ثورة إسقاط النّظام

[ماجد الزيد]

ليتك بحدّي ياليلى مع الليل الطويل=منّي لك الفين عام ٍ ومنْك الفين عام
مبسمك لا صار قلبي من همومي عليل =يجلي اللي زوّده فكري الساطي ضرام
ليتني في عام بدر أو أحد مرمي قتيل=من قبل وقت الخوارج وأشياع الامام
لا يزيد احكم على الامّة الدين الهزيل=ولا الحسين افداه مقتول برماح اللئام
يالحسين الحقّ ماله بعد قتلك دليل=والله اللي شرذموا دين جدّك يالهمام
سنّة وشيعة ويقدح فتايلهم عميل=امّة ٍ من نبل الافرنج صارت كالنعام
دنّي ياليلى وهاتي عن المنطق بديل=الوتر ضربه على هْموم هالعالم حرام
كيف ابيّنها وهي شمس من بعد الاصيل=ماتبي حجّة يالولا العقول بْها انفصام
ليلى صيحي بْلابتي من على ذاك الدّبيل=وكل مسلم لابتي من جنوب اوهو بشام
ردّوا لدين النّبي و ذلك العصر النبيل=يوم وجهك يا بلال ٍ مثل بدر التمام
النّفوس انقى من الماء الفرات السلسبيل=والقلوب اطهر من الغيم لا خالط جهام
العيون تقول طفْل ٍ ضحك عض الشليل=الصدق يومه ملاها هزم كذب الكلام
مسلمين وخلّها يابعد ميتي تحيل=يا عساهم فدوة تراب طه من أنام
ايه شفته نور والدّمع بعيونه يسيل=باخع ٍ نفسه على أمّة ٍ كلْها نيام
يا عمر ما والله إنّا يابو حفص ٍ قليل=الا من آمن وهو مطمئن وفي سلام
تايهيييين ونرمي البلوى بالحكم الهبيل=وتوهونا زود في ثورة اسقاط النظام
كنّك اللي تشوفنا وتنظر الحال الذليل=نحنُ قومٌ عزّنا الدّين ومن غيره حُطام
البلى يا تاج راسي هُبل عالم جليل=يتبعه غلمان بخشومهم خنّة زكام
وين اسجّ بهمّي وكل وجهه له نزيل=لا ببطن شعاب سالم ولا عند المقام
هدهد سْليمان عوّد معه علم ٍ جزيل =انفجع بالعرش مسْلوب والقدْس بهدام
ابتهل لله من بعْد ما جاب الذبيل=يبعث الله ناصر الدّين ويزيح الغمام
يوم بان العلم قالوا يا كيف ومستحيل=والنّقي سمّوه دجّال من زود الخَمام
ليتك بحدّي ياليلى مع الليل الطويل=منّي لك الفين عام ٍ ومنْك الفين عام

[حوريه]

صح لسانك يا ماجد
حرف مميز وابداع متناهي الجمال
والله ينصر الإسلام اينما كان
تحيتي لك مع التقدير
0
0

[عمر ال شيبي]

صباح الشعر والقول النقي
وبارك الله بك
وصح لسانك

[عبدالله الشويمان]

صح السانك يا ابو حمد

قصيدك دائما جزل ولا شك في ذلك

دمت بخير وصحه وسلامه

[منيع]

ابيات اكثر من ر ائعة ومعبرة
شكرا لك ولحرفك الراقي والمميز
تحياتي

[حي الضمير]

ياسلام ابدعت جدا يابوحمد
والقصيده من اجمل ماقرأت وعواااايدك التميز
ومدد صح لسانك يانجم

[الطامي]

الزيد
صح السانك
رائعة لاهان راسك
شكرال ك

[عدنان كريزم]

صح لسانك ولا هنت ياالغالي

[بنت النور]

صح السانك ملايين
رائعة جدا
لاهنت اخي

[عبدالعزيز العمار]

صح لسانك ياماجد ولاهنت

قصيدة طيبه وجزله كالعاده

لاهنت ولهان منطوقك الجزل

تحياتي لك مع التقدير