قصائد صوتيه

[عبدالعزيز العمار]

الطيب مـع مـن لايقـدّر سذاجـه=كم واحد من طيبته داسـه النـاس
وطيبٍ بليّا قيـاس اكبـر سماجـه=فوازن امورك كل شيٍ لـه قيـاس
ولا شفت منهو يعاملك في هواجـه=باسباب طيبك فاقلب الوضع ينحاس
ولا من عرفت اللي قليـلٍ يواجـه=يضحك بوجهك غير ف الظهر ملاس
فابعده عـن دربـك بليـا لجاجـه=مثله حقود وجالب لكـل الاتعـاس
ولا من ذكرك اللي يـدوّر لحاجـه=من بعد نسيانـك فـرده بالافـلاس
ولا تنخدع باللي طليـقٍ احجاجـه=لا من سمعته قلت معدنـه المـاس
انظر لفعله تكتشـف وش خماجـه=ترى الحصاني تغيّر لباس بلبـاس
واحذر من اللي ماثبت في مزاجـه=كل يوم والثانـي تلاقيـه محتـاس
عواطفـه تحكمـه طايـر عجاجـه=يومٍ يثق بك وآخـرٍ فيـه اوجـاس
ورجل مهفّه ما عرف وش خراجـه=ودّك على علباه يكـوى بمحمـاس
تعبت انـا والفكـر زاد انزعاجـه=واعلنت حربي للحصاني والانجاس

للشاعر/ الطائر المهاجر

[سناعيس]

قصيدة الطائر المهاجر
(الله من ضيقة بالصدر مخفيها)
بصوت سناعيس

الله من ضيقةٍ بالصدر مخفيها= من حر ما اوجس يبوح القلب باسراره
ازريت اقاوم ولا ادري وش تواليها= دنيا بها اللي بعقله قلّوا انصاره
من وين ماوجّهت تعصف بلاويها= الصبر كمّل ولا باقي سوى امراره
من بعد ماني جبل دنياي قاويها = اليوم ضعفي بدى ما اتحمل الغاره
لو يضبط العقل نفسي في خطاويها = يجي البلى من بعيد ويعصف اعصاره
في وقت فيه الخلايق لو تداريها= طمعوا بك اكثر وكلٍ طالت اشباره
فالمصلحه هي هدفها اللي يمشيها = ومن لا لقوها معه ايقلّ مقداره
حتى قريبك غدا يخيّب هقاويها = لا شاف ما بك فوايد بانت اكداره
ومن فوق هذا نفاقٍ في نواحيها = نضحك على بعضنا في غش وتجاره
وين القيم والعقيده وين راعيها= وشلون صرنا ضماير كنها حجاره
نسخر من الغرب واوضاعٍ يعانيها= لأنه بلا دين يحكم منهج افكاره
واليوم اوضاعنا مهما نخفّيها = اسوأ من الغرب مهما زاد فجّاره
في الغرب كلش وضوحٍ ولا يواريها= وحنا نخبي نخاف الناس في اظهاره
ولا نخاف اللذي للنفس باريها = ونفخر بأنا خيار الخلق واطهاره
السيل جارف تحت تبنٍ يغطيها= ومصيرنا لا استمر الوضع باخطاره

[سناعيس]

أضحك مع الناس - للطائر المهاجر
بصوت سناعيس
http://www.fatahilah.com/showthread.php?t=17658

اضحك مع الناس واخفي ما يعنيني = ومن شافني يحسب اني داله(ن) سالي
ولا صرت وحدي لفى حزني يخاويني= كنه مكلف من الايام بوصالي
آه(ن) على آه من حرات تكويني = تلسع على القلب لسع الداب يبرالي
اجر صوتي ولا القى من يواسيني= كني كسير(ن) يصوت في الخلا الخالي
الله يا دنيتي ليه امتحنتيني = وش عاد باقي تخبي لاحق(ن) تالي
من وين وجهتها ترجع وترميني = بسهم(ن) على القلب حطم كل آمالي
الوقت ماهوب وقتي لا تضديني = مقدر اساير زمانٍ فيه إذلالي
الله خلقني من احرار الشياهيني = كرامتي عزتي في راسي العالي
مقدر اوطيه لو وقتي يجافيني= وحتى ولو شفت ندباته على عيالي
اصبر واصابر فلا الرحمن ناسيني= في يوم تفرج ولو طول بي الحالي