ياللي على الجيب خل انغام صبوحه

[فواز الغسلان]

ياللي على الجيب خـل انغام صبوحه=واطـلــق سـبـوقــه وخله يامـلا الـماحي
الجيب روحه لراس الطعس مشـفوحه=لاصار فـوقــه شجـاع مـثـل شـولاحي
يـتـبـع طـريـق عـفـاش عـازل روحـه=والطـعـس ماجـاء عـلى بالـه ولاراحي
سبعه خليجي جـديـد الـرقـم واللوحه=تصمـيم رجلن فـهـيـمـن حاز الامـداحي
ماداج حـافـي بـنـار القـيـظ بسروحه=ونـار الـقـوايـل بـكـبــده تـقـل قــداحي
من ديرة صنـعـتـه بالطيب مـمـدوحه=ياخذ على الـسـيـر بالتمرين مـشـواحي
وقال المـهـندس حـقوق البيع ممنوحه=فوق الـبـواخر يـشـم اصنـاف الارياحي
وراعي قطر ينتظر والسوق مفـتـوحه=مــع واحــدن مـايـدور فـيـه الاربـاحي
شيخ وروحه بحـب الجـيـب مفضوحه=لا داس بـنـصه بـثـالـث طـار وانزاحي
الجـيب غـايـة هـواه وراس مصلوحـه=يـشـبـه لذيـبـن رقـى فـي راس لولاحي
هابت فلوسه عـفـون الناس وشحـوحه=ويشـريه قـلـبـن مـع الخـلـيـان ينساحي
لا لاح بـرقن بعـيـدن يطـربك ضوحه=او جاه رجـلـن ويـذكر مـاطـرن طـاحي
يسري مـع اللي تهـيل القلب بمـزوحه=صوب الـمسايل مـع اول فـج الاصباحي
شيخـن هـواه الخلا والـسـيل بسفـوحه=يمـشـي قـبـل ينـبـلـج فجـره ويـنـبـاحي
حـسـه تقل خـفـرة غـنـجـاء ومـملوحه=والنور يكـشـف طـريقه تـقـل مـصباحي
مـاقـيـل كـنـداسـته بالدرب مـطـروحه=او نـام تحـتــه مـعـه حـبـه ومـفــتـاحـي
او هاب ردمـيـتـن ماهـي بـمـمـسوحه=او حـط تحت الكـفـر صلبات الالواحي
نفسه لـمرقـى طـعوس الرمل مـفـتوحه=يقـطـع دعـاثــر فـلـوقــه تـقـل سـبـاحي
واللي يطـارد علـوم الجـيـب وشـروحه=يكشف فـعـولـه قـبـال الظـلع والضاحي
حـس الـدداسن بـجـنـبـه تقـل مـبحـوحه=كـنــه مـحـاحيل بـيــرن عـنــد فـلاحي
والجـيـب ذيـبـن هـريـفن شـاف ذابوحه=جـايـع وفـي سـاقـتـه عـشـرين نـبـاحي
او مـثـل طـيـرن جلـيلن صار له مـوحه=كـفــه صـرومـن لخـرب الصيـد ذباحي
يـنـزل جـبـال يـنـام الـغـيـم بـسـطـوحه=كــان الهـلايـم تـنـام بــدور الاشـبـاحي
عينه بجـمـر الغـضـى بالريـح مـقـدوحه=فـعـلــه شـهـير(ن) بلا وصفات وايضاحي
فـيـه الشـنـب رمز عز الجيب وصروحه=ومن يجحد الجـيـب وفعوله مهو صاحي
لانـشـت فـيـه الـدبـل كـنــك بـراجـوحـه=هـادي ولايـفـضـح الجـيـران بصـيـاحي
لـولا الـكـوابــح تـرد الجـيـب وجـمـوحه=تلـقــاه قـاعـد عـلــى الابـراج بوشـاحي
وتكـيـيـف عـن لاهـب الجوزاء ولافـوحه=عـاقـت طـيـورن جـنـاحـه كان لـفـاحي
وانـتـه على الجـيب مـثـل الشيخ بالدوحه=شـهـم شجـاع لـعـسـر الـدرب نطاحي
مايصلـح الجـيـب بـيـن اسـواق مـنـفــوحه=خـله يـقـوس الـمفـالـي تـقـل مـسـاحي
راعـيـه يـضـمـن رفـاع الـنـفـس ونجـوحه=كـسـبان مـلـيـون جابه جورج قرداحي
ودفـاتـر الـمـشـتـرى بـالــدرج مـفـسـوحـه=تجـتاز جـمـرك حدودك وانت مرتاحي
لــولاه والـلــه ديــار الــزيــن مـااروحــه=ياكـود نـركـب على زيـنـات الاجـناحي
لـلـي رمــى الـروح مـن فـرقـاه مـبـذوحـه=والجفـن مايـهـتـنـي فـي نـوم ومـراحي
بالجـوف جـمـــر الـمــوده ثـايـرن فـوحـه=من رمشه اللي رمى شيـنـات الارماحي
اضحك وروحـي بـسـيـف الهجـر مجروحه=لاداج بـالـبــال صــدرن تـقــل تـفـاحي
والـلـه فـلا هـي بـهـجـر الـروح مـسـمـوحه=والـهجر يـبــذح عـروقـي بذح زنـاحي
وقـبـلـي رجـالــن بـرمـش الـريـم مسدوحه=مهدي والاطرق وابن مجـلاد والضاحي
محـدن نـشـد عـن طريح الــريــم وشـنـوحه=فـجـره يجـاوب حـمـام الـورق لانـاحي
الـجـاش يـنـثــر حـروفــن واضـحـن بـوحـه=تـشـدى قوافي مـحمـد وابـن قـرقـاحـي
ودام اكـثـر الـنـاس تـشكي قل مربـوحه=وش مكسب الروح من قصاف الارواحي
وآخذ على الجـيـب بـدروب الخلاء شوحه=ولا صـاحـب بالهوى ماهو بمـنـصاحي

[سعود المسعد]

للي رمى الروح مـن فرقـاه مبذوحـه
والجفن مايهتني فـي نـوم ومراحـي
بالجوف جمر المـوده ثايـرن فوحـه
من رمشه اللي رمى شينات الارماحـي
اضحك وروحي بسيف الهجر مجروحه
لاداج بالبـال صـدرن تقـل تفاحـي
والله فلا هي بهجر الـروح مسموحـه
والهجر يبذح عروقـي بـذح زناحـي

صخ لسانك يابن غسلان
مبدع ومافيك حيله
لك ودي

[رفيعة الشان]

شاعرنا الأخ الغسلاان
كعاادتك تحلق في سمااء الابدااع
وتاتي بجزل القصيد
معااني راائعه ومفرداات اصيله
فصح الله لساانك مليوون


ولااهنت

[حوريه]

أبداااع وإمتاااع

صح لسانك ملاييين

ولا هنتــ..........

.

صح صح صح السااانك

قصيده جزله من شااعر جزل

لا هنت

موج القصيد

[زهرة اللوتس]

الشاعر فواز الغسلان
سلمت وسلم فكرك
جزلة من شاعر جزل
لاهنت وبيض الله وجهك
تحية طيبة

زهرة

[عذب القوافي]

الجزل / فواز الغسلان

نص من شاعر كبير لله درك

سافرت بخيالي مع هذه الفاتنه

وصف جميله لايجيده إلا الكبرا

وأنت منهم

مودتي يالغالي ,,,,,,,,

[الـزلـزال]

حسه تقل خفـرة غنجـاء ومملوحـه=والنور يكشف طريقه تقـل مصباحـي
ماقيـل كنداستـه بالـدرب مطروحـه=او نام تحتـه معـه حبـه ومفتاحـي
او هـاب ردميتـن ماهـي بممسوحـه=او حط تحت الكفر صلبـات الالواحـي

فواز الغسلان


قصيده جزله من راس جزل


حملت لنا


أوصاف رائعه وتفاصيل تميزت وأنفردت بها

مبدع في كل ماتقدمه غالينا


صح لسانك ملايين ملايين


ولك فائق تحياتي

[محمد عبدالله البدراني]

صح السانك

وعلا شانك



تحيتي

[داعي الشوق]

صح لسانك يالشاعر الرائع فواز

شاعر مميز بالجزاله في المعنى و الكلمة

لله درك يا بن غسلان

و صح لسانك

مع التحية لك