ملحمة جبريل وعامر وابليس الكافر

[ماجد الزيد]

http://www.youtube.com/watch?v=fwQLK4noAXM

ابليس فيه من البشر بعض حاجات=وعلى الجحود / أغلب هل الأرض جاء له
ماخذ من الرّهبان كبْر وطفاسات=وماخذ من الالحاد وضع الطماله
ونا وهو بالحرب حرب الخلافات=حقٍ تبدّآلي وهو ما بداله
حزبي هل المصحف وحزبه هل اللات =لكن ليا قبّت , لحالي قباله
متخالفين وبالخلاف العداوات=هو مْغرور وبي غرور الشكاله
يا ما نصحته عن طريق الضلالات=وياما دعاني في دروب الجهاله
انا ذهين ولا أرتكبت الحماقات=وهو خبيث وفيه زايد خباله
وآحب جدّي هبس شيخ المروّات =من زود عشقي له حياتي سهاله
على سلوم الطيب عايش سهالات =وسوّ الدّهر ما لاحقن بي خماله
الحمدلله واثقٍ حيل بالذّات =و راسي ما فوقه غير ربّي ونا له
اللي يحبّ اسمي يحبّ السماوات=والي أحبه نعمةٍ له وصاله
من عاش / ما أركز له على سهيل رايات =ماهو كفو دوس الثرى وانتعاله
أحدٍ يمر بساع ويموت بسكات =وأحدٍ يموت وكل حيّ(ن) بكاله
أحدٍ حياته بين عبرة وآهات =وأحدٍ رمى همّه على الله شكى له
أحدٍ يعيش ويآهب العميْ ومضات=وأحدٍ حياته لا دعى للرذاله
يمنى بخفى تعطي جزيل الكرامات=واخرى تمدّ الطّيب / مثل النذاله
آدم يزل ويرجع الذّنب حسنات=وابليس غلطاته لحدّ الثماله
نفس الكبير , هموم نفسه . كبيرات =ونفس الصغير همومها , بالحثاله
والي على حقّ وعلى خير واخبات =الله فزع له بالنِّجَد والكفاله
النّية البيضاء بظلّ الصلاوات=جبريل في قلب النقيّ احتمى له
يا مطرق(ن) سمْعك , مع الخير قوّات=جبريل ميكائيل كل ٍ سعى له
الي هقى بالله فلا تخيب هقوات=سهم أوليائه صاب قبل ابتلاله
ما تخطي الدعوة كبود الإصابات=لكنّها بتدبير منشي ثقاله
الي على نيّة ينال الفتوحات=واللي على وجهين مالك وماله
هذا الزمن حقق جميع النّبوءات =وكبر العقوبة فيه , معنى العدالة
يالله تكفيني جميع المضرّات=ويالله تهديني طريق الرسالة
مالي ومال الناس قتلا وإصابات=وبين العمامة والغمامة زمالة
حرب ٍ ماهي حربي يا روس العصابات=مالي بها ناقه وموتوا ضَلالة
دام الرعاع تسير خلف القناوات=مسكين شال الذنب كتف البطالة !
كل ٍ يعلقها بحيط الحكومات=كنّ الشعوب أطهار والملك ! حالة !
جنّب دروب الشّر وأهل الدعايات=وعنهم جموع النّاس هاك الإحالة
بين البشر قصّاب مغتاب من فات =إن ما ادرك المقفي / كلى من ظلاله
ومن بينهم نِمِّة كثير العلاقات=وجه البشوش وقلب وصخ الثعاله
الليث ما تكثر حواليه الأصوات =وعادة كبير التّيس حول الرّغاله
عمر ال بن آدم لو يُعَمَّرْ , فلحظات =من عاش مات ويوم فايت , نعى له
مرّت عوام وكنّها حرق شمعات =ما كنّ مرّت من سريع العجاله
وليا كسى راسك هك الثّلج لا تبات =إلا على التوحيد والدين فاله
كم واحد ٍ قفّت سنينة سريعات =حلل حرام وضايع ٍ عن حلاله
يا أهل الونيت الي طويتوه كشّات=طاوين وادي ثمّ وادي خلاله
هاكم كتاب الخالدي جزل الأبيات =متعب هل القيفان شيخ الجزاله
ماجد حمد بن زيد راع الطويلات =مستعبد القيفان لا ركز عقاله
الي يوردهن كحمر الجنيهات =صرف المعاني جاد فيها خياله
دوكم كتابه مسّكه مسك وآيات =كلّه لعينا آخوه بأقصى شماله
سلام يا شيخي قبل كل ما آآآت =سلام يا حر ٍ جناحه وفا له
يا لحر يا ابن الحر دكاك الازمات =الكايدة تركع لرآسه وآله
الي مضرّيني طوال ٍ منيعات =الي مدرّبني على العز طاله
قرم ٍ عسفني للمراجل وثم بات = مطّمّن(ن) باللي على القوّ باله
ابوك ناقي محزمك بالثقيلات=قبل الولد ناقي من قروم خاله
انا بطوع آخوي ليث المهمات =الحيدر الهصْور على ما طرى له
هذاك لوّ الوّقت كشّر . سلامات =ليث الليوث الأصبحي لا نوى له
يابو حمد منّي خذ الجزْل ثم هات=صح الله لساني وعطني مثاله
حّرك على اللي كن راسه زرافات=متزرفلات القيظ هبّ الهوا له
عملّسي لا دزّ جاب البعيدات =سحمان نابه فيه كل الغذا له
تقول طرّادٍ بحرب المحيطات =كول انتهت مع كبرها من هباله
أو هو زمل ذودٍ حُمرْ صيعريّات=يهدر وترغي دون ساقه جماله
معروف ما يُسمّى وصوفه فريدات=جنّي تحدّر من نجيب السلاله
وعن جوف زعبل والديار الأصيلات =خبّر عسى الوسمي طرب في قياله
عسى الديار الي ربتنا بخيرات=وعسى قنوف الغرب يسبق هماله
وعسى الربوع مذيّرين الصعيبات=فجاجة البيبان بأطيب مقاله
يا مرحبا مليون معها التحيّات =حيّ الذي طابق كلامه فِعاله
الشاذلية بعد قدع الحليّات=والحيل ويّا العود الأزرق دَلاَلَه
وتلقى العلوم الغانمة والرّوايات=و الدين والنّاموس ثوبه وشاله
بين النخل ومسوبعاتٍ عزيزات=تلقى السّيوف الباتعة بالعْضَاله
شيبانهم طيب وكرامة وفزعات =وتلقى الفتى كنّه شجيع الرّباله
الجوف ربعي / والخوالد , فجينات =والربع والجينات , قلبي مئآله
يالجوف لا تمشين خلف المحطّات=تريّضي , دام الحضارة مَغَالة
والله يا بيت الطّين بين النخيلات=يسوى القصور المتخمة بالفسالة
ابليس وش يعمل ؟ , ووزنه بذرّات=حنّك ملايين ٍ وكردس تِلاله
يا ابليس أنا ويّاك والوقت دورات=عامر عتقْه الله وفكك حباله
يالخارجي مذهب وقلبك دناوات=لا أنت بشبيب ولا أنت حتّى غزاله
الطيب بك ضايع كما الضّبع تقتات=فسْل ورجيم وجيش جنّك غسالة
لابوك لابو فاقدين الشهامات=مافيكم الي يرفع الراس فاله
عِبّادت الدرهم حجيج الرّيالات= نظرة حديكم ما تعدّا رياله
قفّل ولك ميسور قدْم الغلاقات=من تاه يا علّه يردّ الدْلاْلَه
من لا تعلآ في السنين الشديدات=وقت الرخا ماينفع الدون ماله
والي عتق ماله وقفّاه منّات=رخيص ماله بالخوانيق غاله
الطيب كايد والعوالي منيفات=كم ماجدٍ مطلوبه العزّ ناله
المال نِعْم ان حالفته الزكاوات=واعط اليتيم , الخير منه تناله
والفزعة الغرّا مثل بعث الأموات=تحيي هشيم الدمدمي للكلاله
عدو عيني لانخوه القرابات=ذيخ ٍ يهزّ الذيل والراس ماله
حي مهبول ٍ لاطُلب قال هي جات=صميدعي زوّد هباله جماله
تلمع عيونه كالسيوف الصقيلات=هادي ولو تقفل من طويق شاله
حليم يغفر كل ما شاف زلات=والبعض من حقده يوصّي عياله
دواس ظلمى وللرخوم الرخامات=الي سوالفهم يقوله وقاله
حدهم علومه ناكسات وغبيات=والمعرفة . ماهناش ، غير الضحالة
المعرفة وردين ، كتب ومشبّات=علم الخفايا مع علوم الأصالة
الاوله تعطيك حال الدويلات=والثانية منها تحوش الجِماله
العلم ماهو علم أهل الشهادات=راسه تعرْف الله جلَّ جلاله
الواحد المعبود رب البريات=الغافر التواب علّي فدا له
هو الرحيم اللي عذابه برحمات=يغيث مشتاق ٍلربّه لجى له
وهو الكريم الجود جوده جزالات=منشي السحاب بكل ودّان ساله
وهو الودود الحيّ , والغير مُوَّات=الوارث الباعث وهو في كماله
ياذا الطبيب الي تعرْف الإجابات=الموت شافه كان عندك شفاله
للموت ما تنفع جميع العلاجات=غير الذي نور النبي فيه هاله
يشتاق للميعاد يوم السَكَرات=اللي لطــه حنّ , قبل انتقاله
الموت معبر للديار الفريدات=حرّيّة المؤمن وساعة نواله
الموت . خافه من يحبّ الملذات=يهنى بخراب . ومن وعى ما هنى له
الموت ما عنّه طرق واتجاهات=جهّز رحيلك عن رحيب الهماله
ترى الذي فرّق وشتّت جماعات=تلّ القروم ودسّهم في رماله
دنياً تسحِّر للفتى بالغوايات=سلعوة ٍ تُوري الحكيم اختلاله
كم قفّت بشيخ ٍ يدينه قويّات =تنهب نهيب الذيب رغث الصخاله
ملعونة ٍ ما دام فيها مسرّات=ما تُضحك إلا حزنها فوق جاله
باسم اللطيف دموع عيني شفيعات=يرحم مُحبّه بالفعل والمقاله
الي عشق طه على ذكره يْبات=لا من طراله صاح . لامن طراله
صلى الله وبارك بعدّ المجرات=وعدّ المطر منشاه ، قَطْر ، ومساله
وعد الخلايق ، ضعفها ، والجمادات=على النبي محبوب روحي وآله

[حوريه]

ونعم بك وبربـعـك يا ماجد
قصيده شامخه كشموخ شاعرها
صح لسانك مليون ولا يكفون
دمت ودام المدام.

[داعي الشوق]

صح لسااااااااااانك

يبي لها جلسه القصيدة و بيالة شاهي يا بو حمد

لاهنت لاهنت يا مبدع

تحياتي لك مدد

[الطامي]

الزيد
فعلا ملحمة وقمة لافض فوك اخي
هنا استاذ الشعر
هنا استاذ الجزاله
هنا الحبك والسبك وان طالت ابياته ازددنا اشتياق له
صح السانك ولاهان فكرك
شكرا لك اخي

[حي الضمير]

ابدعت وامتعت وعواااايدك شاعرنا النجم ماجد
ومدد صح لسانك ولافض فوك

[منيع]

ممتع وجزل وعملاق
لي عودة مرات ومرات
شكرا لك
تحياتي

قصيدة رائعه كروعة فكر صاحبها

لافض فوك ويعطيك العافيه


تحياتي وتقديري

[عبدالله الشويمان]

كفو كفو والله يا ابو حمد..تجيب ازود

وصحالله السانك وكلك..يا النشمي..

والجزاله ما تفاختك يا ابوحمد..لله درك.
دمت بخير وصحه وسلامه..

[فايز بن جبيل]

ماجد صح اللسانك على هذه المعلقة يا جزل

تقبل ودي وتقديري

[سعيد عوده الحويطي]

لله درك ماجد الزيد على هذه الملحمة الشامخة التي لايكتبها الا شاعر متمكن ومبدع ومتميز لك كل احترامي وتقديري