مطعم سبازيو في برج المملكة بالرياض

السلام عليكم ورحمة الله


مطعم سبازيو

المطعم موجود في الدور السابع و السبعون (77) في برج المملكة (يعني أنت و السحاب جنب بعض)pb027


أمس بالليل قررت ادلع المعزبة و أوديها لم مطعم جديد فكان اختياري لمطعم سبازيو على انه من أفضل المطاعم في مدينة الرياض.

اتصلت على المطعم من العصر (هذا تلفونهم 2111888) و حجزت لي طاولة على الساعة 9 بالليل.

توكلت مع المعزبة للمطعم و بعد ما عدينا حقين التفتيش اللي يغثونك و يخلونك تفتح كبوت الموتر و شنطته لأنهم خائفين انك حاطن قنبلة (ما يدرون إن المرتبة الخلفية ممكن يحط تحتها طن متفجراتpb034 ) ، و سفطت قدام مدخل برج المملكة و ما دريت إلا و ذاك الهنديين ناقزين و احد منهم فتح باب المعزبة و الثاني فتح بابي (ترى كل هذا بسبب اللون العنابي للهوندا) ، يوم نزلت من السيارة ما دريت إلا و الهندي مطلع لي كرت اصفر و بعدين راح و ركب في مكاني في السيارة ، الحقيقة إنا طارت عيوني ، صحيح إن الهوندا تأخذ العقل بس مهوب إلي درجة انه يسرقها و إنا واقف قدامه ، سألت الهندي وش السالفة فقال لي انه بيروح يوقفها لي ، فبكذا تطمنت شوي.

دخلنا البرج و سألت عن المطعم فدلوني طرقة ، يوم وصلت عند الاصنسير اللي قالوا لي عنه نقز لي واحد ثاني بس المره هذي كان سعودي لابس ذيك ألبدله الكشخة (انا حسبته صاحب المطعم) فقال لي "عندك حجز" فقلت له أكيد ، سألني "وش اسمك" فقلت له يعني ما عرفتني "إنا اسبرانزا ولد أبو اسبرانزا رد على و قال " ونعم ، تفضل".

رحت للاصنسير و ضغطت الزر حقة و قعدت انتظره يؤصل ، راحت دقيقة و بعدها دقيقة ، و صارت الدقائق تجر الدقائق و فكرت اهون عن السالفة و ارجع للبيت ، بس ما أمداني أقرر إلا و باب الاصنسير يفتح و يطلع لي ذاك الهندي اللي كاشخ أكثر من الثانين.

المهم بعد ما رحب فيني و حب خشميpb027 ضغط على زر الدور 77 و شوي ولا الاصنسير يمغط ذيك المغطه اللي حسيت معها إن مصاريني طلعت من مكانها ، يعنبو هالاصنسير كان في كل ثانية يعدي حدود أربع ادوار.

خلال دقيقة وصلنا للدور 77 و فتح باب الاصنسير ، اول ما طلعت مع الباب و تنسد اذاني كاني توي نازل من طيارة (هذا لان المكان مرتفع) توجهت للمطعم و لاقاني واحد هندي كاشخ أكثر بزود عن اللي قبل و سألني إذا إنا أبي القهوة أو المطعم ، قلت له المطعم فوداني لمه ، يوم اقبلت على المطعم و ينقز لي هندي ثاني (يا كثر ما يتناقزون هالهنود) و قال لي "السيد اسبرانزا ولد أبو اسبرانزا" إنا طارت عيوني وشلون عرف اسمي حتى اني شكيت إني لين الحين معلق الإثبات حق الدوام ، بس يوم تاكدات اني ما كنت ناسي بطاقة العمل على مخبات ثوبي قلت له ايه إنا اسبرانزا (طبعاً بغيت اسأله وشلون عرف اسمي بس قلت لنفسي يا ولد اركد).

قعدنا الهندي الكاشخ على طاولة في وسط المطعم ، بس قبل ما نقعد نشبت فيه المعزبة و قالت له إن ودنا نقعد جنب الشبابيك الكبيرة اللي تطل على الرياض ، طبعاً الهندي عيا و قال إن الجلسة جنب الشبابيك يبي لها حجز خاص و لازم نكون على الأقل 5 أشخاص ، عاد توقعون المعزبة تركته ، لا والله نشبت في حلقة و بغت تخبطه بشنطتها (هي قشرا الله يخليها لي) إلا إني هديتها و وعدتها إن إحنا نجيب أمها و إخوانها المره الجاية عشان نصير أكثر من 5 أشخاص و يقعدونا جنب الشبابيك.

جاب لنا الجرسون قائمة الأكل على لوح قزاز ياله يشيله الرجال من كبره (إنا استغربت وشلون ما طاح البرج من ثقل قوائم الأكل حقتهم) ، تصفحت قائمة الطعام و كان عندهم بس 3 أنواع شوربة فيها ، شوربة بحرية و شوربة ربيان و شوربة قرع (والله مال امها داعي شوربة القرع).

إنا و المعزبة ما جاز لنا شي من الشوربة فحولنا علطول على الدسم ، أكثر ما لفت نظري سالفة أكله عندهم من فخذ خروف يقولون أنهم يطبخونها لمدة 7 ساعات (يعني لو اطلبها ما تجهز إلا بكرة).

لفيت على القائمة كلها فجازلي شرائح لحم العجل المشوية بالزبدة و 20 نوع من التوابل و كان اسمها دايلا ماما ، إما المعزبة فطلبت نوع من المكرونة الايطالية.

طبعاً طول الوقت كان الجرسون واقف على بعد كم متر مننا و يناظرنا و الظاهر يقول في نفسه وش جابنا للمطعم حقهم ، المهم ما أمدانا نحط قوائم الأكل على جنب إلا و نقز لنا الجرسون (ما قلت الكم يا حبهم للمناقز) و سألنا وش نبي نأكل و نشرب.

إنا طلبت لنفسي ببسي دايت (تراني حريص على رشاقتي) بسعر 10 ريال و المعزبة طلبت لنفسها عصير أناناس بسعر 16 ريال. و طلبت إنا اللحم حقي اللي كان بسعر 80 ريال ، إما المعزبة فيوم طلبت طلبها اقترح عليها الجرسون تأخذ صحن فيه ثلاث أنواع من المكرونه فوافقت (طبعن عرفت بعدين إن سعر الطبق حقها كان 90 ريال.)

سألنا الجرسون إذا نبي سلطة أو شوربة مع الأكل فقلنا له لا ، فقال لا لازم تطلبون ، إنا سألته إذا الشوربة من ضمن سعر الطبق اللي طلبناه فقال إيه. لذلك إنا طلبت لي الشوربة البحرية و المعزبة طلبت شوربة القرع.

جابو لنا الشوربة اللي كانت كل وحده منها في صحن صغير كله سبع ملاعق ولاه قاضي و جابو لنا معها خبز (الحقيقة خبزهم كان رايق.

بعدها بحدود العشر دقائق جابو لنا الطلبات الرئيسية ، الحقيقة اللحم حقهم كان مهبول و من جد لذيذ على الأخر ، و نفس الشي ينطبق على المكرونة.

نسيت أقول لكم إن الببسي اللي جابوه كان في كاس صغير ولا يجي ولا نصف العلبة الحقيقية حقت الببسي لذلك طلبت الببسي 3 مرات لأني كنت اعتقد انه بيكون ببلاش.

خلصنا من أكلنا و طلبنا الحساب.

الحساب كان 358 ريال و من ضمنه 50 ريال رسم خدمة ، و الأكثر من كذا الشوربة حقتهم اللي ما تجي ربع علبة ببسي كانت بفلوس ولا هي ببلاش ، وكان سعر كل وحده منها 50 ريال.


بعد ما دفعنا الحساب و دعينا على المطعم و مسكنا الباب مرينا لنا على فوال و أخذنا لنا تميسة و صحن قلابة بخمسة ريال لأننا ما شبعنا من الأكل في المطعم أبو 358 ريال.

هذا باختصار كان تجربتي في مطعم سبازيو و انصح كل واحد يقضب ارضة و يأكل فول أحسن له. الا اذا كان توه ماكل و الفلوس مضيقة عليها فممكن يروح ينقرس (يمزمز) عندهم على الاكل حقهم.


ملاحظات :

المطعم بديكوراته كان خيال.
كانو مشغلين موسيقا خاثرة في المطعم.
اكلهم جداً ممتاز
اغلب اللي كانوا في المطعم كانوا حريم.
كان يفضل انه يكون عندهم قسم منفصل للتدخين لان الحريم اللي كانوا في المطعم ذبحونا بدخانهمpb094 .


لكم الشكر و التحية

الغالي ابو ياسر

الموضوع رائع كالعادة

الله يعطيك العافيه وبانتظار المزيد (علشان تعزمني كل مرة)

[ثار التميميه]

خخخخخخخخخخخخخخخخخخخ

اجل ياشذا مستانسه انتي على هالمواضيع

مشكور ياسبرنزا على النصيحه

وبصراحه رحله ممتعه بس تقهر اللي نهايتها فول وتميس

[ثار التميميه]

حلو حلو

يعني ماتنصحنا بالمطعم

شكرا لك على النصيحه

ومافيه احسن من الزبادي على العشاء

هههههههههههههههههههههههههههههه ههههههههههه
هههههههههههههههههههههههههههههه ههههههههههه
هههههههههههههههههههههههههههههه ههههههههههههه
هههههههههههههههههههههههههههههه هههههههههههههه

والله موضوعك موتني من الضحك
بس تراني للحين حيه تلسع
ههههههههههههههههههههه

بصراحه موضوع مسلي وبنفس الوقت فيه النصيحه

يعطيك العافيه يا.........
اسمك صعب اكتبه

هههههههههههههههههههههه

[الريم]

اخوي الكبير اسبيرنزا الرائع دائماً

يسلموو ويعطيييك العاااافيه على الموضوع الحلوو

وسمعت عنه هالمطعم كثيررر بس مشكلة هالمطعم يااخيي انه بدون بارتشينز وان الي يروحون له اغلبهم مو عشان ياكلون عشان يترززون ويتفرجون على بعض ,,واغلب المطاعم الي بالاوتيلات كذا

عاد المره الجايه لا تنسوني مروني ابي اطلع بموضوع المطعم الجااي:d

[بليهان]

احسنت
ولاهنت
تحياتي

[طويق]

مشكور
على ما افدتنا به
تحياتي

[طويق]

لك الشكر
على ما فاض به قلمك
تحياتي

[الحويطي]

خالص الشكر والتقدير
على كل جهودك الرائعه
تقبل اطيب التحيه