام سيف: انتي اللي سمحيلي يابنتي...
حصه: الي صار نصيب ياعموووه ..... مب ذنب حد...مشكووره وااايد على حظوورج...وايد فرحتيني..
ام سيف: ماكنت بطوف عرسج يابنتي...لانه عرس واحد من عيالي بعد..والا نسيتي ان خليفه بغلاة ولدي.؟؟..الله يسعدج يابنتي ويوفقج..وسمحيلي تراني ماروم اتم عالعشا...لكن عمتج ام سلطان ماقصرت ترست السياره هههههه...
ابتسم حصه بنعومه لقلب هالحرمه الكبير...
حصه: مسمووحه ياعموووه...
ام سيف: مبرووك مره ثانيه يابنتي.. فمان الله...
حصه: الله يبارك فيج...الله يحفظج ويبقيج ...مع السلامه...
باستها ام سيف مره ثانيه وراحت...تمت حصه دقيقه او دقيقتين تفكر فيها..وتفكر بسيف...وحزن فظيع اعتصر قلبها....لين مايتها نورة ونبهتها انها صارلها فتره واقفه..وقعدتها مره ثانيه وحاولت تنسيها اللي صار...

وكملوا الاحتفال والعرس على احلى مايكون...

الساعه 11 وبعد العشا.. طفح الكيل عند المعرس...يبا يدخل... وبناءا على رغبته ..عن ينطر عليهم...دخلووه ودخلوا معاه بو خالد وبو سلطان ودخل الخال هلال معاهم....وخالد وعبدالله......حمدان ذبحهم..بدخل وبدخل..طبعا سوالف...بس صدق كان خاطره يشوف حصه وهي عرووس...لكن طبعا لا يجووووز .حرام...بالتالي تم براا عند سعيد..وباقي اخوانه...
كانت حصه وصلت حدها من التوتر...ردت الطرحه على ويهها... ودخل خليفه قافط من الحريم..وكل شوي يشغل نفسه ويعدل سفرته وعقاله..
عبدالله: كاشخ كاشخ...لا اتعبث بها...يالله يالارتباك..!!!
خليفه: هي..تطنز ونك... ناسي عمرك انته يوم داخل ..هاااا... ( ونفض خليفه ايده اونه يرتجف يعيب على عبدالله يوم عرسه)..تتناااافض تقولون ماسكتنك كهربا...
كل هالسوالف وهم يمشوون صوب الكوشه...
عبدالله: ههههههههه عنلاتك زاااد...ذليتوونا ترا...
سكت خليفه وقت ماطاحت عينه على حصه عدالها امها وام خليفه...وتندم بانه مالبس عدسااااته الطبية.. مايشوفها عدل...!!..لكن يوم بيوصلها بيشوفها زين...
ويوم وصل...خذه جو حصه لعالم ثاني...ياربي شو هالجمااااال شو هالنعووومه..!!!...لا ماصدق...كل هذا لي..؟؟ وقف عدالها وهو ويهه محمر...وبعد شوي رفع طرحتها عن ويهها وردها لورا...وشافها بشكل اوضح... كان منحرج..مرتبك..لكن فرحته تسوى الدنيا باللي فيها....خلاص زوجتي...جدام اهلها واخوانها...والعالم كله...زوجتي...حلالي...
تقرب منها وباسها بين حواجبها..ورد على ورا وهو يشوف حصه مغمضه عيونها ومنحرجه حدها....ابتسم وهو يشوف اخوانها وابوها واهلها ايون يسلمون عليها..وعليه..ويتصورون....بعد ربع ساعه انصرفوا...وخلوه بروحه معاها...وبعد مايلسوا...صد خليفه صوبها وقرب راسه منها عشان يهمس فاذنها..لانها مابتسمعه من هالدق والحشره...
خليفه: مبروووك ياحصه...
ابتسمت حصه ..
ويت هي بعد عشان تصاصره جان يبتعد عنها...
خليفه: لالا لا تصاصريني..
ظحكت حصه..
حصه: ليش.؟؟
قالها بغلاسه وهو يظحك ...
خليفه: اخاف استوي خبزه فلبن عقب...!!.. ههههههههه...
قصده انه مايتحمل قربها منه..بدون مايذوب...ماتت حصه من الظحك والاحراج... بس سكتت يوم شافه رد صد صوبها وكله اهتمام...وهو يطالع شي وراها..اخر شي اكتشفت انه يبا يشوف شعرها... فاجدمت شوي بكرسيها عشان يشوفه...
خليفه: ماشاء الله عليج..سويتيها....!!...خليتي عموه تقرا عليه..؟؟
حصه: هي قرت عليه..لا تخاف...
خليفه: اللهم لاحسد...الجمال ثره الا من بعدج يابنت عمي..!!
ابتسمت حصه ونزلت راسها....
حصه: عيونك الحلوه تسلم...
خليفه: يابختي فيج والله..هههههه...
يتهم عنود تبا تغلس بس من شافها مسكها..
خليفه: سيري هاتيلي عصير شي ماي...ابا ابل ريجي....
عنود: شووووووووووه ياخوويه...احين تبا ماي.؟؟
وظحكت... بس خليفه متخبل اليوم....ولا عليه من حد... وصاير منفتح عالعالم...
خليفه: هي نشف ريجي من شفت حصه...طيري..
ظحكت عنود وراحت تيبله عصير...ويابت لحصه واحد....والمصوره مشتغله تصورهم بكاميرا فيديو كل شوي تقولهم سووا حركه معينه...

بعد قص الكيك وباقي الحركات المعتاده في الاعراس.. نش خليفه وحرمته وزفووهم لغرفتهم... وهو طول الوقت ماسك ايد حصه يسندها ويساعدها عالمشي..لانه واضح انها تعبت..والفستان ثقيل عليها.. وايد كان حنون عليها والكل لاحظ عليه..ومبين من الاول انه بيحطها فعيوووونه ومابيقصر معاها....وحصه تستاهل...
وعلى اخر العرس تيمعوا اخوان حصه واخواتها...وابوها وامها وخالها.. وعنود وميره كلهم في غرفه المعاريس.. بينما خليفه قال لحصه بتهديد..
خليفه: سلمي عليهم الحينه لانج شهر مابتشوفينهم من اليووم...
فاجاهم خليفه بهالكلام...
حصه: لييييييش.؟؟ مابنسيرلهم باجر.؟؟؟
خليفه: لا..نحن مابنباات هني....الحين بنطلع من العين بنسير دبي...
حصه: ماااريد ..شو نبا بدبي خليفه.؟
خليفه: اووص.. بنسير برج العرب وبخبرج في الطريج بالسالفه...
استغربت حصه لكنها ما ناقشت الموضوع اكثر..بروحها تعبانه ومافيها على الحشره..بالتالي ساعدتها عنود بانها تلبس لبس ثاني وطلعت يشمك من الشنطه...فخم وحلوو..ودخلت الحمام ومعاها عنوود.. بينما الباقين في الغرفه...فصخت فستانها والطرحه ولبست اليشمك وطلعت.. رجعوا الفستان لمكانه عشان ياخذونه معاهم عقب ويرجعونه.. بينما نوره قعدت تلم شعر حصه بمعرفتها عشان ماتقدر تخليه مفتوح لين دبي...!!..والبقيه يسولفوون مع خليفه ويظحكون...
رجعوا اغراض حصه في الشنطه ماعدا الفستان ..وشلها عبدالله بعد ما خذ سويش الكوبي من خليفه عشان يودي شنطه حصه... وسلمت حصه على اهلها كلهم وهي مثل الاطرش في الزفه .ماتدري خليفه على شو ناوي... وقالت انها بتتصلبهم من تيلفون خليفه...لانه ماعندها تيلفوون...

مر الوقت وطلع خليفه مع عرووسه للكوبي وتوكلوا لدبي...
بينما البقية قعدوا يشطبون وبعدها كل حد ركب مع هله وروحوا البيت هم بعد...

في الدرب ..الخجل كان مسيطر عالجو...حصه تحس نفسها طايره لعالم ماتعرفه شو هوو...وخليفه مب عارف الجرأة اللي كانت موجوده طول اليوم وين طارت الحين...احين هو بامس الحاجه لها..عشان يكسر هالتوتر..
التفت لها..
خليفه: تعبانه..؟؟؟
حصه: هممم.... والله مادري هههههههه...احس اني متخدره...
خليفه: هههههههههه...زايغه انزين.؟
ابتسمت حصه باحراج..
حصه: ليش انته بتذبحني شووو..؟!!..
خليفه: هي..توج تدرين.؟؟..
حصه: هههههههههههههه...ماهون عليك..
ابتسم خليفه ومد ايده ومسك ايدها..وهو عنده نيّه بانها مايفجها...
خليفه: صدقتي...ماتهونين والله....
وبعد عشر دقايق صمت...
خليفه: انا يوعان ولا تعشيت....يوعانه..؟؟؟
حصه: تبا الصدق هي...يوعانه...ماتغديت عدل..
خليفه: تبين اكل ثقيل يوم نوصل الفندق والا ناخذ لنا من المطعم وناكل في الدرب.؟؟؟
حصه: الثاااني بدون تردد...لاني من اوصل ابا ارقد...
شهقت حصه وعظت على شفايفها..منقهره من لسانها اللي دومه يزل عند خليفه...انحرجت موووت من تلمييحها...وصدت صوب الدريشه ادس ويهها بسرعه..
خليفه انتبه وانصدم من تلميحها هو الثاني..بانه حصه ماتبا تسوي شي غير الرقاد...وشكلها تقصد...بروحها..بغا يموت من الظحك...لانه ماعنده مشكله في هالموضوع...
خليفه: ههههههههههه...اووووكيه...
وحاول يسكت...بس رد يظحك اكثر واكثر....وحصه تظحك منحرجه ...بس يوم شافته مصخها بالظحك...
حصه:.. بس عاااااااااااااااااد...والله ماكنت اقصد اللي فهمته...
خليفه: هي هي صح...مب عليه انا..
حصه: ههههههه والله اني ماقصدت خلاص عاده...
خليفه: ههههههههههههه انزين عادي والله.. ههههههههههههههههههههههه..
حصه: يييييييييه يا هالظحك اللي مايخلص.... خبرني..شحقه ماخليتنا نبات في الفندق هناك ونسلم على اهلنا بالباجر..؟؟
خليفه: لانه الغرفه المحجوزه في برج العرب هدية ولازم ناخذها...هدية ليلة العرس...
حصه: والله..؟؟؟ هدية من منووووه..؟؟
خليفه: خمني..؟؟
حصه: اكيد عبدالله...
خليفه: ههههههه لا... خوج ناصر..عن طريق سلطان...
ابتسمت حصه بفرح..
حصه: فدييييييييييت روووحه...
وقف خليفه عند الاستراحه ..
خليفه: شوو تبين.؟؟؟
حصه: همممممممم ابا سندويش جبن..وعصير برتقال فرش..بس..
خليفه: وايد عليج..عبرتي فلووووسي..هالكثر تاكلين.؟؟ ...
حصه: ههههههه لا تطنز...
خليفه: شوو ما اطنز هذا عشا..؟؟؟؟ مايشبع..
حصه: الوقت متاخر ومب زين نرقد ثقاااال....
خليفه: هممممممممممم.... تغشي..
تغشت حصه يوم وصل الهندي وطلب خليفه اثنين سندويش جبن..واحد عصير برتقال فريش..واحد عصير موز...
خذوهن وكملوا سوالف واكل وظحك.. لين ماوصلوا برج العرب..

شو بيصير بين خليفه وحصه...؟؟...اخليه لخيالكم..

الجزء التاسع والستين


في بيت حمد وبعد ماخلصت نوره سبوح..كانت تحس بتعب فظيع...وفراغ... طلعت من الحمام ودخلت فطوم بعدها عشان تتسبح.. حاولت نوره ترقد ..بس ماقدرت..تحس بشي غلط في البيت...من الحين تولهت على اختها..طلعت من غرفتها وهي لابسه شيله بيظا..ودخلت حجرة حصه المظلمه...خلت الباب ملايم وفتحت الليت..الحجره ملعوزه...لكن باجر الخدامه بتنظفها..والشنط واغراض حصه مصطفه تنتظر حد يشلها ويوديها بيت حصه اليديد...بيت العم محمد...!!..معقوله حصه خلاص بتطلع من بيتنا.؟؟..بتم برووحي.؟؟...صح عنود موجوده بس عنود انسانه متزوجه ...يوووه حتى انا تراني متزوجه ومابطول...انسدحت على شبرية اختها تتمنى لو كانت موجووده معاهم الحين..وابتسمت...ياترى شو تسوي حصه الحين مع خليفه.؟؟ يووه وانا شخصني صدق ملقوفه..!!!...

دخلت حصه مع خليفه برج العرب اللي كان كله هيبه.. اول مره تطلع مكان بدون اهلها..بالتالي لصقت في خليفه وتمسكت بايده...وهو ماهدها بالعكس استانس بحركتها..هذا يعني انها تحس بالحمايه معاه...وهذا شعور يسعد اي رجل غيور...
دخلوا الجناح اللي كان جناااااااااااااان...بس ماهمهم الشكل..الا ليله بيقضوونها هني وبيروحون بعدها.. بس الفخامه واضحه بكل مكان...
حصه: وااااااااااااو...روعه والله...
خليفه: هي...تعلمي الديكور..تراني خليت قسمنا اجلح واملح عشانج..
حصه: هههههههههههه لووووتي والله انك لووتي..عنود تقولي معدلنه مب مخلي شي ماحطيته..
خليفه: هههههههههه..بس ادريبج بتغيرينه ذاك كله..
حصه: لا مابغيره دامك متعبل...
ابتسمت له..ومشت جدامه وهي ادور بغرفة الجلوس.. كان راسها يعورها..لكنها مرتبكه وتبا تتاخر قد ماتقدر عشان ماتسير غرفة النوم اللي مبين انها في الطابق الفوقي ... وخليفه ملاحظ هالشي.. لكن هو اخر شي يباه انها تتوتر او تخاف منه...تحرك وقال..
خليفه: اشووف الحواطه وايد عايبتنج...انا بسبقج عيل وبسير اتسبح...
خطف من جدامها ومسك خشمها اونه يلاعب ومناك هو مايعرف يلاعب بنات.. ظحكت حصه وهي تراقب خليفه يركب الدري..مسكين..يبذل جهده عشان يريحها...!!
وبما انه راح فوق يتسبح..ارتاحت شوي وقامت فعلا ادقق بالديكورات..لانه هي هوايتها هالشي.. وعندها موهبة بالتزييين وتحب تاخذ افكار..مرت خمس دقايق وهي تستكشف المكان..وبعدها تحمست تركب فوق وتشوف اكثر..
ركبت فوق ودخلت غرفة النوم..اللي ماتقل روعة عن غرفة الجلوس والحمام (الله يعزكم)... حصلت شنطه خليفه مبطله عالكرسي.. وشكله فاصخ كندورته هني..والسفره مفروره...يييييييييه ...اثره انسان مب مرتب..!!!!... معلومه يديده...فصخت حصه عباتها وشيلتها وعلقتهم... ورتبت شعرها المنعفل شوي.. وسارت مسكت سفره خليفه وعدلتها وحطتها داخل العقال..وعلقته.. ونفس الشي بالكندوره..وسكرت شنطته بس خلتها مكانها عالكرسي..بيحتاجهاعقب.. خذت شنطتها الصغيره اللي فيها اغراضها الشخصيه وراحت للمنظرة..فتحت شعرها اللي قام يعورها من الربط..وفتحت التسريحه البسيطه اللي مسوينها فوق راسها.. وقامت تسحي شعرها الطويل وتفججه..كان لازم تغسله بسبب الاسبراي...
وقت مادخل خليفه الغرفه بوزار وفانيله وماسك الفوطه ينشف بها شعره..كان شعر حصه نصه على جتفها اليسار تسحيه.. اول ماشافته فزت...مب متعوده تطلع جدام خليفه بلا شيله ولا عباه ولا شي..صح في العرس كانت جذي بس كانت عراسها طرحه تغطي شوي...بس الحين ..!!...حست الوضع مختلف...
ابتسم خليفه يوم حس بارتباكها... رفع ايده كانه يبا يهديها...
خليفه: easy easy…..!! .... مابكلج.. ههههههه...
نزلت حصه عيونها منحرجه..وكملت سحاي شعرها...
خليفه: ممكن.؟؟
حصه: شوو.؟؟؟
خليفه: اسحيييه..!!...دخيلج من زمان فخاطري ..
حصه: ههههههههههه اخافك تقطعه..!!
خليفه: لالا شوي شوي بسحيه...
يا وفر الفوطه عالكرسي.. مسك المشط عنها ووقف وراها.. يسحيه بكل نعوومه لين ماحست حصه انها بترقد صدق..وهو كان مستمتع بملمس شعرها الناعم والسايح اللي يتخلل صبوعه بكل سحر.. مستمتع بطووله وحلاته... يفكر يرفعه ويخش ويهه فيه...قفط من خيالاته... مايتخيل ردة فعل حصه على هالشي..بس ليش لا... منو له الحق اكثر مني ؟؟..حركه بسيطه احرمها على نفسي !!.لين متى هالتردد..
..لكن بعد ما مرن خمس دقايق تقريبا...حست حصه بتوتر خليفه...وبانفاسه اللي بدت تتسارع... وضربات المشط الخفيفه صارت ثقيله...انتقلت العدوى لها...توترت وماعرفت شو تسوي...بطرف عينها شافت خليفه يفر المشط عالكرسي..وحست انها يمسك شعرها ويجمعه في قبضه ايده...كانه قاعد يلعب به.!!..
طول الوقت كانت حصه منزله عيونها... من الاحراج...والتوتر...تشجعت تبا تشوفه شو قاعد يسوي...رفعت عينها للمنظره...وابتسمت بحنان...شافت خليفه رافع شعرها ومغطي به ويهه...ياربي شو هالانسان..!!..صدق غريب..رقيق لابعد حد..وحساس اكثر...لكنه مايبين عليه الا عن الناس القراب عليه...التفتت حصه وواجهته وهي ما انتبه لها ..ومازال ماسك شعرها بذيج الطريقه..
حصه: خليفه..!!
قالتها بصوت واطي جدا... تنهد خليفه ونزل شعرها عن ويهه..وهو مبتسم...
حصه: بسه شعري من السحاي.؟؟؟؟!!!
ظحك خليفه ورد شعرها ورا ظهرها... وبصبعه السبابه حركه على فجها..ولحيتها..وشفايفها.. وحصه تحس نفسها بتموت...من شوو بتموت الله اعلم....المهم انها بتموت.....قالها خليفه بشكل خطير..وبصوت واطي
خليفه: تعرفين يابنت عمي...انج استويتي...نقطة ضعفي..!!!..


لالالالالالالا صدق بمووت ..بموت... ناقص يقولي احبج بعد..!!!..لا ماقدر ماقدر..ماعرف اتصرف..
تمت حصه اطالعه بعيون بريئه وحلللوه... مب قادره تبعد عيونها عين عيون خليفه ونظرته اللي تحرق أي حد فعروقه دم احمر..!!.. دقيقه ..دقيقتين..ماردت عليه...خليفه عقد حياته وقال بطريقه حاول انها يكون مازحه..
خليفه: اذا تميتي اطالعيني جي...وماسرتي تتسبحين ...تراج بتمين لين باجر بلا سبوح...!!

بربشت حصه بعيونها عشان تفهم..وتكسر الجو المسحور هذا...ابتسم خليفه..وابتسمت هي بعد باحراج وطارت صوب الحمام..اللي له غرفه منفصله...ابتسم خليفه ...زين سوت...لين ما اهدي نفسي شوي...حشى شو بلاني..؟!!!!...امره ذبت..هممممممم... هذي حصه حطت لي شي فعصيري اكيد...!! رفع نظره للمنظرة...بنظرة تانيب لنفسه...
خليفه: لا تتسرع...لا تستعجل الامور ياخلووف..اهدا..
سمع صوت انفتاح الباب والتفت حصل حصه طالعه وهي قافطه موت ويايه صوب الحجره...تساءل خليفه..غيرت رايها والا شو.؟؟... وبدون مايسال..جاوبت بصوت منحرج..
حصه: نسيت..نسيت ثيابي... ماشليت ثيابي...
قال خليفه بتسرع ومن دون قصد ابدا...
خليفه: لازم..؟؟؟ ..
بطلت حصه عيونها وحلجها منصدمه. شو يقول هذا.!!!!!!!!!!!... وخليفه غمض عيونه منصدم هو الثاني وغطا ويهه بايديه الثنتين وغرق في نوبه ظحك فظيييعه...كله بسبب هالتوتر...التوتر هو السبب...
ظحكت حصه بعد وتساهلت معاه..اكيد مب قاصد...مسكين بروحه متوتر...وتمت تظحك يوم وصلت عداله كفخته عجتفه وهي تظحك عقابا له علىهالقفطات اللي يعقها عليها.. وسارت صوب شنطتها وفتحتها وقامت اطلع ملابسها واغراضها الشخصية الظروريه.. وهي تحاول تجاهل ظحكات خليفه المتواصله والحلوه..وانهياره عالكرسي وهو يظحك على عمره.. ويوم خلصت تحنحن وقالها..
خليفه: عندج لزقة براقع..؟؟؟
التفتت حصه متعجبه...
حصه: شوو..؟؟ لا ماعندي..حق شو.؟؟
خليفه: عشان تلزقين حلجي ومارمس ..اشوفني قمت اخور... ههههههههههههههه....
ابتسمت حصه..
حصه: من متى ناش.؟؟
خليفه: من الفجر...
حصه: هذا هو السبب عيل... من زود التعب ..لازم ترقد...
خليفه: ههههههههه مافهم التلميحات اللي تحاولين تعطيني اياها..سييري تسبحي..يالله..
ماتت حصه من الظحك... صدق ان خليفه مب صاحي اليوم...قلنا يوم عرسك مايصير تسوي هذا كله عاد...!!
خذت ملابسها وسارت الحمام..
وكل ماتذكر خليفه ورمسته تظحك عليه...


سعيد وعبدالله ردوا متاخرين..امبونهم سهرانين مع حمدان في الميلس..روح حمدان بيتهم ودخلوا هم البيت..ويوم وصلوا فوق عند تقاطع الممرات..
عبدالله: تصبح على خير..
وروح قسمه... وسعيد كمل طريقه لحجرته...وقبل مايدخل التفت على حجرة حصه المفتوحه والمولع ليتها..استغرب..وبدون قصد شاف نوره راقده بشيلتها عالشبريه...
سعيد: فديييييييييييييييييييييييييييي ت عمري انا....
مشى صوب الحجره اللي ملايم بابها وفتحه..واطمن انه نوره بروحها في الحجره...كسرت خاطره...اكيد متولهه على اختها من احين...عشان جي رقدت فحجرتها....انتبه عالحر..رقدت وهي مب مشغله المكيف...سار سعيد وشغل المكيف...ورد لنوره..وقف على راسها يتاملهاشوي...يتامل شكلها الطفولي ورقدتها اللي تظحك... حتى لحاف ماتلحفت...الظاهر انها ماكانت تقصد انها ترقد...مد ايده وسحب الفراش شوي شوي ولحفها.. فكر يعق الشيله عنها..بتظايقها في الرقاد.!!..عقب غير رايه لانه خافها انها تنش..فخلاها مثل ماهي...وماقاوم رغبته ..وخّا عليها وباسها على يبهتها...
سعيد: فديت روحج ياعمري...
ابتعد عنها لكن عينه تمت عليها...وسكر الليت..والباب...وطلع وراح غرفته وهو يفكر الا فيها..وبموعد عرسه..ناوي يخبل بهالبنت مثل ماهي مخبلتبه..!


الساعه 9 وربع نشت حصه من النوم... اول شي شافته هو...عمرها...بسم الله..شو هالمنظرة البايخه اللي معلقينها فوق روسنا عالسقف..!!!!..تمغطت والتفتت على يمينها.. خليفه واعي..ايده فوق راسه ويلعب بشعره ..وسرحان...ابا افهم هذا متى يرقد ومتى ينش..؟؟؟؟؟..
رسمت على شفايفها ابتسامه عذبه..
حصه: صباح الخير..
ردة فعله خلتها تستغرب...غمض عينه وابتسم بفرح.. والتفت لها وهو بعده يبتسم..
خليفه: صباح النور..وصباحية مباركه يالعروس..!
حصه: الله يبارك فيك..ولك انته بعد....ههههه ليش تظحك خليفه..؟!
خليفه: اظحك لاني من نشيت وانا مب متجرأ التفت صوبج..مب عارف صدق اللي صار امس كله والا احلم..!!!.. اخاف التفت ماحصلج..
ظحكت حصه وخشت ويهها في المخده...
خليفه: ههههههههههه بلاج حصيص..!!
حصه: ماقدر انا جي...
اعتدلت حصه ورقدت عظهرها...ظحك خليفه وتقرب منها وانسدح عدالها..كلهم عظهورهم.. يطالعون المنظرة اللي فوق روسهم ببلاهه...
حصه: بتخبرك...شو هالمنظرة البايخه اللي حاطينها لنا...
خليفه: عشان نطالع عمارنا ونحن ناشين من الرقاد...
حصه: انزين نحن حلوين..بالله واحد شييين مسكين ابتلى ورقد هني..واطالع عمره وهو ناش...فلم رعب.. بيتم طول اليوم متنكد مسكين..
خليفه: ههههههههههههههههههههه...يرقد عبطنه عيل احسن له..
ظحكت حصه وسكتت...ويوم طال الصمت التفت لها خليفه ..يطالعها بفضول..
خليفه: حصه..!!
حصه: همممممممم..؟!..
خليفه: تذكرين يوم...يوم زعلت انا...وانتي..ذاك اليوم...
سكت ولا كمل كلامه يوم شافها ابتسمت وهي مغمضه عينها....
خليفه: شو.؟!!..
حصه: تبا تعرف الشي اللي ماقلته لك..؟!
خليفه: بالضبط...انتي قلتي عقب مانعرس...بتقولين..
حصه: ذكرني عن شو كنا نتكلم..!!
خليفه: كنت اقولج اذا متاكده عشان ارتباطج بي... قلتي شي مثل انج من زماان متاكده..شي جي..
حصه: قلت لك من فتحت عيوني وانا متاكده.....كلامي مفهوم...
خليفه: اشرحي اكثر..
حصه: خلووف..!!..(والتفتت له.).. ليش تستهبل.؟؟
خليفه: ههههههههه كيفي...يالله قولي..قولي عاد ابا اتاكد من اللي فهمته..
حصه: كان قصدي..اني من فهمت شو هو الزواج والارتباط..كنت موافقه على ارتباطي فيك...يعني من سنين وسنين...
خليفه: بس انا ماكنت خاطبنج...ولا محيرنج..
حصه: ادري...بس كنت اشوف انه نصيبي في الحياة انك تخطبني..وانا بوافق عليك...كنت اشوف هالشي صاير لامحالة يعني.... برمجت رغباتي وذوقي كلها على انسان بشخصيتك واطباعك..من غير قصد..
ابتسم خليفه بفرح..
خليفه: يعني كنتي تحبيني..؟؟؟
حصه: ههههههههههههههه لا....صراحه..خليفه لا تزعل...بس انا ماكنت اعرف مشاعري اذا هي حب..او اني بس..تعودت على فكره انك بتكون انته ولا حد غيرك ريلي... عشان جي حصلت صعوبه في اني.....آآ...في اني اتاقلم على أي شي ثاني..
لعنت حصه لسانها اللي يزل ويخونها دايما...اما خليفه ففهم عليها..اصلا هو فاهم عليها من اول...لانه عنود خبرته بانه خطوبه حصه وملجتها كل شي يا بصعوووبه اقتناع من طرف حصه...هذا هو السبب يعني.؟؟ ماكانت متقبله فكره انه ريال ثاني يكون زوجها غير خليفه..!!!.. وهذا شو يعني...؟.. ماكانت متوقعه غيري...انا الوحيد...الوحيييد...
ماقدر يتحمل..وبابتسامه ماكره تقرب يعطيها بوسه الصبح...

بعد ساعه كانوا جاهزين للطلعه ..رتبوا اغراضهم مره ثانيه في الشنط وراحوا مطار دبي...طيارتهم الساعه 12.. ولازم يسيرون من وقت..بيتلاقون مع خالد بعد هناك...بييبه سلطان..لانه عبدالله عليه دوام...
دخلوا المطار وحصه متشبصه بايد خليفه اللي قاعد يدز جدامه عربانه الاغراض.. وقالها تقعد عالكراسي لين مايسير يخلص اوراقهم.. بس هي لا..مستحيل..اروح معاك... لين ماوصل خالد مع سلطان... سار سلطان مع خليفه يخلصون الاوراق بينما خالد قعد مع حصه... خليفه عطا سويجه لسلطان عشان يعطيه حمدان ويوصيه يخطف على سيارته عقب ويوديها البيت...بلا شموخ..ويحافظ عليها عدل...تراها يديده..

ركبوا الطياره وكان خليفه بالوسط.. عدال الدريشه كانت حصه.. وخالد من الصوب الثاني بجهة الممر..حصه كانت اول مره تركب طياره..وزايغه موووت منها..ومن المصايب اللي تسمعها...وخليفه وخالد يظحكون عليها...


في العين نشت نورة قبل صلاة الظهر بشوي.. استغربت مكانها..عقب تذكرت بانها رقدت هني في غرفة حصه عن غير قصد... لكن منو لحفني.؟؟ ومنو شغل المكيف وبند الليت..؟؟ اكيد فطوم..حليلها.. نشت نورة وتغسلت فحمام حصه وعقب راحت حجرتها ..وشافت فطيم راقده ذيج الرقده..تقولون يراده... ظحكت عليها ..
نورة: ايه فطووم...فطوووووووووووم..... قوومي ويا هالراس..بيأذن بعد شوي...
دخلت نورة الحمام تبدل ملابسها وتغسل ظروسها وتتوظى من الحين للصلاة..
بعد ماخلصت دخلت فطوم وهي ادعم اليدراان..دهمااانه... مسكت نورة تيلفونها كانت توها بدق لسعيد عشان ينش لكن سمعت من خلال الممر منال تزاعج عليه من برااا الباب عشان ينش...جنه الاامها مطرشتنها توعيه... لانه الظاهر عبدالله في الدوام ومب موجوود...
ردت نورة للباب الحمام وصارخت هي الثانيه على فطوم..
نورة: فطووووووووووم..انا بنزل.. يوم بتخلصين انتي وبتنزلين لا تنسين تنزلين خوج وياج..سويله درب لانه عبدالله محد...انزيييييييين.؟؟
فطوم: اووكي..

نزلت نورة تحت عند باقي الحريم.. فطوم باجر عليها دوام صيفي..وخذت مساقين...ولازم حد يخطفها عالسكن قبل مايرجعون الشارجه اليوم... قاطع يلستها التيلفون..ظحكت...توك ناش عنبو وادقدق تيلفونات..؟؟
نورة: هلاااااااا...
سعيد: هلا والله....شحالج نواااري.؟؟
نورة: بخير والله ..( نشت من الصاله وطلعت عشان تتكلم براحه)... شخبارك انته الغالي.؟؟
سعيد: ليش انتي ماوعيتيني.؟؟ يرضيج يزاعجون عليه ويوعوووني بدفاشه.؟؟؟
نورة: هههههههههههه والله اني كنت ماسكه التيلفون وبوعيك بس سمعت منال تزاعج قلت خلاص عيل تكفلت فيك...
سعيد: حرام عليج الصراحه....المهم..فاظيه انتي.؟؟
نورة: هي انا الفظاوه كلها عشانك بس...آمر..ادلل..
سعيد: فديت عمرج والله...اباج تكويلي كندورتي...
نورة: البشكاره ماتنفع...
سعيد: عنلاااااااااتج يالخامه جان بتخلين البشكاره تكوي كندورتي .!!!
نورة: هههههههههههه والله امزح...سيده انته تسب ماعندك وحده ثنتين...
سعيد: انصدم منج تراني.. المهم تعالي فوق شليها...
نورة: احين بييك...
سعيد: تمام..باي

ركبت نورة فوق ودقت باب سعيد..طلع لها الحمار بوزار وفانيله..!!..يبتسم بغياض...
نورة: مارمت تلبس بجامه نوم..!!!
سعيد:...........تعــــــــــــ ودي...!
نورة: هههههههه وين الكندوره.!!..
سعيد: اول قوليلي...ارتحتي برقدتج امس.؟؟؟
نظرة وطريقه كلامه خلاها تنصدم...سعيد هو اللي شغل المكيف ولحفها وبند الليت.!!!...يالفظيحه...ياوييلي كيف كنت راقده كيف.؟؟؟؟؟؟؟؟؟؟
نورة:....احــممم..!!
سعيد: هههههههههههههههههههههههههههه.. .
نورة: شوشفت وشو سويت.؟؟؟ اعترف..
سعيد: سويت سوااالف وايده...وعلووم..وانتي راقده ماتدرين عن شي...
قربت نورة بتصيح من القهر..
نورة: شووووووو سوييييت سعيييد..؟؟
سعيد: ماااااااااااابقولج..المهم( وفر الكندوره فحظنها).. اندوج كويها يالله...جلدي..
نورة: خسك الله يالسبال....
سعيد: باااااااااااجوووتج جوووته لا تسبين...
نورة: روح تسبح رووح...روووووووووح....
ماجاوبها..لكنه رقع بالباب فويهها عمدا..بس عشان يقفطها...وفعلا نورة قفطت وماتت قهر.. شو تسويبه هذا..تذبحه والا شو..؟...احرق كندورته..؟؟؟ هي ..بحرقها..خله يموت قهر وفشله...
بينما سعيد بيموت من الظحك..يدري بها تثووور بسرعه...الله يعين عالحال يوم بيعرسون..دام هو بترول وهي جبريت...اذا تلاقوا شو يصير..؟؟؟...
رد فتح الباب وشافها على وشك انها تروح وشكلها تبا تذبح حد...ركظ وراها ومسكها....
سعيد: نورووه فديتج فدييتج اسوووولف والله اسووولف...
نورة: فجني ويا هالويه....قووووووم... بتشوف جان ماحرقت كندوورتك...
مسك كندورته ومطها..
سعيد: لالالا دخييلج مب ياييب غييرها .. ويا راسج اسوولف..
نورة: تسكر الباب فويهي جي..؟؟..
سعيد: تراني اسمع كلامج انتي قلتي روح تسبح...ههههههههههههههه...
تمت نورة متاففه ومتظايقه .. ماتحب حد يقفطها..وسعيد يراقب وفيه ظحكه.... طلعت في هاللحظه فطوم متلبسه وخالصه...وقفت منصدمه من المنظر...
فطوم: شووووووووو تسوي انته بوزار وفانيله في الممر استح على ويهك حريم في هالطابع بيطلعن بيشوفنك جي..؟؟!!!..
سعيد: جب انتي...
نورة: كلهن نزلن تحت فطوم...
فطوم: شو بلاها نوره...؟
سعيد: فطوم كملي طريقج...
فطوم: اسفه جدا...
سعيد: بعطييج جوووته اطيرج لين امريكا.... ذلفي...
فطوم: اووكي بسير..تين وياي نوره.؟؟
نورة: هي بيي....قوم انته...
سحبت ايدها وشردت عنه ونزلت مع فطيم.وهو يطالعها ويظحك....
سعيد: بزيه..برايها مابراضيها...تنقع فدرام...
رجع حجرته وسكر الباب ودخل يتسبح...
اما نورة فسارت غرفة الغسيل اللي هي عدال المطبخ.بس من ورا... وكوت لسعيد كندورته ومعاها فطيم تسولف معاها وتخبرها نوره شو صار مع سعيد..وكيف السبال سكر الباب فويهها..
فطوم: ههههههههههههههههههههههههه مب هين خوويه...
نورة: تخيلي كيف احترق ويهي...شعور فظيع والله يوم تحسين نفسج منبوذه...رقع بالباب هب رقعه...
فطوم: ههههههههههههه والله انكم..... سمعي...اسمع سياره..
نورة: يمكن عبدالله...سيري شوفي منوو....
طلعت فطيم من غرفة الغسيل وووقفت مكانها..حمدان كان ياي صوب المطبخ وبعده ماشاف فطيم.. لابس نظاراته الشمسيه كالعاده ومتسفر بسفره حمرا...وقف عند المطبخ ورمس البشكاره..
حمدان:... آآقوولج..سيري فوووق..حجره مال ماما حصه...هاتي هذا شنطه مناااك مال حصه..مادري كم شنطه المهم هاتيهن وحطيهن في السياره...
الخدامه: بابا انا سوي غاداااااا الحين مايقدر سير فوق...
خنفس حمدان..
حمدان: بعطيج بكس على خشمج بس اخافه ينفعص زياده... سيري الغدا مابيحترق...
تراجعت فطيم لغرفه الغسيل وهي تظحك مستانسه...
فطوم: نوروه نوروه...هذا حمدان...
نورة: حللللللللللللفي...شافج..؟؟
فطوم: لا ماشافني يرمس البشكاره ... شكله يبا يشل شنط حصه...
نورة: اندوك من احين يطالبون فيها اختي ...مسكي مسكي الكوايه...
عطت الكوايه لفطيم وطلعت برااا... شافت حمدان شويه وبيعطي طراق للبشكاره اللي مب طايعه تتزحزح من المطبخ...
نورة: ولد عمي... (التفت لها حمدان معقد حياته).... شعندك ؟
حمدان: بووي قوليلها بشكارتكم تسير فوق تيب الشنط...
نورة: انزين انته بتصلي فمسيدنا..؟؟
رفع حمدان حواجبه مايعرف هالسؤال شو يخصه بالموضوع..!!
حمدان: هي..
نورة: وبتتغدى عندنا..؟
حمدان: اذا ماعندج مانع طويلة العمر...
نورة: انزين..خل البشكاره تخلص غداها ويوم بتفظى بتروح تيب الشنط وبتحطهن فسيارتك مب لازم تسويلنا فظيحه...
حمدان: همممممم....وانتي شو تسوين هناك..؟؟
نورة: اكوي كندورة سعيد...
حمدان: ول عليج..من احين قام يتشرط هههههههههههههاي...
تقربت منه وقالت بصوت واطي..
نورة: اقولك حمدان....انا كنت اكوي وعرب يسولفون وياي...
وغمزت له...بطل حمدان حلجه ورفع حواجبه من فوق النظاره..
حمدان: حلللللللللللفي...؟؟..ابا...
نورة: هههههه شو تبا.؟؟
حمدان: ابا اسير اشووفها...سعيد وين.؟؟
نورة: سعيد فوق يتسبح...بس لا تفكر بالموضوع..
حمدان: سعيد مابينزل الا يوم توديله كندورته صح.؟
نورة: صح...
حمدان: خوزي عني...
تخطاها وسار صوب حجرة الغسيل...ودخل على فطيم ونورة وراه...
نورة: خسك الله ماتسوي قدر لحد...
فطوم اطالع حمدان مصدوومه..وحمدان محد يعرف تعابيره لانه مازال بالنظارات...بس ابتسامته شاقه الويه..بشكل وايد حلو ويخلي أي حد يشوفه يظحك معاه...
كان متوله عليها من الخاطر... من خلصت امتحانات في الجامعه ماطرشت له ولا مسج بسبب تواجدها في البيت...وداعهم اخر يوم من الامتحانات كان طويييل..لانهم خلاص تعودوا على بعض..يوميا لازم مسجات ماعدى نهايات الاسبوع...مايقدر يصبر اكثر...
انتبه لنفسه بانه لازم يخلي عمره كانه ماشاف او سمع من فطوم من يوم ماطلعت من البيت...لانه نورة موجوده..
حمدان: فطيييييييم...شحالج..؟؟
فطوم:....... هــ ... هـــلا حمدان....بخير...شحالك انته.؟؟
حمدان: بخييييييييييير وسهاله..شو الدراسه...شو الامتحانات..؟؟ شو النتاايج..؟؟؟؟
كان مصر على السؤال الاخير لانه يعرف جوابات الاسئله الاولى ...لكن النتايج مايعرف عنها شي...ويهمه يعرف نتايجها...
فطوم: هههه كل شي تمام الحمد لله...النتايج بعدني ماعرفتهن...يوم بداوم باجر بشيك في النت عالنتايج...
حمدان: رمتي تسجلين.؟؟ مبرووووووووك..ياحيج ولله...
نورة: شوو دراك انها حصلت صعوبه في التسجيل.؟؟؟؟
ارتبك حمدان...
حمدان: مااااااشي بس احيده صعب الواحد يسجل صيفي...
حمدان كان مستانس بانه فطيم بترد الجامعه بالتالي..بترد تراسله...يوم تعايزت عن تسجيل الصيفي حشرها عشان تسجل بس عشان ماتنقطع عنه وبعد عشان تخلص دراسه بسرعه...
فطوم: احم...لا الحمد لله سجلت وافتكيت..
حمدان: زين زين... اوووب..اسمعه ياذن الاذان الاول.... وانا ماتوظيت بعدني...يالله يالله باي...
طلع حمدان ساير صوب الميلس عشان يتوضى هناك...
فطوم: خسااااااااره..مافصخ نظاراته..!!
وبرطمت..
نورة: ليش يعني يفصخ نظاراته...
فطوم: آآآآآخ اموووت على نظراته يوم يطالعني ههههههههههاي...
نورة: ههههه ويا راسج...يالله سويت فيكم خير خليتكم تتلاقون شوي...خوزي خليني اكوي هذي بسرعه سعيد بيلعن خيري يالس فوق بلا كندوره...بتفوته الصلاة..
تمت فطوم ذايبه ونورة تكوي بالسريع... يوم خلصت علقتها بمعلاق وشلتها معاها لداخل البيت.. ودخلت معاها فطوم... شافت المدخن محطوط على طاوله شلته معاها وسارت فوق... اما فطوم فدخلت الصاله...
دقت نورة الباب على سعيد...فتح لها الباب يطالعها بنظرات بارده...يوم شافها ..قال..
سعيد: لحظة شوي...
استغربت نورة...دخل سعيد داخل الحجره ورجع بعد شوي شل الكندوره من ايدها وعطاها ربيتين حطهن في ايدها...
سعيد: شوكريا....
ورقع بالباب للمره الثانيه فويهها...
تنفست نورة بقوو ..ماعليه ياسعيد ماعليه... سارت غرفتها وحطت في المدخن عوود..وردت مره ثانيه لغرفه سعيد...(عبدالله سابقا).. دقت الباب..ورد فتح هالمره كان لابس الكندوره...وقاعد يتعقم ويعدل الطربوشه..يوم شافها اطالعه بنظرات بارده والمدخن في ايدها ظحك... وشل المدخن عنها...
سعيد: لو مب متوظي ببوسج...
نورة: ولو انا مب محترمه بعطيك عويهك....
نزلت نورة تحت وطنشت ظحكاته العاليه...

في الطياره الساعه الساعه سبع بتوقيت الامارات..وصلوا حصه وخليفه وخالد لميونيخ.. خلال الرحله خالد وخليفه بدلوا ملابسهم ...اما حصه وحليلها تمت بالشيلة والعباة...
خليفه: حصه..عقي غشوتج مب لازم تتغشين...
حصه: ماتعودت...
خليفه: يابنت الناس عقيها تحجبي بس...مالها داعي..
حصه: اول مره اشوف ريل يشجع حرمته عالخراب...
خالد: ههههههههههههههههه... بوي هذي متربيه علىايد ابويه وامي لا تحاول فيها...
خليفه: والله ابا راحتها انا...هي الا حتى انها اول مره يوم بتتعود بتعق الغشوه ...
قرب راسه خالد من راس خليفه..وصاصره...بينما حصه متشبصه بايد خليفه من الطرف الثاني..
خالد: ماخبرتها عن العباة..؟؟
خليفه: لا لا تطري السالفه انته الحين اخافها تقول ردوني الامارات...
حصه: شوو اتصاصرووون شو تقولون.؟؟؟
خليفه: لالا سلامتج بس اقوله وين المرشد اللي مستاجر لنا سياره تودينا بون 2...
حصه: حشى شو هالناس ليش جي كلهم ضخام وطوال ..!!...بسم الله شيف...
طلعوا من المطار وحصلوا براا المرشد وراحوا معاه..طلعوا من ميونيخ متجهين لبون 2..اللي تاخذ وقت ساعتين ونص لين توصلها بالسياره...
خليفه: احين نحن حد استاجر لنا شقه والا شو سالفتنا وين بنقعد.؟؟
خالد: هي انا مظبط لكم كل شي..قلت لمحمد اللي يالس مع ناصر الحين...ياجر لكم شقه في الحي العربي.. بترتاحون هناك فيه عرب...واكل حلال..وغيره..
خليفه: زييييين والله ماتقصر....ريحتني تراني تعبان حدي...
حس بنغزه فخاصرته من صبع حصه... اللي كانت قافطه من وجود المرشد في السياره ومب عارفه ترمس وتاخذ راحتها خصوصا ان المرشد لبناني...
خليفه: هلا حصيص...شوو..؟؟
حصه: شو هذي بعد تعبان.؟؟..بنشوف ناصر اول مالي خص...
خليفه: هههههههههه ان شاااااااااااء الله اصلا امبوني انا بشوفه وبسلم عليه وبنتعشى وياه عقب بنسير نرتاح..
حصه: هي توك...
وصلوا بون 2 وهم كله سوالف ويا خالد.. حصه اغلب الوقت قافطه وساكته من هالمرشد اللي وايد ماخذ راحته بحكم معرفته مع خالد الطويله من قبل..وخليفه ماقصر معاهم بالسوالف وطنش حصه...
وصلوا المستشفى ونزلوا وخلوا المرشد يترياهم تحت...لانهم بيرجعون يطلعون بعد شوي..دخلوا المستشفى وحصه كلها حمااااس...اخيرا بتشوف ناصر.. وصلوا غرفته وكان ناصر يالس فغرفته وعلى كرسي متحرك متلبس وكان يترياهم..ويطالع التلفزيون...
حصه: نااااااااااااااااااااااااصر... .
طارت حصه صوب اخوها ولوت عليه...ماصدقت تشوفه صاحي وبخير شوي عن اخر مره شافته فيها...فرحه ناصر كانت كبيييييره بشوفة اخته واخوه وولد عمه...حظن حصه..
ناصر: هلالالا والله حصه انا من متى اتريااااكم... الحمد لله عالسلامه...
حصه: فديييييييييييييييت هالشوف ياربي يعلني ماخلى...
باسته على راسه والدموع تارسه عيونها...
ناصر: ههههههههههههه لا تصيحين حصووووه...
خليفه: عطيينا فرصه نسلم انتي هااااااااي...!!...
تمت حصه لاويه على ناصر من راسه وهو يظحك عليها..
حصه: ماريد ماريد ماصدقت اشووووفه....فديييييييييييتك ياربي والله اني متولهه عليك...
ناصر: هههههههههههه حصه عيب..خليني اسلم على ريلج...واخوج..
ظحكت حصه وهي تمش دموعها وابتعدت شوي يا خليفه وسلم على ناصر ومن بعده خالد..
ومن بعد سوالف سريعه...
خالد: هااا احين شو بتطلع معانا والا نتعشى هني...
ناصر: لالا يابوك انا من الصبح متلبس واترياكم..ومحمد رخصته يسير يرتاح... باجر بيسافر...
خالد: يالله عيل غايته...السياره تحت...
دزوا ناصر بالكرسي ونزلوا وحصه داقه سوالف مع ناصر..
ناصر: انتي شحقه متغشيه...!!!!
خليفه: قلنااالها كلتنا...اون انته تساعدني عالخراب...
ناصر: ههههههههه عقيها عقيها انتي فبلد اجنبي مب في البلاد ينقدون عليج...
حصه: مب متعوده ياربي احس ويهي يحترق...
ناصر: ان تخرطفتي وطحتي مالنا خص عيل... على فكره محمد عطاني مفتاح شقتكم خليفه...
خليفه: زيين ياحيه ماقصر والله...
خالد: احين وين تبونا نتعشى في المطعم والا نشتري ونسير الشقه.؟؟
حصه: نسير الشقه..نبا ناخذ راحتنا مافيني اتم متغشيه...
خليفه: والله برووحج انتي مصره عالغشوه... بس صدقج خلنا نسير الشقه نرتاح اكثر باليلسه...
ركبوا السياره وركبوا ناصر معاهم وحطوا كرسيه ورا..ودلاهم ناصر مكان الشقه...
الشقه كانت بسيطه ومرتبه...ومريحه.. على طول فرت حصه شيلتها وعباتها على واحد من الكراسي وعقت جواتيها ودخلت تتوظى عشان تصلي العشا... كانت مستانسه من الخاطر على شوفة ناصر..اخيرا اطمن بالها...بتقعد هني اطول فتره ممكنه...المصيبه خليفه بيطيع والا لا.؟!!!...لانها ماتعرف هي على شو مخطط..ماخبرها شي...

الجزء السبعين


في المانيا… مرن اربع ايام على وصول خليفه وحصه وخالد … كانوا خلالها يزورون ناصر وايد..يطلعوون معاه..لان ناصر كان يحب يطلع من المستشفى..لاعت جبده منها..وهو ماصدق يشوف حد من هله… كان مرتاح لنفسية حصه…يشوفها وايد مرتاحه..وخليفه وايد مرتاح هو الثاني… صار بينهم تفاهم..الظاهر ان هالزواج ناسبهم..لاان شخصياتهم تتناسب اصلا..وهو مامن على اخته عند خليفه…واضح للكل انه حاطنها بعيونه ويخاف عليها من نسمه الهوا.. لو هو يحاول يكتم مشاعره مايقدر..تطلع من عيونه غصب… وهوحس بعد ان خليفه وحصه مب من النوع اللي يحبون يطلعون مشاعرهم جدام الناس…يخلونها لنفسهم ومن بينهم…

حاليا هم على العبّاره في نهر الراين.. الجو كان يخبل…والمكان وايد حلو… حصه وعلى شان تستمتع بالمنظر تنازلت وعقت الغشوه بس تحجبت..لانها شافت ان الموجودين كلهم اجانب ..لو كان شي عرب مابتعقها.. مع ذلك كانت تحس شكلها غلط..!!..
يا خليفه ويلس عدالها…وابتسم..
خليفه: مستانسه.؟؟
حصه: هي بس احس شكلي غلط بلا غشوه…
خليفه: يابنت الحلاااااااال.. هونيها…الويه مب عوره..
حصه: ان شااء الله..
خليفه: يوم بننزل بنسير البحيره اللي يقول عنها ناصر..بخليج تعطين البط اكل..
حصه: هههههههههههههههههههه وناسه عيل…

بالنسبه لحصه..خليفه صار نقطة ضعفها هي بعد… عمرها ماتصورت انه حنون لهالدرجه…يراعيها ويهتم فيها… بدت تقتنع انها لا هي ولا هو بيندمون ابدا على هالزواج.. وهي كانت تبذل جهدها عشان تسعده.. بس اللي اكتشفته بعد مرور يومين على زواجهم..انها ماله داعي تبذل هالمجهود..لانها بمجرد انها تتصرف بطبيعتها وبحسب مشاعرها تجاه خليفه بيكون هو مستانس…لانها هي اصلا مرتاحه ومستانسه معاه..وفوق هذا تحبه..

عند بحيرة البط تندم خليفه انه ماشل كاميرا وياه…حصه كان شكلها يظحك والبط متيمع عدالها على حافة البحيرة عشان تعطيهن اكل… يوم شافتهن تقربن وايد فرت الاكل وشردت عندهم… هاللي قاصر بعد بط يلاحقنها…!!..

بعدها خالد وناصر رجعوا المستشفى عشان تمارين ناصر وعلاجه..وخليفه وحصه رجعوا الشقه…

خليفه: باقي ساعتين عن الغدا ..بدش اتسبح انا..وعقب بنطلع..
حصه: ماتباني اطبخ لك.؟؟
وقف خليفه فطريجه والتفت الها..
خليفه: تطبخين؟؟.. من وين لج مقادير؟؟
حصه: امس سرت الجمعية مع خالد يوم كنت راقد…
عقد حياته..
خليفه: سرتي الجمعيه ولا شاورتيني.؟؟؟
حصه: شاورتك قلت لي سيري…
خليفه: مااااااااذكر…
حصه: عيل كنت دهمان…!!
خليفه: هههههههههههه احين عرفتي عاده يوم تبغين شي وماتبين طلبج ينرفض شاوريني وانا راقد هاااااا.؟!
حصه: ههههههههههه صح…
خليفه: المهم شو بطبخين؟
حصه: همممممممممممم بسويلك عيش امريكي..مجبوس..شرايك.؟
خليفه: يم…من احين يعت…خلاص شوفي شغلج عيل انا بدش اتسبح…
حصه: اووكي…
دخلت حصه المطبخ بعد ماعقت عباتها وشيلتها… اما خليفه دخل يتسبح ..


فطوم بدت دوامها الصيفي.. كانت ماخذه مساقين..بالتالي كانت طول الصبح كلاسات…وبعد ماتخلص تروح السكن..او الكافتيريا..تتغدى..وبعدها تروح غرفتها وترقد لين المغرب.. بعد المغرب تقعد تدرس وبعد ماتخلص دراسه ومراجعه تشتغل المسجات بينها وبين الاخ حمدان… وعلى هالحال يوميا… وكان ينازعها منازع يوم انها دوم اطنش العشا…بس عايشه على غدا فقط…غير مستغرب انها ظعيفه جي.!!..

نورة وسعيد ودروا الايميلات…شي اكيد بما ان بينهم تيلفون الحين… ظراباتهم صارت اكثر… لكن مسرع مايتراضون…تعودوا على هالوضع..
سعيد: نوروه لا اطلعيني عن طووري..!!
نورة: مابطلعك عن طورك بس سعيد فعلا تو الناس…
سعيد: صارلنا سنه وانا خاطبنج شو تو النااااس..!!!...
نورة: توه مخلص عرس حصه سعييييييييييد…!!...خلنا نتنفس شوي…
سعيد: احين عرسنا هو اللي بيخنقج يعني..!!...مشكوووره نوره هانم..خلاص مب لازم نعرس…
نورة: الله يهديك بس….ياعمري والله مب هذا القصد… بس انا ماجهزت شي ومستحيل اخلص تجهيز بهالمده القصيره…
سعيد: تاريخ..!!
نورة:………شو تاريخه..!!
سعيد: عطيني تاريخ محدد تخلصين فيه…
نورة: هممممممممممم….اربع شهور..
سعيد: شووووووووووووووووه..!!!..
نورة: انزين انزين…ثلاث شهور..بس…مابطلب اكثر…ثلاث شهور بس..
سعيد: اختج خلصت بشهرين عيل..
نورة: بس كله طلع على عيله….ماقدر اجهز فشهرين انا….
سعيد: خلاص…عندج ثلاث شهور.. اخر هالاسبوع بييبلج البيزات تجهزين عمرج… عاد تخلصين ماتخلصين كيفج انا بعرس بعرس..
نورة: ولا يهمك بس انته لا اتم متكدر عسب هالسالفه مب كل يوم بنرمس فيها…
سعيد: ماعليه يصير خير..
نورة: سعوووووووووووود!!!
سعيد: ….هااا…
نورة: اممممممممممممممممممممممممممموا ح…ههههههههه
سعيد: هههههههههههههههههه ويا ويهج..
نورة: يازينك يوم تظحك…
سعيد: انا دوم اظحك…
نورة: هي تظحك واطلع انيابك…
سعيد: هههههههههههههه…حرام عليج انتوا دوم تعصبوبي والا انا طيب..
نورة: ادري انك طيب بس عصبي وايد..
سعيد: تحملي… نوروه بخليج احين بسير اتغدى انزين…ديري بالج على نفسج…
نورة: ان شاء الله وانته بعد..فمان الله

سكرت نورة عن سعيد وهي تظحك عليه...مسرع ما يعصب وماسرع مايرضى...!! خلت تيلفونها عالمكتب ونزلت تحت..لانه ابوها مايحب يشوف التيلفون في ايدها..ينازعها..
دخلت الصاله وسلمت..كانت امها حاطه بنت خالد الصغيره (السمية).. في ذبانها وقاعده اجحلها.. وبو خالد يالس عدالها وحاشرنها...وميره وعيالها وعنود وحمده يظحكن عليه...
بو خالد: ياموووزه بتعورين عين البنت حرام عليج ...
ام خالد: شوفوا عاد شيبتكم بيحشرني...انا كلهم عيالي اجحلهم احين بيي اعور البنت...ماعليك من صياحها انته...
بو خالد: والله ولا تعرفين شي انتي الا خرطي...هاتيها هاتيها...قوموا حطولنا الغدا...
بو خالد ماسك البنت وام خالد بعد ماسكتنها تبا تكمل جحالها..
ام خالد: ياريااال خلني اجحل البنية....
بو خالد: ماتبا ماتبا...هاتيها اقووولج لا تمارطيني..!!
ميرة: وابوويي بنتي بتنقسم نصين....عمووه بعدين بتكملين جحالها خلي عمي يشلها ..خلاص من يعزر على شي تعرفينه انتي...
فجتها ام خالد وهي تظحك...وشلها بو خالد وحطها في ذبانه...
نورة: شو بلاكم محتشرين..؟
ام خالد: ابوج مب مخلني اجحل البنية غادية عيونها غبر... امايه قبل لا تيلسين قولي للبشكاره تحط الغدا...
نورة: ان شاء الله...
طلعت نورة من الصاله وسارت للمطبخ...
ام خالد: امي عنوود وينه عبدالله؟ تااخر اليوم مابيي عالغدا.؟؟
عنود: والله ياعموه يقول بييهم بروفيسور ..دكتور..بيعطيهم محاظره بعد نهاية الدوام...يقول بيرد العصر..بس بخليله غدا يوم بيرد بيتغدى...
ام خالد: هيي..زين... اشوفه اخوج حمدان قاطعنا هالاسبوع...مايانا...!!!
عنود: والله ياعموه حتى امي تتشكى منه..تقول مايقر في البيت....مستانس بالاجازه وكل يوم ساير بقعه ويا ربعه... حتى دوامه العصر ماداوم من بدت الاجازه...جنه الا ماخذ اجازه من ابويه...
بو خالد: بيتبطر اخوج هذا...قوليله يشتغل ويغدي ريال...!!
ميره: لاااااااا وحليله عاد الا حمدان مايتبطر... مسكين وايد يكرف...
بوخالد: عيل دامني انا اروحي بتغدى اليوم...بنتغدى كلنا رباعه..


في المانيا وبعد ماخلصت حصه الغدا..خلصت خليفه يجلب بالقنوات في الصاله ..وراحت تتسبح وتبدل ثيابها عن ريحه المطبخ... بعد ماخلصت لبست جلابية عربية خضرا..اول مره تلبس عربي من وصلت المانيا..وخلت شعرها مفتوح وتجحلت جحال خفيف جدا... وطلعت لخليفه...
اول ماشافها خليفه بطل حلجه... وصفر تصفيرة اعجاب وهي يطالعها من فوق لتحت وهي واقفه جدامه تدلع بوقفتها..
خليفه: صصصصصصصصصراااااااااااااااااااا اااحه...ناقصنج برقع وذهب عربي...شو هذاا شو وووو تبين تيبيلي الجلطه تحيديني ماستحمل يوم اشوف الزين..!!
ظحكت حصه ومسكت ايد خليفه الممدوده لها ويلست عداله...
حصه: بسم الله عليك من الجلطه....بس شو رايك؟؟ تولهت عالامارات هااا..
خليفه: هي والله.... اخاف الا احسدج..
حصه: هههههههه لا مابتحسدني....
خليفه: العين حق...
حصه: براااااااااايك ياحلاة الحسد جانه من ريلي...هههههههه...
ابتسم خليفه ورفع ايدها البيضا وصبوعها الطوال الناعمه وباسها...وعقب نزلها..
خليفه: خلصتي غداج؟ تراني يوعان..
حصه: هي نعم خلص وريحته تفجج الراس...
خليفه: همممم يم..يالله غرفي عيل...
حصه: بس متردده مب عارفه اخلي حق قوم ناصر وخالد والا لا..
خليفه: مسويه كفايه.؟؟
حصه: هي... شحقه ما تتصلبهم وتسالهم...
مسك خليفه تيلفونه واتصل بخالد..ناصر كان مشغول بالتمارين والعلاج... وعاد خالد يموت على شي اسمه امريكي...وطلب منهم يخلون له...
خليفه: خليلهم يبوون...بس حصيص غير المره يوم بتسوين سوي اكثر عشان نطرش حق ييرانا ..
عقدت حصه حياتها..
حصه: أي ييران..؟؟ ماحيد عندنا ييران ..احيدها فاظيه الشقه...
خليفه: امس شفت عايله واصله...شفت ريال واحد الصراحه بس شال شنط وايد قلت اكيد حد غيره موجود بعد..
حصه: اهااااااا خلاص من عيووني... بقوم احط الغدا..

قامت حصه وحطت الغدا اللي كان يفر الراس من ريحته الطيبه...وكل خليفه جنه مب ماكل من اسبوع...توله على اكل البلاد والبهارات وغيره من السوالف اللي تشهي.. مع انه ماصارله اسبوع غايب عنها.. بس صراحه اسبوع مع حصه يساوي شهر في البلاد.. وهالاسبوع كان من احلى مايكون..يتمنى بس انه مايصير شي يكدر عليه وناسته...

المسا زاروا ناصر في المستشفى وتعشوا من وقت وردوا رقدوا..ونشوا من الفجر وراحوا مع المرشد اللبناني مال قوم خالد..لمدينه دوسلدورف...قريبه من بون..تاخذ لها ساعه تقريبا ...وراحوا معاه من الصبح وحاطوا فيها طول اليوم وتغدوا هناك وكملوا حواطه رواحهم عشان حصه تاخذ راحتها شوي مع ريلها بدون وجوود اللبناني هذا..اللي حصه من يت المانيا وهي حاطه دوبها من دووبه...مقهووره منه..هاللبناني سوالفه حلوه والشباب بسرعه يندمجون معاه ويطنشوونها.. وهالشي كان يقهرها شوي...لا مب شوي كان يقهرها وايد..لكن شو يسون محتاجينه هالمرشد عن يضلون...
المدينه كانت حلوه..وفييها مناظر روعه.. ويمر فيها نهر الراين حالها حال بون ومعظم مدن المانيا... وكانت مكس دامجه بين مناظر الريف ومناظر المدن الكبيره...باختصار..حلوه وممتعه... وخذ منهم يوم كامل انهم يشوفون معظم المناظر ويوم يت الساعه 8 في الليل خلاص شطبوا وتعبوا.. وركبوا السياره وردوا بون 2...
وصلهم اللبناني للعماره اللي شقتهم فيها... يوم وصلوا الطابق اللي شقتهم فيه وكانت حصه كالعاده متغشيه .. شافوا ريال شاب.. طالع من الشقه اللي مسكونه قريب...فصخ خليفه نظاراته وحط ايده على ظهر حصه يدزها بخفه...
خليفه: سبقيني انتي ..دخلي داخل..
عطاها المفتاح ودخلت حصه الشقه وخليفه سار صوب الريال..
خليفه: السلام عليكم...
التفت له الريال متفاجئ..وابتسم... عقد خليفه حياته يوم شاف عيونه الملونه..شك انه سوري والا لبناني والا شي.
الريال: وعليكم السلام والرحمه ياااهلا ...
مسك الريال ايد خليفه الممدوده وعلى طول تقرب منه ووايهه...ساعتها تاكد خليفه انه خليجي عالاقل..
خليفه: يامرحبا والله...شووو حالك عساك طيب..؟
الريال: بخير وعافيه وشو حالكم انتوا عساكم بخير..؟؟
خليفه: مانشكي باس والله...حياكم الله..وياك خليفه الكتبي من الامارات..العين...
الريال: يامرحبا الساع باهل العين والله... عبدالعزيز من دبي...
خليفه: والنعم والله.... الحمد لله عالسلامه انا شفتكم امس واصلين ماحبيت ازعجكم واسلم... بس استانسنا انه يوونا ييران...
عبدالعزيز: الله يخليك ويبقيك ... هي والله وصلنا امس يايين نعالج الوالد..
خليفه: عسى ماشر..؟
عبدالعزيز: والله شو اقولك ..جلطه في الدماغ... واثرت عليه شوي وعالوظائف وجي...
خليفه: مايشوف شر ان شاء الله...الله يشفيه..
عبدالعزيز: آمين ..وانتوا..؟؟ .. عسى ماشر..
خليفه: والله نحن منها حواطه وشهر عسل ومنها زياره لمريض...
عبدالعزيز:..اها توك معرس..؟!!
خليفه: هي صارلي اسبوع تقريبا...
وابتسم خليفه على ابتسامه عبدالعزيز....
عبدالعزيز: مبروووووووووك ياريال...
خليفه: الله يبارك فيك...ياحيك عيل.. خلاص عيل مابعطلك بس حبيت اسلم عليك..
عبدالعزيز: ماقصرت والله ارووحي هني ماعرف حد الا وياي الاهل بس والوالد طايح في المستشفى...
خليفه: لا افا عليك حياك فاي وقت والله... انته احين وين ساير؟
عبدالعزيز: والله ساير اييب عشا...وبرد .. شكلكم ماتعشيتوا شحقه ماترتاحون لين ما اييب العشا ونتعشى رباعه؟؟ والله بيستانسون فيكم..
خليفه: مشكووور يا ريال ماتقصر والله بس تونا يايين من دوسلدورف وتعشينا في الدرب .. بس ان شاء الله غير المره والعزيمه عندنا ان شاء الله ..
عبدالعزيز: ههههههههه يعني انا عازمنك احين تجلب العزيمه عليك.؟؟؟!!!
خليفه: ههههههههه هي ترا نحن الجدام وانتوا الا امس واصلين....خلاص انا قلت عاد ومابرد عن رمستي...
عبدالعزيز: ههههه خلاص مب مشكله...نتلاقى على خير ان شاء الله...
خليفه: ان شاء الله...يالله تامرني بشي..؟؟
عبدالعزيز: سلامتك الشيخ وتصبحون على خير...
خليفه: وانته من اهل الخير ..سلم عالوالد...فمان الله..
عبدالعزيز: يوصل ان شاء الله..مع السلامه...
روح عبدالعزيز وركب اللفت ونزل..بينما خليفه دق جرس الباب ...
فتحت له حصه الباب ودخل ...
حصة: من ويين ييراانا عيل..؟؟
يلس خليفه وهو يتنهد على واحد من كراسي الصاله.. ويلست حصه عداله...
خليفه: ماقالي شو من القبايل الصراحه..بس هو اسمه عبدالعزيز من دبي.. اول ماشفته تحسبته سووري..عيونه ملونه...بس مساكين ..ابوه يته جلطه في الدماغ.. ويايين يعالجوونه..
حصه: مساااكييين...الله يشفيه... يعني شو حسيتبهم.. من اصل والا.؟؟
خليفه: مادري..دبي فيها عرب من اصل وانتي تعرفين بس عيونه الملونه شككتني الصراحه..بس رمسته زينه مانقع يعني هههههههههه...المهم انا شفته حشيم وطيب...
حصه: انزين فيه عرب عيونهم ملونه من الله...بس يمكن بعد امه مب مواطنه...
خليفه: احين نحن شو نبابهم نرمس عنهم..؟؟
حصه: ههههههههههه انزين قولي..بروحه في الشقه؟
خليفه: من كلامه فهمت انه اهله وياه...يعني اكيد شي حريم ...وتراني عزمته بس ماحددت موعد العزيمه يوم بنشوفه مناسب بنعزمهم...
حصه: حلوووو...وانا مستعده...
خليفه: يالله انا تعبان قومي نرقد...
حصه: لا اول عطني تيلفونك..ابا اتصل باهلي...احين عندهم الوقت اظني متاخر نص الليل وماحد بيرد عليه في الصاله....اتصل بتيلفون نوره..
طلع خليفه تيلفونه
خليفه: عطيني الرقم..
عطته حصه الرقم ودق لها خليفه اياه وعطاها التيلفون...
خليفه: بسير اتسبح انا عيل ...
نش عنها ودخل الغرفه...

نورة: .........................
نورة كانت زايغه ترمس لانها ماتعرف الرقم بس شكت يوم شافته دولي... وقالت في خاطرها بسكت وبشوف منو يرمس اول...
حصه: ....؟؟...آآلوووه..؟!!
نورة: هلالالالالالالالالالالالالالال ا والله بالعرووووووووووووووس...هلا باختي..
حصه: هلاااا والله نوروووه شحااااااااااااالج؟
نورة: بخيييييييير فديتج متوله عليييج والله شحالج انتي وشحال ريلج ولد العم.؟؟ وشحال ناصر وخالد.؟؟ شخبااااااااااارج.؟؟
حصه: ههههههههه بسم الله شوي شوي عليه ويا ويهج..
نورة: يزااايه ماريد اخسر ريلج بيزاته ..
حصه: هههههههههه انا بخير وعافيه وكلنا بخيير ومستانسين...انتوا شحالكم ؟؟ كلكم بخير؟؟ امي وابويه..وقيس وليلى..؟؟ وحريم الاخوااان..؟؟
نورة: تتقاظين هااااه.؟؟ اسالتج ورا بعض اشوفها.. والله كلهم بخير وسهاااله...
حصه: اوكي احين سؤال مخصوص... شحاااااااااااله حمدااااااااااااااان..؟؟؟؟
خليفه: لااااااااااااا والله..؟!!!..حلفي انتي بس..؟
انصدمت حصه يوم شافت خليفه واقف على راسها...وحاط ايده على خواصره وشكله غيران...
خليفه: عاطنج التيلفون تسالين عن حمدان سؤال مخصوص.؟!!!!!!!!!!...
نورة: هههههههههههههههههههههههههههههه ههههههاي صااادوووووووووه...!!!
حصه تظحك وترمس ريلها مرتبكه...
حصه: هههههههههه بسم الله انته مب داخل تتسبح.؟؟
خليفه: زين اني عطشت وساير اشرب ماي عشان اسمعج...والله براويج يابنت الشيبه...
سند خليفه ركبته على مسند الكرسي ومسك ويه حصه وقربها منه وهي ميته من الظحك عليه... حاس ويهها على جنب وعظها على اذنها عظه معتبره لين ماصاحت وهي تظحك بنفس الوقت... يعني عورتها بس هي تظحك عالموقف اكثر... فجها خليفه وهي يبتسم...
خليفه: سكري...
وحصه ميته من الظحك تفرك اذنها المعظوظه...
خليفه: سكككككككككككري احين..والا اقولج رمسي وخلصي بس ان ذكرتي اسم حمدان والا غيره بتيج عظه غير عالاذن الثانيه...
حصه: ههههههههههههههههههههههههه انزين بس والله عورتني خليفه...حرام عليك..
ابتسم خليفه بتعاطف...طبيعي ماتهون عليه...مد ايده يفرك اذنها بنفسه...عشان يخف الويع...
خليفه: رمسي رمسي...
حطت حصه التيلفون عالاذن الثانيه وهي تبتسم...
حصه: انزيييييييييين نوره...انتي بترقدين..؟؟
نورة: لا بعدني شوي..يالسه اتابع فلم... بس الصراحه الفلم عندكم انتوا اثره..ههههههههه...عظووج..؟؟
حصه: هي والله...
نورة: هههههههههه دواج...خلاص انسي حمدان...ريلج يغااار..خبريني وين تسيرون وين تووون..؟؟
حصه: والله الا اليوم سرنا دوسلدورف ..مدينه هذي عدال المانيا ساعه تقريبا بالسياره وااايد حلوه..والا من وصلنا ونحن نتحوط في بون 2... مافيها وايد مناظر تعرفين هي كلها طبيه وجي...
نورة: هييي...بس مستانسه...؟؟
حصه: هي والله واااااااااايد..
نورة: شوو حااله ناصر حصوووص...شو شفتيه..قولي الصدق..
بعد ايده خليفه عن اذن حصه بعد ماشافها بخير ولا تعورها...وسار المطبخ يشرب ماي... بينما حصه تنهدت بحزن على حال ناصر وهي تتبع ريلها بنظراتها...
حصه: والله شو اقولج يانوره...على هالكرسي... وانتي تعرفين انه تلزمه عمليه ثانيه بعد كم شهر..عشان يشلون المسامير اللي فظهره...وهو يسوي تمارين ويخضع لعلاج طبيعي...تعرفين عاد انتي سوالف اعصاب..العصب اللي في العمود الفقري معطوب..مش مقطوع...لو مقطوع على طول شلل اظن..بس هو معطوب..منظرب.. يعني لين مايرجع مثل ماكان يباله وقت وصبر وطولة بال....ادعييله انتي..
نورة: الله يشفيييه...المهم سلمي عليهم كلهم ماروم اطول عليج المكالمات تصرف وايد..
طلع خليفه من المطبخ وفي ايده كوب ماي ودخل الحجره..
حصه: انزين..وانتي سلمي عالكل اووكي قوليلهم اني اتصلت مب اني ناستنهم...ههههههههه..
نورة: هههههه ماعليه بقولهم باجر ان شاء الله...تصبحين على خير.
حصه: وانتي من هله..مع السلامه..
نورة: فمان الله..

سكرت حصه التيلفون وشلته معاها ودخلت الحجره وهي تبتسم بمكر ناويه تنتقم من خليفه على هالعظه اللي تعور....!

بالباجر الساعه 12 توقيت المانيا.. خليفه وحصه دخلوا المستشفى خليفه شال في ايده كيس داخله طبقه فيها غدا لخالد وناصر..كانوا بيسلمون عليهم وبيرجعون يتغدون براا ..وكانوا يسولفون ويظحكون وهم يمشون في الممر...

سمعوا صوت ناعم قريب...
...: خليفه...!!!!!!!!!!...
لا اراديا التفت خليفه لحصه على باله هي اللي تزقره.. بس شافها هي صاده صوب ثاني... تعابير ويهها غير مقروؤة بسبب الغشوه..التفت خليفه الاتجاه الثانيه...وفجاه حس انفاسه والعالم كله انشل..صار منعدم الحركه..!!

..: ماااااااااصدق معقوووووووووول..؟؟

لاحظ خليفه بطرف عينه التفات حصه الحاد له....تسرط خليفه عشان ينجلي صوته وسحب انفاسه سحب وعينه متعلقه بالشخص المتطفل الناعم...

خليفه:...... هــــــــنـــــــــد...!!!!!!. ....




--------------------

الجزء الواحد والسبعون


شعور خليفه كان فظيع .. وحصه شعورها افظع... خليفه الصراحه ماعرف وين يودي ويهه من حصه...لو شافها بروحه يقدر يتصرف بسرعه بس موقف حصه حرج ... هالهند هذي شو وصلها لين المانيا... !!!... مارامت تخرب حياته في امريكا بتخرب عليه الحين عقب ماعرس وحصل اللي يبغيه...!!..يارب عديها على خير وكبر عقل حصه يارب...!!
تقربت هند وعلى ويهها ابتسامه كبيره...وكعادتها كانت متحجبه بشيله ملونه..ولابسه جاكيت طوويييل ساتر يوصل لين تحت الركب...وتنوره وبلوزه بيظا...حريتها في امريكا ماتغيرت ...مثل ماهي..
هند: والله ماصدق اللي اشووفه...شحالك خلييييييييييييييفه...!! شخباااااااارك؟..
حصه كانت متوتره حدها وحست بشرارات تحولت لنار حارقه داخل صدرها...منو هالبنيه... ومن وين تعرف خليفه.؟؟...خليفه عاد ...خليفه احشم واحد من هلي كلهم يعرف بنت من هالاشكال..؟؟؟... وبعدين وايد رافعه الكلفه وياه...؟؟؟..صدت لزوجها بعصبيه ظاهره ودهشه... ياترى خليفه أي حياة كان يعيشها قبل مايياخذني..؟!!!...
خليفه: مرحبا هند...بخيير الله يسلمج شحالج انتي..؟؟
ماقدرت حصه تتحمل...اذا تمت بتنشب ظرابه بينها وبين الكل.... تحركت ومشت بسرعه وعصبيه في الممر ودخلت غرفه ناصر...!
ابتسمت هند باسف..
هند: اختك..؟؟
هز خليفه راسه...
خليفه: زوجتي...!!
شهقت هند وهي تبتسم ...
هند: تزوجت..!!!!!...هي اللي خبرتني عنها..؟؟؟
ابتسم خليفه وهو يسترجع الذكريات شوي شوي...
خليفه: صح... الحمد لله توفقنا وتزوجت من اسبوع تقريبا...
هند: مبروووووووووك..فرحت لك والله...
خليفه: الله يبارك فيج...وانتي.؟؟
هند: انا من شهر متزوجه...
خليفه: مبروووك الله يوفقج...
هند: الجميع ان شاء الله....
خليفه: عسى ماشر شو تسوين بالمستشفى..؟؟
هند: آآآ والله عمي مريض سايره ازووره...
خليفه: اهاااااااا مايشوف شر ان شاء الله..
هند: الظاهر انه زوجتك زعلت من وجودي..
خليفه: هممممممم فهمت غلط..بس نحن مابينا شي ننحرج منه..بفهمها السالفه وبتنحل المشكله وخلاص.. ولا يهمج..
هند: صح... عالعموم مابطول عليك ..الحق حرمتك ههههههههه اخاف تسوي مشكله والله بسببي..بس سلم عليها ...
خليفه: هههههههه لالا ولا يهمج..سلمي على اهلج..ومع السلامه..
هند: فمان الله..
راحت هند بطريقها وسار خليفه بعد بطريقه وهو مستغرب...وتذكر كلمه هند يوم سلمت عليه..وقالت له الدنيا صغيره وانهم بيتلاقون فيوم..ماتصور ان هاللقاء بيكون جدام حصه بهالطريقه المريبه...سار لغرفه ناصر وهو يدعي بان حصه تكبر عقلها...
دخل وشافها يالسه عدال اخوها وويها منتفخ من غيظ كاتمتنه..يوم دخل اطالعته بنظره احتقار من ورا ظهر ناصر بشكل فظيع..ساعتها عرف انها لا كبرت راسها ولا هم يحزنون حالها مثل حال أي حرمه...
خليفه: السلام عليكم..
يا ووايه ناصر...
ناصر: وعليكم السلام والرحمه...شحالك خليفه..هااااااااااااه شو دوسلدورف حلوه.؟؟
خليفه: الصراحه حللللوه احلى عن بون...شخبارك انته.؟؟
ناصر: والله الحمد لله.. غريبه اول مره تخلي حصه تدخل روحها...
رفع خليفه نظره لحصه بنظره لها مغزى..
خليفه: كنت ارمس ويا زميل دراسه في الممر...
ناصر: زميل دراسه..؟
خليفه: هي كان يدرس معاي في امريكا في كذا صف....وين خالد عيل؟..
ناصر: سار يصلي في غرفته.. مشكووره ياحصه عالغدا..الصراحه من ذقت طباخج خلاص ماتحمل اكل من برا كل يوم طبخيلنا...
قالت حصه بهدوء...
حصه: من عيوني ياخوويه ماطلبت...

ماطولوا عند ناصر.. طلعوا من المستشفى بعد ساعه.. حصه كانت تمشي بسرعه وشكلها بتسبق خليفه الا هو كل مااجدمته مسكها من ايدها وجبرها تمشي معاه.... تمشوا لين مطعم مجاور ...ويلسوا...
خليفه: عقي الغشوه...
حصه: مابا...
خليفه: عقي الغشوه اقوولج لا امطها بالغصب....
عقت حصه الغشوه وتحجبت وصدت صوب ثاني عن ويه خليفه وعقدت ايدها جدام صدرها..
طلع خليفه تيلفونه وحطه جدامها عالطاوله...
خليفه: جان تبين اتصلي بعبدالله الحين..قبل ماانا اشرح أي شي... وساليه قوليله منو البنت اللي كانت تدرس مع خليفه واسمها هند وشو تعنيلي وكيف انا كنت اتصرف معاها..!!..

حصه: لا والله..؟؟ طولت وايد في الممر عااااااادي تروم تتصلبه وتطلب منه يقولي شي معين...

انصدم خليفه من رمستها...حصه ماكانت تقصد بس من زود غيضها...خليفه نظرته كانت قويه..مدموجه مع اسف على النفس...
خليفه: افاااااااا...وصلنا لهالدرجه حصه..؟؟؟
سكتت حصه متندمه على رمستها...
نش خليفه ويلس عالكرسي اللي عدالها...فصار قريب منها مب مجابلنها..
خليفه: اطالعيني...كد جذبت عليج انا..؟؟
سكتت حصه..
خليفه: كد جذبت عليج..؟؟؟
حصه:.......لا....
خليفه: عيل واللــــــــــــــــــــــــــ ـه.... وحلفت الحين..ان هند ماتعنيلي شي... مجرد بنت كنت ادرس معاها في امريكا..وهي شوي فرييي...لانها طول عمرها عايشه هناك في امريكا وحسب علمي انها تزوجت من شهر مثل ماخبرتني توها...مابيني وبينها شي والله ياحصه...
اطالعته حصه بنظره تفحص...ويوم لمست الصدق فلهجته وعيونه هدت شوي وبدت اطلع غضبها المكبوت..
حصه: عاد صراحه واااااااااايد يعني ماخذه راحتها...خلييييييييييييييييييي ييفه...مااااااااصدق.. مب معقووول...عنبو هاللسان لها..مسوده الويه هذي حركات وحده متزوجه بالله عليك..!!!
خليفه: هههههههههههههههههههههههههههههه ههههههههههه...ويا ويهج.. اقولج هذي فريي وطول عمرها فامريكا وزين انها ملتزمه بالحجاب.. بس تلقينها يوم شافتني نست ريلها وتذكرت ايام امريكا.. المهم طبيها عنج..
حصه: لا والله.؟؟ وانته شحقه توقفت وياها هالكثر شو تسوي داق وياها سوالف..؟؟
خليفه: يابنت الناس والله لا سوالف ولا غيره اتخبرها اقولها عسى ماشر ليش في المستشفى قالت ازور عمي... وقالت لي انها من شهر متزوجه... يوم سالتني عنج قتلها زوجتي ..قالت سلم لي عليها ..وماكانت تبغيج تفهمين شي غلط لانها مثل ماقتلج متزوجه يعني مافيه شي بينا نستحي منه او نخبيه...!!!
حصه: ياسلاام...سويتها بينا بعد صار بينكم بينا..؟؟...
خليفه: هههههههههههههههههه بنت الشيبه...شبلاج تعقين خيط وخيط...سكتي سكتي وكبري عقلج...طبيها عنج...
حصه: اوفففففففففففففففففففف.... والله احس نفسي بسير اصفعها....
ابتسم خليفه وتقرب منها..
خليفه: فديت الغيارين..والله مادريت انج تغارين علي...
حصه: والله...مستانس على حراق اعصابي...
ابتسم خليفه ومسك ايدها وصبعها الصغير...وقال وهو يلعب به..
خليفه: تشوفين ظفرج الصغير هذا....شو ظفرج..الا طرفه بس...!!... صدقيني هند هذي ماتسواه عندي...
ابتسم حصه بوناسه واحراج..
حصه: يالله عاد انته بياع رمسات...مثل اخوك...
خليفه: رديتي تطرين حمدان اشوفج...يبالج عظه ثانيه اقوى...
حصه: هههههههههههههه لالالا دخيلك بسني...


حمدان كان يالس مع ربعه العصر في القهوة الشعبية...
عزوز: رشووود سمعت اقتراح حمدان..!!
راشد: شووو عنده..؟؟
عزوز: يقول يبانا نعزم اخر سبعه نسير صلالة...اسبوع جي نغير فيها جو...
حمدان: شرايك رشوود..؟؟
راشد: زيين..بنشوف لين اخر سبعه اذا ماصارلنا ظرف..بنسير..
حمدان: اخاف اذكر هالشي جدام الاهل يقومون كلهم يعزمون عالسيره ..!!
عزوز: لا تذكر هالشي..بس اذا نحن صارلنا ظرف ومارمنا نسير اقترح عالاهل انته وشوفهم...
حمدان: وين خلوود...؟؟؟
راشد: خلوود الله يسلمك راكب راسه...
حمدان: شو السالفه.؟؟
عزوز: الاخ متعرف على واحد من دبي محاسب.. بيسوي مشرووع وياه..يوم سالنا عن هالريال طلع والله انه..تعرف عاد انته..وقلناله لا تدخل فمشروع مب مظمون الا هو معزم...واحين هو في دبي..
حمدان: بيدخل فمشرووع..؟؟ ماجنه توه صغير عالمشاريع...!!
راشد: اون عنده راس مال ويبغي يشغله... نصحناه بس ماشي فايده...برايه شو بنسويبه يعني...
حمدان: برمسه بعدني...المهم انتوا يعني موافقين على سيرة صلالة..!!.. عشان ارتب اموري انا...
راشد: هي هي ان شاء الله ..من زمان ماطلعنا رباعه طلعات جي...
حمدان: تمام عيل..
فجاه نط راشد...
راشد: حووووووووووووه نسيت انا...
حمدان: بسم الله شووووووو..؟؟
راشد: ههههههههههههه عرسي اول ثمانيه ...هههههههههههههههههههه..
تم راشد يظحك ميت من الظحك لانه نسى عرسه فشهر كم...
حمدان: ماااااااااااااااالت عليك احين تقولنا عاد...
عزوز: حد ينسى عرسه ويا هالويه..!!!
راشد: هههههههههههههههههههههههههههههه هههههه قسم بالله لو تدري الحرمه بتلعن خيري بتقول انته اصلا ماتبا تعرس عشان جي نسيت...هههههههههه...
حمدان: هههههههههههههههههه صدق صدق مالت عليك والله...احين شو يعني مابنسير؟؟
عزوز: نحن بنسير شعلينا منه..
راشد: افاااااااااا....
حمدان: شقااايل نسير يالثوور يعني مابنحظر عرسه..!!
عزوز: صبر... انته تاريخ كم عرسك..؟!
راشد: مااادري احيده اول ثمانيه... 5/8 ..والا 8/8..ماذكر والله..
عزوز: المهم يواحيلنا نسير اسبوع ونرد...
راشد: هممممممممممم هي هي يواحي اظن بتردون قبل العرس...
حمدان: ههههههههههههههه زين عيل بنسير عنك..وانته اقعد اكرف هني حق عرسك...
راشد: بدعي عليكم ماتسيرون ماعليه...

كملوا سوالفهم المعتاده ...


مرن يومين ..كانوا خليفه وحصه مبتلشين..في الشقه ماعندهم غير صاله وحده..فاذا عزموا ييرانهم رياييل وحريم..الريايل بييلسون في الصاله لكن الحريم وين بيودونهن..!!..بالتالي قرروا بان خليفه يعزم الريال بس..وحصه بتسويلهم عشا وبيكون خالد وناصر موجودين...وفيوم ثاني بتعزم الحريم على غدا..هذا اذا ماصار العكس وهم اللي عزموها... بالتالي رمس خليفه عبدالعزيز..وعزمه عالعشا...
وسوت حصه ذاك العشاا المعتبر لكنهم زيدوا واشتروا من برا بعد.... ويو خالد وناصر مع خليفه وعبدالعزيز.. ودقوا سوالف من 8 لين عشر.. وحصه محبوسه في الحجره... وايد استانسوا على عبدالعزيز..وايد طيب وراعي سوالف... وبعد ماطلع عبدالعزيز وسار بيته طلعت حصه تكمل السهره مع اخوانها وريلها اللي يايبين فلم يبون يشوفونه..
بالباجر .. وكان خليفه نايم..سمعت دق عالباب سارت ولبست شيلتها ويوم وايجت من الفتحه شافتها انها حرمه بس ماميزتها... فتحت الباب وعلى ويهها ابتسامه صغيره...بس هالابتسامه اختفت فجاه وهي اطالع ويه ناعم مبتسم بموده ودلع...
مسكت اعصابها...هدت نفسها...تذكرت كلام زوجها...مابينه وبين هالانسانه شي...ليش تحس بالتهديد.؟!!.. ليش تحس بالخوف من انسانه متزوجه...
هند: السلاااااام عليكم...
هند كانت مستغربه من تعابير هالحرمه...صح جميله بس صارت شاحبه فجاه يوم شافتني..شو السالفه..!!..
هند ماكانت تعرف حصه بانها هي نفسها زوجه خليفه..والادهى..انها ماكانت تعرف ان خليفه هو جارهم.. زوجها ماقال اسمه...بالتالي كانت تزور مجرد جاره وتتعرف عليها وتعزمها عالغدا...
حصه سحبت انفاسها سحب... كبري عقلج..كبري عقلج...مجرد زميله دراسه ماتشكل أي تهديد على حياتج.!!
حصه: وعليكم السلاام والرحمه...
وحاولت تبتسم...
هند: عسى ما ازعجتج اختي..؟؟
حصه: احم..لا افا عليج مافيها ازعاج..تفضلي..!
دخلت هند بتردد وارتباك...لااااه هالحرمه مب صاحيه..!! ليش اطالعني جي..!!..
هند: شوو حاالج؟؟ عساج طيبه..؟؟
ويلست على كرسي في وسط الصاله...
حصه: بخير الله يعافيج وشحالج انتي..؟؟
ماقدرت حصه انها تمنع نفسها بتفحص هند...حاولت تمنع عيونها لكن ماقدرت...غصبن عليها...
هند: الحمد لله بخير...انا هند..جارتكم...زوجه عبدالعزيز..
تخمينها طلع صح... هند هي جارتها...وعمها اللي كانت تزوره في المستشفى هو عمها ابو ريلها يعني...والا مستحيل تملك الجرأة الكافيه بانها تزور زوجه زميل دراسه لها...يعني قوية وايد... والظاهر انها ماتعرف ان هي نفسها حصه وان هذي شقه خليفه ...زميل الدراسه..!!
حصه: يامرحبا فيج اختي..حيالله من يانا..انا حصه...زوجه..خليفه...
تاكدت حصه بانها ماتدري من اتساع عيون هند المندهش... لكنها غمضت عيونها مب فاهمه ..يمكن تشابه اسامي..!!
ردت تكمل حصه.
حصه: خليفه الكتبي... زميل الدراسه فامريكا..!!..
رجعت ملامح هند تتوسع وتبين الدهشه فيها مختلطه مع ابتسامه فرح بالصدفه هذي...
هند: ياااااهلااا والله انتي حرمه خلييفه...!!..
انزعجت حصه من طريقه لفظ خليفه على لسان هاذي هند..!!..لازم يعني تذكرين اسمه..!!!..ماترومين تعيشين حياتج بطبيعيه اذا ماقلتي اسم خلييييييييييييفه جذي وتمدينها..!!!..افف..! متى بتروح.!

هند: صدق صدق الدنيا صغيره وانا قتله هالكلام فامريكا..والله ماكنت ادري انكم ييراانا..فرصه سعيده اني تعرفت عليج والله..كان خاطري اشوفج من يوم رمس عنج خليفه..
عقدت حصه حياتها...
حصه: شوو..؟؟ خليفه ذكرني جدامج..؟؟
قالت هند بحمااااااسه...
هند: هيييييي يوم قتله اني بعرس بعد التخرج..وسالته اذا هو بيعرس او شي جذي...قالي لا..ويوم سالته اذا فيه وحده بحياته قالي هي بنت عمي بس الوضع صعب اني اخطبها..مادري شو صار بس الحمد لله الله عطاه على قد نياته مسكين..
ابتسمت حصه وهي تدرك بان خليفه فعلا كان خاطره فيها من زمان وكان جاد ويفكر فيها دايما..
حصه: انا كل يوم احمد ربي اني تزوجت خليفه.. لحظه شوي الغاليه..
نشت حصه عنها ودخلت الغرفه شافت خليفه بعده راقد...ماعليه مابينش الحين... خلته ودخلت المطبخ ويابت دلال الشاهي وفواكه وفطاير توها مسوتنهن... مهما كان شعورها تجاه هند لازم تظيفها وتقوم بالواجب..
وشلته كله للصاله...
هند: شحقه عبلتي على عمرج..؟!!.انا مابطول..
حصه: افا عليج عاد لازم...هبشي...
نزلت هند عن الكرسي ويلست عالارض مع حصه...
حصه: سمحيلي عاد عزيمه امس خليناها للرياييل بس عشان ماشي مكان في الشقه للحريم..والا كان خاطري...وانا مقرره ان شاء الله باجر غداكم عندي ..
هند: مسموحه حبيبتي بس نحن سابقينج..انا يايه اعزمج عالغدا عندنا انا وعمووه..ام ريلي..
حصه: اليوووم..؟؟
هند: ههههههههه هي حار بحار..ياختي احس انكم ما بتطولون هني...
حصه: والله الشور عند خليفه ياهند مادريبه متى بيعزم.. نحن صارلنا اكثر من اسبوع بشوي هني... وتبين الصدق بون 2 مافيها مناظر زود عشان الواحد يتحوط فيها...
هند: شو بخصوص العزيمه...ماريد اسمع كلمه لا...
حصه: هههه ان شاء الله ولا يهمج... ومشكوووره على هالعزومه...
هند: افا عليج والله بستانس بحظورج..ماقلتيلي ..اذا طلعتوا من هني وين بتسيرون عقب؟؟
حصه: والله مثل ماقلتلج...خليفه يابني هني ولا قالي وين بنسير عقب وانا ماسالت لاني مستانسه بشوفه اخويه هني.. بس شكلنا جي مابنطول..

هالقرار المفاجئ لحصه قررته الحين بمجرد معرفتها ان هند هي يارتها...ما بتتحملها كل يوم ناطتلها هني...مابتتحملها هي وقرقرتها...صح شكلها طيوبه وقلبها نظيف وماخذه الدنيا بسهاله... بس مستحيل تغير شعورها الاولي تجاهها..هالبنت تهديد...ماتتحمل وجودها وهي تذكرها بانها كانت فتره خمس سنوات تقريبا زميله خليفه في الدراسه... سمووها غييره ..شك..اي شي ... المهم ماتتحمل...
خلصت هند سوالفها بعد عشر دقايق وراحت لانه عمتها بروحها في الشقه...ووعدتها حصه انها بتيهم الظهر عشا عزومتهم...شو تسوي بعد..لازم تسير... وترد العزومه..
سكرت الباب وردت تفج غيظها بخليفه...دخلت الحجره ويلست عالشبريه وهي اطالعه منقهره..مسكت المخده وقعدت تكفخه وتكفخه لين مانش معصب...
خليفه: شووووووووووو شووووفيج...؟!!!.. عنبوو حصه توعيني جي اففففففف...
ورد عق راسه عالمخده بعد مافر المخده اللي في ايدها بعيد عشان ماترد تظربه...
حصه: خلووووووووف...خلوووووووووووووو ووووف....!!
خليفه: اوففففف اللهم طولج ياروح... (نش خليفه وتساند على ايده).. ها حبيبي..شوفيج.؟؟
حصه: زمييييييييلتك مالت امريكا طلعت يارتنا...زين جييييي..؟؟؟!!!!...
عقد خليفه حياته....يحاول يستوعب...شو تقول هذي...هند.!!..يارتنا..؟؟!!...
خليفه: هند حرمه عبدالعزيز..؟!!!!!!....
زغدته حصه من حلجه...
حصه: بذبحك بذبحك لا تطري اسمها لا تلفظه....
خليفه: ههههههههههه حصووه والله ماعندج سالفه انزين...
ورد انسدح وهو يبعد ايدها عن رقبته...
حصه: خلووووف..زميييييييييييييلتك عازمتني عالغدا وانا قتلها بييها...
خليفه: برايج انزين ..(وسحب الفراش وتلحف)... سيري عزيمتها... هم يوونا امس..
حصه: بذبحك احر ماعندي ابرد ماعندك خلوووووووووووف....اووف...
سحبت الفراش وغطت ويهه بنرفزه ونشت وطلعت من الحجره..... بعد شوي رجعت وصرخت...
حصه: ولاااااااااااااا بسويلك غدا تم بيوعك....
وردت بتطلع...وسمعته يقول...
خليفه: يارتنا مابتقصر بتطرشلي من غداها....
طلعت ينونها حصه...وردت الغرفه مره ثانيه تظارب معاه...



نورة بدت تخطط لعرسها وباقي التجهيزات...سعيد يوميا يسالها شو سوت وشو ماسوت..مستعيل على هالعرس يخافه يطير من ايده... الظرايب بينهم حدث ولا حرج.. حتى قاموا مايتراضون.. تعبوا من الرضاوي.. يتظاربون ويوم يخلصون ويطلعون اللي فخواطرهم ردوا يسولفون عادي ويظحكون ولا جنه شي صاير.. كان يزورها اسبوع هي واسبوع لا... هو نفسه كان مشغول مع العمال وشركه المقاولات عالتشطيب على البيت...واتفق مع زراع يزرع له الحوش... وهو نفسه اقترح حركات مثل الجرار والاحجار حوالي الشير وغيره..اسبوعين من التشطيبات ..ومابيتم للبيت غير التاثيث ...والتاثيث مهمة نوره..بعد العرس...يوووم ايي عاد هالعرس ..!!

خليفه وحصه سلموا على قوم ناصر وخالد..وشطبوا اغراضهم في الشقه وطلعوا من المانيا لبلجيكا .. طبعا احين التنقلات بين دول اوروبا صارت مفتوحه تقريبا وبكل سهوله الواحد يتنقل .. وهم راحوا لها بالسياره...كانوا بيطولون اكثر في المانيا لكن حصه مارامت تتحمل وجود يارتها... الغيره تاكلها...وخليفه ماحب يعارضها لانه يحس انه مب ماخذ راحته معاها جدام خوانها وناس يعرفونهم...اذا فمكان غريب وهم رواحهم اكثر يتقاربون من بعض..واول ماساروا ساروا مدينه لييبج تموا يومين فيها عقب راحوا لفافر...تموا فيها يوم واحد وعقب تبعوا الطريق البرية لبروكسل..واستقروا هناك لايام.. كانوا مقررين يتمون اسبوع في بلجيكا وبعدها يتبعون الطريقه البرية بعد لفرنسا..ويتمون هناك فتره...بكل بساطه..عايشين احلى ايام حياتهم..

حمدان رجع يداوم بالشركه..وهالمره صباحي..مب مسائي..ومعاشه زاد.. مرتاح بهالاجازه... يستانس مع ربعه ..ومن صوب ثاني فطيم الغاليه ماتقطعه..المسجات يوميا..والسوالف يوميا...ولو انه نصها نزاع لانها وايد تهمل نفسها... كان يوعد نفسه باليوم اللي بيخلص فيه دراسته وبيشتغل..على طول بيكلم امه عشان تخطبله فطيم..خلاص هو مقتنع بانها هي الوحيده المناسبه له..المناسبه لمزاجه وتقلباته... فوق هذا يحبها.. ومستحيل يمل معاها.. كان متفائل...متفائل وايد لدرجه انه واثق بانها من نصيبه... كل اللي عليه انه يلتزم بالخطه.. يتخرج ويشتغل.. ويخطب...وبعدين خلاص.. بيرتاح.. لانه هو مافيه شي يعيبه عشان ينرفض او شي من هالقبيل..!!..

نورة وعشان تريح امها كانت تروح اغلب الوقت مع عنود للسوق.. تشتري قطع واشياء ظروريه ولوازم.. واشترت قطع وايد للتفصيل.. وبعد ماخلصت مشتراهن صار لازم تفكر بلعوزة الموديلات..عنود كانت تساعدها في كل شي نفس ماساعدت حصه...

بعد مرور اسبوع ونص في فرنسا..قرروا المعاريس يرجعون خلاص.. شبعوا من الحواطه وتولهوا عالبلاد...ثلاث اسابيع من الحواطه واكثر شوي بكم يوم...كفايه..باقي اسبوع من اجازة خليفه بيقظيها في بيتهم وبلادهم وبيرتاحون فيه من تعب السفر والحواطه...

اخر اسبوع من شهر سبعه.. عزموا حمدان وربعه الشله كامله ماعدا راشد يسيرون صلاله... سلم حمدان على فطيم بالمسجات وقالها احتمال مايقدر يتواصل معاها يمكن ماتوصله المسجات هناك...لكن ان وصلت اكيد بيرد عليها...واكد عليها تراسله في اليوم اللي بيرجع فيه..
بالتالي وقت ماردوا قوم خليفه من فرنسا..حمدان ماكان موجود عشان اييبهم من المطار... عشان جي يابهم حميد بالكوبي مالت خليفه...
عنود وعبدالله كانوا يدرون بان قوم خليفه بيرجعون ..بالتالي سارت عنود عند اهلها في هاليوم وسارت ميره معاها ووداهم عبدالله.. وتم هو في الميلس مع عمه محمد وسلطان ..

نوره كانت يالسه في الصاله مع امها.. متظايقه لانهم ماخلوها تسير بيت عمها عشان تستقبل اختها هي بعد... لا سعيد ولا امها ولا ابوها طاعوا اصلا...
نورة: امااايه....متى بتودوني بوظبي...!!
ام خالد: حق شو نوديج بوظبي..؟؟
نورة: بسير افصل فستاني ...ان تاخرت مالي خص مب انا اللي بطيح فلسان سعيد...بقوله انتوا ماوديتوني..!
ام خالد: يالله يهالولد مادري عاشوووو مستعيل..!!
نورة: مايطيع يتفاهم والله حاولت وياه قالي حدج ثلاث شهور..وتفصيل الفستان يباله وقت...ماريد استاجر انا...
ام خالد: منوو بيودييج عاااااد منو عندنا نحن يوديج..؟؟؟
نورة: انا وانتي والدريول بعد شووو نسوي..
ام خالد: يصير خير...
نورة: امايه خلينا نسير بيت عمي...فديتج..
ام خالد: يييييييه انتي كل شوي وطلعتيلي بمنكر..سكتي يالله...
نورة: امايه ابا اسلم على اختي...
ام خالد: اختج بتيج لين هني بتسلم عليج...
نورة: امايه اذا بتي بتينا باجر مب اليوم...
ام خالد: يوووووووووه يانتي بتسكتين عني والا انش...!!
نورة: خلاص خلاص بسكت....

سكتت نوره والام اطالع الاخبار...عقب شوي نطت لها..
نورة: امايه لا تستوين عوفه فيني ثلاث شهور وبروح عنج...
ام خالد: انا ماقلت لج سكتي...
نورة: امايه بتمين روحج بعدين بلا بنات...
ام خالد: حريم اخوانج بناتي بعد...
نورة:لا هذيلا حريم عيالج مب بناتج... نحن بناتج كلنا بنطلع من البيت بتمين روحج....
اطالعتها الام بنظره تسكتها...ونقعت نوره من الظحك..
نورة: هههههههههههههههههههههههههههههه ههههه ...ما تتاثر ولا تصيح...ياقويه انتي...اثرني طالعه عليج..
ام خالد: لا طالعه علي ولا شي..انتي عالدقه ما تستحملين حد يرمسج الا وانبقيتي تصيحين...
نورة: انزين المهم انتي حددي احين متى بنسير..؟؟
ام خالد: ويييييييييييييييين نسييييييييييييييير اذيتيني...!
نورة: بوووووووووظبي..
ام خالد: خلاص فكيني اخر الاسبوع بنسير...
نورة: وليش مانسير خلال الاسبوع محد عليه مدارس كلهم ماجزين..
ام خالد: بنشوف بنشوف....
نورة: الا بنشووووووووووف بعدنا عز الله ماسرنا....
ام خالد: نوروه اذيتيني ترا..قومي ذلفي سيري المطبخ حطي فواكه فصحن...
نورة: انزييييييين...

نشت نوره اللي من طلعت حصه من البيت وهي مستويه مثل العديله لامها..وسارت المطبخ تحط فواكه...







--------------------

الجزء الثاني والسبعين


وصول حصه وخليفه لبيت العم سوالهم ربشه هناك... العيوز كانت متلهفه لوصوولهم عشان تشوف حد جدامها دوم بما ان حصه بتسكن في نفس البيت... لانه حريم حميد وسلطان لهن بيوتهن الخاصه...
اول مادخلت حصه البيت قبل خليفه خذتها ام سلطان فحظنها ..
ام سلطان: ياحي هالشووف والله الحمد لله عالسلامه يابنتي...شحاااااااالج؟
حصه: الله يحييج ياعمووه..بخير الله يعافيج شحالج انتي؟؟
وحبتها حصه على راسها...وابتسمت لها بنعومه وفرح...
حصه: تولهت عليكم والله...
ام سلطان: تشتاقلج العافيه يابنتي كلنا بخير وعافيه...( راحت عيونها لا ارادي ورا ظهر حصه عند دخلة خليفة).. هلا ..هلا بالغاالي هلا والله...
وفتحت يديها ولوت على خليفه بكل حنان...
ام سلطان: فدييييتك ياولدي فديت رووحك شحاااااااالك..؟؟
خليفه: بخير يالغاليه شحالج انتي..عساج طيبه..؟؟..
ام سلطان: بخير فديتك...لالا العرس يايزله الريال متنان..!!
حصه: هههههههههههههههه....
خليفه: ههههههه حليلي يامايه وين متنان حرام عليج...عيل وين .....
وماكمل رمسته الا وعنود يايه طايره من الغرفه وين ماكانت تصلي العصر... وبما ان خليفه اقرب لها طارت صوبه ولوت عليه بسرعه وحبته على خده..
خليفه: ردييييييييييينا عالبوس...
عنود: المفروض تتعود عقب العرس..
قفطت حصه...وظحك خليفه...
ام سلطان: قومي عن خووج....عيب هالرمسه اخ عليج...
عنود: ههههه شحالك ويا هالراس...
خليفه: بخير والله شحالج انتي...؟
ولا ردت عليه عنود سارت صوب حصه ولوت عليها وطولت...لين ماخليفه حاس بوزه وهو يحس بغيره خفيفه من هالموقف...
عنود: تولهت عليج والله...شحااااااااالج؟
حصه: والله انا اكثر...بخير الحمد لله شحالج انتي..؟
عنود: انا حالي حلوه...الحمد لله عالسلامه...
حصه: الله يسلمج يارب...
خليفه: ماقلتيلي امايه وين ابويه..؟ وبعدين اشوف سياره عبدالله..!!..
ام سلطان: كلهم في الميلس الغالي...ابوك واخوك سلطان وعبدالله...
خليفه: زين والله...وحمدان يهووم هاااا..
ام سلطان: هي مسود الويه ساير ظفار...
خليفه: حليله خليه يقظي اجازته...عيل انا بسير اسلم عليهم...
حصه: انا ابا اسير اسلم على عمي وعبدالله بعد...
قالتها حصه بخجل بسبب تواجد سلطان هناك...
خليفه: تعاالي انزين عادي محد غريب..لازم اتعودين الحين هههههههه...
مسكها من ايدها وسحبها وراه... وقال لامه واخته...
خليفه: بردها لكم بعدين...
وسار معاها للميلس...


وبعد ماسلمت حصه على اخوها وعمها وولد عمها رجعت للبيت ويلست شوي مع عمتها وعنود...وبعد ماشلوا الشنطتين وودوهن فوق اقترحت عنود عليها انهم يركبون فوق لقسمها اليديد..اللي زينته عنود لها كهدية عرس..
وكان القسم عباره عن صالة وغرفه نوم وحمام..على قد حالهم لين مايتوسعون اكثر ويحتاجون لتوسيع...حاليا هالقسم يكفيهم لسنتين ثلاث.
حصه: واااااو... والله القسم حلووو عنووووده عيبني...تسلم ايدج حبيبتي..
عنود: الله يسلمج..عاد نصه انا ونصه ذوق خليفه...
حصه: تسلمون لي والله ثنيناتكم...
مسكت عنود ايد حصه وسحبتها للكرسي ويلست معاها...وعيونها تلمع ..
عنود: انتي خلج احين من الديكور وقوليلي.. شو حالج؟؟ صدق صدق..
حصه: هههههههه بخير قلت لج...
عنود: اوووووه انتي عارفه شو اقصد...
تنهدت حصه..
حصه: مثل ماتوقعت من اول...مستانسه ومرتاحه...بصراحه ماتوقعت خليفه جي حنون ويحب لهالدرجه...
عنود: واااااااااو يعني اخوي رومانسي طلع...!!
حصه: لابعد درجه...خلاص بناخذ الاسم عنكم...نحن بنصير قيس وليلى..
عنود: لا ياحبي..نحن قيس وليلى وانتوا اختاروا اسم ثاني..عنتر وعبله...ههههههههاي..
حصه: ههههههههه بس صدق صدق عنود واااايد استانسنا...قوم خالد وناصر يسلمون عليكم بعد وايد...
عنود: الله يسلمج وياهم من الشر... عاد احين لازم تتعودين تسكنين هنيه..ههههه...
حصه: هههههههههه صدقج والله من احين انا كل شوي اتلفت ادور اهلي اتحسب عمري يايه زياره عندكم...
تمن عنود وحصه يسولفن ويظحكن ..فكرت حصه تخبر عنود عن هند...لكنها قررت تتجاهلها واطلعها من بالها وبعدين هالشي بينها وبين ريلها..صح عنود اقرب لها من أي انسان ثاني لكن ماتقدر تخبرها باشياء خاصه عنها وعن خليفه...بالتالي طنشت هند وسولفت عن اشياء ثانيه...

حمدان فصلاله صحيح كان مشتاق لفطيم وسوالفها..بس كان يتصبر وينسى ... الجو الحلو والخضره في كل مكان شاغلتنه ومستانس فيهن.. خصوصا ان ربعه سوالف ومايخلون الواحد يسرح بافكاره ويفكر..حتى لو قبل النوم..الواحد يرقد وهو يسمع سوالفهم ويظحك...كانوا مستاجرين شقه صغيره مشتركين كلهم فيها بالسعر...فيها غرفتين وحمام وصاله ومطبخ... وهم كانوا خمس اشخاص...حمدان كان يرقد مع عزوز في الغرفه الصغيره والكبيره خلوها للثلاثه الباقين... صحيح غداهم كانوا يشترونه لانهم دايما برا..بس العشا كان يوميا على شخص منهم... عزوز كان اشطر واحد فيهم بالطبخ...حمدان يوم ايي عليه الدور يسويلهم بيض وجباتي ويشتري جبن...ويقعدون يتحظون عليه لانه ميوعنهم...بس سوالفهم كان كلها ظحك ووناسه..والكيمره طبعا ماتفارقهم.. أي شي غريب يصوروونه...اي شي يضحك يلقطونه... ببساطه كانت ايام حلوه معروفه في سيرات الشباب..!!..

اول مارد حمدان العين وصل عزوز البيت اللي كان منسدح في الكرسي الوراني.. وكانت الساعه 9 المسا يوم وصل البيت هلكان لانه طول الدرب كان هو اللي يسوق بشكل متواصل وماوقف غير ثلاث مرات عند الشيشه وبس.. وقف سيارته ونزل شنطته وزقر البشكاره توديها فوق لانه مول مافيه حيل يشل شي من زود التعب...
حصه مع عمتها كانن يالسات في الصاله...هذا طبعا بعد خمس ايام من وصول خليفه وحصه اللي استقرت في البيت تقريبا..مازالت تحس انها لازم ترجع البيت فاي لحظه..لكن لازم تتعود ان هذا بيتها خلاص..دخل حمدان الصاله ويوم شاف حصه ابتسم وتذكر انها خلاص بتستقر فبيتهم...وفتح ايده بكبرها عشان يحظن عيوووزه اللي دوم مطفربها..
حمدان: هلا والله بحبيبتي انا بنظر عيني وبروووحي كلها...
وحبها على راسها حبه طوييله...
ام سلطان: لاحبيبتك ولا شي ساير عني تحوط ومخلني ارووحي..شحالك الغالي...ويهك تعبان..
حمدان: تعبان والله من السواقه عالخط ويلزمني حمام ظرووري الحين....
التفت عحصه وابتسامه حلوه لكن تعبانه على ويهه...
حمدان: حصه...!!!!!!..ياهلا والله وغلا...هلا ببنت العم...هلا بحرمه اخوووووووووي...
حصه: هههههههه هلا والله حمدان الحمد لله عالسلامه....
حمدان: الله يسلمج يارب...شحالج ربج الا بخير..!!!
حصه: بخير وعافيه والله شحالك انته؟ ان شاء الله استانست.؟؟..
حمدان: اووففف لا اتخبرين والله استانسنا صدق..لو مب عرس ربيعنا جان طولنا اكثر من جي...انتي علومج..علوم العرس وياج؟؟ نورتي بيتنا والله...
حصه: هههههههه تسلم ياحمدان والله...كل شي الحمد لله تمام...
يلسوا ويسل حمدان مجابلنهن في كرسي منفصل وصب لعمره كوب شاهي عشان يفجج راسه شوي...
حمدان: وين المعرس عيل..؟؟ ..
ام سلطان: اخوك ساير الصناعية مادري شو يسوي..
حمدان: هاا حرمه اخويه اذا لعوزج خلووف والا شي خبريني ترا عندج نصير هني..
حصه: والنعم والله هههههههه ادريبك ولد عمي..ماتقصر...
حمدان: تعالي اخباره ناصر في المانيا..؟؟..
حصه: بخير الحمد لله...الله يعينه على بلواه..ويشفيه ...يعني المسألة كلها مسألة وقت اذا هو عنده ارادة يكمل علاج... وبعد اذا كتبله الله بيشفيه ان شاء الله..
حمدان: آمين ان شاء الله..مسكين مايستاهل..المهم انا سمحولي بقوم ارتاح لانه منهد حيلي من التعب والله...
ام سلطان: فديتك ماتعشيت بوويه خلني اقولهم بيحطولك عشا بتاكل لك لقمة...!!..
حمدان: لالا مابا امااايه ولا اشتهي شي ماكلين عالدرب سندويشات ...بسير ارقد بس لا توعووني الا يوم انش ارووحي خلوني اشبع رقاد...
ام سلطان: هههههههه نوم العوافي ياولدي...
حمدان: الله يعافيج...
هوا على راس امه وحبها ..واشر لايده لحصه..
حمدان: تصبحون على خير...
ركب حمدان الدري بسرعه بغض النظر عن تعبه..طول اليوم يتريا مسج من فطيم لكنها مارسلت له..او يمكن طرشت لكن ماوصلته...دخل حجرته وقفل الباب.. فر تيلفونه وسويجه والبوك على الشبريه ..ولحقتهن السفره بعد شوي والساعه والكندوره.. يحس نفسه متروس غبار...دخل الحمام يتسبح.. بعد ربع ساعه طلع وهو لاف الفوطه...تلبس ثيابه وقعد ينشف شعره اللي طول في الفتره الاخيره ولزمه تحليق.. ماعليه باجر بيسير يتحلق... يلس عالشبريه ومسك تيلفونه...متردد...يرسللها او لا...اذا ارسللها يخاف انه يسويلها مشاكل..!!..مب معقوله تنساه قايللها هو يوم الاثنين مسا ترسل له...ليش ما ارسلت له لين الحين...؟!..لا مابيطرش.. لازم يلتزم بالوعد...كفايه المشاكل اللي صارت لهم مايبون يزيدونها... فطيم مابتنساه...مستحيل تنساه بطرش له اكيد بوقت متاخر اكثر...وكل الي عليه انه يترياها شوي..
حط حمدان التيلفون عداله في الجراجه...يخاف الجرج يخلص ويسكر التيلفون وماتوصله مسج فطيم...وانسدح في الشبريه يغالب النوم عشان مايرقد.. لكن في النهاية رقد من زود التعب...وفطيم ماطرشت مسج...!!..

بالباجر الظهر اول مانش حمدان مسك تيلفونه.. مات من الفرحه يوم حصل مسج وارد...فتحه ...وخاب امله بسرعه...كان عزوز يقول لحمدان بانه نسى تيلفونه في سياره حمدان امس...ولازم عليه يدوره ويرده له لانه حرمه الاخ عزوز اللي مالج عليها احتمال تتصل...آخ يالقهر.. ولا رساله من فطيم..فر تيلفونه عالشبريه عداله بعصبيه ونش يتغسل... بعد شوي طلع من الحمام.... وهو طالع من طوره ..مسك التيلفون مره ثانيه...ماشي ...ماشي ولا مسج ....
حمدان: ويـــــــــــــــــنج..؟!!!!..
ورد فر التيلفون مره ثانيه ومسك الفوطه ينشف ويهه وايده..فجاه سمع دق عالباب... راح وفتح الباب حصل خليفه مبتسم لكن على ويهه تعبير ثاني غريب مافهمه..!!..
خليفه: صح النووووووووم....
ابتسم حمدان وسلم عليه ووايهه...
حمدان: هلا والله خليفه شحااااااااالك؟.
دخل خليفه الغرفه...
خليفه: بخير والله شحالك انته...شوووو صلاله.؟؟
حمدان: جنااان والله...وانته شوووو حواطتك؟؟ اهم شي النفسيه..
خليفه: هههههههه لا كل شي تمام وحلو...
يلس خليفه عالشبريه... وعقد حياته..
خليفه: وينج..؟؟!!!!....
واطالع حمدان بنظرة تساؤل..وحمدان قلبه انقبض...وتنافض...لكنه استهبل..
حمدان: شوو.؟!!
خليفه: همممم...قبل مادش سمعتك تقول وينج... منو تطري.؟؟
كان خليفه جاد وشكله بادي يعصب بسبب فهمه السالفه بشكل خاطئ...
حمدان: هههههه..آآآه... كنت ادور سفرتي...
وقف حمدان مرتبك...مايعرف يجذب... مايعرف..وفاجئه الاتهام المفاجئ بهالطريقه..!!..
مد خليفه ايده وراه وسحب السفره اللي فارنها حمدان امس عالشبريه ومدها صوب حمدان...
خليفه: هذي..؟!..
نظرة خليفه وابتسامته كانت ادل وبشكل واضح انه مب مصدق..
مسك حمدان السفره وفرها للعلاقه وتمت هناك..
قال حمدان بظيق..
حمدان: انسى السالفه خليفه...
وقف خليفه بانفعال وجابل حمدان بقوه...
خليفه: شوف حمدان... ابتعد عن الدرب..ودر اللعب مب لصالحك ترا ... لا تسوي نفس حركات الشباب لاني ماحيدك ترمس بناات...
عصب حمدان..
حمدان: لاني فعلا مارمس بنات...
خليفه: عيل منو هاذي اللي وينج..؟؟
حمدان: بالله لو كنت العب بقعد احاتي واقول وينج.؟؟؟؟...
وابتسم حمدان بسخريه...
خليفه: قووولي منوووو هذي حمدان..؟!!...
خليفه كان خايف على اخوه من انه يغلط ويسوي لعمره مشكله...
حمدان: وحده هني... ( واشر على قلبه).... خليفه ..دخيلك لا تدخل في هالمساله ....
خليفه: شو هني يعني...تحبها..؟؟..
حمدان: هي احبها عندك مانع... والا بس انته اللي يحق لك تحب ..!!..
خليفه: ..... انا حبيت بنت عمي يوم حبيت مب انت مادري من وين لاقطنها...!!..
عصب حمدان لابعد درجه...لدرجه انه رفع ايده لكنه مسك نفسه وجمع صبوعه كلها في قبضه ونزلها مره ثانيه بارتجاف...
انصدم خليفه من اللي صار...حمدان يرفع ايده على اخوه اللي اكبر منه بسبب منوه...بسبب وحده..؟!!!....
خليفه: كملها بعد ليش وقفت..؟؟
حمدان: آسف... خليفه بليز...لا ترمس عن شي ماتعرفه...ماقدر اخبرك منو هي لكني اأكد لك انها مب بعيده عنا...وانا مارمسها بالتيلفون ولا شي..السالفه معقده شوي بس يوم الله بيكتب بقولك هذي هي ...بليز لا تدخل انا ما ادخلت فحياتك...لكن تاكد من شي واحد اني انا ما اغلط عن قصد..وفي هذي الحاله انا ما لعب...انا جاد بالموضوع...
استشف خليفه الصدق في صوت وخصوصا عيون اخوه... باين عليه صدق يحب هالبنت...لكن منووو؟؟ حمدان يحب..؟؟ والله مادش العقل...!!
خليفه: كيف يعني جاد...بتخطبها..؟؟
حمدان: ان شاء الله...
خليفه: هي من عايله زينه...؟
حمدان: وايد...اقولك مب بعيده عنا ... خلاص لا تسالني اكثر.. خل عندك ثقه شوي فيني...
خليفه: بنشووف... بس تراني احذرك...عن اللعب على بنات الناس...
حمدان: ياخي طفرت بي اقولك مالعب والله مالعب... وبليز لا تخبر حد بالموضوع هذا..
خليفه: يصير خير..المهم انزل غدا..
حمدان: بتلبس وبنزل...
طلع خليفه من حجرة اخوه وهو مهموم...مشغول باله بهالبنت اللي يحبها حمدان...منو تكون..؟؟ ماحد فمحيطنا او من بنات اهلهم وحده سنها مناسب له عشان يحبها..؟!...ومستحيل مستحيل تكون نوره مستحيل يعني...عيل منووووه..؟!!..اموت واعرف...
نزل تحت ويلس عند باقي اخوانه وهو يراقب حصه بدت تتاقلم اكثر مع حريم اخوانه والقعده معاهم.. واستانس لهالشي... فجاه دق فباله حال حمدان...بما انه من شوي متواجه معاه...وقعد يفكر بحاله...اكيد شعور حمدان يماثل شعور خليفه لو كانت حصه ظاعت من ايده او بعده ماحصلها...اكيد حمدان يتلهف مثل لهفه خليفه بانه يضم الانسانه اللي يحبها فبيته ومع اهله واحبابه...وتكون تحت نظره دايما... كيف وقف بويه اخوه جذي واحبطه..؟؟ مب المفروض يوقف معاه مثل ماوقف معاه حمدان فسالفه رفض امه لحصه..؟!!!... أي نوع من الاخوان انا..؟!..المفروض اساعده واشجعه مثل ماهو وقف معاي وماقصر فعرسي...
تندم خليفه عالموقف..لكن كان خايف على حمدان من انه يغلط بتصرفاته ويسوي لنفسه مشكله هو في غنى عنها.. ماعليه..بيتكلم معاه مره ثانيه وبيحاول يساعده...هذا اذا خلااااه اصلا...
نزل حمدان وهو متسفر ومتلبس ثيابه ..لانه مقرر يطلع بعد الغدا عشان يودي لعزوز تيلفونه... خليفه كان حاط عينه على حمدان حط..يراقبه في اقل تصرفاته..بتعابير ويهه خصوصا... ويحاول يستوعب الفكره...

حمدان يحب..!!!..

بعد الغدا طلع حمدان بسيارته وخليفه ركب لحجرته وركبت معاه حصه..
كانوا يالسين في الصاله يطالعون الكاميرا الخفيه مالت فرنسا...وحصه تظحك عليها بس خليفه كان باله مب وياه ولا ويا التلفزيون...يموت ويعرف منو هالبنت... دور فبنات العايله كلهن ماشاف وحده مناسبه...لا من صوب امه ولا ابوه... يدري ان حمدان حليو وشخصيه ويطيح أي بنت بتصرفاته ... كبيره كانت والا صغيره...بس مافيه ياناس ماشي وحده منااااسبه له...!!!..
حصه: هاااااي ولد عمي..
دزته حصه بخفه بركبتها اللي عدال ريله..التفت لها بسرعه...
خليفه: هاااه..!!
حصه: هههههه يا ان البرنامج بايخ لدرجه وانا ماعندي سالفه اظحك عليه...يا ان انته عقلك مب وياك...
ابتسم خليفه وانسدح اكثر في كرسيه..
خليفه: انتي الي ماعندج سالفه...
حصه: ههههههههه لا والله انك سرحان بافكارك...قولي شو بلاك..؟
خليفه: ماااشي عيوني...ماشي...
حصه: افا تغبي علي..؟؟
خليفه: هو مب عني انا ويخصني انا عشان اغبي عنج...يخص شخص ثاني...
حصه: منو هوهالشخص..؟!..
خليفه: حمدان...
وتنهد.... بحيره..
حصه: هههههههه لا حمدان اعرف سوالفه كلها..قولي شو شاغل بالك.؟!..
خليفه: ماظني تعرفين هالشي بالذات لانه صدمني الصراحه...
حصه: جربني..انا حرمتك واكتم السر...
خليفه: ادريبج والله ياحصيص بس...همم....اوكي... حمدان... يحب وحده...!!!!..
فاجأته ردت فعل حصه بانها نقعت من الظحك ..ففسر ظحكتهاعلىانها مب مصدقه...
خليفه: والله صدق....صدق السالفه بلاج تظحكين...
حصه: هههههههههههههه ادري انزين انه يحب...
خليفه: شوووووووووه..تدرين..؟؟؟ كيف تدرين..؟
حصه: من شهوووور مسكين متولع صارله تقريبا عشر او تسع شهور...بس محد يدري غيري انا ونوره...
اعتدل خليفه بيلسته منصدم من اللي سمعه ومتلهف لمعلومات اكثر...
خليفه: منوووه.؟؟...منو اللي يحبها حمدان..؟؟ من ساعتين وانا ماخليت بنت في العايله ماذكرتها حتى اللي ناسنهن ذكرتهن وطلعن كلهن مايصلحن له...
حصه: عقابا لك لانك على قولتك دورت فبنات العايله كلها مب قايلتلك...شحقه تفكر بغيري هااااااااه..؟!!
خليفه: يالله عاد حصيص خبريني...
حصه: بس اخاف حمدان يحرج...
خليفه: مابقووووووله اني ادري...بس خبريني ريحيني...
حصه: همممممممم.... هي اخت سعيد ولد خالي..ريل نوره...
خليفه: سعيد ماغيييره... سعيد ولد هلال..اخته.؟؟؟؟؟....حسبي الله عبليسه من وين تسلط عليها اخت سعيد..؟!!!..
حصه: ههههههههههه تراها سكنت عندنا فتره طويله.. وحمدان مايقصر بزياراته...وحبها وحبته..من بعد حرب...
تم خليفه مبهت فويه حصه مصدوم من هالمعلومات...سعيد من عايله طيبه فعلا وماعليهم رمسه...ونفس ماقال حمدان مب بعاد وايد عنهم..!!..
حصة: شو بلاك مشدوه..!!!..ههههههههههه...
خليفه: مب مصدق حصوووه مب مصدق....واحين هالبنت كانت تظهر لحمدان..؟؟
حصه: بصراحه هي.. غلطه ارتكبوها ثنيناتهم بس هذا نصيب وصار..والحين البنت عشان ماتكرر هالغلطه راحت السكن وسكنت هناك عشان تكمل دراستها في الجامعه....
خليفه: زينه هي البنت..؟؟
حصه: واااااااااايد..
خليفه: وتبا حمدان..؟؟؟
حصه: مثل ماهو يباها...
خليفه: وكيف احين يتواصلون مع بعض..؟؟
حصه: حسب علمي ان نوره هي نقطه التقاطع بينهم وتوصل اخبار كل واحد للثاني...
فكر شوي خليفه...
خليفه: يعني كلمه وينج اللي سمعت حمدان يقولها هي لنوره بانها طولت ومااتصلت به ولا يابت له اخبار خت سعيد..!!!..
حصه: ههههه هي اكيد... لانه مايروم يتصل فبيتنا يخاف امي تشل التيلفون او ابويه عاد ساعتها يتورط مايروم يقول عطوني نوره بينقدون عليه...
خليفه: احين فهمت....مسكين حالك ياخووويه...!!..
ظحكت حصه وماعلقت عالموضوع اكثر...وخليفه ارتاح نوعا ما لانه اطمن من البنت وطريقه تواصل حمدان معاها...فعلا اخوه يمكن غلط قبل يوم كاان يشوفها لكنه يصلح غلطته بمقدرته الحين والبنت بعد اللي ماترضى بالغلط وتصلحه بنت زينه ... يعني حمدان ماعليه خوف... متى ما احتاج مساعده...بيلقى خليفه معاه وواقف بصفه... مثل ما هو وقف معاه من قبل وحشر امه عشان حصه...

فطيم نشت من النوم وهي تحس براسها مصدع صداع عنيف..اطالعت الساعه وانصعقت... 3 الظهر..!!!!!!!!!!!...كيف وليش انا رقدت هالكثر..؟؟...
يوم بغت تنش حست بجسمها كله متكسر..وراسها ثقيل..في هاللحظه دخلت شمسه الغرفه...
شمسه: ها ها ها..رقدي رقدي وعيني خير... ماترومين عالظهرات احين...
تقربت شمسه وحطت ايدها على يبهت فطيم اللي ردت تنسدح بسبب تكسر جسمها الفظيع..تحس انه كل عظم بروحه منفصل عن الثاني...
فطيم: اوففف متى يتني الحما..؟؟
شمسه: بعدج محمومه...والله انا امس ييت المغرب وحصلتج راقده واستغربت رقدتج...قلت يمكن مريضه..يوم تهيست راسج لقيته شاب ظوو... اظن ماتذكرين اني وعيتج وعطيتج بنادول بعد...!!..
عقدت فطوم حياتها اثباتا انها ما تذكر هالشي فعلا...
فطوم: وانا راقده من ذيج الساعه..!!!..
شمسه: أي راقده دخيلج..!!..تجلبين وتونين طول الليل...كسرتي خاطري والله... المهم قومي تغسلي..يبت لج غدا تاكلينه وتردين تاكلين بنادول وترتاحين..
نشت فطوم تتغسل مب عشان تتغدى..... بس عشان ترسل للغالي مسج مثل ماموصنها...المفروض اطرشها امس لكنها رقدت وما انتبهت...طلعت من الحمام وفرت الفوطه عالكرسي ويلست عالشبريه وطلعت تيلفونها وهي تحاول تتماسك عن تنسدح مره ثانيه عالشبريه...
شمسه: طالع هااااااي... انا متعبه عمري وامشي في الشمس ويايبتلج غدا عشان تاكلينه تقومين تمسكين تيلفونج..؟!!..
نشت شمسه ومطت التيلفون عن ايد فطيم...
فطيم: اوووووه شموس عطيني...عطيني الموبايل..!!.
شمسه: واللللللللللله وحلفت بربي..ماعطيج الموبايل الا يوم تتغدين وتاكلين البنادول وعقب بعطيج اياه..
فطيم: اووووووووووف شموووس عاد...
شمسه: يالله بنت هلال يالله..انزلي تحت وسمي بسم الله وتعالي تغدي...
فطيم: انزين عاد ماااااااااشتهي والله...
شمسه: بتاكلين غصب لو لقمتين عشان البنادول...انزلي يالله...
نزلت فطيم غصب وتغدت باللي قدرت عليه وكلت حبة البنادول كله عشان خاطر تيلفونها...
وبعد ماكلت حبة البنادول ياها الرقاد مره ثانيه بس عاندت ومسكت تيلفونها وطرشت لحمدان مسج..
" حمدان...وصلت العين بالسلامه"..
كان حمدان ساير بالدرب صوب عزوز هالوقت ويوم وصلت المسج تخبل..مات من وناسته..على الاقل اطمن عليها...لكنه حب يتغلى شوي..
" يهمج يعني..توج تفيجتي تسالين عني اذا وصلت والا مت."
" حرام عليك والله... انا مريضه ورقدت غصبن عني امس بدون قصد والا كنت ناويه اراسلك"
" فدييييييييييييييت هالقلب مريضه غناتي؟ بلاج؟ سلامات."
" حمى...الله يسلمك..شحالك انته؟ والحمد لله عالسلامه"
مارد عليها حمدان لانه نزل يسلم على عزوز ويعطيه تيلفونه اللي ناسنه..وحاول يخلص سوالفه بسرعه معاه عشان يرد يرمس فطيم..وبعد ماخلص رد للسياره وحركها ومسك تيلفونه..
" سلامات فطااامي ماتشوفين شر..والله يسلمج انا بخير بس مشتاقلج موووووووت"
" حتى انا...شو صلالة؟ وناسه؟ "
" الصراحه هي وايد وناسه...ليتج كنتي هناك"
" يالله ان شاء الله بنسير فيوم من الايام"
" آآآآآآآآآآمين الله يسمع منج...واوعدج اني اوديج اذا صار اللي فبالي"
" شو هو اللي فبالك"
" اني اخذج شو بعد"
"ليش منو قص عليك وقالك اني بوافق.؟"
" بصفعج لا تفاولين علينا غصبن عنج باخذج"
" ههههههههه لا مابوافق عليك"
" والله بزعل منج هالموضوع حساس عندي"
" ههههههه اسولف اسولف وياك انا احصل واحد مثلك واقول لا"
" هههههه هي توج..سيري ارتاحي مابطول عليج بس راسليني المسا ..احين سيري رقدي"
" ان شاء الله حمدان...بسير ارقد.."
" اوكي الغاليه...اتريا مسج منج المسا"
" ان شاء الله برسلك...باي باي"
" باي"

كمل طريقه حمدان لبيت عمه وهو مرتاح لانه اطمن على فطوم..




--------------------

الجزء الثالث والسبعين

دخل حمدان الميلس وماحصل حد فيه..اكيد عبدالله في الدوام لانه سيارته محد… من عقب ناصر وخالد الميلس صار دووم فاظي..الله يردهم بالسلامه ويرجع البيت مثل قبل… طلع من الميلس وسار يسلم على اخته ميره..حصلها في الصاله تعابل بنتها الصغيره… وعنود عندها.. دخل وسلم عليهن ويلس وياهن ربع ساعه… عقب خلاهن ودخل البيت ..حصل الشايب يالس يتقهوي بما انه توه الوقت اول العصر وبعد شوي بيطلع وبيسير عزبته..
حمدان: السسسسسسسسسسسلام عليك عمي..
بو خالد: مرررررررررحبا الساع..وعليك السلام والرحمه..
نش بو خالد ووايده حمدان مع انه حمدان اصر عليه يتم يالس… ويلس حمدان عداله..
حمدان: شحاااااااالك عمي..؟ عساك طيب؟
بو خالد: بخيييييير والله ياولدي شعلوومك انته ؟
حمدان: والله علومنا طيبه وبخير وسهاله… بتسير العزبه احين..؟
بوخالد: هي والله..بتخاويني.؟
حمدان: غير المره عمي عندي شوية اشغال…بس ان خلصت من وقت بمر عليك ان شاء الله هناك..
بو خالد: على خيير..انته متى ييت من ظفار.؟
حمدان: امس والله في الليل واصل.. شوووه ياعمي والله انها شي في هالوقت من السنه..
بو خالد: هييييييييي..جنعت عاد من لحواطه.؟؟
حمدان: هههههههههه لا ماجنعت بس باجل باقي الخطط للاجازه اليايه ان شاء الله..
صد عنه بو خالد يانب ثاني..
بو خالد: هممممم اسميك انته مول ماتجنع من اللعب…قولي شو حالها حصه هنااك.؟؟
حمدان: ههههههههه حصه حالها بخير لا تحاتي…
بو خالد: مرتاحه ويا خليفه.؟؟
حمدان: والله حسب اللي شفته مرتاحه وايد الحمد لله…
بو خالد: الحمد لله…
دخلت ام خالد في هاللحظه وهي لابسه العباة والبرقع…
ام خالد: هااااا حمد يالله هبابنا نخلص…حمدااان ولديه انته هني ثرك…مرحبا مرحبا…
نش حمدان احتراما لها ..
حمدان: مرحبااابج زوود عموووه شحالج عساج طيبه..؟
ام خالد: بخير الغالي الحمد لله عالسلامه متى رديت.؟
حمدان: الله يسلمج من كل شر…امس والله راد…بتسيرين العزبه وياه انتي بعد..؟
ام خالد: هي والله ياولدي من يومين ماشفت الحلال مادري شو صار عليهن شو ماصار بسير الوفهن..!.
رد حمدان ويلس…
حمدان: جنهن الا بناتج ونحن ماندري عموه..!!..هالكثر تحاتين هوش ودياي وبقر.؟
ام خالد: وجي ماحاتيهن مربتنهن وارعاهن من متى وسادات البيت اكثر اكلنا طازج الحمدلله ..نافعتنا هالعزبه..
حمدان: هههههههههههه يووه ثرنا غلطنا في الرمسه… الله يخليلج حلالج ويخليج لهن ان شاء الله هههههههه… ويعطيهن طولة العمر والصحه والعافيه… تاخذين خيرهن وتخلين شرهن ان شاء الله…
قالها حمدان نفس عيايز اول وقام يحيس لسانه شراتهن….والعيوز تظحك…
بوخالد: وااااغمي الغم حمدان..؟!!!!...شوبلاك..؟!...
حمدان: هااااه..؟!... لا ماشي ابد …اخاف بس العصا عدالك مني والا مني…لا الحمد لله ماشي عصا اليوم..
بوخالد: مب لازم عصا بنسل لك العقال ترا…
حمدان: ههههههههههههه لالا خلاص اسوي سوالف على عموه بس….يالله ماشي تفاهم… عبدالله وين عيل؟
ام خالد: احيده على وصول…بيي الحين مابيتاخر..
حمدان: وانتوا بتسيرون..؟!..عيل انا بترياه هني ..
ام خالد: برايك ولديه..اتصلبه عشان مايتاخر عليك..
حمدان: لا تحاتين انا مب غريب..
نش بو خالد ..
بوخالد: يالله عيل..بنسير نحن هبابنا نوصل لين هناك بعد…فمان الله…
حمدان: الله وياكم..
طلعوا الشواب وخلوا حمدان اروحه في الصاله..يلس على كرسيه المفضل وقعد يجلب في القنوات…شوي وداخله عليه نوره في ايده صحن صغير…
نورة: طالع..!!!...وين ابوووووووويه.؟!!!...
عقد حمدان حياته…
حمدان: وعليج السلام والرحمه…بخير الله يسلمج..الله يسلمج من كل شر انا وصلت امس في الليل وياي اسلم عليكم…
ظحكت نوره..
نورة: شووووووبلاك جنك عيوز ماكول غداها..!!..وشحاااااااااالك ولد عمي…الحمد لله عالسلامه يالصايع..
حمدان: صايع فعينج…شو فايدج؟؟
اطالعت نوره الصحن باسف…
نورة: حلاوة توني مخلصتنها ويايبه لابويه منها..يحبها…
حمدان: زين هاتي..من حظي…
ومد حمدان ايده وعطته نوره الصحن وهجم عليه..
نورة: على كثر الحلاوه اللي تاكلها ليته يبين فيك شي…
حمدان: الغاليه انا رشيق..اتحرك وايد واحرق اللي اكله…بعدين انتي مب من زينج انزين..؟!..
يلست نوره على كرسي شوي بعيد وظحكت..
نورة: ههههههههه انا والا….عرب..؟!!!...
حمدان: آآآآآآآآآآآخ يانوروه لا تذكريني… ياخي قوليلها تاكل مب زين عليها غادية شرا المسواج ماينعرفلها ويه من مقفى..!!..
نورة: هههههههههههههههههههههههههه ماعليه بقوووووولها….
حمدان: قوليلها والله صدق…قوليلها يقولج حمدان كلي وانتفخي ماعليج من حد….
نورة: ان شاااااااااااااء الله..فرصه تصدق ادقلها احين لاني من يومين مادري عنها شي..
تذكر حمدان ان فطيم بترقد احين ومايبا حد يزعجها بمرضها…
حمدان: لالا…لا ادقين احين..يمكن داومت الصبح ورقدت…لا تاذين الشيخه فاطمه…
نورة: يالله يالله…وشو دراك عاد انها راقده…؟!..
حمدان: انااقول الاحتمال الاكبر انها راقده بعدين لا ادقيلها وانا موجود …عن اسحب السماعه عنج نفس ذاك اليوم تراني ماتحكم بتصرفاتي…!!
نورة: هههههههه خلاص اوكي بعد صلاة العشا بتصلبها..
حمدان: صح هي شخبارها؟.!!..
حمدان اونننه مايعرف عن فطيم شي غير اللي تخبره نوره اياه..
نورة: احيدها بخير تشقح وتنطح…قتلها انك ساير صلاله..قالت لي اذا صور شريط خلي الشريط عندج عشان يوم اييكم اشووووفه ههههههههه…
حمدان: ههههههههههههه فاااااااااااااالها طيب ماطلبت والله طويلة العمر…بس خليني اسجله على شريط عووود ..ويوم بيوون قوم فطيم بعطيج الشريط…
نورة: صاير طيب والله…خلنا نستغل الفرصه…اقول حمدان شو يبتلي من صلالة؟ ..
حمدان: يبت لج الله يسلمج…حشيش اخضر..بس يبس عاد من طول الدرب..ويبت لج طين…وبقره ظايعه حصلتها عاليبل..!..
نورة:……………سبـــــــــال…
حمدان: ههههههههههههه والله… دام امي مايبت لها شي انتي بييبلج..؟؟ مادريت مثلا انج حرمتي وملزوم بج.!!!.
نورة: لا يابوي الا ياحظك ..خلاص انا معرسه احين ..
حمدان: وريلج كل يوم لاعن خيرج اظن…
برطمت نورة..
نورة: والله انك صااااااااادق..ذكرتني ما اتصلت بالمشغل اللي بابوظبي اتاكد منهم…
ربعت نورة ويابت دفتر صغير كانت تكتب فيه كل شي يلزمها… وسارت للتيلفون واتصلت بالمشغل اللي تبغيه وقعدت تستفسر منهم عن اشخاص تخص فستان العرس اللي بعدها مافصلته لين الحين…
دخلت عنود في هاللحظه يايه من عند ميره ويوم شافت اخوها يالس بروحه مع نوره فضلت تقعد معاهم..يلست عدال حمدان وقعدت تساله عن صلالة شو سوا وشو ماسوا وشو شاف وغيره..
مامرت عشر دقايق الا وعبدالله ياي..
عبدالله: السلام عليكم…مرررررررررحبا الساع براعي صلااااااااله…
حمدان: مرحبتييييييين هلا والله …. ( توايه مع عبدالله)… شحاااااااااالك؟
عبدالله: بخيييييييير شحالك انته شوو علووومك؟ الحمد لله عالسلامه…
حمدان: الله يسلمك يارب شخبارك؟
عبدالله: والله اخباري طيبه الحمد لله..استريح…
يلس حمدان ويلس عبدالله عداله… عقب اطالع عنود وتذكر..وظحك..
عبدالله: عنودي ماسلمت عليج…
عنود: زين يوم ذكرتني بعد…
عبدالله: بعدين بعدين هههههههههههههه…
حمدان: اطلع.؟!!..
عبدالله: لالا بعدين فووووق بسلم عليها اخاف بعدين تقولون عبدالله يراوينا افلام عوذ بالله منها…
عنود: ههههههههههههههههه ويا راسك اللي يقول شو عاد هذا سلامك…بوسه عالخد وعالطاير بعد…
حمدان: واااااااااااااااخزياه..بوسه عالخد بعد..؟؟؟ لالالالالالالالا عبدالله اسمحلي شو هذا انته وايد طفس…
عبدالله: اووص..بنشوفك يالطويل عقب عرسك….
رفع حمدان ايده كاني يدعي …
حمدان: آآمين…
هالحركه سببت لهم صدمه…رفعوا عبدالله وعنود حواجبهم وابتسموا باستغراب…
عبدالله: طاااااااااااالع.!!..يبا يعرس مسود الويه..
عنود: بسير ابشر امااااااااااااايه تترياه يعزم..
حمدان: والله ياوييييييييييييلج..محد يدخل في هالسالفه انا يوم بعزم بقولها بروحي.. الا اسوي سوالف عليكم….ادريبها امج بتربع تخطبلي اي بنت تعيبها…
عنود: جي وانته منو تبا؟
حمدان: ماريد حد بس فكوووني..محد يسولف وياكم صدق..
عبدالله: بس نحن شفناها غير طالعه من الخاطر مب مال سوالف…
حمدان: ههههههههههههه هذا لاني السنه اللي طافت ماخذ جايزه اوسكار لاحسن ممثل..
سكرت نورة التيلفون وانضمت لهم…وقعدوا يسولفون شوي رباعه عقبها ترخص حمدان وطلع وركب عبدالله عشان يتسبح ويرتاح..ويلست عنود مع نوره …

******
المسا وكالعاده الساعه تسع ونص…رجعت فطيم اطرش مسجات لحمدان وهالمره كانت شوي احسن عن اول…
" حمدااااااااااان..!!"
كان حمدان يتعشى في البيت ومن وصلته هالمسج نش عن عشاه وتغسل وركب حجرته…
" ياعيووون حمدان الحولا"
" منو الحووولا؟؟!"
" عيووني"
" ومنو عيونك"
" انتي"
" يعني انا حووولا"
" بالضبط جذي..ياذكية انتي "
" ماعليك يالمسطره.."
"ههههههه مقبوله منج…ها شو الصحه احين؟ اهون؟"
" هي الحمد لله الظهر كلت بندول ورقدت واحس نفسي احين بخير"
" الحمد لله..يعني بداومين باجر"
" ان شاااء بداوم ماقدر اغيب لاني اليوم غايبه ماداومت"
"ان شاء الله بتصبحين بخير… دقت لج نوره اليوم؟"
" من نص ساعه مسكره عني…ههههههههه خبرتك عن الفلم لاه"
" هههههه هي قتلها فالها طيب ماطلبت"
" تعرف شو قالت اول شي..قالت حمدان يقولج انقعي في درام!!"
" ههههههه تقص عليج "
" ههههه ادري عقب صلحتها وقالت الصدق"..
" ما بتون بيت عمي قريب؟"
" ماظني...ماشي مناسبه الا جان فعرس سعيد"
"فطوم ابا اشوفج..."
"جان استحي انا.."
" ههههههههه لالا صدق...والله ابا اشوفج"
" حتى انا..بس تدري انته انه مافيه مجال"
" الله يعينج علي انا حظي منحوس من استويت يعني بيلحقج الحظ النحس وياي"
" ههههههه لا تقول جي..بعدين حتى لو كلامك صدق..راضيه"
"حلفي"
" والله"
" جان انا اللي استحي احين..ههههههه فديتج والله"

تموا يسولفون لين ماعورتهم يديهم من الكتابه ..

مرن شهرين على هالاحداث.. ترتيبات نوره طبعا على قدم وساق على قولتهم..تحاول تخلص اشغالها وفعلا خلصت منها وفصلت الفستان بتعاقد مع المشغل على اساس هي تدفع نص القيمه.. يفصلونه لها مخصوص..تلبسه وبعدها ترجعه للمحل عشان يتم تاجيره...سعيد من شهر انتهى من البيت وقفله وبدا يرتب شوي غرفته الحاليه اللي بيسكنون فيها فتره لين مايخلص بيتهم وهذا طبعا لين مايخلص يباله تقريبا ست شهور او اكثر...كانت فرحته قد الدنيا...مب قادر يصدق ان حلمه اللي حلم به سنين اخيرا بيتحقق...لكنه لين الحين متخوف..يخاف انه يصير شي وايد القدر ماترحم...تدخل في اوقات تكون انته في قمه فرحتك وتخرب عليك...ويكون هذا نصيبك وترضابه بس هو مايتوقع انه بيتقبل أي شي يخرب عليه..ولازم افكاره تكون متفائله وان شاء الله مابيصير شي...

لكنه بعد ايام صار شي ممكن انه ينكد عليه لانه زعله الحين...
وكان قبل العرس باسبوعين ونص....يوم قالت له نوره انها خلاص مابتكلمه لين العرس.. وكان ساعتها عندهم في البيت ياي في زياره...
سعيد: لا تقعدين لي تسوين حركات علي احين...
نورة: اوامر عمتك...شو اسوي؟
سعيد: مب عليه هالرمسه نوروه... لو انتي ماقتنعتي برمستها مابتقولينها الحين..لكنج مقتنعه....
كان شكل سعيد معصب وعيونه تنفث نااار... وهو يطالعها بنظرات معصبه ومتفحصه...اما نوره فنزلت عيونها لريولها..
نورة: انزين تبا الصدق...صدقها...يعني نحن احين تعودنا على بعض..وقت العرس بيكون عادي عندك وو...
قاطعها سعيد بعصبيه..
سعيد:..عــــــــادي.؟؟؟!!!!!!! ...شو تخرفين انتي؟
نورة: سعيييد...صدق بيكون عادي عندك جنك ياي زياره مثل الحين...
سعيد: الوضع...مب...نفسه...اوكي..؟!..
نورة: بس بتمل مني...
سعيد: شوووووووووه..؟!!..
نورة: سعيد..هد اعصابك..الغرض من هذا كله انه نتوله على بعض لين العرس...عرفت.؟!..
سعيد: انا ماعندي مشكله في اني اتوله عليج حتى وانا يالس هني وياج...بس جان انتي عندج مشكله في هالموضوع ارمسي من احين..
نورة: انته شحقه تجلب الرمسة دوم...؟
سعيد: انا ماجلبت شي...قولي انج انتي تبين هالشي قولي...
نورة: قلت لك هذي اوامر امايه...وبعدين مابغيك تمل مني والله...
سعيد: اذا بمل منج احين يعني مابمل منج بعد العرس.؟!!..
نورة: ساعتها بنكون معرسين خلاص...
سعيد: يعني طاح الفاس بالراس..
نورة: شو قصدك؟؟؟
سعيد: قصدي بما اني بنظرج بمل من الحين اكيد اني بمل اضعاف بعد العرس والا شو رايج انتي؟؟ زواج مثل هذا يصلح؟
نورة: سعيد...شو قصدك؟
سعيد: قصدي نكنسل العرس احسن...
انصدمت نوره...نكنسل العرس؟؟؟ ... عرس حلمنا فيه سنين نكنسله احين يوم نحصله بسبب شي تافه؟
نورة: هذا اللي انته تباه...؟
سعيد: هذا اللي انتي تبينه مب انا...من احين تبين تفارقيني ثلاث اسابيع عشان تقدرين تتولهين عليه واطالعين فويهي في العرس.؟؟..باجر يوم بنعرس وخلاص شو بتسوين بعد؟ بتقوليلي بسير عند اهلي كم اسبوع عشان ما امل منك وارد اتوله عليك؟؟
دمعت عيونها نوره....
نورة: انا مب هذا قصدي... لكن اذا انته ماتبا هالعرس سو اللي تبغيه انا مابغصبك انك تاخذني...
سعيد: مب انا اللي مابغي العرس معروف منو اللي مايبغيه...واذا انتي تبين هالشي انتي رمسي مب تعقينه كله على راسي في اخر لحظه....
نش من مكانه وهو معصب حده..وكمل..
سعيد: وانا مابعترض على أي قرار تبينه.. فكري من احين اذا كنتي تبغيني صدق او لا قبل ما تطور المسائل...
طلع من الميلس حتى بدون مايتريا نوره تسويله درب..وبعدها من البيت وعلى طول ركب سيارته وتوه كان بيطلع من الباب الرئيسي بالسياره الا وحمدان داش ..يوم شافه اضطر يوقف...نزل حمدان من سيارته وهو يبتسم ..ويا صوب سعيد اللي نزل بتكاسل وعلى ويهه ملامح الضيج والعصبيه...
حمدان: سلااااااااااااااااااااااااام هلا والله بو عسكوووووور..
سعيد: وعليك السلام هلا حمدان..
توايهوا...وحمدان فصخ نظاراته وهو يطالع ويه سعيد وعيونه مرصصه..بتفحص...
حمدان: حد سارق حلالك؟
سعيد: ...شحالك؟
حمدان: متظارب ويا ويه النحس؟
اطالعه سعيد بعصبيه على هالشتيمه لحرمته وحبيبة قلبه..
سعيد: انته ويه النحس لا تسب...
ابتسم حمدان...
حمدان: اركب سيارتك ووقفها في الكاراج والحقني الميلس احين...
سعيد: حمدان بسير انا ..
حمدان: وين تبا؟
سعيد: بسير..
حمدان: وييييين..؟!..
سعيد: بسير بس بظهر..بسير بيتنا...
حمدان: ان ظهرت احين خشمي مابيدق خشمك حتى فعرسك فهمت..؟!..وقف سيارتك والحقني الميلس..
تافف سعيد وهو يشوف حمدان راكب سيارته ويوقفها..ركب هو بعد سيارته متظايق يبا يطلع من هالبيت باسرع فرصه بس حمدان مشكله... وقف سيارته ونزل..وسار هو وحمدان للميلس...ويلسوا هناك كان الميلس فاظي كالعاده..
حمدان: هات من الاول...شو عندك...؟
سعيد: ماعندي شي..
حمدان: ارمس خلصني..شو قالت لك نوره..؟
سعيد: نوره الظاهر ماتباني..
رده فعل حمدان كانت ظحكه...قصيره ومتعجبه..بعدها ظحك بصوت عالي...
سعيد: لا تظحك...ماشي يظحك...
حمدان: والله جنك قايل نكته...احين نووووووووووووووووره...ماتباك.؟ ؟!..تخبلت انته..؟!..
سعيد: صدق ارمسك...جنها الا ملت مني وماتبغيني....
حمدان: ليش عاد؟؟..انته اكيد فاهم شي غلط مستحيل اصلا نوره والله تموت على التراب اللي تمشي عليه...
التفت له سعيد وعيونه تلمع كعادتها يوم حد يقوله بانه نوره تحبه او حتى تكن له مشاعر محبه..!!..
سعيد: نوره ماتنزل نفسها لهالدرجه..
حمدان: بس نوره تحبك لهالدرجه...صدقني... صح انا دووم صك حك وياها بس اعرفها عدل...
سعيد:....................
حمدان: قولي شو قالت لك.؟!..
سعيد: اون انته بتمل مني.. خلنا نفترق لين العرس..عشان نتوله على بعض...
حمدان: وشو فيها..كل المعاريس اللي مالجين من قبل يسووون جي...
سعيد: نحن مب مثل كل المعاريس...نتريا هالعرس من متى.... والله اني يمكن من عشر سنين حمدان عشر سنين عمر هذي مب شوي...وانااتريا...
حمدان: ادري انزين ..بعد كم اسبوع بتكون لك كليا...
سعيد: ياخي لا تستوي شراتها انته بعد افهمني..انا مب على سالفه فراق كم اسبوع محتشر..تراني فارقتها من قبل اكثر عن شهر وشهرين بعد...انا معترض على المبدأ...
حمدان: وشووو هو فهمني...؟!..
سعيد: احين بالله عليك بما اني بمل منها من احين..بعد العرس مابمل منها بعد..؟؟.. وبعدين نحن عقب كل اللي مرينا فيه وكل اللي بينا..نحتاج لفراق كم اسبوع عشان نقدر نتوله على بعض.؟!.. انا احين وانا يالس عندك توني مخلنها ومتظارب وياها تولهت عليها .!!!...بس قسم بالله الحريم محد يعرف كيف تفكيرهن..؟!..
حمدان: خذها على قد عقلها انزين...خلها لين العرس ...وعقب بتم تحت نظرك..
سعيد: انا قتلها كنسلي العرس اذا ماتبغيني وانا مابعترض...
حمدان: خيبه تخيب العدو شو بلاك انته جي ياخي عصبي..؟!..ماحد يرمسك..
سعيد: قهرتني..
حمدان: وانته ماتعرفها يعني هذي خبله بتعاند فيك وبتسويها...
سعيد: اذا سوتها لا عرفها ولا تعرفني ومامبينا شي..
حمدان: تراها بتعاند فيك...سعيييد.. رد البيت ورمسها من اول ويديد..
سعيد: والللللللللللللله ماردييييييييييت...خلها تولي...
حمدان: شووو خلها تولي افاااااااااااااا...
سعيد: شحقه انا اسير...هي غلطانه شحقه هي ماتتصل وتعتذر.؟؟!...
حمدان: ياريال البنت عنيده....عنييييييييييييده مثل التيس...
عقد سعيد حياته وهو يطالع حمدان..
سعيد: محد غيرك تيس..
حمدان: ههههههههههههه ماعرفنالك..
سعيد: انا اسبها واشرشحها اوكي بس غيري لا...
حمدان: شمعنى.؟
سعيد: بس..حرمتي مارظى عليها...
حمدان: ياويلي ياويلي...حرمتك زعلانه داخل وعلى وشك انها تكنسل العرس...الحقها..
سعيد: خلها تسوي اللي يرضي ضميرها..انا ماغلطت..اذا بتمل مني من احين ..اكيد بتكرهني عيل عقب العرس..يزاي يعني اني ابا مصلحتها ومصلحتي..؟؟..
حمدان: وقسم بالله ماشفت انسان فحياتي يحرف الكلام ويفهم على كيفه جي شراتك.؟!..انته شووو ياخي..احين من صدقك بطنشها؟...
سعيد: هي والله خلها تسوي اللي تباه عندها لين العرس تقرر...وانا بعطيها الفتره الي تبغيها وبشوف اخرتها وياها لكن مابتكون النتيجه طيبه لها..ولا تتوقع اني بستقبلها بالاحظان فيوم العرس...
كان سعيد شكله من الخاطر زعلان..وحمدان لو مب الموقف الحساس لسعيد كان نقع من الظحك عليه... لكن بسبب عناد هالثنينه الموضوع ممكن يطور وهو يعرف سعيد لين وين يقدر يوصل ويعرف نوره بعد لين وين تقدر توصل بعنادها...ودام انه وقف على هالموقف..لازم يتصرف بمقدرته...بيكلم نوره..وبيفهمها وجهة نظر سعيد عن تتهور المينونه...
حمدان: مابتستقبلها بالاحظان..؟؟ انته.؟؟ متاكد يعني..
سعيد كتم ابتسامه غادره..
سعيد: هي متاكد..
حمدان: واذا هي استقبلتك بالاحظان .؟؟
سعيد: بطنشها..
حمدان: هههههههههههههههههاي..احلف.؟!..
سعيد: ياخي جب..اسكت عني انا معصب احين...

نورة كانت ماتزال يالسه في الميلس بعد ماطلع سعيد عنها... منصدمه من المجرى اللي تحولت له الامور...كيف سعيد يفكر مجرد تفكير انه يكنسل العرس عسب شي تافه فاهمنه غلط... وشوفيها لو ابتعدنا عن بعض كم اسبوع ؟ بيموت يعني؟... كل المعاريس جي يسوون... عبدالله وعنود سووا جي...وخليفه وحصه نفس الشي... وكانت النتيجه حلوه للكل...طاحت علي انا يعني؟!... ليش انا ريلي عصبي جي ومايتفهم.؟!... هذا قبل العرس جي شقايل بعد العرس اذا واجهتنا مشكله او صارت بينا مشكله كيف بنحلها.؟؟ بالعصبيه بهالطريقه.؟. لانه ابدا مايتفاهم هالانسان..اوووفف...
نشت من الميلس الصغير وراحت للصاله ويلست هناك..امها موصتنها ماتخلي البيت فاظي..عنود كانت عند اهلها..وامها راحت عند يارتهم شوي وبتي.. وابوها محد..وعبدالله في الدوام..وهي مجبوره تقعد ارووحها.. فسارت الصاله ويلست هناك وهي متكدره من الخاطر وتفكر برده فعل سعيد الغريبه...اكنسل العرس مره وحده ياسعيد.؟!!...
بعد دقيقه سمعت صوت سياره وشكلها طالعه من البيت...وبعد دقيقه ثانيه دخل حمدان البيت...
حمدان: سلااااااااااام عليج يالعروس..
ابتسمت نورة بسخريه..
نورة: أي عروس الله يخليك..وعليك السلام حمدان...شحالك؟
يا حمدان ووقف جدامها..
حمدان: اول شي قومي عن كرسيه..!!..
نشت نوره بدون اعتراض عن كرسي حمدان المفضل وراحت قعدت مكان ثاني.. ويلس حمدان بعد ماتاكد من مشاعرها لانها لا اعترضت ولا غايظت ولاشي...ومب من عوايدها الاستسلام..
حمدان: انا بخير الحمد لله شحالج انتي بنت عمي؟
نورة: الحمد لله ماشي الحال.. عنود بتبات عندكم؟
حمدان: لالا ماظني..بترد هني المسا...بلاج مويمه.؟
نورة: ماشي...
حمدان: عليه هالحركات؟
انورة: أي حركات...؟!..مافيني شي.. بس ملانه...
حمدان: ملانه من كل شي حتى من سعيد.؟!..
انتبهت نوره وبحلقت بعيونها عليه...
حمدان: هي هي..ِشفت سعيد ورمسته وخبرني بالسالفه....شو بلاج على الريال؟!..
نورة: والله ربيعك ماصدق يحصل سبب عشان يتكلم عن الغاء العرس..
حمدان: لاحوووووووووووول ولا قوة الا بالله كل حد يرد عالثاني.. بوي بلاكم.؟؟ توتر ماقبل العرس هذا والا خبال ماقبل العرس.؟؟
نورة: انا ماقلت له شي...قلت له بس خلنا نفترق لين قبل العرس عشان ...عشان..نجدد يعني...عشان نكون من زمان مب شايفين بعض..يعني قوم عبدالله سووها..وقوم حصه...محد اعترض منهم وسوا هالصدعه كلها شمعنى انا يعني طاحت على حظي.؟!..
حمدان: انتي ريلج غير...مايتحمل فراقج يمكن...
نورة: يعني انا اللي اتحمل.؟!..
حمدان: انزين خلاص عيل بلاها هالفتره اللي تبين تحطينها بينكم..
نورة: هذي اوامر امي مايبت كلام من عندي انا...يتني اليوم الصبح قالت لي بعدج ترمسينه انتي سعيد.؟ قتلها هي..قالت بس خلاص قطعيه لين العرس والا بشل التيلفون عنج...يعني كلام يحرج الصراحه...
حمدان: بعد عموووه غير شكل.!!!!...
نورة: عاد هذا اللي صار..وبعدين مهما كان... مايحقله يقولي كنسلي العرس.. حشى مايسوى عليه...
حمدان: وانتي صدقتي عاد انه يبا هالشي...
نورة: ليش يقوووله عيل..
حمدان: هو منقهر منج لانه يتحسبج مليتي منه عشان جي تبين تفارقينه عشان تقدرين تتولهين عليه...اما هو مايحتاج فراق عشان يتوله عليج لانه دايما يكون متوله على قولته...
نورة: انزين والله حتى انا....بس امي تقول لا ترمسينه شو اسوي.؟!..اعارضها عشان يفركشون علينا العرس امره..يسوونها اهلي تراهم تصنيفات عليهم...
حمدان: تعاييتبكم...المهم انتي سكتي عن الموضوع..وهو بيسكت بعد...لا تسوين شي تندمين عليه..
نورة: تتحسبني بكنسل؟ لا ابوي يبا يكنسل يكنسل ارووحه انا مب مكنسله شي..مافيني المشاكل اطيح على راسي انا والكل يلوم بي..خله هو يتحمل المسؤوليه اذا كان مايباني هو يتصرف..
حمدان: شوو تخنبقين انتي شو ترمسيييييين.؟؟!...قسم بالله انتي وريلج الرمسه ظايعه وياكم ....
نش حمدان يبا يطلع...
نورة: تعااااااااااااااااال...
حمدان: شو تبين.؟؟؟
نورة: سعيد طلع؟
حمدان: هي طلع...
نورة: تعرف وين ساير؟
حمدان: لا...
نورة: ساير اييب فطوم من الجامعه وبيشلها البيت...خلصت امتحانات صيفي على فكره...
بغا حمدان يزل لسانه ويقول ادري..لكنه تصنع الدهشه..
حمدان: لا والله..وشو سوت في الامتحانات؟
نورة: تقول زين..ماعليك منها كديده هذي...
حمدان: قولي الله اكبر...ذكري ربج عوذ بالله من عينج يالحسود...
نورة: هههههه بسم الله كلتني...ماشاء الله والله اكبر ...لا تخاف يابوك...
حمدان: انزين...وماقالت لج سلمي علي.؟؟
نورة: ههههه تقولي سلمي على عرب..عاد انا مادري اذا انته عرب او لا...
حمدان: يالبقره ياللي ماتستحين وهذا انا اللي ياي اواسيج واهدي بالج عسب سعيد تقوليلي جي...بوي شوفي عمرج اذا انتي عرب اكيد انا بعد عرب... واذا انا مب عرب تراج انتي بعد شراتي...
نورة: يالله يانته كيف تتقحطن مره وحده شرا العيايز..
حمدان: ماااغيرج عيوووز....!!..
نورة: والله اذا عيزت بيكون هذا العصبي السبب...بيذبحني قاصره عمر..
حمدان: محد يموت قاصر عمر..كله مكتوب فكتاب عند رب العالمين....
نورة: اقول..وين لحيتك الطويله...وماشي بعد كندوره قصيره....؟!!.
حمدان: مب لازم اكون مطوع عشان اقول هالرمسه او اعرفها...
نورة: روح روح....روووووووووووووح...امبون ي اباك تقعد وياي لاني بروحي في البيت بس احين شكلك انته اللي بتذبحني قاصره عـــ...
قاطعها حمدان ببرود..
حمدان: قتلج محد يموت قــاصــ...
نورة: ادري ادري...عطي مقفاك لو سمحت...
حمدان: ليش تامرين علي تعالي خذيه ارووحج...!!.
نورة: حمداااااااااااااااااااااااان.. ...
صرخت نورة عليه لانه قاعد يغايظها ويقهرها...وهي بروحها مب متحمله زياده...
ظحك عليها حمدان من خاطره..
حمدان: عشان ثاني مره ماتحطين دوبج من دوبي تحملي...فكري مرتين قبل ما تتنقرشين بي..
نورة: يابوك ادري والله بس نسيت افكر مرتين بسبب اللي فيني...خلاص تووبه مابرمسك...
حمدان: انا بسير..
نورة: سيير..
حمدان: باي..
نورة: الله وياك..
طلع حمدان من البيت..داخل البيت عشان يواسيها قامت هي تتقحطن عليه هو...لو مادخل احسن..

مرن هالاسبوعين ونص بدون ما اي واحد فيهم يرمس الثاني او يقوم باي خطوه بانه يراضي الثاني... لانه كلهم عنيدين...وكلهم تيوس على قولة حمدان اللي عيز منهم...خبر حصه بالسالفه عشان يمكن تقدر تصلح بينهم بس خليفه قالها لا تدخل بين أي حرمه وريلها لانه اذا صارت مشكله والا شي بيقولولها انتي قلتي وهو مايبالها المشاكل..مع ذلك حاولت مع اختها واستفسرت عن الموضوع..بس نوره كانت صامده على رايها....
وبناءا على هالموقف..سعيد مايلس فبيت عمته يوم وصلوا العين..حجز في فندق روتانا اللي بييب نوره فيه بعد العرس وسكن هناك...وهو كان مظايق حده.. من الموقف نفسه...ومن فكره بانهم بيعرسون وكل واحد منهم زعلان عالثاني...
كان في النهار يسير بيت عمته...يتم مع عبدالله وحمدان وهو يتابع ترتيبات عرسه اللي بيكون على يومين... كانوا حاجزين الصاله اليديده اللي جدام الميدان..عرس الريايل بيكون الاربعاء..وعرس الحريم الخميس...امه وعمته اهتمن باغلب التفاصيل ماعدى تفاصيل الفرقة مالت العياله وغيره..اللي المفروض هو سعيد يهتم بها..وفعلا حجزها من فتره ثلاث اسابيع وتم تجهيز كل شي...حتى ادق التفاصيل..على كثر سيراته فبيت عمته لين الحين ماشاف نوره ..ولا هي حاولت الظاهر انها تشوفه...وهالشي زعله زياده...حمدان قاله انه نوره زعلانه وايد بسبب تفكير سعيد بالغاء العرس...لكنه هو مافكر جديا بهالشي..ولا بيفكر بعد انه ينفذه.. هو بس عصب والواحد يوم يعصب يقول رمسه مايعنيها...يعني هي ماتعرف هالشي.؟!!..

اما بالنسبه لنوره فكانن الحريم والبنات حواليها يزنن مثل النحل...لدرجه انهن مايخلن لها وقت للتفكير حالها حال أي عروس...المشاوير والخطط ماتخلص..ودايما دايما وراها شي معين تسويه لكن اللي كان يظحكها اكثر شي هو فطيم اللاصقه على الدرايش ومن تشوف طرف كندوره حمدان تي لنوره تربع شفته وشفته..وعلى ويهها احلى تعبير..

يوم الاربعاء دق حمدان باب غرفه سعيد..على امل انه يشوفه جاهز عشان يطلعون مع بعض ويروحون الصاله اللي بيستوي فيها العرس...فتح سعيد الباب وانصدم حمدان...
حمدان: شووووووووووو هذا ياخي ليش مب جاهز..؟!!!..
كان سعيد بعده بوزار وفانيله وشعره مب مرتب...دخل حمدان ورا سعيد الغرفه...
سعيد: مالي مزاج..
حمدان: شووو مالك مزاج اليوم عرسك..
سعيد: ادري ياحمدان ادري...
حمدان: يالله بسرعه ادخل تسبح وتلبس خلنا نطلع...
يلس سعيد على الشبريه متظايق..
حمدان: شو بلاك؟ شو فخاطرك قولي.؟!..
سعيد: مب قادر افكر بالعرس ونوره بعدها زعلانه...لا اتصلت ولا شي..
حمدان: كنسلت هي العرس؟؟
سعيد: ..... لا..
حمدان: عيل مب زعلانه عليك...
سعيد: بس هي زعلانه انا ادري...حد يعرس والعروس زعلانه عليه كد شفتها هذي؟ وتقولي قوم تلبس؟..وين ارووووم.؟!!...
تافف حمدان وتلفت حواليه لين ماحصل ظالته...مسك تيلفون سعيد وعطاه اياه في ايده..
حمدان: اتصل بها الحين..شي وقت..
سعيد: ليش انا اللي اتصل.؟!!..
حمدان: لانك اعقل عنها...ولانك انته المعرس...ولانك بعد الريال وهي الحرمه خذها على قد عقلها لانها بنظرك زعلانه..راضها قبل ماتعرس خلصنا...
فكر سعيد شوي وهو يطالع تيلفونه..وبحركات بطيئه حرك صبعه الابهام وهو يدق على رقم نوره ويتصل...مامرت ثانيه الا وكان يبا يكسر التيلفون وعلى ويهه تعبير عنيف...
تحرك حمدان بسرعه وخذ التيلفون من ايده...
حمدان: هااااه....!!..شو بلاك..؟
نش سعيد من مكانه ومشى بعصبيه في الغرفه...
سعيد: .....مــــــــغــــــــــــلــ ــــــــــق....!!!...
حمدان: انزين بتفجه عقب وبترمسها...يالله عاد سعيد ...خلصنا ادخل تسبح خلنا نسير...
تافف سعيد وشل الفوطه وثياب داخليه نظيفه ودخل الحمام يتسبح...في هالوقت اتصل حمدان بعنود..
عنود: مرحبااا..
حمدان: هلا عنووود...شحالج؟
عنود: بخير والله شحالك انته براااذر.؟؟
حمدان: نشقح وننطح...اقولج..وينها العروس؟
عنود: شو تبغيها؟
حمدان: انتي قولي وينها؟؟؟
عنود: تتحنى..
حمدان: اهااااااااااا...ومتى بتعق الحنا؟...
عنود: مادري يمكن المغرب عشان يسود...
حمدان: اهااا اوكي خلاص عيل فمان الله..
عنود: مع السلامه...
سكر حمدان التيلفون ويلس يتريا سعيد يخلص..وطرت على باله فطيم..من طلعت من الجامعه مارمسها ولا طرش لها مسج ولا هي طرشت..لانها ردت بيتهم...لكنه مرتين دخل على نوره وهي ترمسها واحيانا كانت تسمح له يسمع صوتها..لكنه مع ذلك متوله عليها موووت...مسك تيلفون سعيد وبدا يفتش...مسجات وايد من نوره ومن ربع سعيد ومن حمدان نفسه...بس ثلاث مسجات من فطيم واستانس يوم حصلهن...هو اصلاماسك التيلفون يفتش عليهن بالذات..
طلع سعيد من الحمام وهو ينشف شعره وعلى ويهه تكشيره...
حمدان: نعييييييما يالمعرس...
سعيد: .... الله ينعم عليك...
وسكت سعيد...واطالع حمدان بنظره لها معنى وابتسامه جانبية...
سعيد: عقبالك....
ابتسم حمدان بخجل لاول مره في التاريخ..وارتبك ..
حمدان: الله يسمع منك... يالله تلبس خلنا نطلع..
لكن سعيد ماتحرك...كان يطالع حمدان بنظرات متفحصه...وطول على هالحال... لين ما ارتبك حمدان صدق وللحظه شك بانه سعيد كاشفنه بانه يتواصل مع فطيم بالمسجات...لانه الانسان اللي مسوي شي غلط دايما دايما يكون عايش في خوف بانه امره ممكن ينفضح في أي لحظه...
حمدان: شو بلاك؟!..
ابتسم سعيد وقال..
سعيد: افكر..حمدان...من وين تعرف باخبار فطيم.؟!..
انصدم حمدان وقلبه تم يدق بالقو...
حمدان: اخبارها؟ ...
سعيد: لاني اعرفك حمدان مافي شي يردك... ولك فتره طويله طويله من صارت السالفه... مستحيل تكون ماتعرف عنها شي من ذاك الوقت..!!!..
حمدان: احم... مابجذب عليك...انا اسال نوره عنها دوم واعرف اخبارها منها...بس..
حمدان كان متوتر وخايف حده كانه واقف على دبوس ومتحمل..سعيد يعرف؟؟؟ يعرف والا مايعرف؟؟ لا يكون قاعد يختبره ويلعب عليه.؟!!...الله يستر..
اللي مخوفنه زياده انه سعيد تم ساكت وهو يطالع حمدان بنظرات غريبه...
سعيد: نوره وبتعرس وبتسير ..من وين عقبها بتعرف باخبارها.؟؟!!..
حمدان: الله كريم.. بتريا نوره لين تي في الزيارات وبسالها هههههههه...
الظحكه كانت من دون نفس...طالعه غصب عشان يخفف من توتر الجو...
سعيد: بتصبر.؟!!..
حمدان: عشان فطيم اكيد بصبر..
سكت سعيد فتره ثانيه وبعدها ابتسم وحط ايده على جتف حمدان..
سعيد: اذا كنت تباها وتحبها لهالدرجه...الله يكتبها من نصيبك ان شاء الله..
تفجر شعور عنيف فصدر حمدان من فرحته... سعيد عطا موافقته..!!... شي يبشر بالخير...واندفع لسعيد ولوا عليه بالقو...
حمدان: مشكووور والله ياسعيد...والله انك شيخ....
وابتعد عنه ..وعلى ويهه احلى ابتسامه...حتى سعيد كان مبتسم وشكله مبسوط على وناسه حمدان...
سعيد: قول هالرمسه لبنت عمك العنيده...
وابتعد سعيد للخزانه وطلع كندوره نظيفه يلبسها..
حمدان: تعال صدق.. غالقه التيلفون لانها يالسه تتحنى...اتصلبها المغرب بترد عليك...
سعيد: ولاااااااااا بتصل...خلها تنقع ...
حمدان: ههههههههه افااااا... ياريال بتنزف باجر لها وتقول خلها تنقع؟!..
سعيد: محد قالها تفهم غلط وتزعل...
حمدان: كلكم فاهمين غلط...المشكله كل حد يرد عالثاني واحسن شوي تسووونه انكم تنسوون السالفه هذي وتسولفون عادي ولا كانه شي صار...
سعيد: يصير خير..
بعد ماخلص من العقم راح للمرايه وكان بيتسفر لانه ناوي يلبس سفره وعقال المسا بعد المغرب...مب من الحين لكن حمدان نط فحلجه...
حمدان: لا يا ريااال..خلنا نكشخك انته معرس...
قعد حمدان يسولف عليه ويخفف عنه عشان يبعد الظيج...لبس سعيد السفره والعقال وتكشخ..وتسبح بالعطر...
حمدان: اسمع..اذا بترد هني بعد المغرب انا اقترح عليك تشل شنطه وياك وتحط فيها كندوره ثانيه لانه هذي احتمال تخيس..انزين وفوطه وكل شي تحتاجه لانه هناك في الصاله شي غرفه للمعرس بتحط فيها اغراضك وبتتسبح وكل شي مافينا نرد هني...
سعيد: صدقك والله..
نفذ سعيد اللي قاله حمدان لانه عملي اكثر..وطلعوا وراحوا للصاله وبالتحديد المساحه المخصصه للرزف وغيره وين بيكون العرس ..وحصلوا هناك ام خالد مع ام فيصل كانن داخل الصاله يشرفن على العشا والتجهيزات في المطبخ.. وبرا جدام الصاله حصلوا بو فيصل مع فيصل وعبدالله.. اللي قالهم ان خالد وصل اليوم الصبح وهو في البيت يرتاح حاليا والعصر بيي يحظر العرس..لانه ياي مخصوص لاخته عشان ماتزعل وتقول حظر عرس حصه الا انا ماحظر عرسي...
من الساعه خمس والناس تحظر.. اهل سعيد ومعارفه في الشارجه ودبي...كانوا وايدين اكثر عن مايتصورون.. وعنده ربع وايد من بوظبي ودبي والشارجه حتى من راس الخيمه عنده ربع وكلهم حظروا عشانه.. ويوم شافهم نسى شوي الهم اللي فيه وبدا يرتبش ويحس بعرسه... وحمدان ماقصر معاه..يسير ويرد عليه.. كانه من خوان العروس..ماجنه ولد عمها...
خليفه مرخص حرمته طول اليوم عشان اتم عنداختها وفوق هذا تبات عندها وهالشي اللي كان قاهرنه.. اول مره يفترق عنها من عرسوا..لكن ماعليه هيه ليله ان شاء الله وخلاص...وعلى هالحال لحقهم المغرب للعرس وهو كاشخ..
بعد المغرب بشوي راح سعيد لغرفه المعرس داخل الصاله وبدل ثيابه وتنعنش شوي وتكشخ مره ثانيه... مسك تيلفونه واتصل..مايقدر يقاوم..لازم يرمسها..هذا عرسه لازم يتطمن ويرتاح باله... لكنه يوم اتصل حصله مغلق للمره الثانيه... مات قهر..شو سالفتها هذي كله مغلق..؟؟ اكيد ماتباني ارمسها... حشى مايسوى عليها زعل هالكثر..برايها خلها تولي... ماتبا ترمسني..!!..انا بعد مابا ارمسها..
خش التيلفون في مخباه ورد طلع للمعازيم يتصنع الفرحه ويحاول ينسى "التيس العنيد" على قولة حمدان..صدق انها عنيده مثل التيس..!!!..

اما نوره فكانت مظلومه...ادور تيلفونها من اصبحت ولا حصلته... بسبب ربشة البنات والحريم ماتعرف تيلفونها وين طاح.. فكرت تتصل برقمها عشان يصيح وتحصله وين هو لكن يوم اتصلت حصلته مغلق وتذكرت انها امس في الليل اغلقت تيلفونها قبل ماترقد...وين راح من امس لليوم وييين.؟!!!...بعد ماعقت الحنا المغرب..كانت خلاص ماوراها شي ثاني تسويه طول الليل...فتمت مع الاهل تسولف وتظحك... فكرت تتصل به من تيلفون البيت بس البيت متروس حريم وكلهن ازعاج مابتقدر تركز..عقب تراجعت وفكرت بانه هو حاليامستانس اكيد بالربشه هناك ومافيه على حشرتها...
فطيم يت ويلست عدال نوره في الصاله الساعه 8 ونص المسا..
نورة: حصلتي تيلفوني.؟!!..
دارت فطيم بعيونها..
فطيم: لا ماحصلته...
نورة: شو بلاج مرتبشه.؟!..
فطيم: ياختي مابين اليوم...
ظحكت نوره.
نورة: تلقينه ويا سعيد مرتبش..مب كل يوم العيد وتشوفينه كفايه عليج الثلاث ايام اللي طافن حوالي 100 مره شفتيه...
فطيم: حرام عليج ماشبعت...
نورة: لو تجابلينه يوم كامل بعدج مابتشبعين..
فطيم: والله انج صادقه...
طبت عليهن عنود ويلست وياهن...
عنود: منو هذا اللي مابتشبع من شوفته.؟!!..
بطلت فطوم عيونها...اووووففف لو تدري عنود ان فطيم تحب اخوها شو بتسوي؟!!.. توترت ولا قالت شي..بس نورة ظحكت وقالت..
نورة: ههههههه ممثل هندي شارتله فلم يديد ولا يابته وياها من الشارجه ..احين تقول متولهه عالفلم..
ظحكت فطوم وكفخت نوره على راسها...جان حمدان استوا ممثل هندي احين.؟!!...
عنود: ههههههههه طالع.؟!!..قسم بالله انتن والهنود مادري شسالفتكن...!!!..حصوووه تعالي سمعي..
يت حصه ويلست وياهن هي بعد.. وفي ثبانها هلال الصغير ولد عليا... اللي بدا يمشي الحين..
حصه: شوبلاكم؟
عنود: يقولولج فطيم تصيح متولهه على شوفة ممثل هندي في بيتهم..عندها شريط يديد اون..!!
حصه: ههههههههه لحقتي اخوج انتي.. يتحظى يوم يشوفني حاطه قناة الهند..!!..
عنود: لا حول ولا قوه انتي بعد.!!..انا قلت عقلتي عن هالسوالف...
حصه: ههههههههههه لا نحن مانتوب.. حب الهنود في دمنا..ههههههه..
عنود: وووووووه الله لا بليتنا ياربي...
نورة: ههههههههههههههههههههههاي.... عنود اشوفج استويتي عيوز... ماشي في الطريج..؟؟
غمزت نورة لعنود..وانحرجت عنود واحمر ويهها... وفطيم اطالع نورة بنظرة كانها تقول شوفي اشاعتج يابت لنا سوالف وسوالف..!!!..
حصه: شوخصج انتي شي في الطريج والا ماشي..؟
عنود: يخصها وابوي..؟!!..انا بنت عمها وريلي اخوها ..لا فديتج لين الحين ماشي في الطريج...
نورة: وانتي حصيص؟؟
بطلت حصه عيونها..
حصه: حسبي الله على بليسج على شو مستعيله انتي..؟ انا تووووني...
نورة: ماشي بس ابا اشوفكن امهات قبل ماروح عنكن الشارجه..
عنود: هههههههههههه فيوم وليله تبانا امهات...ماعليه بتشوفين يوم بتردين من شهر العسل بسالج نفس السؤال..
نورة: ههههههههه خسكن الله..
انحرجت نوره غصبن عنها مع انها بالعاده قوية ويه... بس دام السالفه فيها سعيد تنحرج غصبن عنها....آآخ ياسعيد..شكثر احبك...
في هاللحظه ماتحملت...الا تكلمه...لازم تكلمه... استاذنت منهن وركبت فوق.. لازم تحصل هالتيلفون البلية اللي ماحصل يظيع الا اليوم...وبعد ثلث ساعه دواره..حصلته اخر شي في حجرة حصه.. الله اعلم منو فارنه هناك... اكيد حد من اليهال اللي يتراكظون شرق غرب...واستانست يوم حصلت التيلفون شلته ودخلت حجرتها وقفلت الباب..فتحت التيلفون واتصلت بسعيد..زعلان والا راضي ..غصب تكلمه..مب على كيفه يقعد يتزعل عسب سالفه تافهه..والليله عرسهم.. مايصير يتمون متزاعلين من بعض...
اتصلت.. وتريت وتريت وتريت.......

سعيد كان ماسك التيلفون ويطالع كلمه " حبيبتي" المطبوعه على شاشه التيلفون.... احين اتصلتي؟؟ من متى ادقلج واحين تفيجتي ادقين.؟؟ ... كان زعلان.....وده يرمسها...لكنه يكابر... في النهاية مارد عالمكالمه لين ماسكرت نوره من نفسها...ويوم وقف التيلفون عن الرنين حس بشي غريب...كانه ولاول مره يتوله على رنه التيلفون ومايباها توقف...زعل من خاطره...لكنه هو السبب..ليش مايرد...
يا حمدان ووقف عداله وهو يكلمه لكن سعيد ماسمعه ولا فهم حرف..كانه يتكلم ياباني...
حمدان: شوووووبلاك.؟!!...
التفت له سعيد محتار كيف يجاوب..لكن ولفرحته الغامره قاطعه التيلفون ..رفعه وشاف "حبيبتي" للمره الثانيه...ماياست..مصره تكلمه مثل ماهو كان مصر يكلمها...قعد يتامل هالكلمه فرحان بظهورها على الشاشه الصغيره.... وتاخر بالرد... فسر حمدان تاخر سعيد بالرد بانه تردد..يوم قرب راسه شاف الكلمه سحب التيلفون بسرعه ورد عليه..
حمدان: مررررحبا بالعروووووووووووس مرحبا الساع هلا والله...
عقد سعيد حياته معصب من هالتدخل...لكنه ماتحرك...ودار بنظره على الرياييل اللي يرزفون واللي يسلمون وكل المعازيم..لكنه اذنه وقلبه وانتباهه الكامل كان عند حمدان...

عقدت نورة حياتها..
نورة: حمدان.؟؟!!!!!!!!...
حمدان: هي نعم انا ولد عم العروس وربيع المعرس....شحالج؟
نورة: بخير..!!!!..ليش سعيد مايرد عالتيلفون؟ وينه..؟!!..
حمدان: ريلج زعلان ويكابر...
برطمت نورة.
نورة: ادريبه...
حمدان: لا..هو زعلان لانه تيلفونج كان مغلق..من الصبح يتصل يبا يراضيج بس يحصله مغلق ..
نورة: قسم بالله انه كان ظايع وتوني حصلته....من اصبحت وانا ادوره...
حمدان: اهااااااااا والا جي السالفه...انزين هذوووه قوليله هالرمسه...باي..
وحط السماعه على اذن سعيد وعطاه التيلفون وراح عنه عند الشواب اللي يالسين يسولفون...
ارتبك سعيد يوم حصل نفسه بروحه فجاه... لكنه مازال صوته مسموع لاي حد يقرب منه..وعشان يتكلم مع نوره يحتاج لعزله...تحرك ومشى صوب الصاله عشان يدخل غرفة المعرس ويكلمها بهدوء...
سعيد: لحظه شوي..
وصل بعد دقيقه الغرفه ويلس هناك ..
سعيد: آآلوووه..!..
غمضت نوره عيونها من سمعت صوته الملهوف...يالله شكثر اشتاقت له ولصوته...
نورة: هلالا بالمعرس...
ابتسم سعيد..
سعيد: مرحبتين الساع... شحالج؟
نورة: بخير...الحين بخير...
ابتسم سعيد مب عارف شو يقولها...حس انه رجع لايام اول قبل مايعترف لها بحبه وقبل مايتطورون...وتتوضح الامور بينهم... وسكت..
نورة: سعيد... صدق انته زعلان لانه التيلفون كان مغلق.؟!!..
سعيد:..... هي.. اتصلت كذا مره..قلت ماتبيني ارمسج...
نورة: لا والله حرام عليك...كان ظايع طول اليوم...امس قبل مارقد اغلقته ورقدت ويوم نشيت ماحصلته وتوني بس حصلته في غرفه حصه مفرور...
ارتاح بال سعيد من هالناحيه..يعرف نوره مابتجذب عليه عشان تصلح الوضع لانه دايما اهم شي عندها هو الصراحه...في كل شي..
سعيد: اهااااااا...
نورة: بعدك مظايق.؟!!..
سعيد: والله ماعرف...انا من يومين مب في حاله مابغي اعرس واحظر عرسي وانتي زعلانه علي..
نورة: انا مب زعلانه عليك..ادري فيك عصبي..لكن حطيت بخاطري من ذيج الكلمه..
سعيد: اي كلمه..؟!
نورة: بانك اقترحت علي نلغي العرس...
سعيد: والله ماكنت اعني كلامي وانتي تدرين شكثر كنت اتريا هالعرس واتمناه..
نورة: ادري..بس مهما كان...الكلمه تجرح..
سعيد:......... آسف...حقج عليه...
ابتسمت نورة..
نورة: اعتذارك مقبول.... احين طاح الفاس فالراس...صح.؟
ظحك سعيد..
سعيد: هههههه صح...الله يعيني عليج...
نورة: والله يعيني على عصبيتك.....
سعيد: على ايدج بتخف ان شاء الله...
نورة: الله يسمع منك هههههه...المهم..يعني خلاص...راضي علينا؟..
سعيد: اهم شي رضاج انتي....
نورة: انا ماقدر ازعل عليك اكثر من يوم...
سعيد: .........
نورة: شو بلاك ساكت...
سعيد:......احبج...قسم بالله احبج...ولا يهون علي زعلج...
ابتسمت نوره وحست بويهها حااار ...
نورة: حتى انا والله....
سعيد: عيل ليش مااتصلتيبي طول الاسبوعين اللي طافن.؟؟؟
نورة: عشان تتوله علي..!..
سعيد: رديييييييييييييييينااااااااااا ا..!!!!!!!!...
نورة: ههههههههههههههههههه...
سعيد: ويا هالويه...
نورة: ايواا ..ايوه طلع طلع يالمعرس..سبني بعد في ليله العرس..
سعيد: قسم بالله براويج باجر...
نورة: هههههههههههه اتريا اللي بتراويني اياه على قولتك..
ابتسم سعيد...
نورة: خلاص انا بخليك رد على عرسك احين... وانا بنزل عندهم تحت بتعشى...
سعيد: اووكي عيوني...مشكورة عالاتصال..
نورة: العفوو ولوووووو...يالله فمان الله..
سعيد: مع السلامه...
واخيرا يقدر سعيد يتنفس ويستانس بعرسه...خش تيلفونه في مخباه وطلع برا وهو ناوي يعبر عن فرحته عدل الحين..




--------------------