قالوا عرب قلت العرب ماضيٍ فات

[الطائر المهاجر]

قالوا عرب قلت العرب ماضيٍ فات = يوم الرجال رجال مبدا وعقيده
يوم ان واحدهم يلاقي الوفات = ولا هاب غير اللي صدوقٍ وعيده
حتى زهى بالمجد عصر الفتوحات = وسادوا جميع الكون باحلا نشيده
الله اكبر .. مالك الملك بالذات= وغيره ولو وصل القمر من عبيده
واليوم ماني شايف إلا زرافات = طوال الرقاب وما تشوف الضديده
وسباع تنهش في جسدها بندبات = والدم ينزف ما توقف وريده
وحصانيٍ تجتر غدر وخيانات= وطيور بحرٍ جت من ارضٍ بعيده
وتسابقٍ في رفع اعلا العمارات = من كل واوي ما تعب في رصيده
ومشيٍ مع اللي يرسموه الخواجات = باسم الحضاره في نواحي عديده
وفتح المجال لكل غاوي ملذات= باللي يسهّل من شراب وطريده
حتى غدا العربان في حكم الاموات= اجساد ماتشعر بحر الوقيده
وصار العرب قسمين لو كانوا اشتات= والفرق واضح ف الحياة الرغيده
عشره بميه متخمٍ ف الملذات = اما البقيه في حوالٍ زهيده
ولاعاد باقي غير هم وحسرات = في قلب من لاشي يفعل بإيده
ماله جدى ياكود ينظم ف الابيات = يرثي زمانٍ ما ظهر به وليده
يجمع شعوبٍ فرقتها المتاهات= يطمع بها اللي ناويٍ بالمكيده
بعضٍ تشرد والبعض في مجاعات = لوهو بأرضٍ في ثراها عتيده
وبعضٍ ولو مستور حاله فلابات= مشغول فكره كيف يحيا حفيده
لا من خلص بترولنا في سنوات= خمسين مازادت ولا هي مديده
تقرير ما جاء من ظنونٍ وهقوات= يعرفه من يقرا حروف الجريده
من اجل هذا خطط الغرب بالذات= وغزا العراق وصار عمه وسيده
وانحى على الافغان لو شاف ويلات= ارض بها الثروات لكن عنيده
ثمٍ على السودان تقسيم واشتات= يدري جنوبه فيه ثروه مفيده
يمشي ورى الثروات خلف الشعارات= الخادعه لاهل العقول البليده
ولانّا ركضنا خلف جمع الريالات= من دون ما نبني عقولٍ رشيده
تصنع لنا اللي يدفعه ف الملمات= صرنا تحت رحمته واللي يريده
يالله ولا غيرك عليم الخفيات = ترأف بأمه في حوالٍ شديده

[نجم الإبداع]

امين

صح لسانك يابو عبدالله

آهات وحسرات ودعوات مستجابه ان شاء الله

لاهنت

تقبل مروري

وتقديري

[عبدالعزيز العمار]

الله الله ياالطائر

صح نظمك وفكرك

جزل في طرحك وصدقت فيما قلت

تحياتي وتقديري

[سناعيس]

صح لسانك يابو عبدالله
قصيدة طيبه وجزله
من شاعر جزل
حكيت عن واقع الحال
لاهنت

تحياتي

[منيع]

الشاعر لسان قومه
اجدت وابدعت ولاكن القوم في سبات عميق
شكرا لك ولحرفك المعطاء
تحياتي

[حرف وشعر]

امين يارب

الطائر كم انته مبدع ومقنع


حتى زهى بالمجد عصر الفتوحـات
وسادوا جميع الكون باحـلا نشيـده
الله اكبر .. مالـك الملـك بالـذات
وغيره ولو وصل القمر من عبيـده


والنعم بالله وصح السانك يابعدي

[عبير الورد]

صح لسااااااانك ملايين
سلمت وسلم منطوقك الجزل
ربي يعطيك العافية

[الراقي]

صــح لـســـآ نــك ملألألألألأ يــن ولألألألألألأ هــنــت00

[حوريه]

يالله ولا غيـرك عليـم الخفـيـات
ترأف بأمـه فـي حـوالٍ شديـده

آآآآآآآآآآآمين
مالنا الا الله سبحانه
صح قلبك وحرفك على ما أبدعت
تقديري لك

[عبدالعزيز الرقابي]

الله عليك يابو عبدالله .. صدقت وصدق شعرك
صح لسانك قصيدة وافيه وشافيه

اسمح لي بتسجيل اعجابي

شكري وتقديري