الشاعر العميد / خالد البليهد ،

[داعي الشوق]

هذه قصيدة من الاوراق القديمة

وجدتها بمكتبة والدي يرحمة الله

وهي للشاعر العميد / خالد بن حسن البليهد يرحمه الله ،

عندما دخلت والدته للمستشفى آنذاك

حيث كان من أقرب الناس لوالدي حتى وفاته ،

،،،،،،،،،،،،،،،،،،،،،

قال الذي يبدع مع القاف ما طاب = وقافٍ بلا معناه وش ينبغابه
القاف حاضر والمثايل لها اسباب = مثايلٍ شب الحشا بإضطرابه
مثايلٍ دسمات و إجزال و اعذاب = وكلٍ على معناه ورّد جوابه
اللي جرى يوم المقدر وقع صاب = الوالدة واللي جري له وصابه
أمسيت من كثر الهواجيس مرتاب = وقمت أتنخى كل من لي قرابة
أريد انا الفزعة لها طب الاعصاب = والطب عند الله سريع الاجابة
نخيت مانع وقال حاضر ولا غاب = رجلٍ وله قيمة وعزم ومهابة
رجل رقا بالمرجلة راس مرقاب = يفعل جميل ولا يحسّب حسابة
رجلٍ بنى مجدة بالارقام وكتاب = يوم ان خطو اللاش يفقد صوابه
يوم ان خطو اللاش صد وهبا وخاب = جنّب عن الماجوب عمد و خيابه
ننخى بعال الصوت يسمع ولا جاب = ينسى الجميل وبيت عز ربابه
يوم انقفل كل النوافذ والابواب = طلبت رب العرش ما صك بابه
ونخيت انا بليهد عريب الانساب = فرخ القطامي يعجب اللي عدابه
من راس ناصر عز من جاه ومنصاب = ناصر بن رسام ذيب الذيابه
ناصر وله بالمجد منبر ومحراب = وحياة من نزّل علينا إكتابة
يهل العقول الراسية يهل اللباب = حيو إعتيبة نعم والله لابه
وحيو ولد ناصر بليهد بعجاب = اللي لفعل الطيب يتعب إركابه
اللي وقف موقف رجولة ولا هاب = للوالدة جاب الدواء والطبابة
الامر هان وزال همي والانشاب = بجود ابو ناصر على الله ثوابه
يوم استمرت بالاداوي والاطباب = وكلٍ تذكر دورة اللي سعى به
جينا العميد وقال للجود طلاب = انا ولد سلمان الفٍ هلا به
الشيخ ابو سلطان للجود كساب = رجلٍ اليانـّه قال علمٍ وفابه
ثم إعتزي سلطان شبلٍ من الغاب = عرينهم فيه الذرا والدوا به
سعود بن سلطان و اخوه الاحباب = أخوة خالد ماكرٍ ينهقابه
ماكر أحرار ان كنت للخال نساب = أشيوخ الرجال وعز منهو لجابه
أهل الفعايل والمهند والاطواب = ليا إشتبت الهيجا وزاد التهابه
اهل الكرم والهم مصّوت ونبّاب = هم مزبن الخايف وسقم الحرابه
الياما غلبك الوقت والوقت غلاب = فإزهم اشيوخ القوم تلقى الذرابه
ويزول عنك الهم لو ماله احساب = لو كان همك ضايق الحشا به
و النعم بالمسعود كفٍ ومخلاب = فهد يحوش المرجلة ما يهابه
ما هي غريبة و ابن الاجواد ما عاب = فهد فهد ونعم بفهد مرحبابه
فهد ليا عدو طويلين الاشناب = رجل وله كلمة وحزم وخطابة
عنوان خير وفيه خير وترحاب= بالمركز الطبي عزيز جنابه
له التحية عد ما صب صباب = من مزنة سيّل مطرها الشعابه
المرجلة ما بين شاري وجلاب = و عزي لمن ما حاشها في شبابه
ما هي بفزعاتٍ بسيفٍ ومشعاب = لها طريق بيّنٍ يندرابه
من عاشر الابطال يضحك له الناب = و من عاشر الانذال ماله مثابه
حمدت ربي حط لي عز و اركاب = في ماقفٍ ما كل حي هقابه
و موقرٍ بين ربعي و الاجناب = من فضل رب البيت منشي سحابه
من فضل رب البيت والنور شباب = نور السعد هني رجلٍ سرى به
الله يجازي كل شاقي وتـّعاب = اللي حضوره نايبٍ عن غيابه
تنشر له البيضا على راس ديراب = المرقب اللي زاميٍ عن اهضابه
أقولها للجيل واللي بالاصلاب = و تاريخنا يشهد على ما جرابه
إحترت يوم الوالدة جاه مضراب = أصابها جرحٍ عميق وسطابه
طلبت رب البيت ما دونه احجاب = بالسر والاعلان والملتجابه
الشافع النافع وهو رب الارباب = يا بخت من عينه معه و التوا به
لو كان جونا الناس فزعات و اسراب = ما وصّلوا علمٍ وهو ما نوى به
الحمد له والشكر في كل الاوجاب = مشفي المريض بحكمته و اعتنابه
مار ابشري يالوالدة ربنا جاب = جاك الفرج والخير والرب جابه
عندي خبر ما فيك خوفٍ ولا ارهاب = ايمان قلبك بالقدر و احتسابه
حقٍ نقوم بواجبك بين الاصحاب = و يضا نوريك الغلا واللبابه
حبك بنى له بالحشا بيت و عتاب = يالوالدة لك دعوةٍ مستجابه
حشمه وتقدير و عز وتلباب = ومن لا يقدر والده و ا عذابه
نخفض جناح الذل بارفاق و آداب = و لآ نوكل واحدٍ بالنيابه
وهنٍ على وهنٍ تشيلك بالاسلاب = عامين تشرب درّها والغذا به
حقه علي بين النواجد و الانياب = حتى تطيب من المرض و اكترابه
بأقدامها الجنة و ريحه والاطياب = يالله عساها ما يخيب الرجابه
يالله تشفيها لنا وانت وهاب = يالله تمنحها الشفا واتهنابه
لو كان حنا روسنا صلب واصلاب = نحطها للوالدين إنحطابه
والعذر لهل الجود شبٍ وشياب = من قيل ابو فرحان وصف ودعبه
الشعر و ان هاضت قوافيه وانساب = احاول انه يعجب اللي قرابه
ليا افتر في صدري ثلاثين دولاب = الشعر سيفٍ قاضبين انصابه
يارد على قلبي من القاف هنداب = روابع ٍ باع الحشا و اشترابه
ما ني من اللي هرجته بين الاطناب = الهرج عندي له دليل ورقابه
الطيب لو هو بيع واتجارةٍ عاب = الطيب لهل الطيب عزم و صلابه
من دور ابونا آدم ترى الطيب له باب = والمرجله بين القبايل إنهابه
و اعداد من طاف المشاعر ومن تاب = و اعداد من حج وتقلد إثيابه
صلاة ربي عد ما هل سحّاب = على محمد سيدنا و الصحابه

[نوف الخالدي]

القدير \ سعود العتيبي

نقل ثري جداً
رحم الله الشاعر ورحم الله والدك ياسعود وأسكنهما الرحمن فسيح الجنان آمين


ذائقة رائعة وإختيار مميز لشاعر قدير ومتمكن ذو حكمة الرجل الكريم المعطاء

رحم الله الشاعر \ خالد بن حسن البليهد وأسكنة فسيح الجنان

من الإبداع من الشعر عذراً أستاذي سـ أضيف لة قصائد هنا لـ تعذرني

.
.

قصيدة خالد حسن البليهد - رحمه الله - الوداعية



بديت باسم اللي له الحمد والثناء
الخالق اللي عالم بالسريرة
اللي رفع سبع السموات بلاعمد
أبدّي اسمه قبل ما ابدأ بغيره
وخلاف ذا بديت بدع المثايل
مثايل فيها المعاني كثيرة
سميتها باسم الوداع وبنيتها
وداع شيخان وصحب وجيرة
وداع يادار الجنوب العزيزة
دار الكرم والطيب باحلاك ديرة
دار بها كسابة الجودوالثناء
سيفين من @-@@-@@-@ السيوف الشطيرة
خالد بن فيصل مقدّي جموعها
حلاّل صعبات الأمور العسيرة
حلحيل ماينحال سوء على العدا
غيث الرفيق وعون من يستجيره
خالد من أوكار الحرار المحنكة
مفراص ماص مايجبّر كسيره
والمنطقة في عهد خالد تقدمت
وفيصل لعسرات المعاني وزيره
فيصل مقدّيها اذا غاب خالد
واذا حضر فيصل عوينه شويره
أهدي لهم كلمة وداع نبيلة
ولا اعتبرها الأولة والأخيرة
لكن من زائد غلاهم وحبهم
ماكنّته نفسي يبين تعبيره
وادعتهم والقلب متأثر بهم
حسب الأوامر جعل بالأمر خيرة
جتنا الأوامر والأوامر مُقدّرة
أقدّره وأقدّر اللي يديره
وافخر بتعييني على أعز منطقة
دار بها راعي الفعول الشهيرة
عبدالإله أمير دار نصيتها
عقاب الطيور اللي بعيد مطيره
خدمة إبن عبدالعزيز افتخر بها
ولي الفخر ماهي عليّ بقصيرة
حسب الأوامر وإقتضاء صالح العمل
صدر قرار الأمن وأمضى مديره
وسقنا ركايبنا على نية السعد
من بيشة الفيحاء ومكرة حريرة
مكرة بساتين بها الزرع والنخل
وطاحونها يلعب بجمة غديره
من بيشة الفيحاء سقا جوّها المطر
ومن الوسم تسقيها الوسوم الغزيرة
دار لنا فيها عزيزين وأصدقاء
عملنا بها عزم وحزم وغيرة
وعزّ ونوماس وأمانة وتقوى
ومن واجب المسؤول يحفظ مسيره
أوادع دوائرها على الطيب والنقا
كل الدوائر والعيون السهيرة
وداع بعد تسع سنين قضيتها
كسبنا معرفة كل قائد عشيرة
عرفنا الصعيري جارنا في محلنا
سلولي وشيخ للوجيه السفيرة
وعرفنا إبن لزهر والقبيلة معاوية
شيخ وله قيمة وعزم وبصيرة
وعرفنا ابن شكبان معرفة أهل الوفاء
شيخ على الرمثين شيخة جديرة
وعرفنا كبير أكلب بوادٍ وحاضرة
عبدالله عطيان زبن المغيرة
وعرفنا الفويه زيزوم لطّامة العدا
بني واهب ماتطلب الخصم جيرة
وعرفنا عمير اللي تسمى به القرى
من الحيفة الخضراء الى ضلع خيرة
وداع لشيخان القبائل وقومها
من لسان بو فرحان واقصى ضميره
شيوخ تعزّ الجار والضيف والخوي
وعليهم فراق الجار صدمة كبيرة
وحنّا وهم في راية المجد والعلا
بظل العلم من يوم صقر الجزيرة
اذا مادعى الداعي بنرخص عمارنا
ندوس الأفاعي والدروب الخطيرة
نحب القيادة والقيادة تحبنا
لاغاب شيهان تقدّم نظيره
نصون الأمانة في عملنا وديننا
عهد علينا حافظين مصيره
نحافظ على سنة محمد وحكمنا
شريعة سمحة وحق وبريرة
على فطرة الإسلام من كبر حظنا
يعيش الفهد فينا يقود المسيرة
ويعيش أبو متعب وسلطان درعنا
اذا ولّّعت نار المعادي الذخيرة
ونايف وزير الداخلية ونورها
عسى الله من سوء المنايا يجيره
وأحمد عضيد له على الكود والرخاء
عضيد السعد سمّ الكبود الضريرة
وختامها أزكى صلاة على النبي
رسول الهدى عبده بشيره نذيره
.
.
.



وهذه أبيات من قصيدة طويلة قالها بمناسبة التقاعد يرحمه الله:


اليوم يسوى كل ماضي زماني *** زاد الفرح واهتنا البال
اكبر سرور وفرحة في مكاني *** بشرى التقاعد زادني شوق وامثال
جانا التقاعد قلت ربي عطاني *** اقضي توال العمر في زين الأعمال
هذي مقاصد خاطري والتماني *** من بعد ماخفيت من شيل الاثقال
وهذا شبابي للعمل مرجعاني *** أدى الأمانه مابها قيلٍ وقال
اكملت بالماجوب عهد ولاني *** خدمة وطن مخلص بقولي والأفعال
واللي وراء قلبي يجيبه لساني *** يحماني الله ما بقى ربع مثقال
يحماني الله بالخفا والبياني *** الواحد اللي عالم غيب الأحوال
صبرت في وقت القسا واللياني *** وجملت باحوالٍ جديدات واسمال
واليوم جاك الخير يا مودماني *** اضرب فجوج الارض ياطيب الفال
اطلق سراحك ياعريب المجاني *** فكر وبكر واذهب إيمين واشمال
وسير على دار الاهل والعواني *** والى اعترضك الهم فارمه على الجال
وقلط دلال الهيل والزعفراني *** وافرح الى ما جا البيت ضيف له اشغال
واغنم توال الوقت والعمر فاني *** كلٍ عن الدنيا مسافر ورحال
ومن لايفيد المرجله والحساني *** حتى ايش لو عنده ملايين واموال
الى أن قال:
والضيف نرمي له كبوش ٍ سماني *** الى جض عن درب الوفاء خايب الخال
الضيف يلقى المكرمة والحناني *** خص الى جانا من البعد هشال
الى أن قال:
وإن جا لزوم للوطن ما نثاني *** حنا على راس العمل وان بدا حال
قريب للداعي الى بان شاني *** ناقف الى قمنا مواقيف الابطال
ربعي هل الجوبه طوال اليماني *** بالجوف وسكاكا كريمين الأسبال
وادي النفاخ موسعين الصياني *** اكرام اللحى والمجد يبقى للاجيال
وباقي قرايا الجوف قاصي وداني *** وقارا وهل قارا لهم قدر وجلال
قبايل الجوبه وفوا بالمعاني *** ما طاوعو بالمرجله كل عذال
يوم الشجاعة واشهب الجبخاني *** مضى لهم صوله وجوله ومدهال
يروون بالواجب شباه السناني *** لطامة العدوان والخصم لا عال
الحضر والبدو متساوياني *** الكل منهم له مع الجود منزال
الله كفيلي والصحيح إيحداني *** ياعل يسقيها من الوبل همال
يمطر على اللبه سحاب الغشاني *** تعلّها الرحمه عشيه ومقيال
بين الدقيقه سيّلت والثواني *** يعلّها الوسمي من الوبل عماّل
ويمطر على خوعا وذيك المحاني *** والتلعه الدنيا وكبدٍ والاجلال
ويمطر على زلوم وصوير زاني *** وهديب زان وسيّل الضلع وارمال
ويمطر على العوجا ربيع ايهناني *** ويمطر على الهيله ويمطر على قيال
ويمطر جنوب وغرب والخير باني *** والجوف ركّب فوقه غيوم وخيال
ويمطر على الخنفه وذيك المثاني *** مرباع معبسة الشمايل والاذيال
تنبت به الربله مع القحوياني *** تلقى نبات القاع راوي وميّال
واشغار سال من المطر ريهجاني *** والطرش ربّع بالحيا عقب الامحال
هذي ديار حبّها في كياني *** لو رحت عنها حبّها دوم في البال
احبّها حب ٍ قديمٍ وذواني *** أحبّها وحب شوفه والاطلال
احبّها حب المطيع المداني *** أحبّها دار الجمايل والافضال
انحيت والماجوب عنها نحاني *** احبها كل ما بدا الشهر بهلال
حب الوطن فرضٍ علي ما خفاني *** حب الوطن فرضٍ على كل رجّال
وايوم في عهد الرخا والاماني *** عهد الفهد عهد السعد عهد الاقبال
المملكه نجمه تعلاّ وباني *** انجازها من هوله الفكر يهتال
الخطه الاولى صدر به بياني *** التنميه نوره لنا يشعل اشعال
هني بيت الله ومن جاه عاني *** هني بيت الله وبشرى للاميال
والنايب الاول وسلطان ثاني *** الكل منهم للصعيبات حلال
ولي عهد المملكه صيرماني *** تنشر له البيضاء على راس ماطال
ان جا نهار فيه شد الرهاني *** درع الوطن في كل حلٍ وترحال
واكتب نصايح والنصايح إثماني *** هدية للجيل شيبان وِ عيال
تراثنا وسلومنا يا خواني *** إسلوم ماضينا لها قيد وعقال
يوم المكدّه والشقاء والسواني *** قاموا بها الاجداد بعززومٍ إجزال
اوصيك بالتقوى بيانٍ عياني *** تفوز في زين العمل ما به اشكال
تفوز بالجنه اذا الرب عاني *** تفوز بالجنات والمنزل العال
الله خلق لك باليدين البناني *** مدبّر خلقه لما راد فعال
والبِر بالوالد نزل بالقراني *** في محكم التنزيل طه والانفال
من هو بحق الوالدين استهاني *** شقي بالدنيا وبالنار نزال
والجار جارك لا يجيه امتحاني *** إحشم قصيرك لا يجي له غثا بال
الجار عن جاره يغض العياني *** في عورة الجيران لا تطيع الانذال
وحذرا ترافق واحدٍ قلّباني *** رافق صليب الراي للشور فتّال
وهرج النميمه جنّبه يا فلاني *** هرج النميمه بالقفا فعل ختّال
والبخل جنّب سكته والجباني *** المرجله مابين شاري ودلاّل
وناسب صليب الراي خطو الحصاني *** رجل يهابه باللقاء كل ريبال
رجل الى اشتد الحقب والبطاني *** من اللي يفكون السلاسل والاغلال
يجي الولد صاروم لا صرت واني *** خصٍ الى صار اللغا والحمر سال
النصح ما يخفى الرجال الذهاني *** والهادي اللي في يده علم الاجال
ومن عاش بالدنيا بذل وهواني *** ما عاد تسوى عيشته قرش وريال
وصلاة ربي عد ما النجم باني *** واعداد مايمطر على القاع هطال
واعداد من صلى وصام رمضاني *** على رسول الحق للخلق مرسال

.
.
.

زهور إعجابي وتقديري




......

[داعي الشوق]

يعطيك العافية يا ضي الخواطر

و مشكوورة على إتحافنا بهذه القصائد الجميلة و المؤثرة ،


ألف تحية لك مع التقدير

،،،،،،،

[الطامي]

داعي
صح فكرك اخي
وصح السان الشاعر البليهد
ورحم الله والدك الذي حفظها
شكرا لك على نقلها وأمتاعنا بها
ولاهنت

[ماجد الزيد]

سلمت يابو سعد سلمت ودمت يالقرم انتظرتها بشوق لله درّك
ولا تبخل علينا بمساجلاته مع الوالد رحمة الله عليهم جميع
صحححححححححححح كلك افداك

[حوريه]

رحم الله شاعرها
وتسلم يد ناقلها
شكرا لك ياابو سعد
والشكر موصول لـ ضي الخواطر على الأضافه
ورحم الله والدك ووالدي وجميع موتى المسلمين
دمت بخير

[ياسر عبدالرحمن الخالدي]

رحم الله شاعرنا ووالدك وجميع المسلمين احياء واموات,,

اذا كان عندك شئ لا تبخل علينا به يابو سعد

[داعي الشوق]

هذه القصيدة للشاعر / سعد بن منير العتيبي ،، والدي ( يرحمه الله )

رداً على قصيدة الشاعر العميد / خالد البليهد

وهي ليست كاملة حيث وجدتها ورقة واحدة و مذيله بـ عبارة .. يتبع

وقد بحثت عن قصيدة الشاعر خالد البليهد هي الاخرى

التي بنيت عليها القصيدة التاليه ولم أجدها ايضا ،

و سأعآود البحث لعلي أحصل عليها ان شالله

،،،،،،،،،،،،،،،،،،

ألف هلا في خط ذيب الذيابه = حر الحرار الخالدي ذخر الاجواد
خالد ابو فرحان جاني كتابة = هداج تيما اللي للاجواد ميراد
راع الوفاء والطيب نزهٍ جنابه = كساب قولة نعم رسات واجداد
ترفع له البيضاء بعالي هضابه = النايفات الشامخة فوق الاطواد
ريفٍ مريفٍ مشرعٍ دوم بابه = ما صك بابه عن مسيّر ونشاد
قولة هلا حياك يا مرحبابه = تكفي منه والله عن الشرب والزاد
يقري ويذري من مقام ومهابه = راع الفرس والسيف والرمح واشداد
قالوا لي الحساد ويش تهقابه = قلت أشهد انه للمواجيب سداد
لاني ولد عمه ولا من قرابه = لكن انا للصدق والحق عداد
ذخر الخوالد والا انا من عتابه = لا جا نهارٍ فيه عرضات واطراد
ما قال فيما راح لا واسفابه = يعرف ويدرك منتهى العمر الالحاد
درب الردي ما قط يوم مشابه = ولاهوب في شذب القفا يوم منقاد

[حي الضمير]

رحمهم الله جميعآ واموات المسلمين
وبيض الله وجهك شاعرنا سعود على توثيق مثل هذه القصائد
التي بالفعل تعد ثمينه
ولاهنت

[ياسر عبدالرحمن الخالدي]

ونعم في عتابه ربع ونسابة

والله يرحم والدك وابن بليهد رحمة واسعه